Evaengeli paMarkus 13:1-37
13 Fimbo Jesus a li ta di motembeli, umwe womovahongwa vaye okwa tya kuye: “Omuhongi, tala omamanya nomatungo oo mawa.”+
2 Opo nee Jesus okwa tya kuye: “Omatungo oo manene ou a wete? Kape na nande emanya tali ka fiwa apa la londa kulikwao inali ngumaunwa po.”+
3 Ndele ofimbo a li omutumba kOmhunda yEemono, a taalela kotembeli, Petrus, Jakob, Johannes naAndreas ove mu pula ve li po ovo aveke tava ti:
4 “Tu lombwela, oinima oyo otai ka ningwa naini, noshike tashi ka kala edidiliko olo tali ulike kutya exulilo loinima aishe ei oli li popepi?”+
5 Jesus okwe va lombwela ta ti: “Taleni, inamu pukifwa nande okomunhu.+
6 Vahapu otave ke uya medina lange tava ti, ‘Aame Kristus,’ notava ka pukifa vahapu.
7 Onghee hano ngeenge omwa udu oita neenghundana di na sha noita, inamu mbadapala; oinima oyo oi na okuningwa, ndele exulilo inali fika natango.+
8 “Osheshi oiwana otai ka lwifafana, nomauhamba otaa ka kondjifafana;+ otaku ka kala omakakamo edu keembinga neembinga; otapa ka kala yo ondjala.+ Oinima oyo oi li ehovelo loshifeta shokudala.+
9 “Ndele lungameni, osheshi ovanhu otave ke mu twala keemhangu,+ ndele tave mu dengele meeshinagoga,+ notamu ka twalwa komesho yovapangeli noyeehamba omolwange, opo shi ninge oumbangi kuvo.+
10 Onghundana iwa oi na yo okuudifilwa tete oiwana aishe.+
11 Ngeenge ove mu twala keemhangu, inamu kala mu na oshisho kutya otamu ka popya shike. Ndele popyeni osho omhepo iyapuki tai ke mu pa pefimbo opo, osheshi hanye vene tamu ka popya, ndele oyo tai ka popya munye.+
12 Natango, omumwainamati ota ka yandja omumwainamati a dipawe, naxe omona, nounona otava ka kala ve li omhinge novadali vavo, notave ke va dipaifa.+
13 Notamu ka tondwa kovanhu aveshe omolwedina lange.+ Ashike ou e lididimika* fiyo okexulilo+ ota xupifwa.+
14 “Ndele ngeenge omwa mono oshinima shitondifa osho tashi etifa ehanauno+ shi li ofika opo shihe na okukala (omuleshi na longife eendunge dokuyoolola), opo nee ovo ve li muJudea nava hovele okuya onhapo keemhunda.+
15 Omunhu oo ta hangika kombada yeumbo ina londoloka ko a ka pitule oinima yaye meumbo,
16 naau ta hangika mepya ina shuna meumbo a ka pitule mo oshikutu shaye shokombada.
17 Woo ovo tava ka hangika ovafimba novamwali pefimbo olo!+
18 Kaleni tamu ilikana, opo efimbo olo lihe uye pokufu.
19 Osheshi pefimbo olo otaku ke uya oudjuu+ oo inau kala ko nale okudja pehovelo leshito olo Kalunga a shita fiyo opefimbo olo, noitau ka kala ko vali.+
20 Oshoshili, ngeno Jehova* ka li a xupipika omafiku oo, ngeno kape na ombelela tai ka xupifwa. Ndele omolwovahoololwa ovo a hoolola, okwa xupipika omafiku.+
21 “Opo nee ngeenge umwe okwa ti kunye, ‘Tala! Kristus oye ou,’ ile, ‘Tala! Oye winya!’ inamu shi itavela.+
22 Osheshi otaku ka holoka ooKristus nosho yo ovaprofeti ovanaipupulu+ notava ka longa omadidiliko noikumwifilonga, opo va pukife, ngeenge otashi dulika, ovahoololwa.
23 Onghee hano kaleni oupafi,+ osheshi onde mu londwela kombinga yoinima aishe oyo fimbo inai holoka.
24 “Ndele pefimbo olo, konima youdjuu oo, etango otali ka laulikwa, nomwedi itau ka minikila vali,+
25 neenyofi otadi ka wa ko keulu, neenghono dokeulu otadi ka kakamifwa.
26 Opo nee otava ka mona Omona womunhu+ te uya moilemo e na eenghono dinene noshinge.+
27 Nota ka tuma ovaengeli notava ka ongela ovahoololwa vaye okudja keemhepo nhee, okudja komunghulo wedu fiyo okomunghulo weulu.+
28 “Lihongeni kefaneko eli li na sha nomukwiyu: Diva shimha oitai yao ya tende, ndele tai twiyuka omafo, omu shii kutya okwenye oku li popepi.+
29 Sha faafana, nanye ngeenge omwa mono oinima oyo tai ningwa, shiiveni kutya oku li popepi, poshivelo.+
30 Oshili, ohandi mu lombwele kutya epupi eli itali ka xula po nandenande, fiyo oinima aishe oyo ya ningwa.+
31 Eulu nedu otali ka xula po,+ ashike eendjovo dange kadi na nande efiku di xule po.+
32 “Shi na sha nefiku olo, ile novili, kape na nande oumwe e i shii, kutya nee ovaengeli vomeulu, ile Omona, ndele oTate.+
33 Onghee hano kaleni oupafi,+ osheshi kamu shii efimbo olo oinima oyo tai ka ningwa.+
34 Osho otashi dulu okufaafanifwa nomulumenhu ta i kondje yoshilongo, ndele eumbo laye te li fiile ovapiya vaye.+ Opo nee okwa pa keshe umwe oshinakuwanifwa shaye, nokwa lombwela omupashukili weumbo a kale oupafi.+
35 Onghee hano kaleni oupafi, osheshi kamu shii efimbo olo mwene weumbo te uya.+ Kamu shii ngeenge ote uya omutenya, ile omokati koufiku, ile ofimbo eluwa inali tenda,* ile ongula inene,+
36 opo ehe mu hange mwa kofa, ngeenge okwe uya ombadilila.+
37 Osho handi mu lombwele, ohandi shi lombwele yo aveshe kutya: Kaleni oupafi.”+
