Inda koshikalimo

Eendombwedi daJehova

Hoolola elaka Oshikwanyama

Ombiibeli otai ti ngahelipi kombinga yokakadona Maria?

Ombiibeli otai ti ngahelipi kombinga yokakadona Maria?

 Enyamukulo lopaMbiibeli

Ombiibeli oya popya kutya Maria, ina yaJesus, okwa li e na oufembanghenda we likalekelwa woku mu dala ofimbo ina ya momilele. Ombiibeli oya popya kombinga yexunganeko loshikumwifilonga osho muJesaja nosho yo nghee la wanifwa mEvaengeli laMateus naLukas.

Jesaja okwa xunganeka shi na sha nokudalwa kwaMessias a ti: “Tala, okakadona otaka ka ninga kafimba, ndele taka dala omona okamati.” (Jesaja 7:14) Omushangi wEvaengeli Mateus okwa li a nwefwa mo a shange kutya okudalwa kwaJesus kuMaria okwa wanifa po exunganeko laJesaja. Konima eshi Mateus a popya kutya Maria okwa ninga oufimba pashikumwifilonga, okwa weda ko a ti: “Ndele eshi ashishe sha ningwa, opo pa wanifwe osho Omwene e shi tongifa omuxunganeki ou ta ti: ‘Tala, okakadona taka ningi oufimba, ndele taka dala okamati, edina lako nali lukwe Immanuel,’ olo tali ti: Kalunga pamwe nafye.” — Mateus 1:22, 23.

Omushangi wEvaengeli Lukas naye okwa popya kombinga youfimba waMaria wopashikumwifilonga. Okwa shanga kutya Kalunga okwa tuma omweengeli Gabriel “kokakadona ka putulwa komulumenhu edina laye Josef, womepata laDavid, nedina lokakadona oMaria.” (Lukas 1:26, 27) Maria naye okwa li a popya kutya ina ya momilele. Eshi Maria a uda kutya oye taka kala ina yaJesus, oo e li Messias, okwa pula a ti: “Eshi otashi ka ningwa ngahelipi, osheshi omulumenhu nghi mu shii?” — Lukas 1:34.

 Ongahelipi okakadona elela taka dulu okumona okaana?

Maria okwa ninga oufimba okupitila momhepo iyapuki, oyo i li eenghono daKalunga tadi longo. (Mateus 1:18) Maria okwa li a lombwelwa taku ti: “Omhepo Iyapuki otai ku dile kombada, neenghono daau wOkombadambada otadi ku tuvikile, onghee hano omudalwa ou omuyapuki ota ka lukwa Omona waKalunga.” (Lukas 1:35) Kalunga okwa li a lundululila pashikumwifilonga omwenyo wOmona waye moshidalelo shaMaria opo a dule okufimbapala.

 Omolwashike Jesus a li e na okudalwa kokakadona elela?

Kalunga okwa longifa okakadona elela opo Jesus a dule okudalwa nolutu la wanenena opo a dule okukulila ovanhu moulunde nefyo. (Johannes 3:16; Ovaheberi 10:5) Kalunga okwa li a lundululila omwenyo waJesus moshidalelo shaMaria. Okudja opo, osha yela kutya Maria okwa kala a amenwa komhepo iyapuki opo Jesus aha dalwe noulunde. — Lukas 1:35.

Nomolwaasho Jesus okwa dalwa nolutu la wanenena ngaashi ashike laAdam ofimbo a li ina nyona. Ombiibeli oya popya kombinga yaJesus ya ti: “Oye ou ina longa oulunde washa.” (1 Petrus 2:22) Molwaashi Jesus okwa li a wanenena, okwa li a dula okukulila ovanhu moulunde nosho yo mefyo. — 1 Ovakorinto 15:21, 22; 1 Timoteus 2:5, 6.

 Mbela Maria okwa kala ashike koukadona?

Ombiibeli oya popya kutya Jesus okwa li e na eendenge

Ombiibeli inai popya kutya Maria okwa kala ashike okakadona elela nokonima eshi a dala Jesus. Ndele ponhele yaasho, oya ulika kutya Maria okwa li a dala vali ounona vamwe. — Mateus 12:46; Markus 6:3; Lukas 2:7; Johannes 7:5.

 Mbela Maria okwa kala a wanenena okudja kedalo?

Ahowe. Omalongelokalunga amwe okwa itavela kutya Maria okwa dalwa a wanenena. Pashihopaenenwa, o-New Catholic Encyclopedia oya popya kombinga “yeitavelo olo kutya okakadona Maria oka li ka manguluka ko filu KOULUNDE WOPEHOVELO okudja kehovelo lokukalamwenyo kwako, sha hala okutya okudja kedalo. Ovanhu vakwao aveshe ova fyuulula onghalo yokuhawanenena . . . Ndele PAFILONGHENDA le likalekelwa, Maria okwa li a amenwa aha dalwe noulunde wopehovelo.”

Mepingafano naasho, Ombiibeli kai na apa ya popya kutya Maria okwa dalwa ehe noulunde. (Epsalme 51:5; Ovaroma 5:12) Maria okwa li a ulika kutya ina wanenena eshi a li a yandja kotembeli etimbayambo olo ovadalakadi va li va teelelwa va yandje paMhango yaMoses. (Leviticus 12:2-8; Lukas 2:21-24) O-New Catholic Encyclopedia oya ti kutya ‘ehongo olo kutya Maria okwa dalwa ehe na oulunde kali fi lopamishangwa. Ehongo ashike lOngeleka.’

 Maria otu na oku mu tala ko ngahelipi?

Maria okwe tu tulila po oshihopaenenwa sheitavelo, sheduliko, shelininipiko nosho yo shokukala netilokalunga. Oku li umwe womwaavo ve li ovadiinini ovo tu na okuhopaenena eitavelo lavo. — Ovaheberi 6:12

Ndele nonande Maria okwa dana onghandangala ya fimana e li ina yaJesus, Ombiibeli inai tu honga kutya otu na okukala hatu linyongamene kuye ile hatu mu ilikana. Jesus ina ningifa ina a kale ta pewa efimano le likalekelwa noina lombwela ovashikuli vaye ve shi ninge. Shikwao vali, Maria okwa tumbulwa ashike mOmavangeli nosho yo oshikando shimwe mOilonga, ndele ina tumbulwa nande olumwe momambo makwao 22 oshitukulwa shOmbiibeli osho hashi ifanwa Etestamenti lipe. — Oilonga 1:14

Omishangwa itadi yandje oumbangi washa kutya Maria okwa li ha pewa elitulemo le likalekelwa kOvakriste vomefelemudo lotete nokwiilikanwa. Ponhele yaasho, Ombiibeli oya ti kutya Ovakriste ove na ashike okulongela Kalunga oye aeke. — Mateus 4:10.

Oshitya shOshiheberi almah, osho sha tolokwa “okakadona” mexunganeko laJesaja, otashi dulu okuulika komukainhu ina ya momilele ile a ya momilele. Ashike Mateus okwa nwefwa mo a longife oshitya shOshigreka parthenos, osho tashi ulike kondadalunde kokakadona inaka ya momilele.

Ovanhu vamwe ohava ti kutya outumbulilo oo “Omona waKalunga” otau ulike kutya Kalunga okwa ya momilele naMaria. Ashike ediladilo olo kali li paMishangwa. Ponhele yaasho, Ombiibeli oya popya Jesus e li “Omona waKalunga” nosho yo “Omudalwa wotete woishitwa aishe” molwaashi oye oshishitwa shotete noye aeke a shitwa odikilila kuKalunga. (Ovakolossi 1:13-15) Ombiibeli oya popya yo omulumenhu wotete, Adam, e li omona “waKalunga.” (Lukas 3:38) Osho osho shi li ngaho molwaashi Adam okwa shitwa kuKalunga.