Evaengeli paMarkus 10:1-52
10 Okudja opo okwa fikama, ndele ta i keengaba daJudea a tauluka omulonga waJordan, neengudu dovanhu oda li de uya kuye noku mu ongalela natango. Okwa li a hovela oku va honga ngaashi ha ningi shito.+
2 NOvafarisai ove uya kuye, va hala oku mu yeleka, nove mu pula ngeenge oshi li pamhango omulumenhu a teye ohombo nomukulukadi waye.+
3 Okwe va pula a ti: “Moses okwe mu lombwela shike?”
4 Ova tya: “Moses okwa li a pitika pa yandjwe ombapila yeteyohombo, ngeenge omukulukadi ta hengwa po.”+
5 Jesus okwa tya kuvo: “Omolwoukukutu womitima deni,+ okwe mu shangela oshipango osho.+
6 Ashike okudja pehovelo, ‘Kalunga okwe va shita omulumenhu nomukainhu.+
7 Nomolwaasho omulumenhu oku na okufiya po xe naina,+
8 naavo vavali otava ningi onhumba imwe.’+ Onghee kave fi vali vavali, ndele onhumba imwe.
9 Hano osho Kalunga a tula kumwe, inashi kufwa kumwe komunhu.”+
10 Ndele fimbo va li meumbo limwe, ovahongwa ova hovela oku mu pula kombinga yoshinima osho.
11 Okwa tya kuvo: “Keshe ou ta teya ohombo nomukulukadi waye, ndele ta hombola umwe, ota nyono ohombo+ noke fi omudiinini kuye.
12 Nomukainhu ngeenge okwa teya ohombo nomulumenhu waye, ndele ta hombolwa kuumwe, ota haele.”+
13 Ndele ovanhu ova hovela okweeta ounona kuye, opo e va tenheke omake, ashike ovahongwa ova li ve va hanyena.+
14 Eshi Jesus e shi mona, ka li e shi hafela, nokwa tya kuvo: “Efeni ounona ve uye kwaame, inamu va kelela ko, osheshi Ouhamba waKalunga owaava ve li ngaashi vo.+
15 Oshili, ohandi mu lombwele, keshe ou ita tambula Ouhamba waKalunga ngaashi okaana, ita ka ya mo nandenande muo.”+
16 Ndele Jesus okwa papatela ounona noku va tenheka omake, ndele te va nangeke noupuna.+
17 Fimbo a li mondjila, kuye okwe uya omulumenhu ta tondoka, ndele te mu twile eengolo noku mu pula ta ti: “Omuhongi muwa, ondi na okulonga shike, opo ndi ka fyuulule omwenyo waalushe?”+
18 Jesus okwa tya kuye: “Omolwashike to ifana nge omuhongi muwa? Kape na omunhu muwa, oKalunga aeke.+
19 Oipango ei ou i shii: ‘Ino dipaa,+ ino nyona ohombo,+ ino vaka,+ ino yandja oundombwedi woipupulu,+ ino kengelela+ nosho yo fimaneka xo nanyoko.’”+
20 Omulumenhu oo okwa tya kuye: “Muhongi, aishe oyo onda kala handi dulika kuyo okudja kounona wange.”
21 Jesus okwe mu tala nokwe mu hokwa, ndele ta ti kuye, “Ope na vali oshinima shimwe osho wa pumbwa okuninga: Inda u ka landife po oinima oyo u na, ndele oimaliwa to i yandje keehepele, noto ka kala u na emona meulu; nokuuya u ninge omushikuli wange.”+
22 Enyamukulo olo ola li le mu udifa nai nokwa ya a nyika oluhodi, molwaashi okwa li e na eliko lihapu.+
23 Konima eshi Jesus a talatala, okwa lombwela ovahongwa vaye a ti: “Kashidjuu tuu kwaavo ve na oimaliwa ihapu okuya mOuhamba waKalunga!”+
24 Ndele ovahongwa ova li va kuminwa eendjovo daye. Opo nee Jesus okwa tya kuvo: “Ovamwange, kashidjuu tuu okuya mOuhamba waKalunga!
25 Oshipu kongamelo okupita meyulu longwiya shi dulife okuya kwoshipuna mOuhamba waKalunga.”+
26 Natango ova li va kumwa neenghono, nova tya kuye:* “Olyelye hano ta dulu okuxupifwa?”+
27 Jesus okwe va tala e va yukilila, ndele ta ti kuvo: “Pataleko lopanhu osho itashi shiiva, ndele hasho shi li ngaho kuKalunga, osheshi kuKalunga oinima aishe otai shiiva.”+
28 Opo nee Petrus okwa tya kuye: “Tala! Otwa fiya po oinima aishe, ndele hatu ku shikula.”+
29 Jesus okwa ti: “Oshili, ohandi mu lombwele, keshe oo a fiya po eumbo, ile ovamwainamati, ile ovamwainakadona, ile ina, ile xe, ile ounona, ile omapya omolwedina lange nomolwonghundana iwa,+
30 ota mono lwe-100 paife, omaumbo, ovamwainamati, ovamwainakadona, ooina, ounona nomapya pamwe nomahepeko,+ nomonghalelo yoinima tai uya,* omwenyo waalushe.
31 Ndele vahapu ovo votete otava ka ninga vaxuuninwa, naavo vaxuuninwa otava ka ninga votete.”+
32 Fimbo Jesus novahongwa vaye va li tava i kuJerusalem, Jesus okwa li e va pita komesho, ndele ovahongwa ova li va kumwa, navamwe ovo va li ve mu shikula ova li va tila. Opo nee okwa ifana po ovayapostoli vaye omulongo navavali, ndele te va lombwele kombinga yaasho a li poku ka ningilwa.+
33 Okwa ti: “Taleni! Ohatu yeni kuJerusalem, nOmona womunhu ota ka yandjwa momake ovapristeri ovakulunhu noovanongo vomishangwa. Ota ka tokolelwa efyo nota ka yandjwa momake ovanhu vomoiwana imwe i lili,
34 opo nee ota ka shekwa, ta ka fiilwa omate, ta ka dengwa nokudipawa, ashike konima yomafiku atatu ota ka nyumuka.”+
35 Ndele Jakob naJohannes, ovana vaSebedeus,+ ove uya kuye, ndele tava ti: “Muhongi, otwa hala u tu ningile keshe osho hatu ku pula.”+
36 Okwa tya kuvo: “Omwa hala ndi mu ningile shike?”
37 Ova ti: “Tu pitika tu ka kale omutumba pamwe naave, umwe okolulyo loye naumwe okolumosho loye, moshinge shoye.”+
38 Ndele Jesus okwa tya kuvo: “Nye kamu shi shii osho tamu pula. Mbela otamu dulu ngoo okunwa meholo olo handi nu, ile okuninginifwa neninginifo olo handi ka ninginifwa?”+
39 Ova tya kuye: “Ohatu dulu.” Jesus okwa tya kuvo: “Eholo olo handi nu olo tamu ka nwa, neninginifo olo handi ninginifwa olo tamu ka ninginifwa.+
40 Ashike okukala omutumba kolulyo, ile kolumosho lange haame handi ku yandje, ndele okwaava ve ku longekidilwa.”
41 Eshi vakwao omulongo ve shi uda, ova li va handukila Jakob naJohannes.+
42 Ashike Jesus okwe va ifana kuye, ndele ta ti kuvo: “Omu shi shii kutya ovapangeli voiwana ohave i* pangele, novanaenghono ohava longifa eenghonopangelo davo oku i pangela.+
43 Osho hasho shi na okukala ngaho mokati keni, ndele keshe ou a hala a kale munene mokati keni, na kale omuyakuli weni,+
44 nakeshe ou a hala okukala wotete mokati keni, oku na okukala omupiya waaveshe.
45 Osheshi nokuli nOmona womunhu, ka li e uya okuyakulwa, ndele okuyakula+ nokuyandja omwenyo waye u ninge ekulilo lavahapu.”+
46 Opo nee ova ya kuJeriko. Eshi Jesus novahongwa vaye nosho yo ongudu inene yovanhu va li tava di muJeriko, Bartimeus (omona waTimeus), omweeheli omupofi, okwa li e li omutumba pomunghulo wondjila.+
47 Eshi a uda kutya ou ta ende po oJesus Omunasaret, okwa hovela okwiingida ta ti: “Jesus, Omona waDavid,+ file nge onghenda!”+
48 Ndele ovanhu vahapu ova hovela oku mu hanyena noku mu lombwela a mwene, ashike okwa twikila okwiingida mokule ta ti: “Omona waDavid, file nge onghenda!”
49 Opo nee Jesus okwa kanghama, ndele ta ti: “Mu ifaneni e uye kwaame.” Onghee ova ifana omulumenhu oo omupofi nova tya kuye: “Kala u na ouladi! Fikama; ote ku ifana.”
50 Okwa dula mo oshikutu shaye shokombada, nokwa fikama diva, ndele ta i kuJesus.
51 Opo nee Jesus okwa tya kuye: “Owa hala ndi ku ningile shike?” Omulumenhu oo omupofi okwa ti: “Rabboni,* kwafele nge u twikulule nge.”
52 Jesus okwa tya kuye: “Inda nombili, eitavelo loye ole ku velula.”+ Ndele okwa twikuluka diva,+ nokwa hovela oku mu shikula mondjila.
Omashangelo opedu
^ Ile tashi dulika, “pulafana.”
^ Ile “nomeedula tadi uya.” Tala Omafatululo oitya.
^ Ile “ovo va talika ko ve li.”
^ Tali ti “Omuhongi.”
