Samuel wotete 5:1-12
5 Eshi Ovafilisti va kwata ko Oshikefa+ shaKalunga kashili, ove shi kufa ko kuEben-eser, ndele tave shi twala kuAsdod.
2 Ovafilisti ova kufa Oshikefa shaKalunga kashili nove shi twala meumbo* laDagon, ndele tave shi tula popepi naDagon.+
3 Eshi Ovaasdod va penduka ongula yefiku la shikula ko, ova hanga Dagon a nangala a fidimika oshipala shaye pedu pOshikefa shaJehova.+ Onghee ova kufa po Dagon, ndele tave mu shunifa ponhele yaye.+
4 Eshi va penduka ongula inene yefiku la shikula ko, ova hanga Dagon a nangala a fidimika oshipala shaye pedu pOshikefa shaJehova. Omutwe waDagon neenyala daye adishe oda li da tetwa ko noda tulwa popepi nomuvelo. Oshitukulwa ashike osho sha fa oshi* sha xupa ko inashi tetwa.
5 Osho osho sha ningifa ovapristeri vaDagon naaveshe ovo hava i meumbo laDagon va kale ihava ende momukala oo u li poshivelo shaDagon fiyo okunena, muAsdod.
6 Jehova okwa handukila neenghono Ovaasdod nokwa hepeka unene Asdod noitukulwa yasho, eshi e i tumina oidinda.*+
7 Eshi ovanhu vomuAsdod va mona osho sha ningwa po, ova ti: “Inamu efa Oshikefa shaKalunga kaIsrael shi kale kufye, osheshi okwa ungaunga nafye nonyanya nosho yo kalunga ketu Dagon.”
8 Opo nee ova ifana ovapangeli aveshe vOvafilisti nove va ongaleka, ndele tave va pula kutya: “Oshikefa shaKalunga kaIsrael natu shi ninge ngahelipi?” Ova nyamukula va ti: “Oshikefa shaKalunga kaIsrael nashi twalwe kuGat.”+ Onghee Oshikefa shaKalunga kaIsrael ove shi twala oko.
9 Konima eshi ve shi twala oko, Jehova okwa li a handukila oshilando osho, nokwe shi tilifa neenghono. Okwa hepeka noidinda ovanhu vomoshilando osho,+ okudja kokaana fiyo okomukulunhu.
10 Onghee ova tuma Oshikefa shaKalunga kashili kuEkron,+ ndele diva eshi Oshikefa shaKalunga kashili sha ya kuEkron, Ovaekron ova hovela okwiingida tava ti: “Ove tu etela Oshikefa shaKalunga kaIsrael ve tu dipae pamwe noshiwana shetu!”+
11 Opo nee ova ifana ovapangeli aveshe vOvafilisti nove va ongaleka, ndele tava ti: “Kufei mo Oshikefa shaKalunga kaIsrael, shi shunifeni konhele yasho, opo fye noshiwana shetu tuha dipawe.” Osheshi ovanhu aveshe moshilando ova li va tila okudipawa. Kalunga kashili okwa li a handuka neenghono,+
12 novalumenhu ovo inava fya ova hepekwa noidinda. Ovakalimo aveshe vomoshilando ova ingida pombada neenghono fiyo osheshi va udika keulu.
