Evaengeli paMarkus 14:1-72

  • Ovapristeri tava kundafana va dipae Jesus (1, 2)

  • Omaadi edimba liwa a tilwa Jesus (3-9)

  • Judas ta kengelele Jesus (10, 11)

  • Opaasa yaxuuninwa (12-21)

  • Okudikwa po kwOuvalelo wOmwene (22-26)

  • Okulidimbika kwaPetrus taku xunganekwa (27-31)

  • Jesus ta ilikana muGetsemane (32-42)

  • Jesus a kwatwa po (43-52)

  • Jesus e li mOmhangu yoPombada yOvajuda (53-65)

  • Petrus te lidimbike Jesus (66-72)

14  Okwa li ku na omafiku avali,+ opo ku danwe Opaasa+ nosho yo Oshivilo shOmingome inadi ya Efulika.+ Novapristeri ovakulunhu novanongo vomishangwa ova li tava kongo omhito ve mu kwate po* meholeko* noku mu dipaa;+ 2  osheshi ova li tava ti: “Inatu mu kwata po pefimbo loshivilo; otashi dulika pa kale epiyaano lovanhu.” 3  Fimbo a li ta li* muBetania meumbo laSimon, oo a li omunashilundu, kuye okwe uya omukainhu umwe e na oshanga yomaadi* ondilo edimba liwa, onarde yo venevene. Opo nee omukainhu oo okwa patulula oshanga, ndele ta hovele oku a tila momutwe waye.+ 4  Vamwe ova pulafana va handuka tava ti: “Omolwashike omaadi aa edimba liwa taa hepifwa? 5  Ngeno okwa landifilwe po oimaliwa i dulife peedenari* 300, ndele tai pewa eehepele.” Onghee ova li ve uditile nai* unene omukainhu oo. 6  Ashike Jesus okwa ti: “Mu efeni. Omolwashike mwa hala oku mu handukifa? Okwa longela nge oshilonga shiwa.+ 7  Osheshi eehepele odi li punye alushe,+ notamu dulu oku di ningila ouwa efimbo keshe, ndele ame itandi ka kala alushe punye.+ 8  Omukainhu oo okwa ninga ngaashi ta dulu. Okwa vaeka olutu lange omaadi edimba liwa, opo e li longekidile epako.+ 9  Oshili, ohandi mu lombwele, keshe apa onghundana iwa tai udifwa mounyuni aushe,+ osho omukainhu ou a longa, nasho otashi ka hepaululwa, opo a dimbulukiwe.”+ 10  Ndele Judas Iskariot, umwe womwaavo omulongo navavali, okwa ya kovapristeri ovakulunhu, opo a yandje Jesus momake avo.*+ 11  Ovapristeri ova li va hafa neenghono eshi ve shi uda, nova li ve mu udanekela ve mu pe oimaliwa yoisilveri.+ Opo nee okwa li a hovela okukonga omhito e mu kengelele. 12  Ndele mefiku lotete lOmingome inadi ya Efulika,+ omo va li hava yambe eyambo lOpaasa,+ ovahongwa vaye ova tya kuye: “Openi wa hala tu ke ku longekidile ouvalelo wOpaasa, opo u u lye?”+ 13  Opo nee okwa tuma ovahongwa vaye vavali, ndele ta ti kuvo: “Indeni moshilando, notamu ka shakeneka mo omulumenhu a humbata oshitoo shomeva. Mu landuleni,+ 14  nongeenge okwa i meumbo, tyeni kumwene weumbo, ‘Omuhongi okwa ti: “Onduda yovaenda oi li peni, opo ndi danene mo Opaasa pamwe novahongwa vange?”’ 15  Opo nee ote ke mu ulikila onduda ya kula yopombada, ya longekidilwa ovaenda. Omo mu tu longekidila ouvalelo wOpaasa.” 16  Onghee ovahongwa ova ya moshilando osho, nova mona oinima aishe ngaashi Jesus e va lombwela, nova longekida Opaasa. 17  Eshi kwa toka, Jesus okwe uya monduda oyo novayapostoli vaye omulongo navavali.+ 18  Ndele fimbo ve li omutumba poshitaafula tava li, Jesus okwa ti: “Oshili, ohandi mu lombwele, umwe womunye, oo ta li pamwe naame, ota ka kengelela nge.”+ 19  Opo nee ova nyika oluhodi, ndele keshe umwe te mu pula ta ti: “Haame ndishi?” 20  Okwa tya kuvo: “Oumwe womunye omulongo navavali, ou ta tu oshita naame metiti.+ 21  Osheshi Omona womunhu ota ka fya, ngaashi pa shangwa kombinga yaye, ndele woo komunhu ou ta kengelele Omona womunhu!+ Oshixwepo ngeno omunhu oo ka dalelwe.”+ 22  Naashi va twikila okulya, okwa kufa omungome, ta ilikana, ndele te u pambula, nokwe u va pa ta ti: “Tambuleni; eshi otashi faneke olutu lange.”+ 23  Opo nee okwa kufa eholo, ta pandula, nokwe li va pa, ndele aveshe tava nu mo.+ 24  Okwa tya kuvo: “Eshi otashi faneke ‘ohonde yange+ yehangano,’+ oyo tai ka tilwashi omolwavahapu.+ 25  Oshili, ohandi mu lombwele, itandi ka nwa vali nandenande omaviinyu, fiyo efiku olo handi ke a nwa mape mOuhamba waKalunga.” 26  Xuuninwa, konima eshi va imba omaimbilohambelelo,* ova dja mo, ndele tava i kOmhunda yEemono.+ 27  Na Jesus okwa tya kuvo: “Amushe otamu ka fiya nge po, osheshi opa shangwa: ‘Ohandi ka denga omufita,+ needi otadi ke lihana.’+ 28  Ndele konima ngeenge onda nyumuka, ohandi ke mu tetekela kuGalilea.”+ 29  Ashike Petrus okwa tya kuye: “Nande vakwetu aveshe nave ku fiye po, ame itandi ku fiye po.”+ 30  Jesus okwa tya kuye: “Oshili, ohandi ku lombwele kutya nena, heeno, oufiku wonena, ofimbo ekondobolo inali kwena oshikando oshitivali, oto ke lidimbika nge lutatu.”+ 31  Ndele Petrus okwa kala ta endulula lwoikando ta ti: “Kutya nee otashi pula ndi fye pamwe naave, itandi ke ku lidimbika nandenande.” Natango, ovahongwa vakwao aveshe ova popya sha faafana.+ 32  Onghee ove uya ponhele hai ifanwa Getsemane, ndele ta ti kovahongwa vaye: “Kaleni omutumba apa, ofimbo handi ka ilikana.”+ 33  Nokwa ya pamwe naPetrus naJakob naJohannes,+ nokwa hovela okukala a wililwa po* neenghono nokukala e udite oudjuu unene. 34  Okwa tya kuvo: “Onda* nyika oluhodi neenghono,+ nokuli fiyo okufya. Kaleni apa, nokukala oupafi.”+ 35  Ndele okwa ehena komesho kanini, te linyongamene pedu, ndele ta ilikana kutya ngeenge otashi shiiva, ovili ei otai dulu oku mu pitilila po. 36  Opo nee okwa ti: “Abba,* Tate,+ kwoove oinima aishe otai shiiva; kufe nge eholo eli. Ashike hangaashi ame nda hala, ndele ongaashi ove wa hala.”+ 37  Okwa aluka, nokwa hanga va kofa, ndele ta ti kuPetrus: “Simon, owa kofa hano? Ito dulu okukala oupafi nande ovili imwe?+ 38  Kaleni oupafi nokutwikila okwiilikana, opo muha ye momayeleko.+ Oshoshili kutya omhepo oya halelela,* ndele ombelela oi na ounghundi.”+ 39  Opo nee okwa ya vali, ndele ta ilikana, a popya eendjovo da faafana.+ 40  Nokwe uya vali nokwe va hanga va kofa, osheshi omesho avo okwa li a djuupalekwa keemhofi, onghee kava li ve shii kutya nava tye shike. 41  Nokwa aluka oshikando oshititatu, ndele ta ti kuvo: “Eli halo efimbo lokukofa nokufuda po! Osha wana! Efimbo ola fika!+ Taleni! Omona womunhu ota yandjwa momake ovalunde. 42  Fikameni, ituyeni. Taleni! Ou ta kengelele nge oku li popepi.”+ 43  Ndele diva ofimbo a li natango ta popi, Judas, umwe womwaavo omulongo navavali, okwe uya pamwe nongudu yovanhu i na omaongamukonda needibo, ya tumwa kovapristeri ovakulunhu, kovanongo vomishangwa nokovakulunhu.+ 44  Ndele omukengeleli waye okwe va pa edidiliko ta ti: “Ou handi xupita, oye ngaho; mu kwateni po, indeni naye e li mepashukilo leni.” 45  Nokwa ya a yukilila kuJesus, nokwa tya kuye, “Rabbi!” ndele te mu xupita. 46  Onghee ove mu kwata po. 47  Ndele umwe womwaavo va li po ofika okwa pweya mo eongamukonda laye nokudenga omupiya womupristeri munene, a teta ko okutwi kwaye.+ 48  Opo nee Jesus okwa tya kuvo: “Omwe uya okukwata nge po mu na omaongamukonda needibo mwa fa mwe uya okukwata po ombudi?+ 49  Onda kala nanye motembeli efiku nefiku handi hongo,+ ashike inamu kwata nge po. Ndele aishe oyo oya ningwa opo Omishangwa di wanifwe.”+ 50  Opo nee ovahongwa aveshe ove mu fiya po nokuya onhapo.+ 51  Ndele opa li omulumenhu umwe omunyasha e likambeka elapi liwa loliina olo alike, ta shikula Jesus, novanhu ova li va kendabala oku mu kwata po. 52  Opo nee okwa fiya po elapi laye, ndele ta faduka po e li hamunghele.* 53  Ndele ova twala Jesus komupristeri munene, opo nee ovapristeri ovakulunhu,+ ovakulunhu voshiwana novanongo vomishangwa aveshe ova ongala.+ 54  Ashike Petrus okwa li e mu shikula e li konima kokule, fiyo omomukala womupristeri munene, nokwa kala omutumba povapiya, ta xuxumukwa pomundilo.+ 55  Ndele ovapristeri ovakulunhu noilyo aishe ikwao yOmhangu yoPombada yOvajuda ova li tava kongo ovanhu va totele Jesus omahokololo, opo va dule oku mu dipaa, ashike inava mona nande oumwe.+ 56  Nonande opa li pa holoka eembangi doipupulu dihapu,+ omahokololo ado kaa li taa tu kumwe. 57  Opa li yo vamwe ovo tava popi oipupulu kombinga yaye tava ti: 58  “Otwe mu uda ta ti, ‘Ohandi ngumauna po otembeli ei ya tungwa nomake, ndele moule womafiku atatu ohandi tungu po imwe inai tungwa nomake ovanhu.’”+ 59  Ndele nopomhito oyo, omahokololo avo kaa li taa tu kumwe. 60  Opo nee omupristeri munene okwa fikama, ndele ta pula Jesus ta ti: “Ito nyamukula sha? Ku udite ko hano eshi ovalumenhu ava tave ku hokololifa?”+ 61  Ndele okwa kala ashike a mwena, ina nyamukula sha.+ Opo nee omupristeri munene okwe mu pula vali ta ti: “Oove Kristus Omona wOmukombadambada?” 62  Jesus okwa ti: “Heeno, aame; notamu ka mona Omona womunhu+ e li omutumba kolulyo laKalunga+ Omunaenghono note uya moilemo yokeulu.”+ 63  Opo nee omupristeri munene okwa pombaula oikutu yaye, ndele ta ti: “Omolwashike twa pumbwa vali okukonga eembangi?+ 64  Omwe mu uda, eshi ta sheke Kalunga. Otamu ti ngahelipi?”* Aveshe ova ti kutya okwa wana okufya.+ 65  Opo nee vamwe ove mu fiila omate,+ tave mu uvike koshipala noku mu denga neengonyo, ndele tava ti kuye: “Xunganeka!” Ove mu denga nomanghava moshipala, novapiya vomomhangu ove mu kufa po.+ 66  Ndele fimbo Petrus a li momukala, okakadona kamwe okapiya komupristeri munene oke uya po.+ 67  Eshi ka mona Petrus ta xuxumukwa, oke mu tala, ndele taka ti: “Naave owa li pamwe naJesus Omunasaret.” 68  Ashike okwe shi likala ta ti: “Nghi mu shii, nokandi shii kutya oto popi kombinga yashike.” Opo nee okwa ya a finda koshivelo. 69  Okakadona okapiya oke mu mona vali, ndele taka lombwele ovo ve li po ofika taka ti: “Ou oumwe womuvo.” 70  Natango okwe likala. Ndele konima yokafimbo, ovo va li po ofika navo ova tya kuPetrus: “Oshili naave oumwe womuvo, osheshi ove Omugalilea.” 71  Opo nee okwa hovela okulifingaela nokwaana ta ti: “Omulumenhu ou tamu popi nghi mu shii!” 72  Ekondobolo ola kwena diva oshikando oshitivali,+ na Petrus okwa dimbuluka osho Jesus a li e mu lombwela a ti: “Fimbo ekondobolo inali kwena oshikando oshitivali, oto ke lidimbika nge lwoikando itatu.”+ Petrus okwa nyika oluhodi neenghono, ndele ta lili.

Omashangelo opedu

^ Ile “monanguwi.”
^ Ile “mange po.”
^ Ile “a li omutumba poshitaafula.”
^ Ile “okakende komaadi.”
^ Ile “ova popya va handuka; ova tangunina.”
^ Ile “opo e mu kengelele.”
^ Ile “omapsalme.”
^ Ile “a kumwa.”
^ Ile “Omwenyo wange owa.”
^ Oshitya shOshiheberi, ile shOshiaramea tashi ti, “Akutu, Tate!”
^ Ile “oya hala.”
^ Ile “e li hamakasha; e li mokambulukweva kokoshi oko akeke.”
^ Ile “Otamu diladila ngahelipi?”

Oufemba u na sha noumwene woshishangomwa eshi