Evaengeli paMarkus 1:1-45
-
Johannes Omuninginifi ta udifa (1-8)
-
Eninginifo laJesus (9-11)
-
Jesus ta hongaulwa kuSatana (12, 13)
-
Jesus ta hovele okuudifa muGalilea (14, 15)
-
Ovahongwa votete va ifanwa (16-20)
-
Omhepo ya nyata ya tewa mo (21-28)
-
Jesus ta velula vahapu muKapernaum (29-34)
-
Ta ilikana monhele ye likalela (35-39)
-
Omunashilundu a velulwa (40-45)
1 Ehovelo longhundana iwa i na sha naJesus Kristus, Omona waKalunga.
2 Ngaashi ashike sha shangwa komuprofeti Jesaja taku ti: “(Tala! Ame ohandi tumu omutumwa wange e ku tetekele,* oo te ke ku longekidila ondjila.)+
3 Ondaka yaao ta ingida mombuwa tai ti: ‘Longekideni ondjila yaJehova!* Yukililifeni omalila aye.’”+
4 Johannes Omuninginifi okwa ya mombuwa, ndele ta udifile ovanhu kutya ove na okuninginifwa va ulike kutya ove lidilulula, opo va diminwe po omatimba avo.+
5 Noitukulwa aishe yaJudea novakalimo aveshe vomuJerusalem ova li tava i kuye, nova li tava ninginifwa* kuye mOmulonga waJordan, tava hepaulula omatimba avo moipafi.+
6 Johannes okwa li ha djala oshikutu sholududi longamelo nekwamo loshipa moshiya shaye,+ nokwa li ha li oshipaxu nomaadi eenyiki.+
7 Okwa li ta udifa ta ti: “Otaku di umwe oo e na eenghono e dule nge, oo inandi wana nokuli okunyongama ndi mangulule eemwiya deenghaku daye.+
8 Ame ohandi mu ninginifa momeva, ndele ye ote ke mu ninginifa nomhepo iyapuki.”+
9 Moule womafiku oo, Jesus okwa dja kuNasaret shomuGalilea, ndele ta ninginifwa kuJohannes momulonga waJordan.+
10 Ndele diva eshi a dja momeva, okwa mona eulu la yeuluka, nomhepo ya fa onghuti tai kulukile kuye.+
11 Opo nee meulu omwa dja ondaka tai ti: “Ove Omona wange omuholike; onde ku hokwa.”+
12 Ndele diva omhepo oye mu twala mombuwa.
13 Onghee okwa kala mombuwa oule womafiku 40, ndele ta hongaulwa kuSatana.+ Okwa li mokati koifitukuti, ashike ovaengeli ova li tave mu yakula.+
14 Konima eshi Johannes a kwatwa po, Jesus okwa ya kuGalilea,+ ta udifa onghundana iwa yaKalunga+
15 ta ti: “Eufwafimbo ola wanifwa, nOuhamba waKalunga owa ehena popepi. Lidilululeni,+ nye mu itavele onghundana iwa.”
16 Ofimbo a li ta ende komunghulo wefuta laGalilea, okwa mona Simon nomumwaina waSimon, Andreas,+ tava umbile eenete davo mefuta,+ osheshi ova li ovayuli veeshi.+
17 Ndele Jesus okwa tya kuvo: “Shikuleni nge, nohandi ke mu ninga ovayuli vovanhu.”+
18 Opo nee ova fiya po diva eenete davo, ndele tave mu shikula.+
19 Eshi va ya komesho kanini, okwa mona vali Jakob, omonamati waSebedeus, nosho yo omumwaina Johannes, fimbo va li mowato yavo tava hondjo eenete davo,+
20 nokwe va ifana diva. Onghee ova fiya xe, Sebedeus, mowato pamwe novanailonga, ndele tave mu shikula.
21 Nova ya kuKapernaum.
Diva eshi Eshabata la hovela, okwa ya moshinagoga, ndele ta hovele okuhonga.+
22 Novanhu ova li va kuminwa onghedi yaye yokuhonga, osheshi okwa li e va honga ngaashi ou e na eenghono, ndele hangaashi ovanongo vomishangwa.+
23 Moshinagoga shavo omwa li omulumenhu e na omhepo ya nyata, tai ingida pombada tai ti:
24 “Otu na sha shike naave, Jesus Omunasaret?+ Owe uya oku tu hanauna po? Ondi shi shii lela kutya oove lyelye, oove Omuyapuki waKalunga!”+
25 Jesus okwe i hanyena ta ti: “Mwena, ndele to di mo muye!”
26 Opo nee omhepo ya nyata, konima eshi ya pundulila pedu omulumenhu oo noya ingida pombada, oya dja mo muye.
27 Ovanhu aveshe ova li va kumwa, ndele tava hovele okupopya tava ti: “Oshike eshi? Ehongo eli kali kumwifi tuu! Oku na nokuli eenghono dokuta mo eemhepo da nyata, ndele tadi dulika kuye.”
28 Ndele ehokololo li na sha naye ola tandavela diva moshitukulwa ashishe shaGalilea.
29 Opo nee ova dja mo moshinagoga, ndele tava i naJakob naJohannes keumbo looSimon naAndreas.+
30 Ndele ova hanga inamweno yaSimon+ a nangala e kwetiwe koshidu, nova lombwela diva Jesus kombinga yaye.
31 Opo nee okwa ya puye, te mu kwata keke noku mu yambula po. Ndele okwa veluka, nokwa hovela oku va yakula.
32 Efimbo lokonguloshi, eshi etango la ningina, ovanhu ova hovela okweeta kuye aveshe ovo va li tava vele naavo va li ve na eendemoni;+
33 novanhu aveshe vomoshilando ova li va ongala poshivelo sheumbo.
34 Onghee okwa velula vahapu ovo va li tava vele omikifi di lili noku lili,+ nokwa ta mo eendemoni dihapu, ashike ina efa nande eendemoni di popye kombinga yaye, osheshi odi mu shii kutya oye Kristus.*
35 Ongula inene, fimbo eluwa inali tenda, okwa penduka nokwa ya pondje, ndele ta i konhele ye likalela, opo nee okwa hovela okwiilikana.+
36 Ndele Simon naavo va li pamwe naye ova konga Jesus
37 nove mu mona, opo nee ova tya kuye: “Ovanhu aveshe otave ku kongo.”
38 Ndele okwa tya kuvo: “Tu yeni pamwe pe lili, moitukulwa oyo i li popepi, opo yo ndi ka udifile ko, osheshi osho nda endela.”+
39 Opo nee okwa ya, ta udifile meeshinagoga davo muGalilea ashishe nokuta mo eendemoni.+
40 Kuye okwe uya vali omunashilundu, te mu indile a twa eengolo ta ti kuye: “Ngeenge owa hala, oto dulu okuvelula nge.”+
41 Onghee okwa li e mu uditile olukeno, nokwa nana eke laye noku mu kwata, ndele ta ti kuye: “Onda hala! Veluka.”+
42 Diva oshilundu osha dja mo muye, nokwa veluka.
43 Ndele okwe mu kunghilila nokwe mu lekela diva
44 a ti kuye: “Tala, ino lombwela nande oumwe, ashike inda u ke liulike komupristeri nokuyandja oinima oyo ya popiwa kuMoses omolwokuvelulwa kwoye,+ opo i kale oumbangi kuvo.”+
45 Ndele omulumenhu oo eshi a ya, okwa hovela okutandavelifa ehokololo olo apeshe, onghee Jesus ka li vali a dula okuya moshilando osho moipafi, ndele okwa kala ashike kondje yasho, ta udifile moitukulwa oyo ye likalela. Ashike natango ovanhu ova kala tave uya kuye okudja keembinga adishe.+
