Evaengeli paMarkus 6:1-56
6 Ndele eshi Jesus a dja opo, okwa ya koshitukulwa shavo+ pamwe novahongwa vaye.
2 Eshi efiku lEshabata la fika, okwa hovela okuhonga moshinagoga, navahapu ovo va li ve mu uda ova li va kumwa, ndele tava ti: “Omulumenhu ou openi a hanga oinima ei?+ Nomolwashike e na okupewa ounongo oo, noilonganghono oyo i na okulongwa okupitila momake aye?+
3 Hano ou ke fi omuhongi womiti,+ omona waMaria,+ novamwainamati kave fi ooJakob,+ Josef, Judas naSimon?+ Novamwainakadona havava ve li apa pamwe nafye?” Onghee kava li ve mu itavela.
4 Ndele Jesus okwa tya kuvo: “Omuprofeti oha fimanekwa keshe pamwe, kakele moshitukulwa shavo, ile kovapambele vaye nosho yo meumbo lavo.”+
5 Onghee ka li a longa mo oilonganghono ihapu; okwa tenheka ashike ovanaudu vanini omake noku va velula.
6 Ndele okwa li a kumwa, eshi ovanhu vomoshitukulwa osho va li vehe na eitavelo. Opo nee okwa enda ta hongo ovanhu momikunda dasho.+
7 Okwa ifana ovayapostoli omulongo navavali, ndele te va tumu oovavali,+ nokwe va pa eenghono dokufinda eemhepo da nyata.+
8 Natango, okwe va lombwela vaha ye nasha mondjila, kutya nee onomungome, onondjato yoikulya, ile onoimaliwa,* shapo onodibo ashike.+
9 Ponhele yaasho, okwa li ashike e va lombwela va ye neenghaku nosho yo oikutu oyo va li va djala.*
10 Okwe va lombwela vali a ti: “Shimha mwa tambulwa meumbo lonhumba, kaleni hamu di omo, fiyo osheshi mwa dja mo monhele oyo.+
11 Ndele ngeenge monhele oyo inamu tambulwa mo, ile inamu pwilikinwa mo, eshi tamu di mo, pupuleni ondwi keemhadi deni shi kale oumbangi kuvo.”+
12 Opo nee ova ya, ndele tava udifile ovanhu ve lidilulule.+
13 Ova ta mo eendemoni dihapu,+ nova vaeka ovanaudu omaadi noku va velula.
14 Opo nee ohamba Herodes oya li ya uda kutya Jesus okwa shiivika keshe pamwe, novanhu ova li tava ti: “Johannes Omuninginifi okwa nyumuka koufi, nomolwaasho ta longo oilonganghono.”+
15 Ndele vamwe ova li tava ti: “Oye Elia.” Navamwe ova li tava ti: “Omuprofeti ngaashi ashike ovaprofeti vonale.”+
16 Eshi Herodes e shi uda, okwa tya: “Johannes ou nda tetifa omutwe oye a nyumuka.”
17 Osheshi Herodes oye a li a tuma nokukwatifa po Johannes noku mu tulifa modolongo a mangwa omolwaHerodias, omukulukadi wamumwaina, Filippus, molwaashi okwa li e mu hombola.+
18 Osheshi Johannes okwa li ha lombwele Herodes ta ti: “Kashi li pamhango okuhombola omukulukadi wamumwanyoko.”+
19 Onghee Herodias okwa li a kwatela Johannes onghone, nokwa li a hala oku mu dipaifa, ashike ka li a dula oku shi ninga.
20 Osheshi Herodes okwa li a tila Johannes, molwaashi okwa li e shii kutya omulumenhu omuyuki nomuyapuki,+ nokwa kala te mu amene. Konima eshi e mu uda, okwa li a limbililwa unene noka li e shii kutya na ninge po shike, ndele okwa twikila okupwilikina kuye nelitulemo.
21 Ndele Herodias okwa li a mona omhito iwa, eshi Herodes a ningila omalenga aye, ovawiliki vomatangakwaita nosho yo ovanenenhu vomuGalilea+ oitendele mefiku ledalo laye.+
22 Opo nee okamonakadona kaHerodias oke uya, ndele taka dana oshidano, noka li ka hafifa Herodes nosho yo ovo a li ta li navo.* Ohamba oya lombwela okakadona ya ti: “Indile nge keshe osho wa hala, opo nee ohandi shi ku pe.”
23 Ohamba oya ana ya ti: “Keshe eshi to indile nge, ohandi shi ku pe, kutya nee etata louhamba wange.”
24 Okudja opo, oka ya kuina, ndele taka ti: “Nandi indile shike?” Ina okwa ti: “Indila omutwe waJohannes Omuninginifi.”
25 Opo nee oka ya diva kohamba, ndele taka ti: “Onda hala u pe nge paife omutwe waJohannes Omuninginifi moshiyaxa.”+
26 Nonande ohamba oya li ya nyika oluhodi neenghono, kaya li ya hala oku ka anyena osho ka indila omolweano layo nomolwovaenda vayo.*
27 Ndele ohamba oya tuma diva omukwaita wayo e i etele omutwe waJohannes. Onghee okwa ya, nokwa teta ko omutwe waJohannes oo a li modolongo,
28 ndele te u eta u li moshiyaxa. Okwe u pa okakadona, nokakadona oke u yandja kuina.
29 Eshi ovahongwa vaJohannes ve shi uda, ove uya, ndele tava kufa po oshimhu shaye noku shi paka mombila.*
30 Ndele ovayapostoli vaJesus ova ongala puye noku mu lombwela oinima aishe oyo va ninga nanghee va honga.+
31 Opo nee okwa tya kuvo: “Ituyeni konhele ye likalela, opo mu ka fude po kanini.”+ Osheshi opa li vahapu tave uya notava i, nokava li nokuli va mona omhito yokulya.
32 Okudja opo ova londa mowato, ndele tava i konhele ye likalela, ve ke likalele.+
33 Ndele ovanhu vahapu, eshi ve va mona nova uda kutya otava i, ove va shikula kolupadi tava tondoka va dja moilando aishe nova ka fika ko tete.
34 Eshi Jesus a fika, okwa mona ongudu inene yovanhu, nokwe i kenukila,+ molwaashi oya li ya fa eedi dihe na omufita.+ Opo nee okwa hovela oku i honga oinima ihapu.+
35 Efimbo lokomatango, ovahongwa vaye ove uya kuye, ndele tava ti: “Onhele ei oye likalela, nokwa toka nale.+
36 I lekela, opo i ye i ke lilandele oikulya momikunda odo di li popepi.”+
37 Okwa tya kuvo: “I peni sha shokulya.” Opo nee ove mu pula tava ti: “Natu ke i landele omingome deedenari* 200, ndele hatu i pe i lye?”+
38 Okwa tya kuvo: “Omu na omingome ngapi? Indeni mu ka tale.” Konima eshi va shilipaleka, ova tya: “Otu na omingome nhano neeshi mbali.”+
39 Opo nee okwa lombwela ovanhu aveshe va kale omutumba paengudu pomwiidi mutalala.+
40 Onghee ova kala omutumba paengudu, dimwe 100 nadimwe 50.
41 Okwa kufa omingome nhano neeshi mbali, nokwa tala keulu, ndele ta ilikana.+ Opo nee okwa pambula omingome, ndele te di pe ovahongwa vaye ve di yandje kovanhu. Okwa tukulila aveshe eeshi odo mbali.
42 Onghee aveshe ova lya nova kuta,
43 nova toola po oundjaumukile vomingome, va yadeka oimbale 12, inamu kwatelwa eeshi.+
44 Ovo va lya omingome ova li ovalumenhu 5 000.
45 Opo nee okwa lombwela diva ovahongwa vaye va londe mowato, nova tetekele kombinga ikwao yefuta lwokuBetsaida, ofimbo ye ta lekele ongudu yovanhu.+
46 Konima eshi e i lekela, okwa ya komhunda a ka ilikane.+
47 Eshi kwa toka, owato oya li mokati kefuta, ndele ye okwa li komutunda.+
48 Eshi a mona tava kendabala okuyukililifa owato omolwomhepo oyo ya li tai va dilile komesho, okwe uya kuvo lwopenangelo etine loufiku* ta ende kombada yomeva, ndele okwa li a hala oku va pitilila.*
49 Eshi ve mu mona ta ende kombada yomeva, ova ingida mokule tava ti: “Oshifalakanena osho!”
50 Aveshe eshi ve mu mona, ova li va tila unene. Ndele diva Jesus okwe va lombwela a ti: “Kaleni mu na ouladi! Aame; inamu kala mwa tila.”+
51 Opo nee okwa londa mowato omo va li, nomhepo oya li ya lota. Ova li va kuminwa unene oshinima osho,
52 molwaashi kava li va uda ko eityo lomingome, nomitima davo kada li natango da patuluka.
53 Eshi va fika komutunda waGenesaret, ova li va pandeka owato komunghulo wefuta.+
54 Ndele diva eshi va dja mowato, ovanhu ova li va dimbuluka Jesus.
55 Opo nee ovanhu vomoshitukulwa ashishe ova tondoka nove mu etela ovanaudu vavo ve va humbata komalutala.
56 Ndele keshe momukunda, ile moshilando a ya, ovanhu ova eta ovanaudu vavo peenhele domalandifilo, nove mu indila va kwate ashike nande okonyemba yoshikutu shaye shokombada.+ Naaveshe ovo va kwata ko ova li va veluka.
Omashangelo opedu
^ Eln., “onongopolo.”
^ Ile “vaha ye noshikutu sha wedwa po.”
^ Ile “ovo va li naye omutumba poshitaafula.”
^ Ile “nomolwaavo va li nayo omutumba poshitaafula.”
^ Ile “mombiladimbuluko.”
^ Tala Oshiw. B14.
^ Sha hala okutya, 3:00 yokeengulasha lwaapo fiyo 6:00, eshi etango tali piti.
^ Ile “okwa li poku va pitilila.”
