Evaengeli paMarkus 12:1-44
12 Opo nee okwa hovela okupopya navo ta longifa omafaneko ta ti: “Omulumenhu umwe okwa twika oshikunino shomandjebele+ nokwe shi umbila ongubu, ndele ta fe mo elambo loshikolelo shomaviinyu nokutunga mo oshungongulu.+ Opo nee okwa kongela mo ovanailonga, ndele ta i kondje yoshilongo.+
2 Eshi omandjebele a pya, okwa tuma omupiya waye umwe kovanailonga e ke mu talele ko oiimati.
3 Opo nee ove mu kwata, nove mu denga, ndele tave mu shunifa eenyala dongaho.
4 Natango okwa tuma ko omupiya umwe, ndele naye tave mu denge eembole momutwe noku mu tukaela.+
5 Ndele okwa tuma ko vali mukwao, nove mu dipaa; navakwao vahapu ovo a tuma ko, vamwe ove va denga navamwe ove va dipaa.
6 Opo nee mwene woshikunino shomandjebele okwa tuma ko omonamati waye omuholike+ kuvo ta ti: ‘Otava ka fimaneka omonamati wange.’
7 Ndele ovanailonga ova kundafana tava ti, ‘Ou oye omufyuululi.+ Ileni tu mu dipaeni, nefyuululo otali ningi letu.’
8 Onghee ove mu kwata noku mu dipaa, ndele tave mu kokolola mo moshikunino shomandjebele.+
9 Mwene woshikunino shomandjebele osho, ngeenge okwe uya, ota ka ninga po shike? Ote ke va dipaa, ndele moshikunino shomandjebele ta kongele mo ovanailonga vamwe.+
10 Hamba inamu lesha omushangwa ou tau ti: ‘Emanya olo ovatungi va ekelashi ola ninga emanya la fimanenena.*+
11 Ola dja kuJehova,* nolikumwifi momesho etu’?”+
12 Opo nee ova li va hala oku mu kwata po,* ashike ova li va tila ongudu yovanhu, osheshi ova li ve shi shii kutya ota popi kombinga yavo mefaneko olo. Onghee ova li ve mu fiya po, ndele tava i.+
13 Natango, ova tuma kuJesus vamwe vomOvafarisai novayambididi vaHerodes, opo va dule oku mu yula meendjovo daye.+
14 Eshi va fika, ova tya kuye: “Omuhongi, otu shi shii kutya ove omunashili noiho lalakanene okupandika kovanhu, osheshi iho tale eholokepo lokombada lovanhu, ndele oho hongo oshili kombinga yaKalunga. Oshi li ngoo pamhango* okufuta oifendela kOmukesari, ile hasho?
15 Mbela otu na okufuta, ile hasho?” Eshi Jesus a didilika oihelele yavo, okwa tya kuvo: “Omolwashike tamu yeleke nge? Eteleni nge odenari* ndi i tale.”
16 Opo nee ove i eta, ndele ta ti kuvo: “Efano neshangelo eli olalyelye?” Ova tya kuye: “OlOmukesari.”
17 Jesus okwa ti: “Eshi shOmukesari shi peni Omukesari,+ naasho shaKalunga shi peni Kalunga.”+ Onghee ova li va kuminwa eendjovo daye.
18 Ndele Ovasadukai, ovo hava ti kaku na enyumuko,+ ove uya, ndele tave mu pula+ tava ti:
19 “Omuhongi, Moses okwe tu shangela a ti kutya, ngeenge umwe okwa filwa omumwaina omulumenhu, ndele ta fiye po omukulukadi, ashike kave na okaana, omumwaina na kufe po omukulukadi oo, ndele ta dalele omumwaina ounona.+
20 Ndele opa li ovamwainamati vaheyali. Wotete okwa li a hombola, ndele ta fi ehe na oludalo.
21 Nomutivali okwa li a hombola po omukulukadi oo, ndele naye ta fi ehe na oludalo, nomutitatu osho tuu.
22 Ndele aveshe vaheyali kava li ve na oludalo. Xuuninwa, omukainhu naye okwa ka fya.
23 Ngeenge ova nyumunwa, omukulukadi oo ota ka ninga walyelye? Osheshi okwa li omukulukadi wavo aveshe vaheyali.”
24 Jesus okwa tya kuvo: “Mbela eshi hasho she mu pukifa, shaashi kamu shii Omishangwa, ile eenghono daKalunga?+
25 Osheshi eshi tava nyumunwa koufi, ovalumenhu itava ka hombola, novakainhu itava ka hombolwa, ashike otava kala ngaashi ovaengeli meulu.+
26 Ashike shi na sha novafi kutya otava ka nyumunwa, hamba inamu lesha membo laMoses, mehokololo li na sha noshixwa sheno, eshi Kalunga a ti kuMoses: ‘Aame Kalunga kaAbraham naKalunga kaIsak naKalunga kaJakob’?+
27 Oye Kalunga kovanamwenyo, ndele ke fi kovafi. Nye omwa puka filufilu.”+
28 Ndele umwe womovanongo vomishangwa, eshi a uda tava kundafana, nokwa didilika kutya Jesus okwe va nyamukula mondjila, okwe uya puye, ndele te mu pula ta ti: “Oshipango shotete* oshilipi po?”+
29 Jesus okwa ti: “Shotete osheshi, ‘Pwilikina, akutu Israel, Jehova,* Kalunga ketu, oye aeke Jehova.*
30 Ndele hola Jehova,* Kalunga koye, nomutima woye aushe, nomwenyo* woye aushe, nomadiladilo oye aeshe nosho yo neenghono doye adishe.’+
31 Oshitivali osheshi: ‘Kala u hole mukweni ngaashi u lihole mwene.’+ Kape na vali oshipango shimwe sha fimana shi dule ei.”
32 Ndele omunongo womishangwa oo okwa tya kuye: “Omuhongi, owa popya oshili, ‘Oye aeke, nokape na vali umwe, kakele kaye.’+
33 Onghee okukala tu mu hole nomutima aushe, nomadiladilo* etu aeshe, neenghono detu adishe, nokukala tu hole vakwetu ngaashi tu lihole fye vene, osha fimanenena shi dule omaxwikiloyambo nomayambo aeshe.”+
34 Eshi Jesus a mona kutya omulumenhu oo okwa popya sha yuka, okwa tya kuye: “Ove ku li kokule nOuhamba waKalunga.” Konima yaasho, aveshe ova li va tila oku mu pula sha vali.+
35 Ndele eshi Jesus a twikila okuhonga ovanhu motembeli, okwa ti: “Omolwashike hano ovanongo vomishangwa tava ti kutya Kristus omona waDavid?+
36 David eshi a nwefwa mo komhepo iyapuki+ okwa ti, ‘Jehova* okwa lombwela Omwene wange a ti: “Kala omutumba kolulyo lange, fiyo ohandi tula ovatondi voye koshi yeemhadi doye.”’+
37 Hano ngeenge David okwe mu ifana Omwene, ongahelipi e li omona waye?”+
Ongudu inene yovanhu oya li tai pwilikine kuye nehafo.
38 Fimbo a li ta hongo, okwa ti: “Lungameni ovanongo vomishangwa ovo ve hole okweendaenda va djala oikutu ile, nove hole okupopifwa monghedi ye likalekelwa peenhele domalandifilo,+
39 nokukala omutumba koipundi yokomesho* meeshinagoga nopeenhele odo da nuninwa ovaenda, ovo va fimana poivilo.+
40 Ohava xwake po omaumbo* ovafiyekadi, nokwiilikana omaindilo malemale, opo ve liulike.* Ovanhu va tya ngaho otava ka mona ehandukilo la kwata moiti.”*
41 Fimbo Jesus a li omutumba a taalela koshikefa shomayambidido+ ta tale nghee ongudu yovanhu tai tula mo oimaliwa, okwa mona oipuna ihapu tai tula moshikefa shomayambidido oimaliwa ihapu.+
42 Opo nee okwa dja omufiyekadi ohepele, ndele ta tula mo oumaliwa vavali vongushu inininini.*+
43 Onghee Jesus okwa ifana ovahongwa vaye, ndele ta ti kuvo: “Oshili, ohandi mu lombwele, omufiyekadi oo ohepele okwa tula mo shihapu e dule aveshe ovo va tula oimaliwa moshikefa shomayambidido.+
44 Osheshi aveshe ova tula mo oixupe yeliko lavo, ashike ye okwa tula mo nehalo liwa* ashishe osho a li e na, ashishe osho a li e kwete.”+
Omashangelo opedu
^ Emanya olo ohali tulwa mohuke, opo ekuma li kale la kola.
^ Ile “manga po.”
^ Ile “mondjila.”
^ Tala Oshiw. B14.
^ Ile “sha fimanenena.”
^ Tala Omafatululo oitya.
^ Eln., “neudeko.”
^ Ile “iwa.”
^ Ile “oinima.”
^ Ile “limonikife.”
^ Ile “lidjuu.”
^ Eln., “ouhaulapa vavali, ve fike po-quadran imwe.” Tala Oshiw. B14.
^ Ile “moluhepo.”
