Samuel wotete 28:1-25
-
Saul ta i komupopi neemhepo kuEn-dor (1-25)
28 Pefimbo opo, Ovafilisti ova li va ongela omatangakwaita avo va ka lwife Israel.+ Opo nee Akis okwa tya kuDavid: “Ou shi shii nawa kutya oto ka ya moita pamwe naame nosho yo ovalumenhu ovo u li navo.”+
2 Onghee David okwa tya kuAkis: “Ou shii filufilu kutya omupiya woye ota ka ninga po shike.” Akis okwa tya kuDavid: “Osho osho sha ningifa nge ndi ku nangeke po u kale omwaameni wange ta kalelele.”*+
3 Lwanima, Samuel okwa ka fya, ndele Ovaisrael aveshe tave mu lili, nove mu paka moshilando omo a li ha di, muRama.+ Pefimbo olo, Saul okwa ta mo moshilongo ovo hava kwatafana neemhepo nosho yo ovaxunganeki vonakwiiwa.+
4 Ovafilisti ova ongala, nova ya, ndele tava ongo onhanda muSunemi.+ Opo nee Saul okwa ongela Ovaisrael aveshe, ndele tava ongo onhanda muGilboa.+
5 Eshi Saul a mona onhanda yOvafilisti, okwa li a tila, nomutima waye owa li tau kakama unene.+
6 Nonande Saul okwa li a pula ekwafo kuJehova,+ Jehova ine mu nyamukula, kutya nee okupitila meendjodi, ile muUrim,+ ile omovaprofeti.
7 Xuuninwa, Saul okwa lombwela ovapiya vaye ta ti: “Kongelei nge omukainhu ha kwatafana neemhepo,+ opo ndi ye ko, ndi ka popye naye.” Ovapiya vaye ova nyamukula va ti: “Tala! Ope na omukainhu ha kwatafana neemhepo muEn-dor.”+
8 Opo nee Saul okwe liningifa a fa omunhu umwe e lili, nokwa djala oikutu imwe, ndele ta i komukainhu oufiku pamwe novakwaita vaye vavali. Okwa tya komukainhu oo: “Alikana, nyanekela to longifa eemhepo,+ noku ifanena nge omunhu oo handi ku lombwele.”
9 Ashike omukainhu okwa tya kuye: “Ou na okukala u shii osho Saul a ninga, nghee a ta mo moshilongo ovo hava kwatafana neemhepo nosho yo novaxunganeki vonakwiiwa.+ Omolwashike to kendabala okukengelela nge,* opo u dipaife nge?”+
10 Saul okwe mu anena kuJehova a ti: “Oshili, ofimbo Jehova e na omwenyo, ito kala nande u na ondjo yasha moshinima eshi.”
11 Opo nee omukainhu okwa ti: “Nandi ku ifanene lyelye?” Saul okwa nyamukula a ti: “Ifanene nge Samuel.”
12 Eshi omukainhu a mona “Samuel,”*+ okwa ingida mokule ta ti kuSaul: “Omolwashike wa kengelela nge? Oove Saul.”
13 Ohamba oya tya kuye: “Ino kala wa tila, ou wete shike?” Omukainhu okwa nyamukula Saul a ti: “Ondi wete omunhu a fa kalunga, ta di medu.”
14 Saul okwe mu pula a ti: “Okwa tya ngahelipi?” Omukainhu okwa ti: “Omulumenhu omunamido, te uya, nokwa djala okandjafa kehe na omaoko.”+ Opo nee Saul okwa didilika kutya “oSamuel,” nokwe linyongamena pedu, ndele ta nangala eombe.
15 Onghee “Samuel” okwa tya kuSaul: “Omolwashike to piyaaneke nge, eshi wa ifanifa nge?” Saul okwa nyamukula a ti: “Ondi li moupyakadi wa kula. Ovafilisti otava lwifa nge, na Kalunga okwa dja po pwaame, noiha nyamukula nge vali, kutya nee okupitila movaprofeti, ile omeendjodi.+ Osho osho nde ku ifanena, opo u shiivifile nge kutya oshike ndi na okuninga po.”+
16 “Samuel” okwa ti: “Omolwashike to pula nge paife, ye Jehova okwa dja po pwoove+ noke na vali ohokwe mwoove?
17 Jehova ota ka ninga osho a xunganeka okupitila mwaame: Jehova ote ke ku kufa ouhamba, ndele te u yandje kuumwe womunye, kuDavid.+
18 Molwaashi ino dulika kondaka yaJehova, noino xulifa po Ovaamalek, ovo va li ve mu handukifa unene,+ Jehova osho te ku ningile ngaho nena eli.
19 Jehova ote ke ku yandja nosho yo Ovaisrael momake Ovafilisti,+ ndele tave mu dipaa, notamu uya okukala pamwe naame mongula+ nye novanamati voye.+ Jehova ota ka yandja yo etangakwaita lOvaisrael momake Ovafilisti.”+
20 Opo nee Saul okwe liwitika diva pedu, nokwa li a tila unene omolweendjovo “daSamuel.” Ndele ka li e na eenghono nandenande, molwaashi ka li a lya sha omutenya aushe noufiku aushe.
21 Eshi omukainhu e uya kuSaul, nokwa mona kutya oku li monghalo idjuu, okwa tya kuye: “Omupiya woye okwa dulika kwaashi wa popya, nonda tula omwenyo wange moshiponga,*+ ndele handi ningi osho wa lombwela nge ndi ninge.
22 Alikana, paife pwilikina kwaasho omupiya woye ta popi. Tambula omungome u lye, opo u kale u na eenghono, u dule okuya nondjila yoye.”
23 Ashike okwe u anya, ndele ta ti: “Itandi li.” Onghee ovapiya vaye nosho yo omukainhu oo ova kala tave mu ladipike a lye. Xuuninwa, okwa pwilikina kuvo, nokwa penduka, ndele ta kala omutumba kombete.
24 Omukainhu oo okwa li e na onhana ya ondoka meumbo. Onghee okwe i toma* diva, nokwa kufa oufila, ndele te u lungu olumbololo, nokwa teleka nao omungome inau ya efulika.
25 Opo nee okwa pa Saul novapiya vaye, ndele tava li. Konima yaasho, ova fikama, ndele tava i oufiku oo.+
