Samuel wotete 1:1-28
1 Opa li omulumenhu wokuRamataim-sofim,*+ womoludalo laSuf, koshitukulwa shokeemhunda shaEfraim,+ nedina laye oElkana,+ omonamati waJeroham, omonamati waElihu, omonamati waTohu, omonamati waSuf, Omuefraim.
2 Okwa li e na ovakulukadi vavali, umwe oHanna namukwao oPeninna. Peninna okwa li e na ounona, ashike Hanna ka li e na ounona.
3 Elkana okwa li ha di moshilando shavo omudo keshe a ka longele* nokuyambela Jehova, Kalunga komatangakwaita, kuSilo.+ Ovanamati vavali vaEli, Hofni naPinehas,+ ova li hava longo oko ve li ovapristeri vaJehova.+
4 Efiku limwe eshi Elkana a li ta yandje eyambo, okwa yandja oitukulwa imwe komukulukadi waye Peninna nosho yo kovanamati vaye novanakadona vaye aveshe.+
5 Ashike Elkana okwa pa Hanna oshitukulwa she likalekelwa, molwaashi okwa li e mu hole unene, ndele Jehova ka li a pa Hanna oludalo.*
6 Ndele nyamunghwao okwa kala he mu shindi alushe, opo e mu udife nai, molwaashi Jehova ka li e mu pa oludalo.
7 Nyamunghwao, Peninna, osho a kala ha ningi ngaho omudo keshe. Ngeenge Hanna a i keumbo laJehova,+ nyamunghwao okwa kala he mu shindi unene, na Hanna okwa kala ha lili nokwa kala ita li.
8 Ashike omushamane waye, Elkana, okwa tya kuye: “Hanna, omolwashike to lili, nomolwashike ito li nowa nyika oluhodi?* Mbela inandi fimana kwoove ndi dule ovanamati omulongo?”
9 Konima eshi va mana okulya nokunwa muSilo, Hanna okwa fikama. Pefimbo opo, omupristeri Eli okwa li omutumba poshivelo shotembeli*+ yaJehova.
10 Hanna okwa li a nyika oluhodi neenghono,* nokwa hovela okwiilikana kuJehova+ nokulila unene.
11 Onghee okwa ninga eano eli: “Jehova, Kalunga komatangakwaita, tala nghee handi mono oixuna. Ngeenge owa dimbuluka nge noino dimbwa omupiya woye, ndele to pe omupiya woye okaana okamati,+ ohandi ke ka yandja kuJehova onghalamwenyo yako aishe, nomomutwe wako itamu ka enda okambi.”+
12 Eshi a kala ta ilikana efimbo lile koshipala shaJehova, Eli okwa kala te mu tale komilungu.
13 Hanna okwa li ta ilikana momutima waye; omilungu daye odo ashike da li tadi linyenge, ashike ewi laye kala li li uditike. Onghee Eli okwa li ta diladila kutya okwa kolwa.
14 Eli okwa tya kuye: “Ofiyo onaini to kala wa kolwa? Ino nwa vali omaviinyu.”
15 Opo nee Hanna okwa nyamukula a ti: “Ahawe, omwene wange! Ame omukainhu ndi li moudjuu munene; inandi nwa omaviinyu, ile oshikolwifa shasha, ashike ohandi mbubulile Jehova omutima* wange.+
16 Ino tala ko omupiya woye e li omukainhu wongaho, osheshi onda kala handi ilikana fiyo opaife omolwoupyakadi noudjuu wange munene.”
17 Eli okwa nyamukula a ti: “Inda nombili, na Kalunga kaIsrael na nyamukule eindilo loye.”+
18 Hanna okwa tya: “Fila onghenda omupiya woye.” Opo nee okwa ya nondjila yaye, ndele ta li, noka li vali a nyika oluhodi.
19 Oukwaneumbo waElkana owa penduka ongula inene, ndele tau linyongamene koshipala shaJehova, nokonima yaasho, owa shuna keumbo lavo kuRama.+ Elkana okwa nangala nomukulukadi waye Hanna, na Jehova okwa dimbuluka Hanna.+
20 Hanna okwa ninga oufimba meni lomudo umwe* nokwa dala okaana okamati, ndele te ka luku+ Samuel,* molwaashi okwa ti, “onde ka indila kuJehova.”
21 Konima yaasho, Elkana okwa ya pamwe noukwaneumbo waye aushe va ka yambele Jehova eyambo+ lokomudo, nokuyandja eyambo laye leano.
22 Ndele Hanna ka li a ya,+ ashike okwa lombwela omushamane waye a ti: “Diva shimha okamati ka tovo, ohandi ka twala; opo nee otaka ka holoka koshipala shaJehova, ndele taka kala oko fiyo alushe.”+
23 Omushamane waye Elkana okwa tya kuye: “Ninga osho u wete kutya osha yuka.* Kala meumbo fiyo osheshi we ka tovifa. Jehova na wanife po osho wa popya.” Onghee Hanna okwa kala meumbo ta nyamifa okamonamati kaye, fiyo osheshi e ka tovifa.
24 Diva eshi e ka tovifa, okwe ka twala kuSilo pamwe nongobe yomhedi yomido nhatu, oefa imwe* youfila noshitoo sha kula shomaviinyu,+ nokwa ya keumbo laJehova kuSilo+ pamwe nokamonamati kaye.
25 Opo nee ova toma ongobe yomhedi, ndele tava twala okaana oko kuEli.
26 Hanna okwa tya: “Alikana, omwene wange, ngaashi u na omwenyo omwene wange, aame omukainhu oo nda li nda fikama pamwe naave monhele ei handi ilikana kuJehova.+
27 Onda ilikana ndi pewe okaana aka, na Jehova okwa pa nge osho nde mu indila.+
28 Paife ohandi ka shunifa kuJehova. Otaka kala kaJehova onghalamwenyo yako aishe.”
Opo nee okwe* linyongamena kuJehova oko.
Omashangelo opedu
^ Ile “wokuRama.”
^ Ile “e ke linyongamene.”
^ Eln., “okwa fitika oshidalelo shaye.”
^ Ile “omolwashike omutima woye we liditika?”
^ Sha hala okutya, shetwalihangano.
^ Ile “omwenyo wa nyika oluhodi.”
^ Eln., “ohandi tileshi omwenyo wange koshipala shaJehova.”
^ Ile tashi dulika, “meni lefimbo lixupi.”
^ Tali ti “Edina laKalunga.”
^ Eln., “osho shiwa momesho oye.”
^ Eelita 22 lwaapo. Tala Oshiw. B14.
^ Tashi ulike kuElkana.
