Inda koshikalimo

Inda koshikalimo

Mbela onghalamwenyo otai ti sha?

Mbela onghalamwenyo otai ti sha?

Faizal okwa ka tandwa komutima konima yodula eshi omukulukadi waye a fya. Okwa ti: “Eshi nda lesha embo laJob, onda mona kutya Jehova okwe li shangifa nelalakano. Ngeenge otwa lesha ehokololo mOmbiibeli olo le tu kuma, ohashi tu hekeleke.” Okwa weda ko a ti: “Ohatu dulu natango okukala nonghalamwenyo tai ti sha.”

Tarsha okwa li munini natango eshi ina a fya. Okwa ti: “Molwaashi ondi shii Omushiti wetu, onghalamwenyo yange otai ti sha paife, ndi na eteelelo nosho yo ehafo nonande ondi na omaupyakadi mahapu. Onghee ohatu dulu okukala tu na elineekelo kutya Jehova ota dulu oku tu kwafela noku tu yambidida.”

MOITUKULWA ya tetekela otwa mona nghee oiningwanima ya yoolokafana tai dulu okuningifa onghalamwenyo i kale idjuu nokulididimikila. Eshi to lididimikile omaupyakadi oye, otashi dulika u lipule ngeenge onghalamwenyo otai ti sha ngoo ile ngeenge ope na ngoo ou e na ko nasha naave. Kala u na oushili kutya Kalunga oku na ko nasha naave. Ou na ondilo kuye.

Omushangi wEpsalme 86 okwa ulika kutya okwe lineekela muKalunga, eshi a ti: “Fiku handi hangika koudjuu, ohandi ku ifana, osheshi Ove ho udu nge.” (Epsalme 86:7) Otashi dulika u lipule kutya, ‘Ongahelipi Kalunga ta udu nge “fiku handi hangika koudjuu”?’

Nonande Kalunga ita ka kufa po omaupyakadi oye mepakumo leisho, Eendjovo daye, Ombiibeli, oda popya kutya otadi dulu oku ku pa ombili yopamadiladilo u lididimike, eshi da ti: “Kaleni muhe na nande oshisho shasha, ndelenee oufyoona weni u shiivifileni Kalunga momailikano nomomaindilo pamwe nomapandulo, nombili yaKalunga ei i dule eendunge adishe, otai ka amena omitima deni nomadiladilo eni.” (Ovafilippi 4:6, 7) Natu ka taleni nghee Omishangwa tadi landula da ulika kutya Kalunga oku na ko nasha nafye.

Kalunga oku na ko nasha naave

“Kalunga ina dimbwa [oonamusheshe] nande oimwe yomudo. . . . Nye omu dule oonamusheshe vahapu.” Lukas 12:6, 7.

DIDILIKA: Oudila vanini ngaashi oonamusheshe ova talika ko vehe na ongushu kuvahapu, ashike Kalunga ohe va file oshisho. Kalunga oku shii oonamusheshe, oudila ovo vanini, nakeshe kamwe oke na ongushu kuye. Ovanhu ova fimana kuKalunga ve dule oonamusheshe. Ovanhu ove li oishitwa ye likalekelwa meshito alishe molwaashi ova shitwa “oshifefa” shaKalunga notava dulu okuulika omaukwatya a fa aye. — Genesis 1:26, 27.

“Omwene, Oove to konakona nge, ndele to koneke nge. . . . Omadiladilo ange ou a uditile kokule. . . . Yeleke nge, u dilakane omadiladilo ange.” Epsalme 139:1, 2, 23.

DIDILIKA: Kalunga oku ku shii pauhandimwe. Oku shii omaupyakadi oye nosho yo omaliudo oye. Nonande vamwe kave udite ko omaupyakadi oye, Kalunga oku na ko nasha naave nokwa hala oku ku kwafela. Naasho ohashi ningifa onghalamwenyo i kale tai ti sha.

 Onghalamwenyo yoye otai ti sha

“Omwene, uda eindilo lange, nonghuwo yange nai fike kwoove! . . . Alushe ngeenge handi ifana, endekela okutwi kwoye kwaame, u kwafe nge diva. . . . ote liameke komaindilo ovaefiwa.” Epsalme 102:1, 2, 17.

DIDILIKA: Okudja kehovelo, Jehova okwa didilika omahodi ovanhu omolwokumona oixuna kwavo. (Epsalme 56:8) Omwa kwatelwa yo nomahodi oye. Kalunga oku shii omaupyakadi oye aeshe nosho yo omahodi oye molwaashi ou na ondilo kuye.

“Ino tala wa limbililwa, osheshi Aame Kalunga koye. Ame ohandi ku pameke ndele handi ku kwafa yo. . . . Aame Omwene Kalunga koye. . . . Ame ou handi ku lombwele: ‘Ino kala wa tila, Ame ohandi ku kwafa.’” Jesaja 41:10, 13.

DIDILIKA: Kalunga okwe lilongekida oku ku kwafela. Ngeenge owa wile poshi, ote ku yambula po.

Eteelelo li na sha nonakwiiwa itunhula

“Osho Kalunga a kala e hole ounyuni, Oye a yandja Omona waye Ewifa, opo keshe ou te mu itavele aha kane, ndelenee a kale e nomwenyo waalushe.” Johannes 3:16.

DIDILIKA: Ou holike kuKalunga neenghono eshi a yandja Omona waye, Jesus, a fye ponhele yoye. Eyambo la tya ngaho ole shi ningifa tashi shiiva opo u kale nonghalamwenyo i hafifa notai ti sha fiyo alushe. *

Nonande ou na omaupyakadi mahapu nou wete shidjuu okulididimika, konakona Eendjovo daKalunga noukeka nokupameka eitavelo loye mwaasho Kalunga a udaneka. Naasho otashi ke ku etela ehafo nokukala nelineekelo kutya onghalamwenyo otai ti sha.

^ par. 19 Opo u lihonge shihapu shi na sha nanghee to dulu okumona ouwa mekuliloyambo laJesus, tala okavidio Kala ho dimbuluka efyo laJesus ko-www.jw.org/kj. Inda opo pa shangwa OISHANGOMWA > OUVIDIO > OKWOONGALA NOUKALELE WETU.