Samuel wotete 26:1-25
26 Mokweendela ko kwefimbo, ovanhu vokuSif+ ove uya kuSaul puGibea,+ tava ti: “David okwa hondama koshikulundudu shaHakila, popepi naJeshimon.”*+
2 Onghee Saul okwa fikama, ndele ta i kombuwa yaSif pamwe novalumenhu 3 000 Ovaisrael, ovo a hoolola va ka konge David mombuwa yaSif.+
3 Saul okwa onga onhanda koshikulundudu shaHakila, osho shi li popepi naJeshimon, popepi nondjila. David okwa kala ha di mombuwa nokwa uda kutya Saul okwe uya mombuwa e mu konge.
4 Onghee David okwa tuma eendadi di ka shilipaleke ngeenge Saul okwe uya ngoo shili.
5 Lwanima, David okwa ya konhele oko Saul a li a onga onhanda, nokwa mona onhele opo Saul naAbner,+ omonamati waNer, ondjai yetangakwaita laye, va kofela. Saul okwa li a kofela monhanda a dingililwa komatangakwaita.
6 Onghee David okwa tya kuAhimelek, Omuheti,+ nokuAbisai,+ omonamati waSerua,+ omumwaina waJoab: “Olyelye hatu i naye konhanda kuSaul?” Abisai okwa nyamukula a ti: “Ohandi i naave.”
7 Opo nee David naAbisai ova ya komatangakwaita oufiku, nova hanga Saul a kofa monhanda neonga la shimbama medu popepi nomutwe waye. Abner nomatangakwaita ova li va nangala ve mu dingilila.
8 Abisai okwa tya kuDavid: “Nena Kalunga okwa yandja omutondi woye momake oye.+ Alikana, paife nandi mu twe ashike lumwe neonga noitandi ka pumbwa oku mu endulula.”
9 Ndele David okwa tya kuAbisai: “Ino mu ningila owii, osheshi olyelye ta ningile owii omuvaekwa waJehova,+ ndele ta kala ehe na etimba?”+
10 David okwa weda ko a ti: “Oshili, ofimbo Jehova e na omwenyo, Jehova oye mwene ta ka ungaunga naye,+ ile efiku laye otali uya+ nota ka fya, ile ota ka ya molwoodi, ndele ta file mo.+
11 Pataleko laJehova, itashi shiiva ndi ningile owii omuvaekwa waJehova.+ Alikana, paife natu kufe po ashike eonga olo li li popepi nomutwe waye nombao* yomeva, ndele hatu i.”
12 Onghee David okwa kufa eonga nombao yomeva, oyo ya li popepi nomutwe waSaul, ndele tava i. Kape na ou e va mona,+ ile e va uda, ile a penduka, osheshi aveshe ova li va kofa, molwaashi Jehova okwe va kofifa eemhofi didjuu.
13 Opo nee David okwa tauluka, ndele ta i kombinga ikwao. Okwa li a fikama koxulo yomhunda e li kokule naSaul, nopokati kavo opa li oshinano shonhumba.
14 David okwa ifana omatangakwaita nosho yo Abner,+ omonamati waNer, ta ti: “Abner, ito nyamukula?” Abner okwa nyamukula a ti: “Oove lyelye to ifana ohamba?”
15 David okwa pula Abner a ti: “Ove ku fi omulumenhu omunaenghono? Olyelye e ku fa muIsrael? Omolwashike ino kala to pashukile omwene woye ohamba? Umwe womovakwaita okwa li e uya monhanda a dipae omwene woye ohamba.+
16 Osho wa ninga kashiwa. Oshili, ofimbo Jehova e na omwenyo, owa wana okufya, molwaashi ino kala to pashukile omwene woye, omuvaekwa waJehova.+ Lengaalenga! Eonga lohamba nombao yomeva,+ oyo ya li pomutwe wayo, oi li peni?”
17 Opo nee Saul okwa dimbuluka ondaka yaDavid, ndele ta ti: “Mumati wange David, oove ngoo to popi ngaho?”+ David okwa nyamukula a ti: “Heeno, aame handi popi, omwene wange ohamba.”
18 Okwa weda ko a ti: “Omolwashike omwene wange ta taataa omupiya waye,+ onda ninga shike nondi na ondjo yashike?+
19 Omwene wange ohamba, alikana, pwilikina keendjovo domupiya woye: Ngeenge Jehova oye e ku tuma u ningile nge owii, na tambule ko* eendjayambo dange. Ndele ngeenge owa tumwa kovanhu,+ Jehova ne va finge, molwaashi ova ehenifa nge kokule nena, noinava efa ndi kale monhele oyo Jehova e tu pa i li efyuululo,+ ndele tava ti: ‘Inda u ka longele ookalunga vamwe.’
20 Paife, ino efa ohonde yange i tikile pedu kokule naJehova, osheshi ohamba yaIsrael oya ya i ka konge ona imwe,+ ya fa tai taataa omakonghola okeemhunda.”
21 Opo nee Saul okwa nyamukula a ti: “Onda nyona.+ Omumwange David, aluka, itandi ku ningile vali owii, molwaashi nena eli owa tala ko omwenyo wange u li oshinima shi na ondilo.+ Inandi katuka pandunge nonda ninga epuko la kwata moiti.”
22 David okwa nyamukula a ti: “Eonga lohamba oleli. Umwe womovakwaita ovanyasha ne uye e li kufe po.
23 Jehova ota ka pa ondjabi keshe umwe omolwouyuki waye+ noudiinini waye, osheshi Jehova okwe ku yandja momake ange nena, ashike kanda li nda hala okuningila owii omuvaekwa waJehova.+
24 Tala! Ngaashi ashike nda xupifa omwenyo woye nena, Jehova na amene nge nokuxupifa nge komaudjuu aeshe.”+
25 Saul okwa nyamukula David a ti: “Mumati wange David, nangekwa noupuna. Oto ka longa shili oilonga inene noto ka pondola filufilu.”+ Opo nee David okwa ya nondjila yaye, na Saul okwa shuna konhele yaye.+
