Kana Mu Itukiselize ku Ikalabela ka za Tumelo ya Mina?

KANA mu kile mwa ipumana mwa muinelo o ne u mi susuelize ku yemela tumelo ya mina? Mu nyakisise se ne si ezahezi ku Susana, kaizeli wa lilimo ze 16 za buhulu ya pila kwa naha ya Paraguay. Ha na li mwa kilasi kwa sikolo se si pahami, mwan’a sikolo yo muñwi na bulezi kuli Lipaki za Jehova ha ba lumeli “Testamente ya Kale,” ha ba lumeli ku Jesu Kreste, kamba ku Maria. Ba bañwi ne ba bulezi kuli Lipaki ba ngangatezi litoho mi ba kona ku ikatulela ku shwa ku fita ku amuhela kalafo. Kambe ki mina ba ne ba ipumani mwa muinelo wo, ne mu ka be mu alabile cwañi?

Susana a lapela ku Jehova mi a yemisa lizoho la hae kuli a fe kalabo. Kwa mafelelezo a tuto, Susana a kupa bo muluti ba hae kuli ba mu lumeleze ku talusa za tumelo ya hae ka ku ba yo muñwi wa Lipaki za Jehova. Bo muluti ba mu lumeleza. Mwa lisunda ze peli ze ne latelezi, Susana a itukiseza ku to buhisana ni bana ba sikolo mwa broshuwa ya Lipaki za Jehova—Ki Batu Ba Ba Cwañi? Ba Lumelañi?

Lizazi la puhisano la fita. Susana a talusa libaka ha lu bizwa Lipaki za Jehova. Hape a talusa sepo ye lu na ni yona ya za kwapili ni libaka ha lu sa lumeli ku pompelwa mali. Cwale a kupa mañi ni mañi ku buza lipuzo. Bana ba sikolo ba bañata ba yemisa mazoho kuli ba buze lipuzo. Bo muluti ba taba hahulu ha ba utwa Susana ha alaba lipuzo ka ku itusisa Mañolo.

Mwana sikolo yo muñwi a talusa kuli, “Ni kile na ya kwa Ndu ya Mubuso hañwi, mi ne ni si ka bona mwateñi siswaniso nihaiba fela si li siñwi.” Bo muluti ba buza libaka mwa Ndu ya Mubuso ha ne ku si na maswaniso. Susana a ba balela Samu 115:4-8 ni Exoda 20:4. Bo muluti ba komoka hahulu, mi ba li: “Ku taha cwañi kuli mwa likeleke za luna ku tezi maswaniso kono Bibele inze i a hanisa?”

Puhisano ye ya lipuzo ni likalabo ne i ngile mizuzu ye 40. Susana ha na buzize bana ba sikolo haiba ne ba ka tabela ku buha vidio ya No Blood—Medicine Meets the Challenge, kaufel’a bona ba lumela. Kacwalo, bo Muluti ba lukisa kuli puhisano yeo i zwelepili mwa lizazi le li tatama. Ha se ba buhile vidio, Susana a talusa kuli ku na ni likalafo ze ñwi ze sa tokwi ku itusisa mali ze ba kona ku amuhela Lipaki za Jehova ba bañwi. Ka ku ama fa taba yeo bo muluti ba li: “Ne ni sa zibi kuli ku na ni likalafo ze ñwi ze ñata ze sa tokwi ku itusisa mali; mane ne ni sa zibi ni tuso ya ku alafiwa ku si na mali. Kana likalafo ze cwalo ki za Lipaki za Jehova fela?” Bo muluti ha ba utwa kuli ki za batu kaufela, se ba li: “Zazi le ni ka potelwa ki Lipaki za Jehova ni ka ambola ni bona.”

Puhisano ya na itukiselize Susana ye ne swanela ku nga fela mizuzu ye  20 ya tanda lihora ze talu. Hamulaho wa sunda, bana ba sikolo ba bañwi ba eza puhisano ya ze ba lumela kwa likeleke za bona. Kwa mafelelezo a puhisano yeo ne ku buzizwe lipuzo ze ñata, kono bana ba sikolo ba ne ba zamaisa puhisano yeo ne ba palezwi ku li alaba. Bo muluti ba buza bana ba sikolo bao kuli: “Ki kabakalañi ha mu palelwa ku yemela tumelo ya mina sina mwa ezelize mulikan’a mina ya li yo muñwi wa Lipaki za Jehova?”

Bana ba sikolo bao ba alaba kuli: “Lipaki za Jehova ba ituta hahulu Bibele. Luna ha lu itutangi hahulu yona.”

Bo Muluti ba lumba Susana kuli: “Mu itutanga hahulu Bibele mi mu likanga ka t’ata ku latelela ze i bulela. Mu eza hande luli.”

Susana ha na ka lata na ka kuza fela. Kono ka ku bulela, na latelezi mutala o munde wa kasizana ka Muisilaele ka ka si ka bulelwa libizo ka ne ka isizwe mwa butanga ki Masiria. Kasizana kao ne ka pila mwa ndu ya Naamani, muzamaisi wa mpi ya Siria, ya na kula butuku bo bu maswe bwa mbingwa. Kasizana ka bulelela musal’a Naamani kuli: “[Muñ’a] ka [ha n’a ka ya] ku mupolofita ya inzi mwa Samaria, kabe n’a ka y’o mu folisa mbingwa ya hae.” Kasizana kao ne ka ikutwile kuli ne ka tokwa ku fa bupaki ka za Mulimu wa niti. Bupaki b’o ne bu tahisize kuli mulen’a kona Naamani a be mulapeli wa Jehova.—2 Mal. 5:3, 17.

Ka ku swana, Susana na si ke a kuza fela a sa fi bupaki ka za Jehova ni batu ba hae. Ka ku yemela tumelo ya hae ha na buziwa lipuzo, Susana na latelela taelo ye mwa Mañolo ye li: “Mwa lipilu za mina mu kenise Kreste, Mulena; mu itukiseze kamita ku ikalabela ku ya ka mi buza sepo ye li teñi ku mina, inze mu eza ka musa ni likute.” (1 Pit. 3:15) Kana mu itukiselize ku ikalabela haiba mu buziwa ka za tumelo ya mina?

[Siswaniso se si fa likepe 17]

Broshuwa ye ni vidio ye za kona ku mi tusa ku ikalabela ka za tumelo ya mina