Samuel wotete 27:1-12
-
David a pewa Siklag kOvafilisti (1-12)
27 David okwe lipopila momutima waye ta ti: “Efiku limwe, Saul ota ka dipaa nge. Oshixwepo kwaame okufaduka po+ ndi ye kedu lOvafilisti. Opo nee Saul ota ka efa po okukonga nge moitukulwa aishe yaIsrael,+ nokungaho ohandi ka xupifa omwenyo wange momake aye.”
2 Onghee David okwa fikama pamwe novalumenhu 600,+ ovo va li pamwe naye, nova ya kuAkis,+ omonamati waMaok, ohamba yaGat.
3 David okwa kala naAkis muGat, ye novakwaita vaye, omulumenhu keshe noukwaneumbo waye. David okwa li pamwe novakulukadi vaye vavali, Ahinoam+ wokuJisreel naAbigail+ Omukarmel, omufiyekadi waNabal.
4 Eshi Saul a lombwelwa kutya David okwa shuna kuGat, ina kala vali te mu kongo.+
5 Opo nee David okwa tya kuAkis: “Ngeenge owa fila nge onghenda, nandi pewe shimwe shomoilando oyo ya ama komikunda, opo ndi kale omo handi di. Omolwashike omupiya woye e na okukala ha di moshilando omo mu na ohamba?”
6 Onghee Akis okwe mu pa Siklag+ mefiku olo, nomolwaasho Siklag shi li oshilando sheehamba dOvajuda fiyo okunena eli.
7 David okwa kala ha di moshitukulwa shokomikunda shOvafilisti oule wefimbo* li fike podula neemwedi nhee.+
8 David okwa kala ha i alushe pamwe novakwaita vaye va ka ponokele Ovagesur,+ Ovagirsi nOvaamalek,+ osheshi ova li hava di medu olo la dja kuTelam fiyo okuSur+ nosho yo fiyo okedu laEgipiti.
9 Ngeenge David a ponokele oshilongo, iha xupifa mo nande omulumenhu, ile omukainhu e na omwenyo,+ noha kufa ko eedi, eengobe, eendongi, eengamelo noikutu, nokonima yaasho, oha shuna kuAkis.
10 Opo nee Akis ohe mu pula ta ti: “Owa li wa ka ponokela oshitukulwa shilipi nena?” David oha nyamukula ta ti: “Okolukadi* lOvajuda,”+ ile “okolukadi lOvajerahmeel,”+ ile “okolukadi lOvakeni.”+
11 David iha xupifa nande omulumenhu, ile omukainhu, opo e va twale kuGat. Ponhele yaasho, oha ti: “Opo vehe ke va lombwele kombinga yetu, tava ti: ‘Eshi osho David a ninga.’” (Oilonga oyo oyo a kala ta longo efimbo alishe olo a kala ha di moshitukulwa shokomikunda shOvafilisti.)
12 Onghee Akis okwa itavela osho David a popya nokwe lipopila ta ti: ‘Oku tondike filufilu mokati kOvaisrael, onghee ota kala omupiya wange fiyo alushe.’
