Ariũ a Ithe witũ arĩa monanagia ngumo cia Gĩkristiano makoragwo marĩ ũteithio mũnene harĩ kĩũngano. Mũndũ ũtanyitagĩrĩra mawoni make nĩ athingataga thayũ. Ningĩ nĩ athikagĩrĩria arĩa angĩ na akageria gũtaũkĩrũo nĩo. Kwa ngerekano-rĩ, hihi no ũkorũo wĩhaarĩirie kũnyita mbaru itua rĩrĩa rĩretĩkanĩrio nĩ athuri arĩa angĩ angĩkorũo rĩtiragarara motaaro ma Bibilia, o na akorũo uuma na mawoni ngũrani? Ndũgatindĩkĩrĩrie andũ meke maũndũ ũrĩa wee ũrenda, ĩndĩ thikĩrĩria mawoni mao. (Kĩam. 13:​8, 9; Thim. 15:22) Ningĩ aragĩria andũ na njĩra ya ũtugi na ũhooreri, handũ ha gũkararania nao na kũmaarĩria na njĩra ĩtarĩ ya gĩtĩo. Ũngĩkorũo wendete thayũ nĩ ũrĩĩrutanagĩria kũũthingata o na rĩrĩa ũtarĩ ũndũ mũhũthũ gwĩka ũguo. (Jak. 3:​17, 18) Ciugo ciaku cia ũtugi no ciororoiye ngoro cia andũ, nginya arĩa mangĩkorũo magĩgũũkĩrĩra.—Atiir. 8:​1-3; Thim. 25:15; Mat. 5:​23, 24. w24.11 23 ¶13

O na gũtuĩka Jesu aakuire “riita rĩmwe rĩa kũigana,” no athiaga na mbere kwĩheana nĩ ũndũ witũ. (Rom. 6:10) Na njĩra ĩrĩkũ? No arahũthĩra mahinda na hinya wake nĩguo tũgunĩke nĩ maũndũ marĩa mahotithĩtio nĩ ũkũũri. Kwa ngerekano nĩ aratungata arĩ Mũthamaki, Mũthĩnjĩri-Ngai Ũrĩa Mũnene, na mũtwe wa kĩũngano. (1 Kor. 15:25; Ef. 5:23; Ahib. 2:17) Ningĩ nĩ aratongoria wĩra-inĩ wa gũcokanĩrĩria arĩa aitĩrĩrie maguta na andũ a kĩrĩndĩ kĩrĩa kĩnene, na wĩra ũcio ũkaarĩka mũthia-inĩ wa thĩna ũrĩa mũnene. (Mat. 25:32) Ningĩ nĩ atigagĩrĩra atĩ ndungata ciake njĩhokeku nĩ iraheo irio cia kĩĩroho matukũ-inĩ maya ma kũrigĩrĩria. (Mat. 24:45) Na hĩndĩ ya Wathani Wake wa Mĩaka Ngiri, no agaathiĩ na mbere gũtũrũmbũiya. Kwoguo Jehova ndaaheanire Mũrũ wake nogetha arute muoyo wake ũrĩ ũkũũri, ĩndĩ nĩ nginya atũtungatĩre na njĩra ingĩ nyingĩ. w25.01 24 ¶12

Jehova atuohagĩra biũ na ndarĩ hĩndĩ agaatũherithia nĩ ũndũ wa mehia macio twĩkĩte. Ũndũ ũcio nĩ ũtũhotithagia gũkorũo na ũrata mwega hamwe na Ithe witũ wa igũrũ. O na kũrĩ ũguo, nĩ tũbatiĩ kũririkana atĩ wohanĩri wa Jehova nĩ kĩheo atũheete nĩ ũndũ wa wendo na ũtugi wake mũnene, no ti tondũ atĩ nĩ tũragĩrĩra. Na githĩ o ũmwe witũ ndabatiĩ kũgĩa na ngatho nĩ gũkorũo Jehova ‘atuohagĩra biũ’? (Thab. 130:4; Rom. 4:8) O na kũrĩ ũguo, nĩgetha tuoherũo mehia, harĩ ũndũ wa bata twagĩrĩirũo gwĩka. Jesu aaugire ũũ: “Angĩkorũo mũtirĩohagĩra andũ mehia mao, o nake Ithe wanyu ndarĩmuohagĩra mehia manyu.” (Mat. 6:​14, 15) Ũndũ ũcio ũronania atĩ no mũhaka twĩgerekanagie na Jehova na njĩra ya kuohagĩra arĩa angĩ. w25.02 13 ¶18-19

Ta wĩcirie ũhoro wa andũ a Sodomu na Gomora. Itũũra-inĩ rĩa Sodomu nĩ kwarĩ na mũndũ mũthingu wetagwo Loti, no tũtiũĩ kana nĩ aahotire kũmahunjĩria othe. Nĩ ma andũ acio maarĩ aganu, no hihi no tuuge othe nĩ maakũũranaga wega na ũũru? Ta ririkana rĩrĩa gĩkundi kĩa arũme a itũũra rĩu kĩeendaga kũnyita kĩa hinya ageni a Loti. Bibilia yugaga atĩ maathiire kwa Loti “kuuma kahĩĩ nginya mũthuri mũkũrũ.” (Kĩam. 19:4; 2 Pet. 2:7) Hihi no tuuge tũrĩ na ma biũ atĩ Jehova, Ngai ũrĩ tha aamatuĩrĩire kũniinwo ũndũ gũtarĩ o na ũmwe wao ũkaariũkio? Aca! No Jehova nĩ eerĩte Iburahimu atĩ itũũra rĩu rĩtingĩoonekire o na andũ ikũmi athingu. (Kĩam. 18:32) Kwoguo maarĩ andũ matarĩ athingu, na nĩkĩo Jehova aarĩ na kĩhooto gĩa kũmaniina nĩ ũndũ wa ciĩko ciao. No hihi no tuuge tũrĩ na ma biũ atĩ gũtirĩ o na ũmwe wao ũgaakorũo gatagatĩ-inĩ ka andũ “matarĩ athingu” arĩa makaariũkio? Aca! w24.05 3 ¶3, 8

Nĩ ũndũ wa mathĩna ma kĩĩmbeca, andũ amwe nĩ magwĩte mũtego-inĩ wa gwĩtĩkĩra wĩra ũrabatara mathiĩ kũraihu na famĩlĩ ciao, no aingĩ nĩ monete atĩ rĩu rĩtikoragwo rĩrĩ itua rĩa ũũgĩ. Ũtanetĩkĩra wĩra mwerũ, nĩ wega gwĩciria ũrĩa wĩra ũcio ũkũhutia maũndũ maku ma kĩĩroho, handũ ha o kũrora tu mũcara ũrĩa ũrĩonaga. (Luk. 14:28) No wĩyũrie: ‘Hihi kĩhiko gĩakwa kĩngĩhutio atĩa ingĩthiĩ haraihu na ũrĩa tũhikanĩtie nake? Hihi nĩ ndĩrĩhotaga gũthiĩ mĩcemanio yothe, gũthiĩ ũtungata, na kũhũthĩra mahinda hamwe na aarĩ na ariũ a Ithe witũ?’ Ningĩ angĩkorũo ũrĩ na ciana, nĩ ũbatiĩ kwĩyũria kĩũria gĩkĩ kĩa bata: ‘Ingĩhota atĩa kũrera ciana ciakwa “ngĩcirũngaga na ngĩcitaaraga na njĩra ya Jehova” ndĩ kũraihu nacio?’ (Ef. 6:4) Ũgĩtua matua rũmagĩrĩra mwĩcirĩrie wa Jehova, no ti wa andũ a famĩlĩ kana arata arĩa matatĩĩte ithimi cia Bibilia. w25.03 29 ¶12

Mũkristiano ũtarĩ mũgimaru kĩĩroho no ahĩngĩcwo na njĩra hũthũ nĩ “wara wa andũ” kana “maheeni marĩa mabangĩtwo na wara,” mũhuhu, ngʼano cia maheeni iria itheremagio nĩ nyũmba cia mohoro, kana aheenererio nĩ aregenyũki. No akorũo arĩ mũndũ ũiguanagĩra ũiru, ũrehaga ngarari, ũrakaraga na ihenya, kana akagwa magerio-inĩ na njĩra hũthũ. (1 Kor. 3:3) Maandĩko maringithanagia gũkũra kĩĩroho na ũrĩa mwana akũraga agatuĩka mũndũ mũgima. (Ef. 4:15) Mwana ndakoragwo na ũtaũku mũnene, kwoguo nĩ abataraga gũtongorio. Kwa ngerekano, mũtumia no anyite kairĩtu gake guoko magĩkĩra barabara. O ũrĩa kairĩtu kau karaneneha, nyina no agetĩkĩrie gwĩkĩragia barabara, ĩndĩ no arĩkaririkanagia kwamba kũrora kana harĩ ngaari ĩrahĩtũka. No gatuĩka mũndũ mũgima, nĩ karĩhotaga gwĩthema mogwati ta macio gategũteithĩrĩrio nĩ mũndũ. Na njĩra o ta ĩyo, rĩrĩa Akristiano magimara kĩĩroho, nĩ mecũranagia motaaro ma Bibilia nĩguo magĩe na mwĩcirĩrie wa Jehova ũndũ-inĩ mũna na makerutanĩria gwĩka kũringana namo. w24.04 3 ¶5-6

Kwa ihinda iraihu, ageni a Jehova maarĩ o ciũmbe cia roho iria cikaraga nake kũrĩa igũrũ. Nĩ aacokire akĩũmba andũ, na o nao nĩ mangĩatuĩkire ageni hema-inĩ yake. Andũ amwe arĩa aanyitire ũgeni nĩ Enoko, Nuhu, Iburahimu, na Ayubu. Bibilia yonanagia atĩ maatuĩkire arata a Jehova tondũ nĩ maatwaranaga “na Ngai ũrĩa wa ma.” (Kĩam. 5:24; 6:9; Ayub. 29:4; Isa. 41:8) Kwa ihinda rĩa mĩaka mĩingĩ, Jehova nĩ athiĩte na mbere kũnyita arata ake ũgeni hema-inĩ yake. (Ezek. 37:​26, 27) Kwa ngerekano, ũrathi wa Ezekieli nĩ ũtũrutaga atĩ Jehova nĩ endaga mũno gũkorũo na ũrata wa hakuhĩ hamwe na athathaiya ake ehokeku. Eranĩire atĩ nĩ egũthondeka “kĩrĩkanĩro gĩa thayũ hamwe nao.” Ũrathi ũcio waragĩrĩria ihinda rĩrĩa arĩa marĩ na kĩĩrĩgĩrĩro gĩa gũthiĩ igũrũ hamwe na arĩa marĩ na kĩĩrĩgĩrĩro gĩa gũgaatũũra gũkũ thĩ magaakorũo hamwe hema-inĩ ya Jehova ya mũhaano marĩ “rũũru rũmwe.” (Joh. 10:16) Rĩrĩ nĩrĩo ihinda rĩu rĩarathĩtwo. w24.06 2 ¶2, 4; 3 ¶5

Tondũ tũrĩ andũ a Jehova, nĩ tũnyitaga mbaru Ũthamaki wa Ngai na ngoro yothe, na kaingĩ ũndũ ũcio nĩ ũbataraga ũmĩrĩru. (Mat. 6:33) Kwa ngerekano, thĩinĩ wa thĩ ĩno njũru, nĩ tũbataraga ũmĩrĩru wa gũtũũra kũringana na ithimi cia Jehova na kũhunjia ũhoro ũrĩa mwega wa Ũthamaki. Na kaingĩ nĩ tũbataraga ũmĩrĩru nĩguo tũikare tũtekũnyita mbaru maũndũ ma ũteti thĩinĩ wa thĩ ĩno ĩrathiĩ o ĩgayũkanĩte. (Joh. 18:36) Andũ aingĩ a Jehova managĩa na mathĩna ma kĩĩmbeca, makahũũrũo, kana magaikio njera, nĩ ũndũ wa kũrega kũnyita mbaru maũndũ ma gĩũteti kana kũingĩra njeshi-inĩ. Nĩ twĩkĩragwo hinya na tũkagĩa na ũcamba rĩrĩa twecũrania cionereria cia arĩa mananyita mbaru wathani wa Jehova marĩ na ũmĩrĩru. Mũthamaki witũ Jesu Kristo, nĩ aareganire na hatĩka cia kwĩingĩria maũndũ-inĩ ma ũteti ma mũtabarĩre wa Shaitani. (Mat. 4:​8-11; Joh. 6:​14, 15) Hingo ciothe eehokaga Jehova amũhe hinya ũrĩa aabataraga. w24.07 2 ¶4; 4 ¶7

Jehova aandĩkithirie ũhoro ũcio nĩguo tũgunĩke. Nĩ ũtũteithagia gũtaũkĩrũo kĩrĩa gĩtũmaga athũũre mehia mũno. Mehia matũmaga twamũranio na Ithe witũ wa igũrũ na maumĩrĩra mamo nĩ gĩkuũ. (Isa. 59:2) Na nĩkĩo Shaitani, o we kĩhumo gĩa thĩna ũcio wothe, endete kũingĩria andũ mehia-inĩ. Rĩrĩa Adamu na Hawa meehirie, no kũhoteke Shaitani eeciragia nĩ athararia muoroto wa Jehova harĩ andũ. No ndaamenyaga atĩ Jehova nĩ Ngai ũrĩ wendo mũnene. Ngai ndaacenjirie muoroto wake harĩ njiarũa cia Adamu na Hawa. Tondũ nĩ endete andũ mũno, nĩ aabangire o rĩo ũrĩa andũ othe mangĩgĩa na kĩĩrĩgĩrĩro. (Rom. 8:​20, 21) Jehova nĩ aamenyaga atĩ andũ amwe nĩ mangĩgathuura kũmwenda na macarie ũteithio wake nĩguo mahote kũrũa na mehia. Arĩ Ithe witũ nĩ aathondekire njĩra nĩguo andũ ta acio makũũrũo kuuma mehia-inĩ na mamũkuhĩrĩrie. w24.08 3 ¶3-4

Ndungata nyingĩ cia Jehova ikoragwo na mĩhangʼo mĩingĩ ũtũũro-inĩ wacio. Nĩ tũrutaga wĩra nĩguo tũhote kũhingia mabataro maitũ na ma famĩlĩ citũ. (1 Tim. 5:8) Ningĩ nĩ kũrĩ Akristiano aingĩ makoragwo makĩrũmbũiya andũ ao arĩa arwaru kana akũrũ. Na ithuothe nĩ tũbataraga kũhũthĩra mahinda tũkĩrũmbũiya ũgima witũ wa mwĩrĩ. Makĩria ma ũguo, kũrĩ o na mawĩra mangĩ tũkoragwo twĩhokeirũo kĩũngano-inĩ. Wĩra ũmwe wa bata twĩhokeirũo nĩ kũhunjia tũrĩ na kĩyo. Gũthoma Bibilia nĩ ũndũ ũmwe wa “bata makĩria” harĩ ithuĩ tũrĩ Akristiano, kwoguo nĩ tũrabatara kũũiga mbere ũtũũro-inĩ witũ. Thaburi ya mbere yugaga ũũ igũrũ rĩgiĩ mũndũ ũrĩa ũkoragwo na gĩkeno: “Watho wa Jehova nĩguo ũmũkenagia, na athomaga watho ũcio Wake na mĩheehũ ũtukũ na mũthenya.” (Thab. 1:​1, 2) Ũndũ ũcio ũronania atĩ nĩ twagĩrĩirũo kũbanga mahinda ma gũthomaga Bibilia. Hihi nĩ mathaa marĩkũ mega ma gũthomaga Bibilia? Nĩ gũkũringana na mũndũ kĩũmbe. Ũndũ ũrĩa wa bata nĩ gũthuura mathaa marĩa ũrĩhotaga gũthoma ũtegũtĩrĩria. w24.09 3 ¶5-6

Hihi kũrĩ hĩndĩ Mũkristiano mũgimaru kĩĩroho abataraga ũteithio kuuma harĩ andũ angĩ? Ĩĩ. Akristiano agimaru kĩĩroho rĩmwe nĩ mabataraga gũcaria ũteithio. Mũndũ ũtarĩ mũgimaru kĩĩroho no erĩgĩrĩre andũ arĩa angĩ mamwĩre ũrĩa abatiĩ gwĩka kana mamũtuĩre matua marĩa we mwene agĩrĩirũo gwĩtuĩra. Ngũrani na ũguo, Mũkristiano mũgimaru kĩĩroho nĩ ahoyaga ũteithio kuuma kũrĩ andũ marĩ na ũũgĩ na ũmenyeru makĩria, ĩndĩ nĩ ataũkagĩrũo atĩ Jehova erĩgagĩrĩra “[akuue] mũrigo wake mwene.” O ta ũrĩa andũ agima matakoragwo mahaanaine, no taguo Akristiano agimaru kĩĩroho matakoragwo na ngumo ihaanaine, ta ũũgĩ, ũmĩrĩru, ũtaana, na tha. Ningĩ rĩrĩa Akristiano erĩ agimaru kĩĩroho macemania na ũndũ ũhaanaine, no matue matua ngũrani ĩndĩ mararingana na motaaro ma Bibilia. Kaingĩ ũndũ ũcio wonekaga maũndũ-inĩ marahutania na thamiri. Kwoguo matituagĩra arĩa angĩ rĩrĩa maatua matua ngũrani na mao. Handũ ha ũguo merutanagĩria gũtũũria thayũ.—Rom. 14:10; 1 Kor. 1:10. w24.04 3-4 ¶7-8

Ũngĩka atĩa angĩkorũo rĩmwe nĩ ũiguaga ũtarĩ kĩene? Thomaga na ũgecũrania mĩhari ya Bibilia ĩrĩa ĩrakũhe ũũma atĩ Jehova nĩ onaga ũrĩ wa bata. Angĩkorũo nĩ ũremetwo gũkinyĩra muoroto mũna wĩigĩire kana ũgakua ngoro tondũ ndũrahota kũhingia maũndũ maingĩ ta andũ arĩa angĩ, ndũkemene. Ririkana atĩ Jehova nderĩgagĩrĩra wĩke maũndũ makĩrĩte ũhoti waku. (Thab. 103:​13, 14) Angĩkorũo harĩ mũndũ wanagwĩka maũndũ moru, ndũgecokagĩrĩrie mahĩtia. Ririkana atĩ andũ arĩa Jehova agaatuĩra nĩ arĩa mekaga arĩa angĩ maũndũ moru, no ti arĩa mekĩtwo maũndũ macio. (1 Pet. 3:12) Korũo na ma atĩ Jehova no akũhũthĩre gũteithia arĩa angĩ. Nĩ akũheete mweke wa mwanya wa kũrutithania wĩra nake wĩra-inĩ wa kũhunjia. (1 Kor. 3:9) Nĩ ũndũ wa maũndũ maritũ marĩa ũgereire ũtũũro-inĩ, no kũhoteke nĩ ũhotaga kwĩĩkĩra iratũ-inĩ cia andũ arĩa angĩ na ũgataũkĩrũo nĩ ũrĩa maraigua. No ũkorũo ũrĩ ũteithio mũnene harĩ o. w24.10 7-8 ¶6-7

Jehova nĩ aiguaga ũũru rĩrĩa ona tũgĩkwo maũndũ matarĩ ma kĩhooto, tondũ Bibilia ĩtwĩraga atĩ “Jehova nĩ endete kĩhooto.” (Thab. 37:28) Jesu nĩ atũheete ũũma atĩ Jehova nĩ arĩtigagĩrĩra “kĩhooto [nĩ kĩoneka] o na ihenya” ihinda rĩrĩa rĩagĩrĩire rĩakinya. Na ica ikuhĩ nĩ ekweheria maũndũ marĩa mothe matũmaga tũthĩnĩke na aniine wagi wothe wa kĩhooto. (Thab. 72:​1, 2) O twetereire ihinda rĩrĩa thĩ yothe ĩkaaiyũrũo nĩ ũthingu, Jehova nĩ atũteithagia kũhiũrania na wagi wa kĩhooto. (2 Pet. 3:13) Nĩ atũrutaga ũrĩa tũngĩĩthema gwĩka ũndũ ũtarĩ wa ũũgĩ rĩrĩa twekwo ũndũ ũtarĩ wa kĩhooto. Kũgerera kĩonereria gĩkinyanĩru kĩa Mũrũwe, Jehova nĩ atuonetie ũrĩa tũngĩhiũrania na wagi wa kĩhooto. Ningĩ nĩ atũheete motaaro ma Bibilia marĩa tũngĩhũthĩra rĩrĩa twekwo maũndũ matarĩ ma kĩhooto. w24.11 2-3 ¶3-4

Jesu kũũria arutwo ake mahe kĩrĩndĩ irio nĩ ũndũ ũngĩoonekire ta ũtangĩahotekire tondũ kĩarĩ na arũme ta 5,000, na hihi magĩtaranĩrio na atumia na ciana maarĩ andũ ta 15,000. (Mat. 14:21) Andrea aaugire ũũ: “Haha harĩ na kahĩĩ karĩ na mĩgate ĩtano ya cairi na tũthamaki twĩrĩ tũnini. No icio nĩ kĩĩ harĩ kĩrĩndĩ kĩnene ũũ?” (Joh. 6:9) Mĩgate ya cairi nĩ yarĩagwo kaingĩ matukũ-inĩ macio, na no kũhoteke tũthamaki tũu twarĩ twĩkĩre cumbĩ na tũkomithio. No mĩgate ĩyo ĩtano na tũthamaki tũu twĩrĩ itingĩaiganire kũhũnia andũ acio othe. Tondũ Jesu nĩ eendaga kuonia andũ acio ũtaana, aameerire maikare thĩ nyeki-inĩ marĩ ikundi. (Mar. 6:​39, 40; Joh. 6:​11-13) Thutha ũcio agĩcokeria Ithe ngatho nĩ ũndũ wa mĩgate na thamaki icio. Warĩ ũndũ mwagĩrĩru gũcokeria Ngai ngatho tondũ nĩwe wamaheete irio icio. Nĩ ũndũ mwega kũrũmĩrĩra kĩonereria kĩa Jesu na njĩra ya kũhoyaga tũtanarĩa irio. Jesu aacokire akĩneana irio icio igaĩrũo andũ, na andũ makĩrĩa nginya makĩhũna. w24.12 2-3 ¶3-4

Rĩrĩa Jesu aarĩ gũkũ thĩ, nĩ aagoocithirie Jehova na njĩra ya kuonania atĩ nĩwe wamũheaga hinya wa kũringa ciama. (Mar. 5:​18-20) Ningĩ Jesu nĩ aaheaga Jehova riri na njĩra ya kwaria maũndũ mega mamwĩgiĩ, o hamwe na kũrũmbũyania na andũ arĩa angĩ na njĩra ya wendo. Hĩndĩ ĩmwe Jesu akĩrutana thunagogi-inĩ, haarĩ na mũtumia wamũthikagĩrĩria wathumbũrĩtwo nĩ ndaimono kwa ihinda rĩa mĩaka 18. Ndaimono ĩyo yatũmĩte mwĩrĩ wa mũtumia ũcio wĩyune ũndũ ataahotaga kũrũgama ehandĩte. No nginya akorũo nĩ aatangĩkaga mũno. Ĩndĩ Jesu nĩ aamũcaĩire, na kwoguo agĩthiĩ harĩ we na akĩmwĩra ũũ arĩ na tha nyingĩ: “Mũtumia ũyũ, nĩ wohorũo kuuma harĩ wathe waku.” Agĩcoka akĩigĩrĩra mũtumia ũcio moko, na o hĩndĩ ĩyo akĩrũgama arũngarĩte na “akĩambĩrĩria kũgooca Ngai” nĩ ũndũ wa kũhonio. (Luk. 13:​10-13) Mũtumia ũcio aarĩ na gĩtũmi kĩega gĩa kũhe Jehova riri, na noguo o na ithuĩ. w25.01 2-3 ¶3-4

Hihi no tũhote gũcokia kĩrĩa gĩothe Adamu na Hawa maateire? Aca, tũtirĩ na ũhoti ũcio. (Thab. 49:​7-9) Tiga nĩ ũteithio wa Jehova, tũtingĩrĩ na kĩĩrĩgĩrĩro gĩa gũkoona muoyo o na kana kũriũkio. Tũngĩkuuaga tũtarĩ na kĩĩrĩgĩrĩro o ta nyamũ. (Koh. 3:19; 2 Pet. 2:12) Jehova, Ithe witũ ũtwendete, nĩ atũheete kĩheo kĩrĩa kĩrĩhĩire thiirĩ wa mehia marĩa twagaire kuuma kũrĩ Adamu. Jesu aataarĩirie kĩheo kĩu na njĩra ĩno: “Ngai nĩ eendire kĩrĩndĩ gĩa gũkũ thĩ mũno, nginya akĩruta Mũrũ wake wa mũmwe, nĩguo mũndũ o wothe ũrĩonanagia wĩtĩkio harĩ we ndakananiinwo no akaagĩa na muoyo wa tene na tene.” (Joh. 3:16) Makĩria ma ũguo, kĩheo kĩu nĩ gĩtũheaga mweke wa gũkorũo na ũrata mwega na Jehova. No tũgunĩke kuumana na kĩheo kĩu kĩa magegania nĩguo tuoherũo mehia kana “mathiirĩ” maitũ. w25.02 3 ¶3-6

Nĩ kĩĩ gĩateithirie Saulu gũkinyĩrĩra kũbatithio? Rĩrĩa Jesu aarĩirie Saulu kuuma igũrũ, ũtheri mũnene nĩ wamũmũrĩkire nginya agĩtuĩka mũtumumu. (Atũm. 9:​3-9) Kwa ihinda rĩa thikũ ithatũ, Saulu nĩ eehingire kũrĩa na kũnyua na no mũhaka akorũo nĩ eecũranirie ũhoro wĩgiĩ ũndũ ũcio wamũkorete. Ũndũ ũcio nĩ wamũteithirie gũkorũo na ma atĩ Jesu nĩwe warĩ Mesia na atĩ arũmĩrĩri ake nĩo maarĩ na ũthathaiya ũrĩa wa ma. Nĩ harĩ maũndũ tũngĩĩruta kuumana na Saulu. Nĩ angĩetĩkĩririe mwĩtĩo kana gwĩtigĩra andũ kũmũgirĩrĩrie kũbatithio, no ndeekire ũguo. Saulu ndetigĩrire gũtuĩka Mũkristiano o na gũtuĩka nĩ aamenyaga atĩ nĩ angĩanyaririrũo. (Atũm. 9:​15, 16; 20:​22, 23) Thutha wa kũbatithio, nĩ aathiire na mbere kwĩhoka atĩ Jehova nĩ angĩamũteithirie gũkirĩrĩria magerio. (2 Kor. 4:​7-10) O nawe wĩtĩkio waku no ũgerio kana ũcemanie na ũkararia thutha wa kũbatithio. O na kũrĩ ũguo, no ũkorũo na ma atĩ hingo ciothe Ngai na Kristo nĩ marĩkũheaga ũteithio ũrĩa ũrabatara, nĩguo ũhote gũkirĩrĩria na gũikara ũrĩ mwĩhokeku.—Afil. 4:13. w25.03 4 ¶8-9

Kwĩigĩra muoroto wa gũthomaga Bibilia nĩ ũndũ mwega. No nĩ harĩ na ũndũ ũngĩ tũbatiĩ gwĩka nĩgetha tũgunĩke biũ kuumana na maũndũ marĩa tũrathoma Kiugo-inĩ kĩa Ngai. Ta wĩcirie ngerekano ĩno: Mĩmera nĩ ĩbataraga maĩ nĩgetha ĩhote gũkũra. No kũngiura mbura nene o rĩmwe, tĩri no ũremwo nĩ kũgucia maĩ macio mothe na kwoguo ĩngĩthiĩ na mbere kuura, no yage kũguna mĩmera. Tĩri nĩ ũbataraga ihinda rĩa kũgucia maĩ kahora nĩguo mateithie mĩmera gũkũra. Na njĩra o ta ĩyo, nĩ tũbatiĩ gwĩthema gũthomaga Bibilia ihenya ihenya ũndũ tũkũremwo nĩ kũrikĩria maũndũ marĩa tũrathoma, kũmaririkana, na kũmahũthĩra ũtũũro-inĩ. (Jak. 1:24) Hihi rĩmwe nĩ wĩkoraga ũgĩthoma Bibilia ihenya ihenya? Ũngĩĩkora ũgĩka ũguo, tithia na ũthome kahora ũndũ ũkũhota gwĩciria maũndũ marĩa ũrathoma kana marĩa warĩkia gũthoma. No ũthuure kuongerera ihinda rĩaku rĩa kwĩruta nĩguo ũkagĩa na mahinda ma gwĩciria kana gwĩcũrania kĩrĩa wathoma. w24.09 4 ¶7-9

Rĩrĩa athuri a kĩũngano mamũkĩra ũtongoria, mabatiĩ kũũthoma na kinyi, na meke ũrĩa wothe mangĩhota nĩguo maũrũmĩrĩre. Nĩ mamũkagĩra ũtongoria wĩgiĩ ũrĩa mabatiĩ kũruta tũcunjĩ mĩcemanio-inĩ, ũrĩa mabatiĩ kũhoithia kĩũngano-inĩ, na ũrĩa mangĩrũmbũiya ngʼondu cia Kristo. Rĩrĩa athuri marũmĩrĩra ũtongoria wa ithondeka, nĩ matũmaga aarĩ na ariũ a Ithe witũ maigue atĩ Jehova nĩ amendete na nĩ amarũmbũyagia. Rĩrĩa twaheo ũtongoria nĩ athuri a kĩũngano, twagĩrĩirũo kũũrũmĩrĩra twĩyendeire. Tweka ũguo, nĩ tũrĩmahũthagĩria wĩra ũrĩa mehokeirũo. Bibilia ĩtwĩkĩraga ngoro twathĩkagĩre arĩa matongoragia maũndũ na tũmenyihagĩrie. (Ahib. 13:​7, 17) Rĩmwe ti hahũthũ gwĩka ũguo, tondũ ariũ a Ithe witũ acio ti akinyanĩru. No tũngĩroraga mũno mawathe mao handũ ha ngumo ciao njega, tũngĩkorũo tũkĩnyita mbaru thũ citũ. Na njĩra ĩrĩkũ? No twambĩrĩrie gwĩkĩrĩra nganja ithondeka rĩa Jehova. w24.04 10 ¶11-12

Hihi andũ arĩa othe magaakua hĩndĩ ya thĩna ũrĩa mũnene magaakorũo matuĩrĩirũo kũniinwo tene na tene ũndũ matarĩ na kĩĩrĩgĩrĩro gĩa gũkaariũkio? Maandĩko monanagia wega atĩ akararia arĩa makaaniinwo nĩ Jehova na mbũtũ ciake hĩndĩ ya Hari–Magedoni matikaariũkio. (2 Thes. 1:​6-10) Ĩ nao andũ arĩa hihi magaakua hĩndĩ ya thĩna ũcio mũnene nĩ ũndũ wa icanjama cia ndũire, aksidenti, kana kũũragwo nĩ andũ angĩ? (Koh. 9:11; Zek. 14:13) Hihi amwe ao nĩ magaakorũo gatagatĩ-inĩ ka andũ “matarĩ athingu” arĩa makaariũkio thĩinĩ wa thĩ njerũ? (Atũm. 24:15) Tũtiũĩ. No nĩ tũĩ maũndũ maigana ũna marĩa mageekĩka ihinda rĩũkĩte. Kwa ngerekano, nĩ tũĩ atĩ hĩndĩ ya Hari–Magedoni andũ magaatuĩrũo kũringana na ũrĩa maarũmbũyanirie na ariũ a Ithe na Kristo. (Mat. 25:40) Arĩa magaatuĩrũo atĩ nĩ a mũhaano wa ngʼondu, nĩ magaakorũo monanĩtie atĩ nĩ manyitaga mbaru arĩa aitĩrĩrie maguta o hamwe na Kristo.—Kũg. 12:17. w24.05 10-11 ¶9-11

Bibilia yugaga atĩ tũratũũra “mahinda ma ũgwati maritũ kũhiũrania namo.” (2 Tim. 3:1) Andũ a Jehova nĩ macemanagia na moritũ marĩa mũndũ o wothe aragerera mũtabarĩre-inĩ ũyũ wa maũndũ, no ningĩ nĩ macemanagia na ũkararia na makanyarirũo. Nĩ kĩĩ gĩtũteithagia gũthiĩ na mbere gũthathaiya Jehova o na kũrĩ na moritũ macio? Ũndũ ũmwe wa bata nĩ atĩ nĩ tũmenyete atĩ Jehova nĩ “Ngai ũrĩa ũtũũraga muoyo.” (Jer. 10:10; 2 Tim. 1:12) Jehova nĩ Ngai wa biũ ũrĩa ũtũtiiragĩrĩra hĩndĩ ya magerio, na agacaria mĩeke ya gũtũteithia. (2 Maũ. 16:9; Thab. 23:4) Kũririkana atĩ we nĩ Ngai ũrĩa ũtũũraga muoyo no gũtũhe hinya wa kũhiũrania na igerio o rĩothe tũngĩcemania narĩo. w24.06 20 ¶1-2

No mũhaka tũtũũre twĩhokete ithondeka rĩa Jehova. Rĩrĩa kuoneka atĩ nĩ tũrabatara kũgarũrĩra ũtaũku witũ ũhoro-inĩ wĩgiĩ ũrutani mũna wa Bibilia kana ũndũ ũngĩ ũhutanĩtie na wĩra wa Ũthamaki, arĩa matongoragia maũndũ ithondeka-inĩ nĩ makoragwo mehaarĩirie gwĩka mogarũrũku marĩa marabatarania. Mekaga ũguo tondũ makĩria ma ũndũ ũngĩ o wothe, mendaga gũkenia Jehova. Ningĩ nĩ matigagĩrĩra atĩ matua mao mehocetie harĩ Kiugo kĩa Ngai, tondũ nĩkĩo gĩthimi kĩrĩa andũ othe a Jehova mabatiĩ kũrũmĩrĩra. Mũtũmwo Paulo aatũtaarire ũũ: “Thiĩ na mbere kũrũmia gĩthimi gĩa ciugo iria ciagĩrĩire.” (2 Tim. 1:13) “Gĩthimi gĩa ciugo iria ciagĩrĩire” nĩ morutani ma Gĩkristiano marĩa marĩ Bibilia-inĩ. (Joh. 17:17) Morutani ta macio nĩmo makoragwo marĩ mũthingi wa wĩtĩkio witũ. Ithondeka rĩa Jehova nĩ rĩtũrutĩte kũrũmia gĩthimi kĩu. Gũikara tũrũmĩtie gĩthimi kĩu nĩ gũtũmaga tũgĩe na irathimo. w24.07 11-12 ¶12-13

Tondũ Petero nĩ aamenyaga ũrĩa aaiguire thutha wa kuoherũo, nĩ angĩahotire kũruta andũ ũhoro wĩgiĩ kwĩrira na kuoherũo. Ihinda inini thutha wa gĩathĩ kĩa Pentekoste, Petero nĩ aarutĩire kĩrĩndĩ kĩa Ayahudi mataarĩ etĩkia mĩario, akĩmataarĩria atĩ nĩ mooragĩte Mesia. Ĩndĩ nĩ aamomĩrĩirie akĩmeera ũũ: “Nĩ ũndũ ũcio-rĩ, mwĩrirei, na mũgarũrũke nĩguo mehia manyu marihũrũo, nĩguo hagĩe na mahinda ma gũcanjamũra moimĩte kũrĩ Jehova we mwene.” (Atũm. 3:​14, 15, 17, 19) Na njĩra ĩyo Petero nĩ oonanirie atĩ kwĩrira gũtindĩkaga mwĩhia kũgarũrũka, agatigana na mwĩcirĩrie mũhĩtanu na ciĩko ciake njũru, na akaambĩrĩria mũtũũrĩre mwerũ ũrakenia Jehova. Ningĩ Petero nĩ oonanirie atĩ Jehova nĩ angĩamoheire, na ahuure mehia mao mathire biũ. Na githĩ ti ũndũ wa gũtũũmĩrĩria kũmenya atĩ Jehova nĩ akoragwo ehaarĩirie gũtuohera, nginya rĩrĩa tweka mehia maritũ? w24.08 12 ¶14

No tũhote gwĩthema gũtengʼerania na indo cia kĩĩmwĩrĩ angĩkorũo nĩ twĩtĩkĩtie biũ atĩ mũthia wa mũtabarĩre ũyũ wa maũndũ nĩ ũkuhĩrĩirie. Hĩndĩ ya thĩna ũrĩa mũnene andũ nĩ “magaaikia betha ciao njĩra-inĩ,” tondũ nĩ makaamenya atĩ “betha ciao o na thahabu ciao itikaahota kũmahonokia mũthenya wa marakara ma Jehova.” (Ezek. 7:19) Handũ ha gwĩtungumania tũgĩcaria mbeca nyingĩ, tũrabatara gũtuaga matua mangĩtũteithia gũikara ũtũũro mũhũthũ, ĩndĩ ũrĩ na ũigananĩru. Kwoguo nĩ tũrĩĩthemaga kwĩingĩria mathiirĩ-inĩ matarĩ ma o mũhaka kana gũkorũo na indo nyingĩ irabatara mahinda maitũ maingĩ ma gũciramata. Ningĩ nĩ twagĩrĩirũo gwĩthema gũkorũo twendete mũno indo iria twĩ nacio. (Mat. 6:​19, 24) Ma nĩ atĩ, o ũrĩa mũthia wa mũtabarĩre ũyũ wa maũndũ ũrakuhĩrĩria, wĩtĩkio witũ nĩ ũrĩgeragio ũhoro-inĩ wĩgiĩ indo cia kĩĩmwĩrĩ na maũndũ mangĩ. w24.09 11 ¶13-14

Nĩ kũrĩ mawathe mamwe maitũ tũngĩhota gũtooria biũ. No mangĩ no tũbatare kũrũa namo kwa ihinda iraihu. Ta wĩcirie ũhoro wa mũtũmwo Petero. Nĩ aakaanire Jesu maita matatũ nĩ ũndũ wa gwĩtigĩra andũ. (Mat. 26:​69-75) Nĩ kũngĩonekire ta Petero aatooretie thĩna ũcio wa gwĩtigĩra andũ rĩrĩa aahunjirie arĩ na ũcamba mbere ya Sanhedrini. (Atũm. 5:​27-29) No mĩaka ĩigana ũna thutha ũcio, harĩ hĩndĩ aatigĩte kũrĩanĩra na Akristiano arĩa mataarĩ Ayahudi nĩ ũndũ wa “gwĩtigĩra gĩkundi kĩa arĩa maarĩ aruu.” (Gal. 2:​11, 12) Ũndũ ũcio ũkĩonania atĩ ndaatooretie biũ thĩna wa gwĩtigĩra andũ, na hihi o na aabatarire kũrũa naguo kwa ihinda iraihu. O na ithuĩ no twĩkore ũndũ-inĩ ta ũcio. O na kũrĩ ũguo, no tũhote kũregana na mũtugo tũtarĩ tũraũtooria tũngĩrũmĩrĩra ũtaaro wa Jesu wa ‘gũikara twĩiguĩte.’ (Mat. 26:41) O na rĩrĩa ũraigua ũrĩ na hinya kĩĩroho, thiĩ na mbere gwĩthema maũndũ mangĩkũingĩria magerio-inĩ. Ndũkanatige gwĩka maũndũ marĩa magũteithĩtie kũrũa na wathe waku.—2 Pet. 3:14. w24.07 18-19 ¶17-19

Gũtirĩ mũndũ wanonania ũtaana gũkĩra Jesu. Rĩrĩa aarĩ gũkũ thĩ, nĩ aateithagia andũ na njĩra ya kũmaringĩra ciama. (Luk. 9:​12-17) Na nĩ aaheanire kĩheo kĩrĩa kĩa goro makĩria rĩrĩa aarutire muoyo wake nĩ ũndũ witũ. (Joh. 15:13) Ningĩ kuuma rĩrĩa aariũkirio, nĩ athiĩte na mbere gũtuonia ũtaana. O ta ũrĩa eeranĩire, nĩ ahoete Jehova atũheage roho wake mũtheru nĩguo ũtũrute na ũtũũmagĩrĩrie. (Joh. 14:​16, 17, kohoro ka magũrũ-inĩ; 16:13) Na kũgerera mĩcemanio itũ ya kĩũngano, Jesu nĩ athiĩte na mbere gũtũhe kĩrĩa tũrabatara nĩguo tũtue andũ arutwo thĩinĩ wa thĩ yothe. (Mat. 28:​18-20) Mũtũmwo Paulo aandĩkire atĩ rĩrĩa Jesu aambatire igũrũ, nĩ aaheanire “arũme marĩ ta iheo.” (Ef. 4:​7, 8) Paulo aataarĩirie atĩ Jesu aaheanire iheo icio irĩ cia gũteithia kĩũngano na njĩra itiganĩte. (Ef. 1:​22, 23; 4:​11-13) Ũrĩa kũrĩ nĩ atĩ arũme acio ti akinyanĩru, na kwoguo rĩmwe no mahĩtie. (Jak. 3:2) No Mwathani witũ Jesu Kristo nĩ atũheete arũme acio marĩ ta iheo nĩguo matũteithagie. w24.10 18 ¶1-2

Daudi eerire mũrũwe Suleimani atĩ angĩagaacĩrire tu angĩathiire na mbere gwathĩkĩra Jehova Ngai. Ũndũ wa kĩeha nĩ atĩ, thutha-inĩ Suleimani nĩ aambĩrĩirie gũthathaiya ngai ingĩ. Kwoguo agĩtiga gwĩtĩkĩrĩka harĩ Jehova, na akĩũrũo nĩ ũũgĩ wa gwathana na njĩra ya kĩhooto na ũthingu. (1 Ath. 11:​9, 10; 12:4) Tũreruta atĩa? Gwathĩka nĩ gũtũmaga tũgaacĩre. (Thab. 1:​1-3) Ma nĩ atĩ Jehova ndatwĩrĩire ũtonga na riri ta Suleimani. No twamwathĩkĩra, nĩ arĩtũheaga ũũgĩ wa gũtũteithia gũtua matua mega. (Thim. 2:​6, 7; Jak. 1:5) Motaaro make no matũteithie rĩrĩa tũratua matua megiĩ maũndũ ta wĩra, gĩthomo, mbeca, na maũndũ ma gwĩkenia. Kũrũmĩrĩra motaaro ma Jehova nĩ gũtũgitagĩra kuumana na ũndũ o wothe ũngĩtũrehera mwanangĩko wa gũtũũra. (Thim. 2:​10, 11) Ningĩ ũndũ ũcio nĩ ũtũmaga tũgĩe na arata ega, na famĩlĩ citũ igakorũo na gĩkeno. w24.11 10-11 ¶11-12

Aciari nĩ makoragwo na mĩeke mĩingĩ ya kwarĩrĩria na ciana ciao ũhoro wĩgiĩ Bibilia kana wĩgiĩ Ngai. No magĩe na mĩeke ya gwĩka ũguo ta rĩrĩa mathiĩte gũceera museum. No wonie mwana waku indo imwe cia tene irĩ kuo iria irahutania na ũhoro ũrĩ Bibilia-inĩ. Ũndũ ũcio no ũmũteithie kuona atĩ ũhoro ũrĩa ũrĩ Bibilia-inĩ ũkoragwo ũrĩ wa ma. Ningĩ no wonie mwana waku mbica cia indo cia tene Intaneti-inĩ kana mabuku-inĩ maitũ. Kwa ngerekano, no ũmuonie ihiga rĩkoretwo kuo mĩaka 3,000 rĩĩtagwo Ihiga rĩa Moabi, rĩrĩa rĩkoragwo na rĩĩtwa rĩa Ngai, Jehova. Mũhaano warĩo nĩ ũkoragwo thĩinĩ wa museum ya “Bibilia na Rĩĩtwa rĩa Ngai,” ĩrĩa ĩkoragwo wabici-inĩ nene ya Aira a Jehova thĩinĩ wa Warwick, New York. Ningĩ ihiga rĩu nĩ rĩrĩ ũhoro ũronania atĩ Mũthamaki Mesha wa Moabi nĩ aaremeire Isiraeli. Ũndũ ũcio nĩ ũratwarana na ũrĩa Bibilia yugaga. (2 Ath. 3:​4, 5) Rĩrĩa mwana waku eyonera ũira ũronania atĩ Bibilia nĩ ya ma na ndĩrĩ mahĩtia, wĩtĩkio wake nĩ ũgĩaga na hinya makĩria. w24.12 14 ¶4; 15 ¶6