Inda koshikalimo

Inda koshikalimo

Ngeenge to ungaunga nomukifi wa kwata moiti

Ngeenge to ungaunga nomukifi wa kwata moiti

Linda, oo e na omido 71, okwa ti: “Eshi nda uda kutya ondi na okankela yokomapunga, onda li ndi shii kutya ohandi ka fya. Ashike konima eshi nda ya keumbo, onde lipopila nda ti, ‘Ondi shii kutya kanda li nde shi teelela, ndele ondi na okulididimikila onghalo ei.’”

Elise, oo e na omido 49, okwa ti: “Ombinga yange yokolumosho yomoshipala oya li ya dengwa koudu wombada. Omafimbo amwe, ouyahame owa li wa ningifa nge ndi kale nda polimana. Luhapu, onda li ndi udite ndi li aame andike nonda li nokuli nda hala okulidipaa.”

NGEENGE ove ile omuholike woye okwa monika omukifi oo tau twala mefyo, otashi dulika shi ku denga pomutima. Kakele kokuungaunga nomukifi, otashi dulika u kale u na oshisho omolwonghalo oyo. Okukala to i komakonakono opauhaku, ito mono ekwafo olo wa pumbwa, okufutila ouhaku oo ile oilanduliko oyo hai etwa komiti odo wa pewa, otaku dulu oku ku etela outile, oshisho ile ostresa. Okukala wa wililwa po pamadiladilo omolwomukifi wonhumba otaku dulu okukala omutengi kwoove.

Openi hatu dulu okumona ekwafo? Vamwe ova mona ehekeleko mokukala hava ilikana kuKalunga nokulesha Omishangwa odo tadi hekeleke. Vamwe ova kwafelwa eshi va kala tava yambididwa nokuulikilwa ohole kovapambele nokookaume kavo.

 NGHEE VAMWE VE LIDIDIMIKA

Robert, oo e na omido 58, okwa ti: “Kala u na eitavelo muKalunga note ku kwafele u lididimikile omukifi woye. Ilikana kuJehova. Mu lombwela nghee u udite. Mu pula e ku pe omhepo yaye iyapuki. Mu pula e ku kwafele u kale u na etaleko liwa nokutwa ovapambele voye omukumo eshi to lididimikile onghalo omo u li.

“Ngeenge ovapambele voye tave ku kwafele, ohashi kala tashi ti sha. Efiku keshe, ohandi dengelwa ku umwe ile kuvavali tava pula kutya ondi li po ngahelipi. Ookaume ovo ve li keenhele da yoolokafana ohava tu nge omukumo. Ohava kwafele nge ndi kale nda pepelelwa nondiha sholole.”

Ngeenge to ka talela po kaume koye oo ta ehama, didilika osho Linda a popya, eshi a ti: “Omunhu oo ta yahama iha kala ashike a hala okupopya shi na sha nouvela waye, ndele oha kala a hala okupopya kombinga yoinima yakeshe efiku. Onghee popya naye kombinga yoinima oyo hamu popi shito.”

Kekwafo laJehova nokehekeleko olo hali di mOmishangwa nosho yo ekwafo lopahole lovapambele nolookaume koye, oto dulu okukala nonghalamwenyo tai ti sha nonande oto lididimikile omukifi wa kwata moiti.