Ũhoro Mwega Ũrĩa Waandĩkirũo nĩ Mariko 6:1-56
6 Agĩcoka akiuma kũu agĩthiĩ itũũra rĩa kwao,+ na arutwo ake makĩmũrũmĩrĩra.
2 Rĩrĩa Thabatũ yakinyire, akĩambĩrĩria kũrutana thĩinĩ wa thunagogi, na andũ aingĩ arĩa maamũiguire makĩgega makĩũria: “Mũndũ ũyũ arutĩte kũ maũndũ maya?+ Na aaheirũo ũũgĩ ũyũ nĩkĩ, na ũhoti wa gwĩka mawĩko maya ma hinya na moko make?+
3 Githĩ ũyũ ti bundi ũrĩa wa mbaũ,+ mũrũ wa Mariamu,+ na mũrũ wa nyina na Jakubu,+ Jusufu, Judasi, na Simoni?+ Nao aarĩ a nyina githĩ matirĩ o gũkũ hamwe na ithuĩ?” Kwoguo makĩambĩrĩria kũhĩngĩka nĩ ũndũ wake.
4 No Jesu akĩmeera atĩrĩ: “Mũnabii ndaimagwo gĩtĩo tiga o itũũra-inĩ rĩa kwao na gatagatĩ-inĩ ka andũ a famĩlĩ yao na gwake mũciĩ.”+
5 Nĩ ũndũ ũcio ndaahotire gwĩka mawĩko ma hinya kũu o tiga kũigĩrĩra andũ maigana ũna moko arĩa maarĩ arwaru na akĩmahonia.
6 Na nĩ aagegire nĩ ũndũ wao kwaga wĩtĩkio. Na agĩthiũrũrũka kuuma gĩcagi kĩmwe nginya kĩrĩa kĩngĩ akĩrutanaga.+
7 Hĩndĩ ĩyo agĩta arĩa Ikũmi na Erĩ, akĩambĩrĩria kũmatũma marĩ erĩ erĩ,+ na akĩmahe wathani igũrũ rĩa maroho moru.+
8 Ningĩ akĩmahe watho akĩmeera matigakuue kĩndũ o na kĩ nĩ ũndũ wa rũgendo tiga o mũtirima—matigakuue mũgate, matigakuue mondo ya irio, matigakuue mbeca* mĩcibi-inĩ yao+—
9 no mekĩre iratũ na matikehumbe nguo igĩrĩ.*
10 Ningĩ akĩmeera atĩrĩ: “Rĩrĩa mwatonya mũciĩ mũna, ikaragai kuo o nginya rĩrĩa mũkooima kuo.+
11 Na kũrĩa andũ matarĩmwamũkagĩra kana kũmũthikĩrĩria, mũkiuma kũu ringithiai magũrũ manyu thĩ rũkũngũ rũitĩke, nĩguo ũndũ ũcio ũtuĩke ũira harĩ o.”+
12 Nao magĩthiĩ na makĩhunjĩria andũ merire,+
13 na makĩingata ndaimono nyingĩ+ na makĩhaka arĩa maarĩ arwaru maguta na makĩmahonia.
14 Na rĩrĩ, Mũthamaki Herode akĩigua maũndũ macio, nĩ gũkorũo rĩĩtwa rĩa Jesu nĩ rĩamenyekete mũno, na andũ nĩ mooigaga: “Johana Mũbatithania nĩ ariũkĩtio kuuma kũrĩ arĩa akuũ, na nĩkĩo arahota gwĩka mawĩko ma hinya.”+
15 No andũ angĩ mooigaga ũũ: “Nĩ Elija.” Nao angĩ makoiga: “Nĩ mũnabii o ta ũmwe wa anabii arĩa a tene.”+
16 No rĩrĩa Herode aaiguire ũguo, akiuga atĩrĩ: “Johana ũrĩa ndarengire mũtwe nĩ ariũkĩtio.”
17 Nĩ gũkorũo Herode we mwene nĩ aatũmanĩte Johana anyitwo na aikio njera nĩ ũndũ wa Herodia, mũtumia wa Filipu mũrũ wa ithe, tondũ Herode nĩ aamũhikĩtie.+
18 Nĩ gũkorũo Johana nĩ eeraga Herode ũũ: “Ndwagĩrĩirũo kũhikia mũtumia wa mũrũ wa thoguo.”+
19 Kwoguo Herodia aatũire amũigĩire muku na eendaga kũmũũraga no akaremwo.
20 Nĩ gũkorũo Herode nĩ eetigagĩra Johana, tondũ nĩ aamenyaga atĩ nĩ mũndũ mũthingu na mũtheru,+ na kwoguo nĩ aamũgitagĩra. Thutha wa kũmũthikĩrĩria nĩ aarigagwo ũrĩa ekũmwĩka, ĩndĩ no aathiaga na mbere kũmũthikĩrĩria akenete.
21 No mũthenya ũmwe mweke nĩ weyumĩririe, rĩrĩa Herode aahaarĩirie iruga rĩa hwaĩ-inĩ mũthenya wake wa gũciarũo+ nĩ ũndũ wa anene ake na atongoria a mbũtũ na andũ arĩa maarĩ igweta mũno a Galili.+
22 Nake mwarĩ wa Herodia akĩingĩra na agĩthũngũtha agĩkenia Herode na arĩa maarĩanagĩra* nake. Mũthamaki akĩra mũirĩtu ũcio ũũ: “Njĩtia kĩrĩa gĩothe ũkwenda, na nĩ ngũkũhe.”
23 Akĩmwĩrĩra na mwĩhĩtwa atĩrĩ: “Kĩrĩa gĩothe ũkũũhoya, nĩ ngũkũhe, o na angĩkorũo nĩ nuthu ya ũthamaki wakwa.”
24 Kwoguo agĩthiĩ kũrĩ nyina akĩmũũria atĩrĩ: “Hoe kĩĩ?” Nake akĩmwĩra: “Mũtwe wa Johana Mũbatithania.”
25 O hĩndĩ ĩyo agĩthiĩ na ihenya kũrĩ mũthamaki akĩmwĩra atĩrĩ: “Ngwenda ũũhe o rĩu mũtwe wa Johana Mũbatithania ũigĩrĩirũo thani-inĩ.”+
26 O na gũtuĩka ũndũ ũcio nĩ waiguithirie mũthamaki kĩeha kĩnene, ndeendaga kwaga kũhingia ihoya rĩa mũirĩtu ũcio, nĩ ũndũ wa mĩĩhĩtwa yake na nĩ ũndũ wa ageni ake.*
27 Nĩ ũndũ ũcio mũthamaki agĩtũma mũrangĩri ũmwe o hĩndĩ ĩyo na akĩmwatha arehe mũtwe wa Johana. Nake agĩthiĩ kũu njera na akĩmũrenga mũtwe
28 na akĩrehe mũtwe wake ũigĩrĩirũo thani-inĩ. Akĩnengera mũirĩtu ũcio, nake mũirĩtu ũcio akĩũtwarĩra nyina.
29 Rĩrĩa arutwo ake maaiguire ũhoro ũcio, magĩthiĩ makĩoya mwĩrĩ wake na makĩũkomia mbĩrĩra-inĩ.*
30 Atũmwo makĩũngana harĩ Jesu na makĩmwĩra maũndũ marĩa mothe meekĩte na makarutana.+
31 Nake akĩmeera atĩrĩ: “Ũkai tũthiĩ tũrĩ ithuiki handũ hatarĩ andũ angĩ mũkahurũke hanini.”+ Tondũ kwarĩ na andũ aingĩ mookaga magĩthiaga, nginya o makaga ihinda rĩa kũhurũka o na rĩa kũrĩa irio.
32 Nĩ ũndũ ũcio makĩingĩra thĩinĩ wa gatarũ nĩguo mathiĩ handũ hatarĩ andũ nĩgetha makorũo marĩ oiki.+
33 No rĩrĩa andũ maamonire magĩthiĩ, na aingĩ makĩmenya, magĩteng’era na magũrũ moimĩte matũũra-inĩ mothe, na magĩkinya mbere yao.
34 Na rĩrĩa ooimire gatarũ-inĩ, akĩona kĩrĩndĩ kĩnene, akĩringwo nĩ tha+ tondũ maatariĩ ta ng’ondu itarĩ na mũrĩithi.+ Akĩambĩrĩria kũmaruta maũndũ maingĩ.+
35 Na gwakinya hwaĩ-inĩ, arutwo ake magĩthiĩ harĩ we makĩmwĩra ũũ: “Kũndũ gũkũ nĩ werũ-inĩ na mathaa nĩ mathiĩte mũno.+
36 Ĩra andũ aya moimagare nĩguo mathiĩ mĩgũnda-inĩ na icagi-inĩ iria ithiũrũrũkĩirie makegũrĩre irio.”+
37 Nake akĩmacokeria akĩmeera atĩrĩ: “Inyuĩ mahei kĩndũ gĩa kũrĩa.” Maigua ũguo makĩmũũria ũũ: “Tũthiĩ tũgũre mĩgate ya dinari* 200 tũhe andũ aya marĩe?”+
38 Nake akĩmoria atĩrĩ: “Mũrĩ na mĩgate ĩigana? Thiĩi mũrore!” Nao marora makĩmwĩra: “Tũrĩ na mĩgate ĩtano na thamaki igĩrĩ.”+
39 Nake akĩra andũ othe maikare thĩ nyeki-inĩ nduru marĩ ikundi.+
40 Nao magĩikara thĩ marĩ ikundi cia andũ 100 na cia andũ 50.
41 Nake akĩoya mĩgate ĩyo ĩtano na thamaki icio igĩrĩ, akĩrora igũrũ akĩhoya kĩrathimo.+ Agĩcoka akĩenyũranga mĩgate ĩyo, akĩnengera arutwo matwarĩre andũ, na akĩgayania thamaki icio igĩrĩ nĩ ũndũ wa andũ acio othe.
42 Nao othe makĩrĩa makĩhũna,
43 na makĩũngania cienyũ cia mĩgate ikĩiyũra ikabu 12, thamaki itatarĩtwo.+
44 Arĩa maarĩire mĩgate ĩyo maarĩ arũme 5,000.
45 O rĩo akĩra arutwo ake maingĩre gatarũ maringage mwena ũcio ũngĩ wa iria kwerekera Bethisaida nake agĩtigwo akiugĩra kĩrĩndĩ ũhoro.+
46 No thutha wa kũmoigĩra ũhoro, agĩthiĩ kĩrĩma-inĩ kũhoya.+
47 Rĩrĩa gwatukire, gatarũ kau kaarĩ iria-inĩ gatagatĩ, no Jesu aarĩ wiki thĩ nyũmũ.+
48 Na rĩrĩa aamonire magĩgatwara na thĩna mũno tondũ rũhuho rwahurutanaga rwerekeire mwena ũrĩa mooimaga, hakuhĩ ituanĩra rĩa kana rĩa ũtukũ* agĩthiĩ harĩ o agereire igũrũ rĩa iria; no eendaga* kũmahĩtũka.
49 Na rĩrĩa maamuonire agereire igũrũ rĩa iria, magĩĩciria ũũ: “Gĩkĩ nĩ kĩoneki kĩa magegania!” Na magĩkaya.
50 Nĩ gũkorũo othe nĩ maamuonire na magĩĩtigĩra. No o hĩndĩ ĩyo akĩmeera: “Gĩai na ũmĩrĩru! Nĩ niĩ; mũtigetigĩre.”+
51 Agĩcoka akĩingĩra gatarũ karĩa maarĩ, naruo rũhuho rũkĩhoorera. Mona ũguo makĩgega mũno,
52 nĩ gũkorũo matiataũkĩirũo nĩ ũhoro wa mĩgate ĩrĩa aaheanĩte, ĩndĩ ngoro ciao ciathiire na mbere kwaga ũtaũku.
53 Rĩrĩa maaringire magĩkinya thĩ nyũmũ mũrĩmo ũcio ũngĩ, magĩkinya Genesareti na makĩoha gatarũ o hau hakuhĩ.+
54 No moima gatarũ-inĩ o ũguo, andũ makĩmenya nĩ we.
55 Magĩteng’era gĩcigo-inĩ kĩu gĩothe na makĩambĩrĩria kũmũrehera arĩa maarĩ arwaru mamakuuĩte na tũrĩrĩ o kũrĩa maigua arĩ.
56 Na kũrĩa guothe aathiaga icagi-inĩ kana matũũra-inĩ kana mĩgũnda-inĩ, maaigaga andũ arĩa maarĩ arwaru thoko-inĩ, makamũthaitha etĩkĩre mahutie o gĩcũrĩ kĩa nguo yake ya igũrũ.+ Na arĩa othe maakĩhutirie makĩhonio.
Tũũhoro twa magũrũ-inĩ
^ Ũkk., “gĩcango.”
^ Kana “nguo ĩngĩ.”
^ Kana “arĩa maaikarĩte metha-inĩ.”
^ Kana “na arĩa maaikarĩte metha-inĩ.”
^ Kana “mbĩrĩra-inĩ ya kĩririkano.”
^ Rora Ũhoro Muongerere B14.
^ Ithaa-inĩ rĩa kuuma kĩndũ ta thaa kenda cia ũtukũ nginya kĩndũ ta thinacara riũa rĩkĩratha.
^ Kana “aarĩ hakuhĩ.”
