Inda koshikalimo

Omolwashike Jesus ta ifanwa Omona waKalunga?

Omolwashike Jesus ta ifanwa Omona waKalunga?

Enyamukulo lopaMbiibeli

Ombiibeli oya tumbula Jesus lwoikando e li “Omona waKalunga.” (Johannes 1:49) Outumbulilo “Omona waKalunga” otau ulike kutya Kalunga oye Omushiti, ile Odjo yomwenyo, mwa kwatelwa nowaJesus. (Epsalme 36:9; Ehololo 4:11) Ombiibeli inai hala okutya Omona oo okwa etwa po kuKalunga pamukalo oo ovanhu hava dalafana.

Ombiibeli ohai ifana yo ovaengeli “ovana ovamati vaKalunga.” (Job 1:6) Natango Ombiibeli oya ti kutya omunhu wotete wokombada yedu, Adam, okwa li “omona waKalunga.” (Lukas 3:38) Kakele kaasho, molwaashi Jesus oye a shitwa tete kuKalunga noye aeke a shitwa odikilila kuye, Ombiibeli oye mu popya e li Omona waKalunga woshiveli, ile wotetetete.

 Mbela Jesus okwa li nale meulu, ofimbo ine uya kombada yedu?

Osho naanaa. Jesus okwa li oshishitwa shopamhepo meulu, ofimbo ina dalwa e li omunhu kombada yedu. Jesus okwa ti: “Onda dja meulu.” — Johannes 6:38; 8:23.

Kalunga okwa shita tete Jesus, omanga ina shita oinima ikwao. Ombiibeli oya popya shi na sha naJesus, tai ti:

Jesus okwa wanifa po exunganeko li na sha naao taku tiwa “nehovelo laye oloshitonale, heeno, olomoukwaalushe.” — Mika 5:2; Mateus 2:4-6.

 Jesus okwa li ha ningi shike, omanga ine uya kombada yedu?

Okwa li e na ondodo ye likalekelwa meulu. Jesus okwa popya meilikano kombinga yondodo oyo a li e na, a ti: “Tate fimanekife nge yo nefimano olo nda li ndi na eshi nda li pwoove fimbo ounyuni inau shitwa.” — Johannes 17:5.

Okwa kwafela Xe mokushita oinima ikwao aishe. Jesus okwa li ha longo pamwe naXe ngaashi “omunongoelela.” (Omayeletumbulo 8:30) Ombiibeli oya popya shi na sha naJesus, ya ti: “Noinima aishe oya shitwa okupitila muye, oinima yomeulu noyokombada yedu.” — Ovakolossi 1:16.

Kalunga okwa longifa Jesus, eshi a li ta shiti oinima aishe ikwao. Oinima oyo oya kwatela mo oishitwa ikwao yopamhepo, ile tu tye, ovaengeli, nosho yo oinima ikwao meshito. (Ehololo 5:11) Elongelokumwe pokati kaKalunga naJesus, ngeenge tashi uya pokushita, otali dulu okufaafanifwa nokulongela kumwe kwomufaneki weeplana domatungo nomutungi ye mwene. Omufaneki weeplana oha faneke nghee etungo tali ka kala, ofimbo omutungi oha tungu etungo lo vene.

Okwa li ta longo e li Ondjovo. Eshi Ombiibeli ya popya kombinga yonghalamwenyo yaJesus, fimbo ine uya kombada yedu, oye mu popya e li “Ondjovo.” (Johannes 1:1) Osho otashi ulike kutya Kalunga okwa li a longifa Omona waye, opo a kale ta yandje omauyelele nosho yo omalombwelo koishitwa ikwao yopamhepo.

Osha fa yo shi li ngaha kutya Jesus okwa li Omupopikalelipo waKalunga ha popi novanhu kombada yedu. Kalunga otashi dulika a li ha popi okupitila muJesus e li Ondjovo, eshi a li ta yandje omalombwelo kuAdam naEva moshikunino shaEden. (Genesis 2:16, 17) Jesus otashi dulika oye a li omweengeli, oo a li ta wilike Ovaisrael, eshi va li tava ende mombuwa nova li ve na okudulika kuye filufilu. — Exodus 23:20-23. *

^ okat. 12 Ondjovo hayo aike omweengeli oo Jehova a popya okupitila muyo. Pashihopaenenwa, okwa longifa yo ovanamati vaye vamwe ovaengeli, opo a yandje Omhango kOvaisrael. — Oilonga 7:53; Ovagalati 3:19; Ovaheberi 2:2, 3.