Mopogore gi dhano moro amora, Yesu ne odak e polo ka en chuech mar roho ka pok obiro e piny. (Johana 8:23) Ne en chuech mokwongo mar Nyasaye, kendo ne okonyo e chueyo gik mamoko duto. En kende e ma ne ochueye achiel kachiel gi Jehova, omiyo owinjore oluonge ni Wuod Nyasaye ma “miderma.” (Johana 1:14) Yesu ne otiyo kaka Jalno ma wuoyo e lo Nyasaye, omiyo iluonge bende ni “Wach.”​—Som Ngeche 8:22, 23, 30; Jo-Kolosai 1:15, 16.

Nyasaye ne ooro Wuode e piny ka nogolo ngimane a e polo kendo ketogo e i nyar Jo-Yahudi ma silili miluongo ni Maria. Omiyo, Yesu ne onge wuoro ma dhano. (Luka 1:30-35) Yesu ne obiro e piny (1) mondo opuonjwa adiera e wi Nyasaye, (2) mondo oketnwa ranyisi kaka onego watim dwach Nyasaye kata ka wan e bwo chandruok, kendo (3) mondo ochiw ngimane makare chuth “owar” ji mang’eny.​—Som Mathayo 20:28.

Seche moko, ka omak ng’ato nyalo dwarore ni ochul gimoro mondo e ka oware. (Wuok 21:29, 30) Ka ne Nyasaye ochueyo dhano, ne ok odwar ni gibed moti kata githo. Wang’eyo mano nade? Nyasaye nonyiso Adam dhano mokwongo ni ka po ni otimo richo, ne odhi tho. Omiyo, ka di ne Adam ok otimo richo, di ne ok otho ngang’. (Chakruok 2:16, 17; 5:5) Ka luwore gi Muma, tho “nodonjo” e piny kokalo kuom Adam.  Omiyo, Adam ne okelo ne kothe duto richo kod gima richo nyuolo, ma en tho. Onego owarwa kuom tho ma ne wayudo kuom Adam.​—Som Jo-Rumi 5:12; 6:23.

Ang’o ma ne inyalo chul mondo owarwa kuom tho? Sama watho, wachulo mana richo magwa wawegi. Onge ng’ato ang’ata ma jaricho, ma nyalo chulo richo mag jomamoko.​—Som Zaburi 49:7-9.

Mopogore kodwa, Yesu ne en ng’at makare chuth. Omiyo, ne ok dwarre ni otho nikech richone, nimar ne ok otimo richo moro amora. Kar mano, Yesu ne otho ne richo mag jomamoko. Nyasaye ne onyiso hera makende ne oganda dhano kuom oro Wuode mondo othonwa. Yesu bende ne onyiso ni oherowa kuom winjo Wuon mare kendo chiwo ngimane ne richowa.​—Som Johana 3:16; Jo-Rumi 5:18, 19.

Ne vidioni: Ang’o Momiyo Yesu Notho?

Ka ne en e piny, Yesu ne ochango joma tuo, ne ochiero joma ne osetho, kendo ne oreso joma chandore. Kuom timo kamano, ne onyiso gima ne obiro timo e kinde ma biro ne ji duto moluoro Nyasaye. (Mathayo 15:30, 31; Johana 5:28) Bang’ tho Yesu, Nyasaye ne ochiere e del mar polo. (1 Petro 3:18) Kae to, Yesu ne orito e bad Nyasaye korachwich nyaka Nyasaye ne omiye teko mar locho kaka Ruoth e wi piny mangima. (Jo-Hibrania 10:12, 13) Sani Yesu locho kaka Ruoth e polo, kendo jolupne lando wachno e piny mangima.​—Som Daniel 7:13, 14; Mathayo 24:14.

Matin nono, Yesu biro tiyo gi tekone kaka Ruoth mondo otiek chandruoge duto kaachiel gi joma kelo chandruok. Jogo duto ma keto yie kuom Yesu kendo timo kaka Yesu dwaro biro dak gi mor e paradiso e piny.​—Som Zaburi 37:9-11.