Batu babañata habalati kusebeleza Mulimu bakeñisa kuli baanga kuli ki yena yatahisa manyando.

Baeteleli ba bulapeli babañata baluta batu kuli Mulimu ki yena yalutahiseza manyando. Ka mutala, baluti bao baluta kuli:

• Mulimu ki yena yatahisanga likozi za ka taho kuli afe batu koto.

• Mulimu utahisanga kuli banana bashwe ilikuli abe ni mangeloi amañata kwa lihalimu.

• Mulimu uyemela batu babañwi mwa lindwa ili nto yetahisa kuli batu banyande hahulu.

Kana litaba zebasweli kuluta baeteleli ba bulapeli ka za Mulimu ki za niti? Kucwañi haiba litaba zebaluta zeo ki za buhata?

Mulimu haki yena yalutahiseza manyando.

Kambe Mulimu ki yena yalutahiseza manyando, uzibe taba yeo neika lwanisana ni zeibulela Bibele ka za hae. Ka mutala Bibele ibulela kuli:

“Linzila [za Mulimu] kaufela lilukile. . . . Ulukile mi unani niti.”—DEUTERONOMA 32:4.

“Hakukonahali kuli Mulimu wa niti aeze bumaswe, kuli Yamaata Kaufela afose!”—JOBO 34:10.

“Yamaata Kaufela hakelusi katulo yelukile.”—JOBO 34:12.

Mulimu utoile bulapeli kaufela bobuluta litaba za buhata ka za hae.

Bulapeli bobucwalo bukopanyeleza ni bulapeli bobuluta batu kuli Mulimu ki yena yalutahiseza manyando, ni bulapeli bobuyemela mifilifili ni lindwa.

“Bapolofita, bapolofita buhata ka libizo [la Mulimu]. Hanisika baluma kamba kubalaela kamba kubulela ni bona. Zeba mipolofitela ki lipono za buhata, ni . . . bupumi bobu mwa lipilu zabona.”—JEREMIA 14:14.

Jesu naanyazize batu bane baipumisa kulapela Mulimu.

“Haki mutu kaufela yali ku na, ‘Mulena, Mulena,’ yakakena mwa Mubuso wa mahalimu, kono kukakena feela yaeza tato ya Ndate ya kwa mahalimu. Babañata mwa lizazi leo bakali ku na: ‘Mulena, Mulena, kana nelusika polofita ka libizo lahao, ni kuleleka madimona ka libizo lahao, ni kueza misebezi yemaata ka libizo lahao?’ Mi cwale nikaba bulelela kuli: ‘Nalikuba nimizibe! Hamuzwe ku na, mina babaeza zemaswe!’”—MATEU 7:21-23.