Ehololo kuJohannes 9:1-21
9 Omweengeli omutitano okwa shika enghuma laye.+ Nonda mona onyofi ya wa keulu ya wila kombada yedu, nonyofi oyo oya li ya pewa oshapi yelambo lombwili.+
2 Onyofi oyo oya patulula elambo lombwili, nomwifi wa fa tau di mediko la hanya owa dja melambo, etango newangadjo oya li ya laulikwa+ komwifi womelambo.
3 Opo nee momwifi omwa dja oshipaxu shihapu she uya kombada yedu,+ ndele tashi pewa eenghono ngaashi odo di li keendje dokombada yedu.
4 Oshipaxu osha lombwelwa shiha hanaune po oimeno nomiti, ndele oshi hanaune po ashike ovo inava didilikwa kuKalunga meembaba doipala yavo.+
5 Oshipaxu osho osha li sha pewa eenghonopangelo, opo shi va hepeke eemwedi nhano, ndele haku va dipaa, nomahepeko oo okwa li a fa ouyehame womunhu a lika kondje.+
6 Pefimbo opo, ovanhu otava ka konga efyo, ashike itave ke li mona, otava ka kala ve li halelela, ndele otali ke va ya onhapo.
7 Oshipaxu osha li tashi monika sha fa eenghambe tadi i koita;+ komitwe dasho okwa li ku na oinima tai monika ya fa oikoroni yoingoli, noipala yasho oya li tai monika ya fa oipala yovanhu,
8 nosha li shi na eexwiki da fa dovakainhu. Osha li shi na omayoo a fa onghoshi+
9 noipapa yoponhulo ya fa oipapa yoivela. Omavava asho eshi tashi papama okwa li tae linyenge a fa eenghambe tadi shili omatemba tadi tondoka da finda moita.+
10 Oshi na eehengo komishila da fa odo di li komishila deendje, nomomishila dasho omu na eenghonopangelo dokuhepeka ovanhu eemwedi nhano.+
11 Ohashi wilikwa kohamba, omweengeli wombwili.+ Edina laye mOshiheberi oye Abadon,* nomOshigreka oye Apollion.*
12 Owoo yotete oya pita po. Tala! Konima yoinima ei otaku ka holoka eewoo dopavali.+
13 Omweengeli omutihamano+ okwa shika enghuma laye.+ Nonda uda ondaka ya dja momaluvinga oo e li koaltari yoshingoli+ oyo i li koshipala shaKalunga,
14 tai lombwele omweengeli omutihamano oo e kwete enghuma tai ti: “Mangulula ovaengeli vane ovo va mangwa ve li pomulonga munene waEufrat.”+
15 Opo nee ovaengeli vane, ovo va kala va teelela ovili, efiku, omwedi nosho yo omudo i fike, ova li va mangululwa, opo va dipae oshititatu shovanhu.
16 Omuvalu wovalondinghambe vomatangakwaita owa li eengudu dihapu lweengudu dihapu;* onda uda omuvalu wavo.
17 Onda mona memoniko eenghambe novalondinghambe. Ovalondinghambe ovo ova li va djala oipapa i na oluvala litilyana, limbulau nosho yo lishunga. Eenghambe oda li di na omitwe da fa deenghoshi,+ nomomakanya ado omwa li tamu di omundilo, omwifi nosulfuri.
18 Oshititatu shovanhu osha dipawa komahandukilo aa atatu, komundilo, komwifi nokosulfuri oyo ya dja momakanya ado.
19 Eenghono deenghambe odo odi li momakanya nomomishila dado, nomishila odi na omitwe da fa omayoka, nohadi longifa omishila dado di hepeke ovanhu.
20 Ashike ovanhu ovo va xupa po, inava dipawa komahandukilo oo, inave lidilulula koilonga yomake avo. Kava li va efa po okulongela eendemoni nosho yo oihongwafano oyo ihai mono ko, ihai udu ko noihai ende, oyo ya longwa moshingoli, moshisilveri, mongopolo, momamanya nomoiti.+
21 Kava li va efa po okudipaa, oumhulile, oluhaelo* nosho yo oumbudi.
Omashangelo opedu
^ Sha hala okutya, “Omuhanauni.”
^ Sha hala okutya, “Ehanauno.”
^ Ile “20 000 a hapupalifwa lwo 10 000,” sha hala okutya, 200 000 000.
^ MOshigreka, porneia. Tala Omafatululo oitya.
