Mika 1:1-16
1 Ondjovo yaJehova, oyo ye uya kuMika*+ wokuMoreset, pefimbo laJotam,+ Ahas+ nosho yo Hiskia,+ eehamba daJuda,+ naashi a pewa emoniko li na sha naSamaria nosho yo Jerusalem, tai ti:
2 “Pwilikineni, ovanhu nye amushe!
Yandjeni elitulemo, akutu, edu naashishe osho shi li ko,NOmwene Omunamapangelo aeshe, Jehova, na kale ondombwedi i li omhinge nanye,+Jehova okudja kotembeli yaye iyapuki.
3 Osheshi taleni! Jehova ota ka dja mo monhele yaye;Ota ka kulukila kedu nokulyataula eenhele dokoikulundudu dokombada yedu.
4 Eemhunda otadi ka hengumuka koshi yaye,+Nomalufilu otaa ka tukuka pokati,Ngaashi edi leenyiki li li momundilo,Ngaashi omeva a tilwa poshikulundudu.
5 Aishe ei otai ningwa omolwounashibofa waJakob,Omolwomanyono eumbo laIsrael.+
Mbela ounashibofa waJakob oshike?
Mbela kau fi Samaria?+
Neenhele dokoikulundudu yaJuda oda ama peni?+
Mbela haJerusalem?
6 Ohandi ka ninga Samaria onduba yoikulukuma i li moixwa,Onhele yoikunino yomandjebele;Ohandi ka kupula* omamanya aye mefilu,Nomakanghameno aye ohandi ke a yeleka.
7 Oihongwafano yasho aishe otai ka nyanyaulwa moinhimbu,+Neeshali adishe odo sha mona, eshi she lilandifa po,* otadi ka xwikwa po momundilo.+
Ohandi ka hanauna po oikalunga yasho aishe.
Osheshi oshe i ongela okudja mondjabi youmbwada,Notai ka ninga vali ondjabi yeembwada.”
8 Omolwoshinima osho, ohandi ka lila nokukuwaana;+Ohandi ka enda eemhadi kombada nondi li hamunghele.+
Okukwena kwange otaku ka kala kwa fa kwookavandje,Nokunyika oluhodi kwange okwa fa kweemho
9 Osheshi oshipute shaye itashi dulu okuveluka;+Oshe uya kokule fiyo okuJuda.+
Oshiponga osha tandavela fiyo okomuvelo woshiwana shange, kuJerusalem.+
10 “Inamu shi shiivifa muGat;Inamu lila nandenande.
Lidedauleni mondwi yedu muBet-afra.*
11 Taulukeni mu li hamunghele nomwa fya ohoni, nye ovakalimo* vomuShafir.
Ovakalimo* vomuSaanan inava dja mo.
Otapa ka kala elilaano muBet-hesel, notashi ka kufa po eyambidido lasho punye.
12 Osheshi ovakalimo* vomuMarot ova li va teelela osho shiwa,Ashike osho shii oshe uya sha dja kuJehova fiyo oposhivelo shaJerusalem.
13 Mangeleni omatemba keenghambe, nye ovakalimo* vomuLakis.+
Onye mwa li ehovelo loulunde womonakadona waSion,Osheshi munye omwa hangwa ounashibofa waIsrael.+
14 Onghee oto ka yandja eeshali dokulitukauka* kuMoreset-gat.
Omaumbo omuAksib+ okwa li oshinima shoukengeleledi keehamba daIsrael.
15 Akutu ovakalimo* vomuMaresha,+ ohandi ke mu etela oo te mu findi.*+
Efimano laIsrael otali ke uya fiyo okuAdullam.+
16 Likululeni eengwala nokukulula ko eexwiki omolwovana veni ovo mwa lenga.
Likululeni eengwala ngaashi onhwa,Osheshi ova kufwa po punye va twalwa moukwatwa.”+
Omashangelo opedu
^ Exupipiko ledina Mikael (tali ti “Olyelye a fa Kalunga?”), ile Mikaia (tali ti “Olyelye a fa Jehova?”).
^ Eln., “tilashi.”
^ Ile “Nondjabi aishe youmbwada washo.”
^ Ile “meumbo laAfra.”
^ Eln., “ovakalimo elela.”
^ Eln., “Ovakalimo elela.”
^ Eln., “ovakalimo elela.”
^ Eln., “ovakalimo elela.”
^ Ile “dokulekelafana.”
^ Eln., “ovakalimo elela.”
^ Ile “oo ta kufa po oinima yeni.”
