Ũhoro Mwega Ũrĩa Waandĩkirũo nĩ Mathayo 4:1-25
4 Jesu agĩcoka agĩtongorio nĩ roho nginya werũ-inĩ akagerio+ nĩ Mũcukani.+
2 Thutha wa kwĩhinga kũrĩa irio thikũ 40 ũtukũ na mũthenya, akĩigua ahũtiĩ.
3 Nake Mũgerania+ agĩũka akĩmwĩra ũũ: “Angĩkorũo ũrĩ mũrũ wa Ngai, ĩra mahiga maya matuĩke mĩgate.”
4 No Jesu akĩmũcokeria ũũ: “Nĩ kwandĩke atĩrĩ: ‘Mũndũ ndatũũragio nĩ mũgate wiki, no nĩ kiugo gĩothe kĩrĩa kiumaga kanua-inĩ ka Jehova.’”*+
5 Mũcukani agĩcoka akĩmũtwara thĩinĩ wa itũũra rĩrĩa itheru+ akĩmũrũgamia gacũmbĩrĩ-inĩ ka hekarũ+
6 na akĩmwĩra atĩrĩ: “Angĩkorũo ũrĩ mũrũ wa Ngai, wĩgũithie thĩ, tondũ nĩ kwandĩke ũũ: ‘Nĩ agaatha araika ake ũhoro-inĩ waku,’ na ‘Nĩ magaagũkuua na moko mao, nĩguo ndũkagũthwo kũgũrũ nĩ ihiga.’”+
7 Jesu akĩmwĩra: “O na ningĩ nĩ kwandĩke atĩrĩ: ‘Ndũkanagerie Jehova* Ngai waku.’”+
8 Ningĩ Mũcukani akĩmũtwara kĩrĩma-inĩ kĩraya mũno na akĩmuonia mothamaki mothe ma thĩ na riri wamo.+
9 Akĩmwĩra atĩrĩ: “Maũndũ maya mothe nĩ ngũkũhe ũngĩndurĩria maru wĩke gĩĩko gĩa gũũthathaiya.”
10 Nake Jesu akĩmwĩra ũũ: “Thiĩ, Shaitani! Tondũ nĩ kwandĩke atĩrĩ: ‘Wagĩrĩirũo gũthathaiya Jehova* Ngai waku,+ na nowe wiki wagĩrĩirũo kũrutĩra ũtungata mũtheru.’”+
11 Hĩndĩ ĩyo Mũcukani agĩtigana nake,+ na araika magĩũka makĩambĩrĩria kũmũtungatĩra.+
12 Na rĩrĩ, rĩrĩa aaiguire atĩ Johana nĩ anyitĩtwo,+ akiuma kũu agĩthiĩ Galili.+
13 Ningĩ thutha wa kuuma Nazarethi, agĩthiĩ akĩambĩrĩria gũikara Kaperinaumu+ hakuhĩ na iria, icigo-inĩ cia Zebuluni na Nafitali,
14 nĩguo ciugo iria ciaandĩkirũo nĩ mũnabii Isaia ihinge, rĩrĩa ooigire ũũ:
15 “Inyuĩ bũrũri wa Zebuluni na Nafitali, inyuĩ mũrĩ barabara-inĩ ya gũthiĩ iria-inĩ, mũrĩmo ũrĩa ũngĩ wa Jorodani, Galili kwa andũ a ndũrĩrĩ!
16 Andũ arĩa maikaraga nduma-inĩ nĩ moonire ũtheri mũnene, nao arĩa maikaraga gĩcigo-inĩ kĩrĩ na kĩĩruru gĩa gĩkuũ, makĩarĩrũo+ nĩ ũtheri.”+
17 Kuuma hĩndĩ ĩyo, Jesu akĩambĩrĩria kũhunjia akiugaga: “Mwĩrirei, tondũ Ũthamaki wa igũrũ nĩ ũkuhĩrĩirie.”+
18 Na rĩrĩa aathiagĩra rũteere-inĩ rwa Iria rĩa Galili, akĩona ariũ erĩ a nyina ũmwe, Simoni ũrĩa wĩtagwo Petero,+ na Andrea mũrũ wa nyina, magĩikia neti iria-inĩ, nĩ gũkorũo maarĩ ategi a thamaki.+
19 Nake akĩmeera ũũ: “Nũmĩrĩrai, na nĩ ngũmũtua ategi a andũ.”+
20 O hĩndĩ ĩyo magĩtiga neti ciao, makĩmũrũmĩrĩra.+
21 Jesu oima hau, akĩona andũ angĩ erĩ a nyina ũmwe, Jakubu mũrũ wa Zebedi na Johana mũrũ wa nyina.+ Maarĩ thĩinĩ wa gatarũ hamwe na ithe wao Zebedi magĩtuma neti ciao, nake akĩmeta.+
22 O hĩndĩ ĩyo magĩtiga gatarũ, na magĩtiga ithe wao, makĩmũrũmĩrĩra.
23 Agĩcoka agĩthiĩ Galili guothe,+ akĩrutanaga thunagogi-inĩ+ ciao akĩhunjagia ũhoro ũrĩa mwega wa Ũthamaki na akĩhonagia andũ mĩrimũ ya mĩthemba yothe na wathe wa mĩthemba yothe.+
24 Naguo ũhoro wake ũgĩtherema Siria guothe, na makĩmũrehera andũ arĩa othe maathĩnagio nĩ mĩrimũ na mĩnyamaro ĩtiganĩte,+ arĩa maarĩ na ndaimono,+ kĩbaba,+ na arĩa maakuĩte ciĩga, nake akĩmahonia.
25 Nĩ ũndũ ũcio, kĩrĩndĩ kĩnene kĩa andũ kuuma Galili, Dekapoli,* Jerusalemu, Judea na mũrĩmo ũrĩa ũngĩ wa Jorodani, gĩkĩmũrũmĩrĩra.
Tũũhoro twa magũrũ-inĩ
^ Rora Ũhoro Muongerere A5.
^ Rora Ũhoro Muongerere A5.
^ Rora Ũhoro Muongerere A5.
^ Kana “Gĩcigo kĩa Matũũra Ikũmi.”
