Samuel wotete 11:1-15
11 Nahas, Omuammoni,+ okwa ya, ndele ta ongo onhanda a lwife Jabes+ shomuGilead. Opo nee ovalumenhu aveshe vomuJabes ova lombwela Nahas va ti: “Ninga ehangano* nafye, opo nee ohatu ke ku longela.”
2 Nahas, Omuammoni, okwa tya kuvo: “Ohandi ningi ehangano nanye ngaha: omesho eni aeshe okolulyo otaa ka kololwa mo. Osho ohandi shi ningi, opo ndi fife ohoni Israel ashishe.”
3 Ovakulunhu vomuJabes ove mu nyamukula va ti: “Tu pa omafiku aheyali, opo tu tume ovatumwa muIsrael ashishe, opo nee ngeenge inatu mona oo te tu amene, ohatu ke liyandja kwoove.”
4 Mokweendela ko kwefimbo, ovatumwa ova ya kuGibea+ shaSaul, nova lombwela ovanhu eendjovo odo, novanhu aveshe ova lila pombada.
5 Saul okwa li ta di mofuka, ta shingi eengobe, nokwa pula a ti: “Oshike sha ningilwa ovanhu ava? Omolwashike tava lili?” Opo nee ove mu lombwela osho sha popiwa kovalumenhu vokuJabes.
6 Eshi Saul a uda eendjovo odo, Kalunga okwe mu pa eenghono nomhepo yaye,+ na Saul okwa li a handuka unene.
7 Onghee okwa kufa eengobe mbali deemhedi, ndele te di tetaula moinhimbu, nokwe i yandja kovatumwa ve i twale muIsrael ashishe, tava ti: “Keshe ou ita shikula Saul naSamuel, eengobe daye osho tadi ka ningilwa ngaha.” Opo nee ovanhu ova hovela okukala hava tila Jehova, nova dja mo nelalakano limwe.*
8 Okwe va valulila muBesek, nopa li Ovaisrael 300 000 novalumenhu Ovajuda 30 000.
9 Ova lombwela ovatumwa ovo ve uya va ti: “Omu na okulombwela ovalumenhu vomuJabes shomuGilead tamu ti: ‘Otamu xupifwa mongula, moshanga shomutenya.’” Opo nee ovatumwa ova ya, ndele tava lombwele ovalumenhu vomuJabes, novalumenhu ova li va hafa unene.
10 Ovalumenhu vomuJabes ova ti: “Ohatu liyandje kunye mongula, ndele tamu tu ningile keshe osho she mu wapalela.”+
11 Mefiku la shikula ko, Saul okwa tukula ovanhu meengudu nhatu, ndele tava i mokati konhanda ongula inene,* nova dipaa Ovaammoni+ fiyo omoshanga shomutenya. Ovo va xupa po ova li ve lihanifwa, noinapa fyaala nande oovavali ve li pamwe.
12 Opo nee ovanhu ova tya kuSamuel: “Oolyelye va li tava ti, ‘Mbela Saul okwa wana ngoo okuninga ohamba yetu?’+ Eta ovalumenhu ovo tu va dipae.”
13 Ndele Saul okwa ti: “Kape na omunhu ta dipawa nena,+ molwaashi Jehova okwa xupifa Ovaisrael nena.”
14 Lwanima, Samuel okwa lombwela ovanhu a ti: “Ileni tu yeni kuGilgal,+ tu ka koleke kutya Saul oye ohamba.”+
15 Onghee ovanhu aveshe ova ya kuGilgal, nomuGilgal omo va ningila Saul ohamba koshipala shaJehova. Opo nee ova yambela ko omayambo oukumwe koshipala shaJehova,+ na Saul nosho yo ovalumenhu aveshe Ovaisrael ova li va hafa unene.+
