Ũhoro Mwega Ũrĩa Waandĩkirũo nĩ Mathayo 6:1-34
6 “Mwĩmenyagĩrĩrei mũtigekage maũndũ ma ũthingu rĩrĩa mũrĩ mbere ya andũ nĩguo muonwo nĩo;+ tondũ mũngĩka ũguo, gũtirĩ kĩrathimo mũngĩona kuuma kũrĩ Ithe wanyu wa igũrũ.
2 Kwoguo-rĩ, rĩrĩa ũkũheana iheo cia tha,* ndũkahuuhage coro mbere yaku ta ũrĩa andũ arĩa hinga mekaga thunagogi-inĩ na njĩra-inĩ nĩguo magoocagwo nĩ andũ. Ngũmwĩra atĩrĩ o ma, nĩ marĩkĩtie kwamũkĩra kĩheo kĩao gĩothe.
3 No wee-rĩ, hĩndĩ ĩrĩa ũkũheana iheo cia tha, ndũkarekage guoko gwaku kwa ũmotho kũmenye ũrĩa guoko gwaku kwa ũrĩo kũreka,
4 nĩguo iheo ciaku cia tha ikoragwo irĩ cia hitho-inĩ. Nake Ithe wanyu ũrĩa wonaga arĩ hitho-inĩ nĩ arĩkũrĩhaga.+
5 “Ningĩ rĩrĩa mũkũhoya, mũtigekage ta andũ arĩa hinga,+ tondũ mendaga kũhoya marũgamĩte thunagogi-inĩ na magomano-inĩ ma njĩra nĩguo monwo nĩ andũ.+ Ngũmwĩra atĩrĩ o ma, nĩ marĩkĩtie kwamũkĩra kĩheo kĩao gĩothe.
6 No rĩrĩa ũkũhoya, thiaga rumu yaku ya thĩinĩ, na thutha wa kũhinga mũrango, ũkahoya Ithe wanyu ũrĩa ũrĩ hitho-inĩ.+ Nake Ithe wanyu ũrĩa wonaga arĩ hitho-inĩ nĩ arĩkũrĩhaga.
7 Rĩrĩa ũkũhoya ndũgacokagĩre maũndũ o marĩa marĩa, ta ũrĩa andũ a ndũrĩrĩ mekaga, tondũ meciragia atĩ nĩ mekũiguo nĩ ũndũ wa kũhũthĩra ciugo nyingĩ.
8 Kwoguo mũtigatuĩke tao, tondũ Ithe wanyu nĩ amenyaga maũndũ marĩa mũbataraga+ o na mũtanamũhoya.
9 “Nĩ ũndũ ũcio, hoyagai na njĩra ĩno:+
“‘Ithe witũ ũrĩ igũrũ, rĩĩtwa rĩaku+ nĩ rĩtherio.*+
10 Ũthamaki waku+ nĩ ũũke. Wendi waku+ nĩ wĩkwo gũkũ thĩ o ta kũu igũrũ.+
11 Tũhe mũgate witũ wa* gũtũigana ũmũthĩ;+
12 na ũtũrekere mathiirĩ maitũ, o ta ũrĩa tũrekagĩra arĩa marĩ na mathiirĩ maitũ.+
13 Na ndũgatũtware magerio-inĩ,+ no ũtũhonokagie kuuma harĩ ũrĩa mũũru.’+
14 “Tondũ mũngĩohagĩra andũ mehia mao, Ithe wanyu wa igũrũ o nake nĩ arĩmuohagĩra;+
15 no angĩkorũo mũtirĩohagĩra andũ mehia mao, o nake Ithe wanyu ndarĩmuohagĩra mehia manyu.+
16 “Rĩrĩa mũkwĩhinga kũrĩa-rĩ,+ tigagai gũtukagia gĩthiithi ta ũrĩa andũ arĩa hinga mekaga, nĩ gũkorũo matukagia ithiithi ciao nĩguo moneke nĩ andũ atĩ nĩ mehingĩte.+ Ngũmwĩra atĩrĩ o ma, nĩ marĩkĩtie kwamũkĩra kĩheo kĩao gĩothe.
17 No wee hĩndĩ ĩrĩa ũkwĩhinga, wĩhakage maguta mũtwe na ũgethamba ũthiũ,
18 nĩguo wonagwo nĩ Ithe wanyu ũrĩa ũrĩ hitho-inĩ atĩ nĩ wĩhingĩte, no ti andũ. Nake Ithe wanyu ũrĩa wonaga arĩ hitho-inĩ nĩ arĩkũrĩhaga.
19 “Tigai kwĩigĩra mĩthithũ gũkũ thĩ,+ kũrĩa memenyi na gutu irĩaga na kũrĩa aici mabunjaga makaiya.
20 Ithenya rĩa ũguo, mwĩigĩrei mĩthithũ kũrĩa igũrũ,+ kũrĩa memenyi na gutu itangĩrĩa,+ na kũrĩa aici matangĩbunja maiye.
21 Nĩ gũkorũo harĩa mũthithũ waku ũrĩ, hau nĩho ngoro yaku o nayo ĩrĩkoragwo.
22 “Tawa wa mwĩrĩ nĩ riitho.+ Kwoguo, riitho rĩaku rĩngĩkorũo rĩrĩ irũngĩrĩru,* mwĩrĩ waku wothe ũrĩkoragwo ũcangararĩte.*
23 No angĩkorũo riitho rĩaku rĩrĩ na ũiru,*+ mwĩrĩ waku wothe ũrĩkoragwo na nduma. Angĩkorũo ũtheri ũrĩa ũrĩ thĩinĩ waku kũna nĩ nduma-rĩ, kaĩ nduma ĩyo nĩ nene-ĩ!
24 “Gũtirĩ mũndũ ũngĩhota gũtungatĩra athani erĩ; nĩ gũkorũo egũthũũra ũmwe na ende ũcio ũngĩ,+ kana egwatanie na ũmwe na anyarare ũcio ũngĩ. Mũtingĩtungatĩra Ngai na mũtungatĩre Ũtonga.+
25 “Nĩ ũndũ ũcio ngũmwĩra ũũ: Tigai gũtangĩkĩra+ mĩoyo yanyu ũhoro-inĩ wĩgiĩ kĩrĩa mũkũrĩa kana kĩrĩa mũkũnyua, kana gũtangĩkĩra mĩĩrĩ yanyu ũhoro-inĩ wĩgiĩ kĩrĩa mũkwĩhumba.+ Githĩ muoyo ndũkĩrĩte irio na mwĩrĩ ũgakĩra nguo?+
26 Rorai na kinyi nyoni cia rĩera-inĩ;*+ itihandaga mbegũ kana ikagetha kana ikaiga irio makũmbĩ, no Ithe wanyu wa igũrũ nĩ aciheaga gĩa kũrĩa. Githĩ inyuĩ mũtikĩrĩ a bata gũcikĩra?
27 Nũũ gatagatĩ-inĩ kanyu ũngĩhota kuongerera mũkono* ũmwe harĩ ũtũũro wake nĩ ũndũ wa gwĩtangĩkĩra?+
28 Ningĩ-rĩ, mũtangĩkaga nĩkĩ ũhoro-inĩ wa kwĩhumba? Mwĩrutei na ũrĩa mahũa ma werũ-inĩ ma itoka makũraga; matiĩnogagia, kana makogotha ndigi;
29 no ngũmwĩra atĩrĩ, o na Suleimani+ na riri wake wothe ndaagemete ta rĩmwe rĩamo.
30 Rĩu-rĩ, angĩkorũo ũguo nĩguo Ngai ahumbaga mĩmera ya werũ-inĩ, ĩrĩa ĩkoragwo ho ũmũthĩ na rũciũ ĩgaikio riiko-rĩ, githĩ inyuĩ ndarĩkĩmũhumbaga o na makĩria, inyuĩ mũrĩ na wĩtĩkio mũnini?
31 Nĩ ũndũ ũcio mũtikanatangĩke+ mũkiugaga atĩrĩ, ‘Tũkũrĩa kĩĩ?’ kana, ‘Tũkũnyua kĩĩ?’ kana, ‘Tũkwĩhumba kĩĩ?’+
32 Tondũ maũndũ macio mothe nĩmo ndũrĩrĩ ithingataga na kĩyo. Ithe wanyu wa igũrũ nĩ oĩ atĩ nĩ mũbataraga maũndũ macio mothe.
33 “Nĩ ũndũ ũcio-rĩ, caragiai Ũthamaki wa Ngai mbere na ũthingu wake, namo maũndũ macio mangĩ mothe nĩ mũrĩongagĩrĩrũo.+
34 Kwoguo mũtikanatangĩke nĩ ũndũ wa rũciũ,+ tondũ rũciũ nĩ rũgaakorũo na mĩtangĩko yaruo rwene. O mũthenya ũkoragwo na mathĩna maguo ma kũigana.
Tũũhoro twa magũrũ-inĩ
^ Kana “iheo kũrĩ athĩni.” Rora Ũthathaũri wa Ciugo.
^ Kana “rĩamũrũo.”
^ Kana “irio citũ cia.”
^ Kana “nĩ rĩrona wega.” Ũkk., “ihũthũ.”
^ Kana “ũiyũire ũtheri.”
^ Ũkk., “nĩ rĩũru.”
^ Kana “nyoni cia igũrũ.”
^ Rora Ũhoro Muongerere B14.
