Ũhoro Mwega Ũrĩa Waandĩkirũo nĩ Mathayo 17:1-27
17 Thikũ ithathatũ thutha ũcio, Jesu akĩoya Petero na Jakubu na Johana mũrũ wa nyina akĩmambatia kĩrĩma-inĩ kĩnene mũno marĩ oiki.+
2 Na arĩ mbere yao akĩgarũrũka ũrĩa aatariĩ; ũthiũ wake ũgĩkenga o ta riũa, na nguo ciake cia igũrũ ikĩhenia* o ta ũtheri.+
3 Na rĩrĩ, Musa na Elija makĩmoimĩrĩra, na maaranagĩria na Jesu.
4 Petero akĩra Jesu atĩrĩ: “Mwathani, nĩ wega gũkorũo tũrĩ haha. Ũngĩenda no nyambe hema ithatũ haha, ĩmwe yaku, ĩmwe ya Musa, na ĩmwe ya Elija.”
5 O hĩndĩ ĩyo aaragia, makĩhumbĩrũo nĩ itu rĩkengu, na rĩrĩ, mũgambo ũkiuma thĩinĩ wa itu rĩu ũkiuga: “Ũyũ nĩ Mũrũ wakwa, ũrĩa nyendete, na nĩ ndĩmwĩtĩkĩrĩte.+ Mũthikagĩrĩriei.”+
6 Arutwo maigua ũguo, makĩĩgũithia magĩturumithia mothiũ mao thĩ na magĩĩtigĩra mũno.
7 Jesu agĩcoka akĩmakuhĩrĩria, akĩmahutia, akĩmeera ũũ: “Ũkĩrai. Mũtigetigĩre.”
8 Rĩrĩa maainamũkire, gũtirĩ mũndũ ũngĩ moonire tiga o Jesu wiki.
9 Na rĩrĩa maaikũrũkaga kuuma kĩrĩma-inĩ kĩu, Jesu akĩmaatha akĩmeera ũũ: “Mũtikeere mũndũ o na ũrĩkũ ũhoro wa kĩoneki kĩu o nginya rĩrĩa Mũrũ wa mũndũ akaariũkio kuuma kũrĩ arĩa akuũ.”+
10 No rĩrĩ, arutwo acio makĩmũũria atĩrĩ: “Na nĩ kĩĩ gĩtũmaga andĩki-watho moige atĩ no mũhaka Elija ambe oke?”+
11 Nake akĩmacokeria ũũ: “Elija no mũhaka oke na acokie maũndũ mothe.+
12 No ngũmwĩra atĩrĩ, Elija nĩ arĩkĩtie gũka, ĩndĩ matiamũmenyire no maamwĩkire ũrĩa wothe meendire kũmwĩka.+ O ũguo noguo Mũrũ wa mũndũ akaanyamarĩka moko-inĩ mao.”+
13 Nao arutwo magĩtaũkĩrũo atĩ aameeraga ũhoro wĩgiĩ Johana Mũbatithania.
14 Rĩrĩa maakinyire harĩ kĩrĩndĩ,+ mũndũ ũmwe agĩũka harĩ we, akĩmũturĩria maru akĩmwĩra ũũ:
15 “Mwathani, iguĩra mũrũ wakwa tha tondũ nĩ akoragwo na mũrimũ wa kĩbaba na nĩ mũrwaru. Kaingĩ nĩ agũaga mwaki-inĩ na maĩ-inĩ.+
16 Ngũmũrehete kũrĩ arutwo aku, no matinahota kũmũhonia.”
17 Jesu agĩcokia ũũ: “Inyuĩ rũciaro rũrũ rũtarĩ wĩtĩkio na rũhĩngĩcanu,+ ngũtũũra hamwe na inyuĩ nginya rĩ? Ngũmũkirĩrĩria nginya rĩ? Mũrehei haha harĩ niĩ.”
18 Jesu agĩkũũma ndaimono ĩyo, ĩkiuma thĩinĩ wa kamwana kau, na kuuma hĩndĩ ĩyo gakĩhona.+
19 Nao arutwo magĩthiĩ harĩ Jesu hatarĩ andũ angĩ makĩmũũria atĩrĩ: “Tũremirũo nĩ kũingata ndaimono ĩyo nĩkĩ?”
20 Akĩmacokeria atĩrĩ: “Nĩ tondũ wĩtĩkio wanyu nĩ mũnini. Ngũmwĩra atĩrĩ na ma, mũngĩrĩ na wĩtĩkio ũigana mbegũ ya karatarĩ,* no mũhote kwĩra kĩrĩma gĩkĩ, ‘Ehera haha ũthiĩ haarĩa,’ nakĩo kĩehere, na gũtirĩ ũndũ ũngĩmũrema.”+
21 *——
22 Na rĩrĩa maarĩ Galili monganĩte hamwe, Jesu akĩmeera ũũ: “Mũrũ wa mũndũ nĩ egũkunyanĩrũo aneanwo moko-inĩ ma andũ,+
23 na nĩ mekũmũũraga, na mũthenya wa gatatũ nĩ akaariũkio.”+ Arutwo maigua ũguo makĩgĩa na kĩeha kĩnene.
24 Na makinya Kaperinaumu, andũ arĩa moonganagia igooti rĩa drakma* igĩrĩ magĩthiĩ harĩ Petero makĩmũũria ũũ: “Hihi mũrutani wanyu nĩ arĩhaga igooti rĩa drakma igĩrĩ?”+
25 Akĩmeera: “Ĩĩ.” No rĩrĩa aaingĩrire nyũmba, Jesu akĩmũhĩta na mĩario akĩmũũria atĩrĩ: “Ũgwĩciria atĩa, Simoni? Athamaki a gũkũ thĩ mamũkagĩra marĩhi na igooti kuuma kũrĩ a? Nĩ kuuma kũrĩ ariũ ao-ĩ, kana nĩ kuuma kũrĩ andũ arĩa angĩ?”
26 Rĩrĩa ooigire: “Nĩ kuuma kũrĩ andũ arĩa angĩ,” Jesu akĩmwĩra ũũ: “Kwoguo, ariũ a mũthamaki matiagĩrĩirũo kũruta mbeca cia igooti.
27 No nĩgetha tũtikamahĩnge,+ thiĩ iria-inĩ, ũikie ndwano, na woe thamaki ĩrĩa ĩkũnyitwo mbere, na wamĩhingũra kanua, nĩ ũgũkora thendi ya betha* ho. Ũmĩoe, ũkarĩhe igooti nĩ ũndũ wakwa na nĩ ũndũ waku.”
Tũũhoro twa magũrũ-inĩ
^ Kana “ikĩerũha.”
^ Nĩ kabegũ kanini mũno konekaga mwena wa Palestina. No gakũre gatuĩke mũtĩ ũrĩ na ũraihu wa mita ta inya ũrĩ na honge.
^ Rora Ũhoro Muongerere A3.
^ Rora Ũhoro Muongerere B14.
^ Ũkk., “thendi ya stateri,” ĩciragĩrio nĩyo yarĩ tetradrakma. Rora Ũhoro Muongerere B14.
