Evaengeli paMarkus 4:1-41
4 Okwa hovela natango okuhonga ovanhu pomunghulofuta, opo nee ongudu inene neenghono oya ongala puye. Onghee okwa londa mowato, ndele ta kala mo omutumba nokwa ehena kanini mefuta, ashike ongudu aishe oya li popepi nefuta, pomunghulo wefuta.+
2 Ndele okwa hovela oku va honga oinima ihapu ta longifa omafaneko.+ Fimbo a li te va hongo, okwa tya kuvo:+
3 “Pwilikineni. Taleni! Omukuni okwa ya a ka kune.+
4 Eshi a li ta kunu, eembuto dimwe oda wila mondjila, needila ode uya, ndele tadi di li po.
5 Dimwe oda wila momamanya, ndele tadi mene diva, molwaashi kapa li edu lihapu.+
6 Eshi etango la pita, oda lemba, noda kukuta, molwaashi kada li di na omidi da ya moule.
7 Eembuto dimwe oda wila mokati keeshosholo, neeshosholo eshi da kula, ode di fininika, onghee inadi dala.+
8 Ndele dikwao oda wila medu liwa, naashi da kula nokuhapupala oda hovela okudala, dimwe 30, dimwe 60, nadikwao olwe-100.”+
9 Opo nee okwa weda ko a ti: “Ou e na omatwi na ude ko.”+
10 Ndele eshi a li oye aeke, ovahongwa vaye, mwa kwatelwa ovayapostoli omulongo navavali, ove uya kuye, ndele tava hovele oku mu pula kombinga yomafaneko oo.+
11 Okwa tya kuvo: “Nye omwa pewa oshiholekwa shiyapuki+ shOuhamba waKalunga, ndele kwaavo vehe fi ovahongwa, oinima aishe oi li momafaneko,+
12 opo nonande ova kale va fa tava tale, kave wete ko, nonande ova kale va fa tava pwilikine, kave udite ko eityo laasho tashi popiwa; nokave na efiku ve lialuluke, opo va diminwe po.”+
13 Okwa tya vali kuvo: “Ngeenge kamu udite ko efaneko eli, ongahelipi tamu ka uda ko omafaneko makwao aeshe?
14 “Omukuni okwa kuna eendjovo.+
15 Odo da kunwa mondjila ovovo va uda eendjovo, ndele diva eshi ve di uda, Satana okwe uya,+ ndele ta kufa mo eendjovo odo da li da kunwa muvo.+
16 Sha faafana, edi odedi da kunwa momamanya; diva eshi va uda eendjovo odo, ove di tambula ko nehafo.+
17 Ashike inadi mena omidi momitima davo, ndele ova twikila oule wokafimbo kanini; ndele diva eshi pa holoka oudjuu, ile omahepeko omolweendjovo, ova sholola.
18 Dimwe vali oda kunwa mokati keeshosholo. Odo otadi ulike kwaavo va uda eendjovo,+
19 ashike oisho+ yonghalelo ei yoinima* neheka loupuna+ nouhalu+ u lili naku lili oya fininika nokufifa oshuunguungu eendjovo, onghee inadi imika sha muvo.
20 Naado da kunwa medu liwa otadi ulike kwaavo va uda eendjovo, ndele tave di tambula ko nehalo liwa nova imika oiimati, vamwe 30, vamwe 60 navamwe olwe-100.”+
21 Okwa tya vali kuvo: “Mbela olamba ohai temwa, ndele tai tulwa koshi yoshimbale,* ile koshi yombete? Mbela ihai temwa, ndele tai tulwa koshikwatelwalamba?+
22 Osheshi kaku na osho sha holekwa itashi ka shiivika, nokaku na osho sha tuvikwa nawa itashi ka tuvikululwa.+
23 Ou e na omatwi na ude ko.”+
24 Ndele okwa tya vali kuvo: “Pwilikineni nawa kwaasho handi mu lombwele.+ Oshiyelekifo osho tamu yelekifa, osho tamu ka yelekifwa nasho, heeno, otamu ka wedelwa ko shihapu.
25 Osheshi keshe ou e na ota ka pewa shihapu,+ ndele ou ehe na sha, nokuli naasho e na ote ke shi kufwa.”+
26 Ndele okwa popya ta ti: “Ouhamba waKalunga otau faafanifwa nomulumenhu a kuna eembuto medu.
27 Opo nee okwa ka nangala konguloshi. Eshi a penduka ongula, eembuto daye oda mena noda kula, ashike ke shii kutya osha enda ngahelipi.
28 Edu olo vene la menifa eembuto odo kanini nakanini, tete omino, lwanima oilya, oilya tai dala omitwe, opo nee omitwe tadi tula ko eemuma.
29 Ndele diva eshi oilya ya pya, okwa hovela okuteya, osheshi efimbo leteyo ola fika.”
30 Okwa weda ko vali a ti: “Ouhamba waKalunga ohatu dulu oku u faafanifa nashike, ile oku u yelifa hatu longifa efaneko lilipi?
31 Owa fa ombuto yoshinapi, oyo eshi ya kunwa ya li inininini keembuto adishe kombada yedu.+
32 Ngeenge ya kunwa, ohai kulu, ndele tai ningi omuti u dule oimeno ikwao aishe, nohau kala noitai inene, opo eedila dokeulu di mone omudile koshi yao.”
33 Okwe va honga ta longifa omafaneko mahapu+ a yukila oko, she likolelela keudeko lavo.
34 Okwa kala alushe ha popi navo ta longifa omafaneko, nokwa li ha yelifile ovahongwa vaye oinima aishe ngeenge ve li ovo aveke.+
35 Nomefiku olo, eshi etango la ningina, okwa tya kuvo: “Natu taululeni efuta tu yeni kombinga ikwao yomunghulo.”+
36 Konima eshi va lekela ongudu yovanhu, ova ya pamwe naye mowato, ashike opa li yo eewato dimwe molweendo olo.+
37 Opo nee opa tukuluka oshikungulu shomhepo shinene sha nyika oshiponga, nomakufikufi okwa li tae lidenge mowato, nowato oya li tai hale okutenguka.+
38 Ndele ye okwa li a kofela mowato konima, a nangala koshiwilo. Onghee ove mu pendula, ndele tava ti kuye: “Omuhongi, otu li pokufya, ku na ko nasha?”
39 Opo nee okwa fikama nokwa hanyena omhepo, ndele ta lombwele efuta ta ti: “Shii! Mwena!”+ Nomhepo oya dulika kuye, nefuta ola lota filufilu.
40 Opo nee okwa tya kuvo: “Omolwashike mwa tila?* Kamu na eitavelo hano?”
41 Ndele ova li va tila neenghono, nova pulafana tava ti: “Omunhu ou okwa tya naanaa ngahelipi? Nokuli nomhepo nefuta otai dulika kuye.”+
Omashangelo opedu
^ Ile “yeedula edi.” Tala Omafatululo oitya.
^ Ile “yoshimbale shokuyelekifa.”
^ Ile “mbadapala?”
