Ehololo kuJohannes 5:1-14
5 Nonda mona Oo e li omutumba kolukalwapangelo e kwete meke laye lokolulyo+ omushangwatonywa wa shangwa keembinga adishe,* wa patwa nawanawa noipatifo iheyali.
2 Onda mona omweengeli omunaenghono ta ingida pombada ta ti: “Olyelye a wana okukufa ko oipatifo yomushangwatonywa noku u tonyununa?”
3 Ndele kapa li nande oumwe, kutya nee omeulu, ile okombada yedu, ile okoshi yedu a dula okutonyununa, ile okulesha omushangwatonywa oo.
4 Onda li nda hovela okulila nokulililila, molwaashi kapa li oo a wana oku u tonyununa, ile oku u lesha.
5 Ndele umwe womovakulunhu okwa tya kwaame: “Ino lila vali. Tala! Onghoshi yomepata laJuda+ nomudi+ waDavid+ oya findana+ noya wana okukufa ko oipatifo yomushangwatonywa noku u tonyununa.”
6 Nonda mona mokati kolukalwapangelo nokoinamwenyo ine nomokati kovakulunhu+ odjona+ ya fa ya dipawa,+ i na eembinga heyali nomesho aheyali, nomesho otaa faneke eemhepo heyali daKalunga+ odo da tumwa kombada yedu alishe.
7 Opo nee oye uya noya kufa ko omushangwatonywa oo u li meke lokolulyo Laao e li omutumba kolukalwapangelo.+
8 Eshi ye u kufa ko, oinamwenyo ine novakulunhu 24+ ova twa eengolo koshipala shayo, nakeshe umwe okwa li e na okaxumbafeta noshiyaxa shoshingoli shi yadi oitwimifo. (Oitwimifo otai faneke omailikano ovayapuki.)+
9 Ova li tava imbi eimbilo lipe+ tava ti: “Oove wa wana okupewa omushangwatonywa nokukufa ko oipatifo yao, molwaashi owa li wa dipawa nowa landela Kalunga nohonde yoye+ ovanhu va dja momapata, momalaka, movanhu nomoiwana aishe,+
10 nowe va hoolola va ninge eehamba+ novapristeri vaKalunga ketu,+ notava ka pangela kombada yedu ve li eehamba.”+
11 Nonda mona, nonda uda ewi lovaengeli vahapu va dingilila olukalwapangelo noinamwenyo nosho yo ovakulunhu, nomuvalu wavo owa li eengudu dihapu lweengudu dihapu* nosho yo omayovi lwomayovi,+
12 notadi ingida pombada tadi ti: “Odjona oyo ya li ya dipawa+ oya wana okupewa eenghono, oupuna, ounongo, omafa, efimano, oshinge nosho yo enangeko noupuna.”+
13 Onda uda oishitwa aishe oyo i li meulu, kombada yedu, koshi yedu+ nomefuta tai ti: “Kwaau e li omutumba kolukalwapangelo+ nosho yo kOdjona+ nava nangekwe noupuna, nokupewa efimano,+ oshinge neenghono alushe fiyo alushe.”+
14 Oinamwenyo ine oya kala tai ti: “Amen,” novakulunhu ova twa eengolo nova fimaneka Kalunga.
