Samuel wotete 29:1-11
-
Ovafilisti inave lineekela David (1-11)
29 Ovafilisti+ ova ongela omatangakwaita avo aeshe puAfek, ofimbo Ovaisrael va li va onga onhanda pofifiya muJisreel.+
2 Ovapangeli vOvafilisti ova li tava ende pamwe novakwaita vavo ve li meengudu domafele nodomayovi, na David novakwaita vaye ova li tava ende ve li konima yavo pamwe naAkis.+
3 Ashike omalenga Ovafilisti okwa tya: “Ovaheberi ava otava ningi shike apa?” Akis okwa nyamukula omalenga Ovafilisti a ti: “Ou oDavid, omupiya waSaul, ohamba yaIsrael, oo a kala pamwe naame oule wodula imwe, ile shi dulife po.+ Inandi mu mona ondjo yasha okudja efiku olo e uya pwaame fiyo okunena eli.”
4 Omalenga Ovafilisti okwa li e mu handukila, ndele taa ti kuye: “Shunifa ko omulumenhu oo.+ Na shune konhele oyo we mu pa. Ino efa a ye nafye molwoodi, opo ehe ke tu pilukile po pefimbo lolwoodi.+ Ota ka dipaa ovakwaita vetu, opo a kale a hokiwa kuSaul.
5 Ou ke fi David oo va imba shi na sha naye, eshi va li tava dana tava ti:
‘Saul okwa dipaa omayovi,Na David omayovi omilongo’?”+
6 Opo nee Akis+ okwa ifana David, ndele ta ti kuye: “Oshili, ofimbo Jehova e na omwenyo, ove omunashili, nonda hafa okuya naave molwoodi pamwe netangakwaita lange,+ molwaashi inandi ku mona ondjo yasha okudja efiku olo we uya pwaame fiyo okunena eli.+ Ashike ovapangeli vamwe inave ku lineekela.+
7 Onghee shuna nombili, noino nyemateka nandenande ovapangeli vOvafilisti.”
8 Opo nee David okwa pula Akis a ti: “Onda ninga shike? Owa mona epuko lashike momupiya woye okudja efiku olo e uya pwoove fiyo onena eli? Omolwashike itandi i naave tu ka lwife ovatondi voye, omwene wange ohamba?”
9 Akis okwa nyamukula David a ti: “Onda tomhwa kutya ou li onga omweengeli waKalunga.+ Ashike omalenga Ovafilisti okwa ti: ‘Ino mu efa a ye pamwe nafye molwoodi.’
10 Ou na okupenduka ongula inene pamwe novapiya vomwene woye, ovo ve uyile pamwe naave, ndele tamu i ongula inene, diva eshi taku yela.”
11 Onghee David novakwaita vaye ova penduka ongula inene, ndele tava shuna koshitukulwa shOvafilisti, nOvafilisti ova ya kuJisreel.+
