Ũhoro Mwega Ũrĩa Waandĩkirũo nĩ Mathayo 26:1-75
-
Athĩnjĩri-Ngai kũbanga kũũraga Jesu (1-5)
-
Jesu gũitĩrĩrio maguta manungi wega (6-13)
-
Pasaka ya mũico na gũkunyanĩrũo (14-25)
-
Kwambĩrĩrio kwa Irio cia Hwaĩ-inĩ cia Mwathani (26-30)
-
Ũrathi wĩgiĩ Petero gũkaana Jesu (31-35)
-
Jesu kũhoya arĩ Gethisemane (36-46)
-
Jesu kũnyitwo (47-56)
-
Gũciirithio nĩ Sanhedrini (57-68)
-
Petero gũkaana Jesu (69-75)
26 Na rĩrĩ, Jesu arĩkia kwaria maũndũ macio mothe, akĩra arutwo ake ũũ:
2 “Nĩ mũĩ atĩ thikũ igĩrĩ kuuma rĩu Pasaka nĩ ĩgũkinya,+ na Mũrũ wa mũndũ nĩ ekũneanwo nĩguo oragĩrũo mũtĩ-inĩ.”+
3 Hĩndĩ ĩyo anene a athĩnjĩri-Ngai na athuri a kĩrĩndĩ magĩcemania nja kwa mũthĩnjĩri-Ngai ũrĩa mũnene wetagwo Kaiafa,+
4 na makĩbanga njama+ mahũthĩre wara kũnyita Jesu na mamũũrage.
5 No mooigaga atĩrĩ: “Tũtikaamũnyita hĩndĩ ya gĩathĩ nĩguo gũtikanagĩe gĩcanjama gatagatĩ-inĩ ka andũ.”
6 Rĩrĩa Jesu aarĩ Bethania mũciĩ gwa Simoni ũrĩa warĩ na mangũ,+
7 mũtumia warĩ na cuba ya alabasta ya maguta manungi wega ma goro agĩthiĩ harĩ we, na akĩambĩrĩria kũmũitĩrĩria maguta macio mũtwe akĩrĩa.*
8 Na arutwo mona ũguo makĩrakara na makĩũria atĩrĩ: “Nĩ kĩĩ gĩatũma maguta maya maitangwo?
9 Nĩ gũkorũo nĩ mangĩendio mbeca nyingĩ na iheo athĩni.”
10 Jesu amenya ũguo, akĩmoria atĩrĩ: “Mũrathĩnia mũtumia ũyũ nĩkĩ? Ũndũ ũrĩa anjĩka nĩ mwega.
11 Tondũ athĩni mũkoragwo nao hĩndĩ ciothe,+ no mũtirĩkoragwo na niĩ hĩndĩ ciothe.+
12 Hĩndĩ ĩrĩa mũtumia ũyũ aitĩrĩria mwĩrĩ wakwa maguta maya manungi wega, eka ũguo nĩgetha aahaarĩrie nĩ ũndũ wa gũthikwo.+
13 Ngũmwĩra atĩrĩ na ma, kũrĩa guothe ũhoro ũyũ mwega ũkaahunjio thĩinĩ wa thĩ, ũndũ ũcio mũtumia ũyũ eka o naguo nĩ ũkaagwetagwo nĩguo aririkanagwo.”+
14 Thutha ũcio ũmwe wa arĩa Ikũmi na Erĩ, ũrĩa wetagwo Judasi Mũisikariota,+ agĩthiĩ kũrĩ anene a athĩnjĩri-Ngai+
15 akĩmoria: “Mũkũhe kĩĩ nĩguo ndĩmũkunyanĩre harĩ inyuĩ?”+ Nao makĩmwĩrĩra icunjĩ 30 cia betha.+
16 Nĩ ũndũ ũcio, kuuma hĩndĩ ĩyo akĩambĩrĩria gũcaria mweke mwega wa kũmũkunyanĩra.
17 Na mũthenya wa mbere wa Mĩgate Ĩtarĩ Mĩimbie,+ arutwo a Jesu magĩthiĩ harĩ we makĩmũũria atĩrĩ: “Ũkwenda tũgakũhaarĩrĩrie kũ gwa kũrĩĩra Pasaka?”+
18 Nake akĩmeera ũũ: “Thiĩi thĩinĩ wa itũũra na nĩ mũgũkora Ngʼania-wa-ngʼania, mũmwĩre, ‘Mũrutani oiga atĩrĩ: “Ihinda rĩakwa rĩrĩa rĩtuĩtwo nĩ rĩkuhĩrĩirie; ngũkũngũĩra Pasaka mũciĩ gwaku hamwe na arutwo akwa.”’”
19 Kwoguo arutwo acio magĩka o ũguo Jesu aameerĩte, makĩhaarĩria Pasaka.
20 Rĩrĩa gwakinyire hwaĩ-inĩ,+ agĩikara metha-inĩ hamwe na arutwo arĩa 12.+
21 Na rĩrĩa maarĩaga, akĩmeera: “Ngũmwĩra atĩrĩ na ma, ũmwe wanyu nĩ ekũngunyanĩra.”+
22 Maigua ũguo makĩnyitwo nĩ kĩeha kĩnene, na o mũndũ akĩũria ũũ: “Mwathani, nĩ niĩ?”
23 Nake akĩmacokeria ũũ: “Ũrĩa ũrarikia guoko hamwe na niĩ mbakũri-inĩ nĩwe ũkũngunyanĩra.+
24 Nĩ ma Mũrũ wa mũndũ nĩ egũthiĩ, o ta ũrĩa kwandĩkĩtwo ũhoro wake, no kaĩ mũndũ ũrĩa ũgũkunyanĩra Mũrũ wa mũndũ+ arĩ na haaro-ĩ!+ Nĩ kaba mũndũ ũcio atangĩaciarirũo.”+
25 Nake Judasi, ũrĩa warĩ hakuhĩ kũmũkunyanĩra akĩmũũria atĩrĩ: “Rabii, nĩ niĩ?” Nake Jesu akĩmũcokeria: “Wee mwene nĩ woiga.”
26 Na o makĩrĩaga Jesu akĩoya mũgate, na thutha wa kũhoya kĩrathimo, akĩwenyũranga+ na akĩnengera arutwo ake, akĩmeera ũũ: “Kei mũrĩe. Ũyũ ũrũgamĩrĩire mwĩrĩ wakwa.”+
27 Ningĩ akĩoya gĩkombe, na thutha wa gũcokia ngatho, akĩmanengera akĩmeera ũũ: “Nyuĩrai gĩkĩ inyuothe,+
28 nĩ gũkorũo gĩkĩ kĩrũgamĩrĩire ‘thakame yakwa+ ya kĩrĩkanĩro,’+ ĩrĩa ĩgũitwo nĩ ũndũ wa andũ aingĩ+ nĩguo moherũo mehia.+
29 No ngũmwĩra atĩrĩ: Ndikanyua ndibei ya maciaro maya ma mũthabibũ rĩngĩ o nginya mũthenya ũrĩa ngaamĩnyua ĩrĩ njerũ hamwe na inyuĩ thĩinĩ wa Ũthamaki wa Awa.”+
30 Na thutha wa kũina nyĩmbo cia kũgooca,* magĩthiĩ Kĩrĩma-inĩ kĩa Mĩtamaiyũ.+
31 Jesu agĩcoka akĩmeera atĩrĩ: “Inyuothe nĩ mũkũhĩngĩka nĩ ũndũ wakwa ũtukũ ũyũ, tondũ nĩ kwandĩke ũũ: ‘Nĩ ngaaringa mũrĩithi, nacio ngʼondu cia rũũru ihurunjũke.’+
32 No thutha wa kũriũkio, nĩ ngaathiĩ Galili mbere yanyu.”+
33 No Petero akĩmũcokeria akĩmwĩra atĩrĩ: “O na arĩa angĩ othe mangĩhĩngĩka nĩ ũndũ waku, niĩ ndirĩ hĩndĩ ingĩhĩngĩka!”+
34 Jesu akĩmwĩra: “Ngũkwĩra atĩrĩ na ma, ũtukũ ũyũ, ngũkũ ĩtanakũga nĩ ũkũngaana maita matatũ.”+
35 Petero akĩmũcokeria ũũ: “O na angĩkorũo nĩ gũkua ngũkua hamwe nawe, ndirĩ hĩndĩ ndĩgũkaana.”+ Nao arutwo acio angĩ othe makiuga o taguo.
36 Jesu agĩcoka agĩthiĩ hamwe nao handũ heetagwo Gethisemane,+ na akĩra arutwo ake atĩrĩ: “Ikarai thĩ haha na niĩ thiĩ haarĩa ngahoe.”+
37 Agĩthiĩ na Petero na ariũ arĩa erĩ a Zebedi, akĩambĩrĩria kũnyitwo nĩ kĩeha na agĩtangĩka mũno.+
38 Agĩcoka akĩmeera ũũ: “Ndĩ na kĩeha kĩnene mũno, o ta ingĩkua. Ikarai haha na mũikare mwĩiguĩte hamwe na niĩ.”+
39 Na athiathia mbere hanini akĩinamĩrĩra agĩturumithia ũthiũ wake thĩ, akĩhoya akiuga ũũ:+ “Awa, angĩkorũo no kũhoteke, reke gĩkombe gĩkĩ+ kĩnjeherere. No ti ũrĩa niĩ ngwenda, no nĩ ũrĩa wee ũkwenda.”+
40 Na rĩrĩa aacokire harĩ arutwo acio agĩkora makomete, akĩũria Petero atĩrĩ: “Mũtingĩhota gũikara mwĩiguĩte na arĩ ithaa rĩmwe hamwe na niĩ?+
41 Ikarai mwĩiguĩte+ na mũhoe mũtegũtigithĩria+ nĩguo mũtikaingĩre magerio-inĩ.+ Nĩ ma ngoro nĩ ĩrenda, no mwĩrĩ ndũrĩ na hinya.”+
42 Agĩcoka agĩthiĩ riita rĩa kerĩ na akĩhoya akiuga ũũ: “Awa, angĩkorũo gũtingĩhoteka gĩkombe gĩkĩ kĩnjeherere, na no mũhaka ndĩkĩnyuĩre-rĩ, reke wendi waku wĩkĩke.”+
43 Agĩcoka agĩthiĩ harĩ o rĩngĩ na agĩkora makomete, nĩ gũkorũo maitho mao nĩ maatoretio nĩ toro.
44 Akĩmatiga o rĩngĩ agĩthiĩ na akĩhoya riita rĩa gatatũ, akĩhoya o ũndũ ũrĩa aahoete.
45 Agĩcoka harĩ arutwo na akĩmoria ũũ: “Ihinda-inĩ ta rĩrĩ nĩrĩo mũkomete na mũkahurũka! Atĩrĩrĩ, ihinda rĩa Mũrũ wa mũndũ gũkunyanĩrũo moko-inĩ ma ehia nĩ rĩkuhĩrĩirie.
46 Ũkĩrai tũthiĩ. Atĩrĩrĩ, ũrĩa ũkũngunyanĩra arĩ hakuhĩ.”
47 Na hĩndĩ o ĩyo aaragia, Judasi, ũmwe wa arĩa Ikũmi na Erĩ agĩũka marĩ hamwe na kĩrĩndĩ kĩnene kĩrĩ na hiũ cia njora na njũgũma, gĩtũmĩtwo nĩ anene a athĩnjĩri-Ngai na athuri a kĩrĩndĩ.+
48 Na rĩrĩ, Judasi ũcio mũmũkunyanĩri nĩ aamaheete kĩmenyithia, akameera atĩrĩ: “Ũrĩa ngũmumunya, ũcio nĩwe; mũnyitei.”
49 Agĩgĩthiĩ nginya harĩ Jesu akĩmwĩra ũũ: “Wĩ mwega Rabii!” na akĩmũmumunya na wororo.
50 No Jesu akĩmũũria atĩrĩ: “Mũndũ ũyũ, woka gwĩka atĩa gũkũ?”+ Nao magĩkuhĩrĩria na makĩnyita Jesu.
51 No rĩrĩ, ũmwe wa arĩa maarĩ na Jesu agĩcomora rũhiũ rwake rwa njora na agĩtinia gũtũ kwa ndungata ya mũthĩnjĩri-Ngai ũrĩa mũnene, gũkĩgwa.+
52 Nake Jesu akĩmwĩra atĩrĩ: “Cokia rũhiũ rwaku rwa njora handũ haruo,+ nĩ gũkorũo arĩa othe moyaga rũhiũ rwa njora makaaniinwo o na rũhiũ rwa njora.+
53 Kana hihi ũgwĩciria ndingĩthaitha Awa andũmĩre o rĩu mbũtũ makĩria ma 12 cia araika?+
54 No ingĩka ũguo-rĩ, Maandĩko mangĩkĩhingio atĩa marĩa monanĩtie atĩ ũndũ ũyũ no mũhaka ũgeekĩka na njĩra ĩno?”
55 Hĩndĩ ĩyo Jesu akĩũria kĩrĩndĩ atĩrĩ: “Muoka kũũnyita na hiũ cia njora na njũgũma ta arĩ mũtunyani muoka kũnyita? O mũthenya ndĩrakoragwo hekarũ-inĩ ngĩrutana,+ ĩndĩ mũtirokaga kũũnyita.+
56 No maũndũ maya mothe mekĩkĩte nĩguo maandĩko ma anabii mahinge.”+ Hĩndĩ ĩyo arutwo othe makĩmũtiganĩria makĩũra.+
57 Nao arĩa maanyitire Jesu makĩmũtwara gwa Kaiafa,+ mũthĩnjĩri-Ngai ũrĩa mũnene, kũrĩa andĩki-watho na athuri maacemanĩtie.+
58 No Petero agĩthiĩ amũrũmĩrĩire arĩ haraya o nginya nja kwa mũthĩnjĩri-Ngai ũrĩa mũnene, na rĩrĩa aatonyire, agĩikara thĩ hamwe na ndungata cia mũciĩ ũcio nĩguo one ũrĩa gũgũthiĩ.+
59 Na rĩrĩ, anene a athĩnjĩri-Ngai na Sanhedrini yothe maacaragia ũira wa maheeni kwerekera Jesu nĩguo mamũũrage.+
60 No matiawonaga o na gũtuĩka aira aingĩ a maheeni nĩ meeyumĩragia.+ Thutha-inĩ aira erĩ makĩyumĩria
61 makiuga ũũ: “Mũndũ ũyũ ooigire atĩrĩ, ‘No hote gũtharia hekarũ ya Ngai na ndĩmĩake na thikũ ithatũ.’”+
62 Hĩndĩ ĩyo mũthĩnjĩri-Ngai ũrĩa mũnene akĩrũgama akĩmũũria atĩrĩ: “Ndũrĩ ũndũ o na ũmwe ũngĩcokia? Nĩ ũhoro ũrĩkũ ũyũ andũ aya maragũthitanga naguo?”+
63 No Jesu agĩkira.+ Nĩ ũndũ ũcio mũthĩnjĩri-Ngai ũrĩa mũnene akĩmwĩra ũũ: “Ndakwĩhĩtithia mbere ya Ngai ũrĩa ũtũũraga muoyo ũtwĩre kana wee nĩwe Kristo, Mũrũ wa Ngai!”+
64 Jesu akĩmũcokeria ũũ: “Wee mwene nĩ woiga. Ĩndĩ ngũmwĩra atĩrĩ: Kuuma rĩu nĩ mũkuona Mũrũ wa mũndũ+ aikarĩte thĩ guoko-inĩ kwa ũrĩo kũrĩ hinya+ na agĩũka arĩ thĩinĩ wa matu ma igũrũ.”+
65 Nake mũthĩnjĩri-Ngai ũrĩa mũnene agĩtembũra nguo yake ya igũrũ akiuga: “Nĩ aruma Ngai! Tũrakĩbatara aira angĩ a kĩ? Rĩu nĩ mweiguĩra akĩruma Ngai.
66 Mũkuona atĩa?” Magĩcokia atĩrĩ: “Agĩrĩire gũkua.”+
67 Makĩmũtuĩra mata ũthiũ+ na makĩmũringa ngundi.+ Angĩ nao makĩmũhũũra hĩ ũthiũ,+
68 makiugaga ũũ: “Wee Kristo, tũrathĩre. Nũũ wakũringa?”
69 Na rĩrĩ, hĩndĩ ĩyo Petero aaikaire kũu nja, na mũirĩtu ũmwe warĩ ndungata agĩthiĩ harĩ we, akiuga: “O nawe uuma hamwe na Jesu ũcio Mũgalili!”+
70 No agĩkaana arĩ mbere yao othe akiuga: “Ndiramenya ũrĩa ũroiga.”
71 Rĩrĩa ooimire hau agĩthiĩ kĩhingo-inĩ, mũirĩtu ũngĩ akĩmuona na akĩra andũ arĩa maarĩ hau atĩrĩ: “Mũndũ ũyũ oima hamwe na Jesu ũcio Mũnazarethi.”+
72 Agĩkaana o rĩngĩ na akĩĩhĩta akiuga: “Mũndũ ũcio niĩ ndimũĩ!”
73 Thutha wa kahinda kanini arĩa maarũgamĩte hau magĩthiĩ harĩ Petero makĩmwĩra ũũ: “Ti itherũ o nawe ũrĩ ũmwe wao, tondũ o na mwarĩrie waku kũna nĩ ũroiga.”
74 Hĩndĩ ĩyo akĩambĩrĩria kuuga aronyitwo nĩ kĩrumi na akĩĩhĩta akiuga ũũ: “Mũndũ ũyũ niĩ ndimũĩ!” Na hĩndĩ o ĩyo ngũkũ ĩgĩkũga.
75 Nake Petero akĩririkana ũrĩa Jesu aamwĩrĩte atĩrĩ: “Ngũkũ ĩtanakũga, nĩ ũkũngaana maita matatũ.”+ Akiuma na nja na akĩrĩra arĩ na ruo rũnene.
