Ũhoro Mwega Ũrĩa Waandĩkirũo nĩ Mathayo 11:1-30
11 Na rĩrĩa Jesu aarĩkirie kũhe arutwo ake 12 motaaro, akiuma kũu agĩthiĩ nĩguo akarutane na akahunjie matũũra-inĩ mangĩ.+
2 No rĩrĩa Johana arĩ njera+ aaiguire ũhoro wa ciĩko cia Kristo, agĩtũma arutwo ake mwene+
3 makamũũrie atĩrĩ: “Hihi wee nĩwe Ũrĩa Weranĩirũo, kana nĩ harĩ ũngĩ twetereire?”+
4 Jesu akĩra arutwo acio atĩrĩ: “Thiĩi mwĩre Johana ũhoro wĩgiĩ maũndũ marĩa mũraigua na mũkona:+
5 Arĩa atumumu rĩu nĩ marona+ na arĩa mathuaga magetwara wega, arĩa marĩ na mangũ+ magatherio na arĩa mataiguaga makaigua, akuũ makariũkio nao arĩa athĩni nĩ maraheo ũhoro ũrĩa mwega.+
6 Gũkena nĩ ũrĩa ũtonaga ũndũ ũngĩmũhĩnga harĩ niĩ.”+
7 Na rĩrĩa arutwo acio maathiire, Jesu akĩambĩrĩria kwarĩria kĩrĩndĩ ũhoro wĩgiĩ Johana agĩkĩũria atĩrĩ: “Mwathiĩte werũ-inĩ kuona kĩĩ?+ Hihi nĩ ithanjĩ rĩkĩhurutwo nĩ rũhuho?+
8 Mwagĩthiĩte kuona kĩĩ? Mũndũ wĩhumbĩte nguo horo?* Atĩrĩrĩ, arĩa mehumbaga nguo horo makoragwo nyũmba-inĩ cia athamaki.
9 Gũkĩrĩ ũguo-rĩ, mwathiĩte nĩkĩ? Kuona mũnabii? Ĩni, ngũmwĩra atĩrĩ, ũcio nĩ akĩrĩte mũnabii.+
10 Ũcio nĩwe ũhoro wake wandĩkĩtwo ũũ: ‘Atĩrĩrĩ, nĩ ngũtũma mũtũmwo wakwa mbere yaku,* ũrĩa ũgũkũhaarĩrĩria njĩra mbere yaku!’+
11 Ngũmwĩra atĩrĩ na ma, harĩ arĩa maanaciarũo nĩ atumia, gũtirĩ kwagĩa mũnene gũkĩra Johana Mũbatithania, no mũndũ mũnini thĩinĩ wa Ũthamaki wa igũrũ nĩ mũnene kũmũkĩra.+
12 Kuuma matukũ ma Johana Mũbatithania nginya ũmũthĩ, Ũthamaki wa igũrũ nĩguo andũ makoretwo makĩgiginyana gũkinyĩra, na arĩa merutanagĩria biũ, nĩ mawonaga.+
13 Tondũ ciugo cia Anabii, o na Watho, ciarathire o nginya hĩndĩ ya Johana;+
14 na mwĩtĩkie kana mũrege, Johana nĩwe ‘Elija ũrĩa weranĩirũo atĩ nĩ agooka.’+
15 Ũrĩa ũrĩ matũ nĩ aigue.
16 “Ngũgerekania rũciaro rũrũ na kĩĩ?+ Nĩ ta twana tũikarĩte thĩ thoko-inĩ tũranĩrĩra tũgĩtaga tũrĩa tũngĩ tũthaakaga natuo,
17 tũkoiga ũũ: ‘Tũmũhuuhĩire mũtũrirũ no mũtinathũngũtha; twacakaya no mũtinehũũrahũũra mũrĩ na kĩeha.’
18 O ta ũguo, Johana ookire akĩĩhingaga kũrĩa na kũnyua, no andũ moigaga, ‘Arĩ na ndaimono.’
19 Mũrũ wa mũndũ nake ookire atekwĩhinga kũrĩa na kũnyua,+ no andũ makoiga, ‘Ũyũ nĩ mũndũ mũkoroku na ũnyuaga ndibei, mũrata wa etia mbeca cia igooti na ehia.’+ No rĩrĩ, ũũgĩ wonanagia ũthingu waguo kũgerera* ciĩko ciaguo.”*+
20 Na hĩndĩ ĩyo akĩambĩrĩria kũmenereria matũũra marĩa eekire mawĩko maingĩ ma hinya, tondũ andũ a kuo matieririre:
21 “Wee Korazini, kaĩ ũrĩ na haaro-ĩ! Wee Bethisaida, kaĩ ũrĩ na haaro-ĩ! tondũ korũo mawĩko ma hinya marĩa mwekĩirũo meekirũo Turo na Sidoni, andũ a kuo mangĩeririre tene mehumbĩte nguo cia makũnia na mehurĩirie mũhu.+
22 No ngũmwĩra atĩrĩ, matũũra ma Turo na Sidoni nĩ mageetiiria Mũthenya wa Ciira kũmũkĩra.+
23 Wee nawe Kaperinaumu,+ hihi nĩ gũtũũgĩrio ũgaatũũgĩrio nginya igũrũ? Wee ũgaaikũrũka Mbĩrĩra-inĩ;*+ tondũ korũo mawĩko ma hinya marĩa wekĩirũo meekirũo Sodomu, ĩngĩtũũraga kuo nginyagia ũmũthĩ.
24 No ngũmwĩra atĩrĩ, bũrũri wa Sodomu nĩ ũgeetiiria Mũthenya wa Ciira kũmũkĩra.”+
25 Hĩndĩ ĩyo Jesu akiuga: “Awa, Mwathani wa igũrũ na thĩ, ndĩrakũgooca mbere ya andũ, tondũ maũndũ maya nĩ ũmahithĩte andũ arĩa ogĩ na marĩ ũmenyo, ũkamaguũrĩria ciana nyinyi.+
26 Ũguo nĩguo kũrĩ, Awa, nĩ gũkorũo ũguo nĩguo wonete kwagĩrĩire.
27 Nĩ heetwo maũndũ mothe nĩ Awa,+ na gũtirĩ mũndũ ũĩ Mũriũ wega tiga Awa;+ o na gũtirĩ mũndũ ũĩ Awa wega tiga Mũriũ na mũndũ o wothe ũrĩa Mũriũ endaga kũguũrĩria.+
28 Ũkai kũrĩ niĩ, inyuothe arĩa mũnogete na mũtitikĩte mĩrigo, na nĩ ngũmũcanjamũra.
29 Oyai icoki rĩakwa mwĩigĩrĩre na mwĩrute kuuma kũrĩ niĩ, nĩ ũndũ niĩ ndĩ mũhooreri na mwĩnyihia ngoro-inĩ,+ na nĩ mũgũcanjamũrũo.
30 Tondũ icoki rĩakwa nĩ inyoroku,* na mũrigo wakwa nĩ mũhũthũ.”
