Ehololo kuJohannes 15:1-8
15 Nonda mona edidiliko limwe vali linene nolikumwifi meulu, ovaengeli vaheyali+ ve kwete omahandukilo aheyali. Omahandukilo oo oo axuuninwa, molwaashi ehandu laKalunga otali ka lota okupitila muo.+
2 Nonda mona yo oshinima sha fa efuta lekende+ la lumbakanifwa nomundilo, nonda mona ovafindani,+ ovo va finda oshilyani noshihongwafano shasho,+ nokave na edidiliko lonomola yedina lasho,+ ve li ofika pefuta lekende, ve kwete ouxumbafeta vaKalunga.
3 Ova li tava imbi eimbilo laMoses+ omupiya waKalunga nolOdjona+ tava ti:
“Jehova* Kalunga, Omunaenghono adishe,+ oilonga yoye oinene noikumwifi.+ Ohamba yaalushe,+ eendjila doye oda yuka nodoshili.+
4 Jehova,* olyelye ite ku tila nokufimaneka edina loye, molwaashi oove auke omudiinini?+ Oiwana aishe otai ke uya nokulinyongamena koshipala shoye,+ shaashi oya mona kutya oho tokola pauyuki.”
5 Konima yaasho, onda mona, nouyapuki wetwali loumbangi+ owa li wa yeululwa meulu,+
6 nomwa dja ovaengeli vaheyali ve na omahandukilo aheyali+ va djala oikutu yoliina i yela, tai vilima nove limanga omalapi oshingoli meenhulo davo.
7 Opo nee shimwe shomoinamwenyo ine osha yandja kovaengeli vaheyali oiyaxa iheyali yoshingoli oyo ya li i yadi ehandu laKalunga,+ oo ta kala ko alushe fiyo alushe.
8 Ndele monhele iyapuki omwa li tamu twimaana omwifi muhapu omolwoshinge shaKalunga+ nosho yo eenghono daye, nokapa li ou ta dulu okuya mouyapuki fiyo osheshi omahandukilo aheyali+ ovaengeli vaheyali a pwa.
