Nĩ ihoya ritũ atĩ andũ aingĩ o ũrĩa kwahoteka nĩ mekũiyũkia ndũmĩrĩri ya mũkaana na manyitanĩre na ithuĩ ihinda-inĩ rĩrĩ ũthathaiya-inĩ mũtheru. No gũgaathiĩ atĩa harĩ andũ arĩa mekwaga kũgarũrĩra ihinda-inĩ rĩrĩ, nginya andũ aitũ a famĩlĩ? No kũhoteke Jehova nĩ akaahonokia andũ arĩa makaagarũrĩra mwerekera wao mona Babuloni Ũrĩa Mũnene anangwo. Angĩkorũo nĩ gũgaathiĩ ũguo, ũkĩrĩ ũndũ wa bata o na makĩria gũthiĩ na mbere kũheana ndũmĩrĩri ĩyo ya mũkaana. Maũndũ marĩa tũrameera ihinda-inĩ rĩrĩ, kwahoteka nĩ makaaririkana mamwe mamo ihinda-inĩ rĩu. (Ringithania Ezekieli 33:33.) No gũkorũo nĩ makaaririkana ndũmĩrĩri ya mũkaana ĩrĩa twamaheaga, na mambĩrĩrie kũnyitanĩra na ithuĩ ũthathaiya-inĩ mũtheru matanacererũo mũno. O ta ũrĩa mũrangĩri ũmwe wa njera itũũra-inĩ rĩa Filipi aagarũrĩire mwerekera wake rĩrĩa kwagĩire “gĩthingithia kĩnene,” no kũhoteke andũ amwe arĩa matatũthikagĩrĩria ihinda-inĩ rĩrĩ nĩ makaagarũrĩra mwerekera wao rĩrĩa makeeyonera kwanangwo kwa Babuloni Ũrĩa Mũnene.—Atũm. 16:​25-34. w24.05 17 ¶9-10

Nĩ harĩ ũndũ wa bata tũreruta kuumana na ũrĩa mũtũmwo Paulo aandĩkĩire Akristiano Ahibirania. Amwe ao nĩ maatigĩte gũkũra kĩĩroho, o na “nĩ [maatuĩkĩte] rĩngĩ a kũbatara iria no ti irio nyũmũ” cia kĩĩroho. (Ahib. 5:12) Nĩ maaremetwo gũtwaranaga na ũhoro wa ma ũrĩa wathiaga ũkĩguũragio kũgerera kĩũngano. (Thim. 4:18) Kwa ngerekano, Ayahudi aingĩ arĩa maatuĩkĩte etĩkia no maarũmagĩrĩra Watho wa Musa ũrĩa waniinĩtwo ta mĩaka 30 mbere ĩyo, thutha wa Jesu kũruta igongona rĩa ũkũũri. (Tit. 1:10) Ibuku rĩu rĩa Ahibirania nĩ rĩonanagia wega atĩ Paulo aageragia gũteithia Akristiano acio mone bata wa kũrĩa irio nyũmũ cia kĩĩroho. Ũndũ ũcio nĩguo Akristiano acio maabataraga nĩguo mekĩre wĩtĩkio wao hinya harĩ mũbango mwerũ wa ũthathaiya, na magĩe na ũmĩrĩru wa gũthiĩ na mbere kũhunjia.—Ahib. 10:​19-23. w24.04 6 ¶15

Kuuma rĩrĩa Adamu na Hawa maanyitanĩire na Shaitani kũremera Jehova, andũ bilioni nyingĩ nĩ makuĩte. Gũgaathiĩ atĩa harĩ andũ acio othe? Gakundi kanini ka arũmĩrĩri a Kristo 144,000, nĩ makaaheo muoyo ũtangĩthira kũrĩa igũrũ. (Kũg. 14:1) Nao andũ angĩ aingĩ arĩa meendete Jehova nĩ makoimĩra ‘iriũkĩro rĩa andũ arĩa athingu,’ na matũũre tene na tene thĩinĩ wa thĩ angĩkorũo nĩ magaikara marĩ ehokeku hĩndĩ ya Wathani wa Mĩaka Ngiri wa Kristo na hĩndĩ ya igerio rĩa mũthia. (Dan. 12:13; Ahib. 12:1) Ningĩ ihinda-inĩ rĩu rĩa Wathani wa Mĩaka Ngiri wa Kristo, “arĩa matarĩ athingu,” na nĩ hamwe na arĩa mataatungatĩire Jehova kana o na arĩa “meekaga maũndũ moru,” nĩ makaaheo mweke wa kũgarũrĩra mĩthiĩre yao na matuĩke ndungata cia Jehova. (Joh. 5:29; Luk. 23:​42, 43) O na kũrĩ ũguo, kũrĩ na andũ amwe maarĩ aganu mũno, na kwoguo Jehova nĩ atuĩte itua atĩ ndakaamariũkia.—Luk. 12:​4, 5. w24.05 3 ¶3; 6 ¶15, 17

Nĩgetha mũndũ etĩkĩrĩke harĩ Jehova, no mũhaka “[aragie] ũhoro wa ma ngoro-inĩ yake.” (Thab. 15:2) Kwaria ũhoro wa ma ngoro-inĩ itũ to gwĩthema kwaria maheeni. Jehova endaga ciugo na ciĩko citũ ikorũo irĩ cia kwĩhokeka hingo ciothe. (Ahib. 13:18) Na ũndũ ũcio nĩ wa bata “tondũ Jehova nĩ athũire mũndũ ũrĩ wara, no nĩ agĩaga ũrata wa hakuhĩ na arĩa arũngĩrĩru.” (Thim. 3:32) Andũ arĩa ‘maragia ũhoro wa ma ngoro-inĩ ciao’ matiĩtuaga atĩ nĩ marathĩkĩra Ngai rĩrĩa marĩ mbere ya andũ, no makoina mawatho make rĩrĩa marĩ oiki. Nĩ methemaga gũkorũo na wara, tondũ mũndũ ũrĩ na wara no ambĩrĩrie gwĩkĩrĩra nganja mawatho mamwe ma Jehova. (Jak. 1:​5-8) No age gwathĩkĩra Jehova maũndũ-inĩ marĩa arona ta matarĩ ma bata mũno. Na angĩaga kuona maumĩrĩro moru ma kwaga gwathĩka, no athiĩ omĩtie ngoro na njĩra ya kwagarara mawatho mangĩ ma Ngai, nginya ũthathaiya wake ũkorũo ũrĩ wa ũhinga. (Koh. 8:11) No ithuĩ tũngĩenda gũkoragwo tũrĩ ehokeku maũndũ-inĩ mothe. w24.06 10 ¶7-8

Andũ a Jehova nĩ mendete ũhoro wa ma ũrĩa ũrĩ Kiugo-inĩ kĩa Ngai. Ũhoro ũcio wa ma nĩguo ũkoragwo ũrĩ mũthingi wa wĩtĩkio witũ. (Rom. 10:17) Nĩ twĩtĩkĩtie atĩ Jehova aambĩrĩirie kĩũngano gĩa Gĩkristiano kĩrĩ “gĩtugĩ na kĩndũ gĩa gũtiirĩrĩra ũhoro ũrĩa wa ma.” (1 Tim. 3:15) Shaitani no akene mũno tũngĩtiga kwĩhoka Bibilia kana ũtongoria ũrĩa tũheagwo nĩ ithondeka rĩa Jehova. (Ef. 4:14) Ica ikuhĩ Shaitani nĩ ekũhũthĩra maheeni moru kũhĩtithia ndũrĩrĩ ciothe nĩguo iregane na Jehova. (Kũg. 16:​13, 14) Ningĩ no twĩrĩgĩrĩre atĩ Shaitani egũthiĩ ongereire kĩyo gĩa kũgeria kũhĩtithia andũ a Jehova. (Kũg. 12:9) Kwoguo nĩ ũndũ wa bata twĩrute gũkũũranaga ũhoro wa ma na wa maheeni, na tũgathĩkagĩra ũhoro wa ma. (Rom. 6:17; 1 Pet. 1:22) Gwĩka ũguo nĩ gũgaatũteithia kũhonoka thĩna ũrĩa mũnene! w24.07 8 ¶1-3

Rĩrĩa Jehova aathuurire rũrĩrĩ rwa Isiraeli, nĩ aagĩire kĩrĩkanĩro nao. Aameerĩte atĩ mangĩathĩkĩire mawatho make, nĩ angĩamagitĩrire na amarathime. No mangĩamũremeire, ta hihi mathathaiye ngai ingĩ, nĩ angĩamehereirie irathimo ciake, na ũndũ ũcio ũtũme macemanie na mathĩna. Ĩndĩ o na ihinda-inĩ ta rĩu, no maarĩ na mweke wa gwĩtĩkĩrĩka rĩngĩ nĩ Jehova. Nĩ ‘mangĩacokereire Jehova Ngai wao na mathikĩrĩrie mũgambo wake.’ (Gũcok. 30:​1-3, 17-20) Na njĩra ĩngĩ, maarĩ na mweke wa kwĩrira. Mangĩekire ũguo, Jehova nĩ angĩacokirie ũrata nao na ambĩrĩrie kũmarathima rĩngĩ. Rũrĩrĩ rũu Jehova eethuurĩire nĩ rwamũremeire rĩngĩ na rĩngĩ, na ũndũ ũcio ũgĩtũma macemanie na mathĩna. Ĩndĩ Jehova no aathiire na mbere kũmateithia atekũnoga. Aamatũmĩire anabii ake rĩngĩ na rĩngĩ nĩguo mamateithie merire na mamũcokerere.—2 Ath. 17:​13, 14. w24.08 9 ¶4-5

Mĩaka ĩrĩa yarũmĩrĩire thutha wa Jesu gũkua, Akristiano Ahibirania arĩa maaikaraga Jerusalemu na Judea nĩ maacemanirie na maũndũ maritũ mũno. Ihinda inini thutha wa kĩũngano gĩa Gĩkristiano kwambĩrĩrio, Akristiano acio nĩ maacemanirie na ũkararia mũnene. Na mĩaka ta 20 thutha ũcio, arũmĩrĩri a Kristo nĩ maathĩnĩkire mũno, hihi nĩ ũndũ wa ngʼaragu ĩrĩa yagũmĩire gĩcigo kĩu. (Atũm. 11:​27-30) O na kũrĩ ũguo, kĩndũ mwaka-inĩ wa 61 M.M., Akristiano nĩ maagĩire na ihinda rĩa thayũ, o na gũtuĩka thutha-inĩ nĩ mangĩacemanirie na ũkararia mũnene. Ihinda-inĩ rĩu rĩa thayũ, Paulo nĩ aamandĩkĩire marũa atongoretio nĩ roho. Maamũkĩrire marũa macio o ihinda rĩrĩa rĩagĩrĩire. Marũa macio Ahibirania maandĩkĩirũo maarĩ ma ihinda rĩrĩa rĩagĩrĩire tondũ thayũ ũrĩa Akristiano acio maarĩ naguo ndũngĩatũũrire ihinda iraihu. Paulo nĩ aamaheire motaaro mangĩamateithirie gũkirĩrĩria mĩnyamaro ĩrĩa yarĩ mbere yao. w24.09 8 ¶1-2

Rĩrĩa tũragerera ũndũ mũritũ, Jehova nĩ ahũthagĩra aarĩ na ariũ a Ithe witũ gũtuonia atĩ nĩ atwendete. No matũũmĩrĩrie na njĩra ya kũhũthĩra mahinda hamwe na ithuĩ na gũtũthikĩrĩria marĩ na ũcayanĩri. No matũthomere rĩandĩko rĩa gũtwĩkĩra ngoro kana mahoe hamwe na ithuĩ. (Rom. 15:4) Rĩmwe mũrũ kana mwarĩ wa Ithe witũ no atũririkanie mwĩcirĩrie wa Jehova ũndũ-inĩ mũna, na kwoguo atũteithie gũthiĩ na mbere gũkirĩrĩria. Ningĩ aarĩ na ariũ a Ithe witũ no matũhe ũteithio ũrĩa tũrabatara, ta hihi gũtũrugĩra irio rĩrĩa tũgũmĩirũo nĩ mĩtangĩko. No nĩguo arĩa angĩ matũhe ũteithio ũrĩa tũrabatara, no tũbatare kũhoya ũteithio. (Thim. 17:17) No makorũo matekũmenya maũndũ marĩa tũragerera kana ũteithio ũrĩa tũrabatara. (Thim. 14:10) Kwoguo no waranĩrie na Mũkristiano mũgimaru kĩĩroho ũmũtaarĩrie ũrĩa ũraigua. Mũmenyithie ũteithio ũrĩa ũngĩkorũo ũkĩbatara. No ũthuure kwaranĩria na mũthuri ũmwe wa kĩũngano kana erĩ, arĩa ũngĩhota kũhingũkĩra ngoro. Aarĩ a Ithe witũ amwe nĩ monete atĩ nĩ momagĩrĩrio rĩrĩa maria na mwarĩ wa Ithe witũ mũgimaru kĩĩroho. w24.10 10 ¶15-16

Andũ aingĩ nĩ merutanagĩria kũrĩa irio njega na kũmenyeria mwĩrĩ nĩguo magĩe na ũgima mwega wa mwĩrĩ. No matiĩrĩgagĩrĩra atĩ nĩ megũtũũra tene na tene. Mationaga ta ũndũ ũcio ũngĩhoteka na matiwĩriragĩria nĩ ũndũ wa mathĩna marĩa maumanaga na ũkũrũ. O na kũrĩ ũguo, Jesu nĩ oonanirie atĩ no kũhoteke andũ magĩe na “muoyo wa tene na tene,” o ta ũrĩa Johana 3:16 na 5:24 yonanĩtie. Hĩndĩ ĩmwe, Jesu nĩ aahũnirie andũ makiri maingĩ na mĩgate na thamaki na njĩra ya kĩama. Ũndũ ũcio warĩ wa kũgegania, no ũndũ ũrĩa aaugire mũthenya ũrĩa warũmĩrĩire warĩ wa kũgegania o na makĩria. Kĩrĩndĩ kĩu kĩamũrũmĩrĩire nginya Kaperinaumu hakuhĩ na rũteere rwa Iria rĩa Galili, na marĩ kũu akĩmeera atĩ andũ nĩ mangĩkariũkio na maheo muoyo wa tene na tene. (Joh. 6:​39, 40) Ciugo cia Jesu ironania atĩ andũ aingĩ arĩa makuĩte nĩ makaariũkio, na atĩ mũrĩ hamwe na endwa aku no mũtũũre tene na tene. w24.12 8 ¶1-2

Riboti ya ica ikuhĩ ya Kĩama kĩa Ũgima wa Mwĩrĩ gĩa Thĩ ĩronania atĩ athuri aingĩ nĩ mahũũraga atumia ao, makamaruma, kana makamatuurithia na njĩra itiganĩte. Mũthuri ta ũcio no etue nĩ arahe mũtumia wake gĩtĩo marĩ mbere ya andũ, no marĩ mũciĩ akamwĩkaga maũndũ moru. Nĩ maũndũ ta marĩkũ matũmaga athuri amwe meke atumia ao maũndũ moru? Amwe no gũkorũo maarerirũo makĩonaga baba wao akĩhũũra mami wao, na kwoguo mageciria ũcio ti thĩna. Angĩ marũmagĩrĩra ũndũire wa kwao, ũrĩa ũngĩkorũo na mawoni mahĩtanu ma atĩ mũthuri nĩ abatiĩ kũruta ũrũme gwake mũciĩ nĩguo mũtumia wake amwĩtigĩre. Nao angĩ kuuma marĩ o anini matiarutirũo kũgirĩrĩria marakara. Nao arũme amwe nĩ ũndũ wa kwĩroragĩra ponografĩ, monaga mũtumia arĩ mũndũ o wa kũhũthĩrũo  kũhingia merirĩria ma ngomanio. Makĩria ma ũguo, riboti nyingĩ cionanĩtie atĩ thĩna ũcio wa athuri gwĩka atumia ao maũndũ moru nĩ woongererekire kuuma hĩndĩ ya kĩngʼũki gĩa COVID-19. O na kũrĩ ũguo, itũmi icio itirahe mũthuri kĩĩgwatio gĩa gwĩka mũtumia wake maũndũ moru. w25.01 8 ¶2-3

“No mũhaka wende Jehova Ngai waku na ngoro yaku yothe na muoyo waku wothe na hinya waku wothe na meciria maku mothe.” (Luk. 10:27) Jesu oonanirie atĩ rĩu nĩrĩo rĩarĩ rĩathani rĩrĩa inene Watho-inĩ wa Musa. Kwoguo tũbatiĩ kwenda Jehova na kĩrĩa gĩothe tũrĩ nakĩo, na ũndũ ũcio nĩ ũhutanĩtie na merirĩria maitũ, ũrĩa tũraigua ngoro-inĩ, na hinya witũ. Ningĩ nĩ ũhutanĩtie na ũrĩa tũhũthagĩra meciria maitũ. Ũrĩa kũrĩ nĩ atĩ, tũtingĩtaũkĩrũo biũ nĩ mwĩcirĩrie wothe wa Jehova. No no tũmenye mwĩcirĩrie wa Ngai na njĩra ya kwĩruta ũhoro wĩgiĩ “meciria ma Kristo,” tondũ Jesu nĩwe kĩonereria gĩkinyanĩru kĩa ũrĩa Ithe eciragia.—1 Kor. 2:16. w25.03 8 ¶1

Jesu aarĩ mũndũ mũkinyanĩru o ta Adamu atanehia. (1 Kor. 15:45) Kwoguo kũgerera gĩkuũ kĩa Jesu, nĩ aahotire kũhumbĩra mehia ma Adamu, na ũguo nĩ kuuga gũcokia kĩrĩa Adamu aateire. (Rom. 5:19) Nĩ ũndũ ũcio, Jesu agĩtuĩka “Adamu wa mũico.” Gũtiabataranagia mũndũ ũngĩ mũkinyanĩru wa kũrĩhĩra kĩrĩa Adamu aateire, tondũ Jesu aakuire “riita rĩmwe rĩa kũigana.” (Ahib. 7:27; 10:12) Gũkĩrĩ ũguo-rĩ, nĩ ngũrani ĩrĩkũ ĩrĩ ho gatagatĩ ka mũbango wa kũhumbĩra mehia na ũkũũri? Mũbango wa kũhumbĩra mehia nĩ ikinya Ngai ooire rĩa gũcokia ũrata gatagatĩ-inĩ gake na andũ. Naguo ũkũũri nĩ thogora ũrĩa warĩhirũo nĩguo mehia ma andũ mahumbĩrũo. Thogora ũcio nĩ thakame ya goro ya Jesu ĩrĩa yaitirũo nĩ ũndũ witũ.—Ahib. 9:14. w25.02 5 ¶12-13.

Kuona Jehova arĩ Ngai ũrĩa ũtũũraga muoyo nĩ gũtũteithagia gũkorũo na muonere ũrĩa wagĩrĩire wĩgiĩ magerio maitũ. Tũngiuga ũguo nĩkĩ? Tondũ ũndũ ũcio nĩ ũtũteithagia kũririkana atĩ magerio maitũ nĩ mahutanĩtie na ũndũ ũngĩ mũnene, wĩgiĩ thitango ĩrĩa Shaitani eerekeirie harĩ Jehova. Mũcukani augaga atĩ no tũtiganĩrie Jehova tũngĩcemania na moritũ. (Ayub. 1:​10, 11; Thim. 27:11) No rĩrĩa twakirĩrĩria moritũ tũrĩ ehokeku, tuonanagia atĩ nĩ twendete Jehova na tũkonania atĩ Shaitani nĩ mũheenania. Kwahoteka nĩ ũracemania na magerio, ta hihi gũũkĩrĩrũo nĩ thirikari, mathĩna ma kĩĩmbeca, kana andũ arĩa ũrahunjĩria makaga gũgũthikĩrĩria. Angĩkorũo nĩguo, ririkana atĩ ũndũ ũrĩa ũragerera nĩ ũrakũhe mweke wa gũkenia ngoro ya Jehova. Ningĩ ririkana atĩ ndangĩreka ũgerio gũkĩra ũrĩa ũngĩhota gwĩtiiria. Nĩ arĩkũheaga hinya wa gũthiĩ na mbere gũkirĩrĩria. w24.06 22 ¶9

Hihi wee nĩ ũkoragwo ũĩ magerio marĩa mangĩgũtooria na njĩra hũthũ? No tũkorũo ũgwati-inĩ tũngĩaga gwĩtĩkĩra atĩ tũrĩ na wathe mũna kana kwĩheenia atĩ tũrĩ na hinya ũndũ tũtangĩgwa mehia-inĩ. (1 Joh. 1:8) O na Paulo aaugire atĩ nginya arĩa marĩ “na ngumo cia kwagĩrĩra kĩĩroho” no magwe magerio-inĩ mangĩaga kwĩrora. (Gal. 6:1) Kwoguo nĩ wega gwĩtĩkĩra atĩ tũrĩ na wathe mũna na gũkũũrana harĩa tũnyihĩirũo. (2 Kor. 13:5) Tũbatiĩ gwĩka atĩa thutha wa kũmenya magerio marĩa mangĩtũtooria na njĩra hũthũ? Twagĩrĩirũo kwĩhotora biũ kũregana na magerio macio. Ta wĩcirie ngerekano ĩno: Mahinda-inĩ ma Bibilia, ihingo-inĩ cia itũũra nĩho thũ cingĩaingĩrĩire na njĩra hũthũ. Kwoguo ihingo nĩcio ciagitagĩrũo mũno nĩguo itũũra rĩkorũo na ũgitĩri. Na njĩra o ta ĩyo, nĩ tũrabatara kũrutĩra wĩra o na makĩria mawathe marĩa tũĩ atĩ no matũme tũgwe magerio-inĩ na njĩra hũthũ.—1 Kor. 9:27. w24.07 15 ¶5-7

Wĩra mwega ũrĩa ũrarĩrĩrio rĩandĩko-inĩ rĩa ũmũthĩ nĩ hamwe na kũhunjia ũhoro ũrĩa mwega. Kwoguo rĩrĩa twathoma Kiugo kĩa Ngai na twecũrania kĩrĩa twathoma, nĩ twĩkĩraga hinya wĩtĩkio witũ harĩ Jehova na tũkoona bata wa gũthiĩ na mbere kũhunjia ndũmĩrĩri ya Ũthamaki. Nĩguo tũgunĩke biũ kuumana na Kiugo kĩa Ngai, no mũhaka tũtigagĩrĩre atĩ twĩ na ihinda rĩiganu rĩa gũgĩthoma na gwĩcũrania maũndũ marĩa tweruta, handũ ha gũgĩthomaga ihenya ihenya. Ũngĩcemania na mũhari ũtarataũkĩrũo nĩguo wega, ndũkaũhĩtũke. Handũ ha ũguo, hũthĩra Ũteithio wa Ũthuthuria Harĩ Aira a Jehova kana Fahirisi nĩguo wone ũrĩa mũhari ũcio ũtaarĩirio. Ũngĩoyaga ihinda ũkĩĩruta Bibilia, nĩ ũrĩkĩraga hinya wĩtĩkio waku harĩ Kiugo kĩa Ngai. (1 Thes. 5:21) O ũrĩa ũgũkorũo na ma na Kiugo kĩa Ngai, noguo ũrĩkenagĩra kwĩra andũ arĩa angĩ maũndũ marĩa wĩrutĩte. w24.04 15 ¶4-5

Daudi aaugire atĩ Jehova nĩ ‘mwega na akoragwo ehaarĩirie kuohanĩra.’ (Thab. 86:5) Nake Mika aandĩkire ũũ: “Nĩ Ngai ũrĩkũ ũhaana tawe, ũrĩa wohanagĩra mahĩtia na akaga gũtindanĩra na mehia?” (Mik. 7:18) Isaia nake aaugire: “Mũndũ ũrĩa mwaganu nĩ atigane na mĩthiĩre yake na ũrĩa wĩkaga maũndũ moru atigane na methugunda make; nĩ acokerere Jehova, na nĩ ekũmũiguĩra tha, nĩ acokerere Ngai witũ, nĩ gũkorũo nĩ ekuohanĩra na njĩra nene.” (Isa. 55:7) Aarĩ na ariũ a Ithe witũ a kĩũngano gĩa Korintho meerĩtwo megerekanie na Jehova na njĩra ya kwamũkĩra mũndũ werirĩte, na mamuonie atĩ nĩ mamwendete. Tondũ kĩũngano kĩu nĩ kĩarũmĩrĩire ũtongoria ũcio, nĩ kĩoonanirie atĩ nĩ “[gĩathĩkaga] maũndũ-inĩ mothe.” O na gũtuĩka mũndũ ũcio aaikarire o mĩeri mĩnini kuuma eherio kĩũngano-inĩ, kũrũngwo na njĩra ĩyo nĩ kwamũteithĩtie gũkinyĩrĩra kwĩrira. Kwoguo hatiarĩ na gĩtũmi gĩa kũmaĩrĩria kũmũcokia kĩũngano-inĩ. w24.08 17-18 ¶12-13

Kũrĩ na mogarũrũku manene makiriĩ gwĩkĩka! Ica ikuhĩ Jesu nĩ egũtuĩra andũ arĩa marĩ thĩinĩ wa thĩ. Jesu nĩ oonanirie ũrĩa tũngĩkamenya atĩ ihinda rĩu rĩa ituĩro nĩ rĩkuhĩrĩirie, na njĩra ya kũhe arutwo ake “kĩmenyithia” gĩa gũkorũo kuo gwake na kĩa “ithirĩro rĩa mũtabarĩre wa maũndũ.” (Mat. 24:3) Kĩmenyithia kĩu nĩ kĩarĩrĩirio thĩinĩ wa Mathayo 24 na 25, na thĩinĩ wa Mariko 13 na Luka 21. Jesu nĩ aatũheire mĩkaana ya bata akĩhũthĩra ngerekano ithatũ. Aaheanire ngerekano ya ngʼondu na mbũri, ya airĩtu ogĩ na akĩgu, na ya taranda. O ngerekano nĩ ĩtũteithagia gũtaũkĩrũo atĩ Jesu agaatuĩra o mũndũ kũringana na mĩthiĩre yake. w24.09 20 ¶1-2

Jesu Kristo arĩ we kĩonereria gitũ kĩrĩa kĩnene, eekaga maũndũ agĩtindĩkwo nĩ wendo wake harĩ Ithe na harĩ andũ. Wendo ũcio nĩguo watũmaga akorũo na kĩyo gĩa kũruta nginya mawĩra marĩa moonagwo marĩ ma kĩrathi gĩa thĩ. (Mat. 20:28; Joh. 13:​5, 14, 15) Wee mũrũ wa Ithe witũ, angĩkorũo ũratindĩkwo nĩ wendo, Jehova nĩ egũkũrathima na agũteithie gũkinyĩra mĩoroto yaku ya kĩĩroho, ta gũtuĩka ndungata ya kĩũngano. (1 Pet. 5:5) Andũ aingĩ thĩinĩ wa thĩ nĩ magucagĩrĩrio nĩ andũ arĩa metũũgagĩria. No tiguo gũkoragwo ithondeka-inĩ rĩa Jehova. Mũrũ wa Ithe witũ ũratindĩkwo nĩ wendo o ta Jesu, ndangĩĩrirĩria gũkorũo na ũnene igũrũ rĩa andũ arĩa angĩ kana igweta. Mũndũ ũrerirĩria maũndũ ta macio angĩamũrũo kĩũngano-inĩ, no age gwĩtĩkĩra kũruta mawĩra mamwe ma kĩrathi gĩa thĩ marĩa mabataranagia harĩ kũrũmbũiya ngʼondu cia Jehova. No eyone arĩ wa bata mũno ũndũ atangĩenda gwĩka maũndũ ta macio.—Joh. 10:12. w24.11 15-16 ¶6-7

Kũndũ guothe thĩinĩ wa thĩ, nĩ kũrabatarania ariũ a Ithe witũ aingĩ makĩria a gũtungatĩra kĩũngano. (Ef. 4:8) Angĩkorũo ũrĩ mũrũ wa Ithe witũ mũbatithie-rĩ, hihi “ũrĩ na ũhoti wa gũteithia”? (Thim. 3:27) Hihi no wĩrutanĩrie nĩgetha wagĩrĩre gũtuĩka ndungata ya kĩũngano? Angĩkorũo wĩ ndungata ya kĩũngano, hihi no wende gũkinyĩra muoroto wa gũtungata ũrĩ mũthuri wa kĩũngano? Hihi no ũbange maũndũ maku nĩguo ũiyũrie fomu ya gũthiĩ Cukuru ya Ahunjia a Ũthamaki? Cukuru ĩyo no ĩkũmenyerie na ĩgũteithie kũhũthĩrũo makĩria nĩ Jesu. Ũngĩigua ta ũtaragĩrĩra maũndũ-inĩ macio, hoya Jehova. Mwĩre akũhe roho wake mũtheru nĩguo ũgũteithie kũhingia wĩra o wothe ũngĩheo. (Luk. 11:13) Ariũ a Ithe witũ arĩa Jesu atũheete “marĩ ta iheo,” makoragwo marĩ ũira atĩ nĩ aratũtongoria matukũ-inĩ maya ma kũrigĩrĩria. (Mat. 28:20) Na githĩ tũtikoragwo na ngatho nyingĩ tondũ Mũthamaki witũ mũtaana na ũtwendete nĩ oĩ kĩrĩa tũrabatara na nĩ atũheete ariũ a Ithe witũ a gũtũteithia? w24.10 23 ¶16-17

Gũgathiĩ atĩa harĩ maũndũ marĩa mothe mareheire andũ a Ngai ruo na mĩtangĩko? Mũthia-inĩ maũndũ macio ‘nĩ makaariganĩra na mahithwo kuuma maitho-inĩ ma Ngai.’ (Isa. 65:16) Jehova nĩ akaaniina mathĩna maitũ mothe, na thutha wa ihinda tũtikaaririkana ruo rũrĩa twanagerera nĩ ũndũ wamo. O na ihinda-inĩ rĩrĩ nĩ tũiguaga tũhooreire rĩrĩa tũrĩ mĩcemanio-inĩ ya kĩũngano, tondũ tũrĩ kũu tũtithumbũkaga nĩ ũndũ wa mĩtangĩko ya thĩ ĩno njũru. Ningĩ nĩ tũtũmaga aarĩ na ariũ a Ithe witũ maigue mahooreire rĩrĩa tuonania ngumo cia maciaro ma roho wa Ngai ta wendo, gĩkeno, thayũ, ũtugi, na ũhooreri. (Gal. 5:​22, 23) Na githĩ ti kĩrathimo kĩnene gũkorũo thĩinĩ wa ithondeka rĩa Jehova? Arĩa megũtũũra thĩinĩ wa paradiso ya kĩĩroho, nĩ makeeyonera kĩĩranĩro kĩa Ngai gĩa kũũmba “igũrũ rĩerũ na thĩ njerũ” gĩkĩhinga biũ. w24.04 22 ¶9-10

O na gũtuĩka ndũgũ ya andũ marenda kũmenyana makĩria no ĩkorũo ĩrĩ ya gũcanjamũra, nĩ ĩbatiĩ kuoywo na ũritũ tondũ no ĩtũme makinyĩrĩre kũhikania. Mũthenya wa ũhiki, andũ arĩa marahikania mehĩtaga mbere ya Jehova atĩ megũtũũra mendanĩte na maheanĩte gĩtĩo ihinda rĩrĩa rĩothe megũkorũo muoyo. Mbere ya kwĩhĩta mwĩhĩtwa o wothe, mũndũ nĩ agĩrĩirũo gwĩcũrania na njĩra ndikĩru. Na ũguo noguo mũndũ agĩrĩirũo gwĩka atanehĩta mwĩhĩtwa wa kũingĩra kĩhiko-inĩ. Ihinda rĩrĩa andũ matumĩte ndũgũ, nĩ rĩmateithagia kũmenyana wega nĩguo matue itua rĩrĩa rĩagĩrĩire. No matue itua rĩa kũhikania kana rĩa kũniina ndũgũ ĩyo. Mangĩtua itua rĩa kũmĩniina, ũguo ti kuuga atĩ ndũgũ yao ndĩnagaacĩra. Handũ ha ũguo, ĩgũkorũo ĩhingĩtie muoroto wayo wa kũmateithia gũtua itua rĩrĩa rĩagĩrĩire. Nĩkĩ nĩ ũndũ wa bata gũkorũo na mawoni marĩa magĩrĩire megiĩ gũtuma ndũgũ? Mũkristiano ũtarĩ kĩhiko-inĩ angĩkorũo na mawoni marĩa magĩrĩire megiĩ ũndũ ũcio, ndangĩambĩrĩria ndũgũ na mũndũ angĩkorũo ndarĩ na muoroto wa kũhikania nake. w24.05 26-27 ¶3-4

Rĩmwe andũ ethĩ no maigue matarĩ na ũmĩrĩru wa gũtetera wĩtĩkio wao. Kwa ngerekano, no metigĩre mangĩrũo mataarĩrie kĩrĩa gĩtũmaga mage gwĩtĩkia ũrutani wa indo kwĩyumĩria. O na no metigĩre o na makĩria mangĩrũo nĩ mwarimũ wao mataarĩrie ũndũ ũcio marĩ mbere ya kĩrathi. Hihi ũngĩteithia mwana waku atĩa gũkorũo na ma biũ na maũndũ marĩa etĩkĩtie? Mũteithie gũkorũo na ma atĩ ndabatiĩ gũconoka atĩ tondũ nĩ etĩkĩtie nĩ kũrĩ Mũũmbi. O na athomi aingĩ a sayansi nĩ monaga atĩ indo iria irĩ muoyo itingĩkorũo nĩ kwĩyumĩria cieyumĩririe. Nĩ ũndũ wa kuona ũrĩa indo icio cionanagia ũũgĩ mũnene na igakorũo irĩ cia magegania, nĩ monaga atĩ no nginya akorũo nĩ harĩ ũrĩa waciũmbire. Nĩkĩo magaga gwĩtĩkia ũrutani wa indo kwĩyumĩria. O na mwana waku no ekĩre wĩtĩkio wake hinya angĩĩcũrania maũndũ marĩa matũmaga aarĩ na ariũ a Ithe witũ arĩa angĩ metĩkie atĩ indo iria irĩ muoyo nĩ kũũmbwo ciombirũo. w24.12 18 ¶14-15

Jesu nĩ aatũũririe mawoni mega kwerekera andũ arĩa aahunjagĩria. Ũndũ ũcio nĩ wamũteithirie gũtũũria gĩkeno na kĩyo ũtungata-inĩ wake. Kwa ngerekano, mũthia-inĩ wa mwaka wa 30 M.M., Jesu nĩ oonire atĩ andũ aingĩ nĩ meehaarĩirie gũthikĩrĩria ndũmĩrĩri yake, na akĩmaringithania na mũgũnda werũhĩte ũndũ ũngĩgethwo. (Joh. 4:35) Kĩndũ mwaka ũmwe thutha ũcio, eerire arutwo ake ũũ: “Magetha nĩ maingĩ.” (Mat. 9:​37, 38) Na thutha-inĩ nĩ aatĩtĩrithirie ũndũ ũcio rĩngĩ akiuga ũũ: “Magetha nĩ maingĩ . . . Hoyai Mwene magetha atũme aruti wĩra magetha-inĩ make.” (Luk. 10:2) Hĩndĩ ciothe Jesu nĩ aakoragwo na ma atĩ nĩ kũrĩ andũ mangĩetĩkĩrire ũhoro ũrĩa mwega, na nĩ aakenaga rĩrĩa meka ũguo. Jesu nĩ aarutire arutwo ake gũkoragwo na mawoni mega megiĩ ndũmĩrĩri ĩrĩa maahunjagia, na ũndũ ũcio nĩ ũngĩamateithirie gũtũũria kĩyo kĩao. w25.03 18-19 ¶15-16

Jehova nĩ rĩũrĩro irũmu. O ta ũrĩa rwaro rwa ihiga rũngĩgitĩra mũndũ hĩndĩ ya kĩhuhũkanio, no taguo Jehova atũgitagĩra rĩrĩa tũracemania na moritũ ũtũũro-inĩ. Nĩ atũgitagĩra kuumana na ũndũ o wothe ũngĩtũrehera mwanangĩko wa gũtũũra. Na makĩria ma ũguo, nĩ atwĩrĩire atĩ nĩ akeeheria ũndũ o wothe ũtũmaga tũtangĩke kana tũthĩnĩke. (Ezek. 34:​25, 26) Njĩra ĩmwe tũngĩtua Jehova Rĩũrĩro ritũ irũmu nĩ kũgerera mahoya. Rĩrĩa twamũhoya, nĩ atũheaga “thayũ wa Ngai” ũrĩa ũgitagĩra ngoro na meciria maitũ. (Afil. 4:​6, 7) Jehova akoragwo ho nĩ ũndũ witũ hingo ciothe. Kwoguo no tũmwĩhoke tondũ we nĩ “Rwaro rwa Ihiga rwa tene na tene.” (Isa. 26:​3, 4) Hingo ciothe nĩ arĩhingagia ciĩranĩro ciake, agathikĩrĩria mahoya maitũ, na agatũhe ũteithio ũrĩa tũrabatara. Ningĩ no twĩhoke Jehova tondũ akoragwo arĩ mwĩhokeku harĩ arĩa mamũtungatagĩra. (2 Sam. 22:26) Gũtirĩ hĩndĩ akaariganĩrũo nĩ maũndũ marĩa mothe tũmwĩkagĩra, na hingo ciothe nĩ arĩtũrathimaga.—Ahib. 6:10; 11:6. w24.06 27 ¶4-6

Nĩ twagĩrĩirũo gwĩthema maũndũ marĩa mangĩthũkia ngoro itũ, ta thiritũ njũru, gwĩkenia na maũndũ matagĩrĩire, na gũtengʼerania na indo cia kĩĩmwĩrĩ. Tũngĩmenya atĩ harĩ na ũndũ ũratũma ũrata witũ na Jehova wambĩrĩrie kũnyiha, tũbatiĩ kuoya ikinya o na ihenya rĩa gũtigana naguo. (Mat. 5:​29, 30) Tũtibatiĩ kũreka ngoro itũ ĩgayũkane. No twambĩrĩrie gwĩciria atĩ tũngĩongerera kĩyo maũndũ-inĩ ma kĩĩroho, tũtingĩthũkio nĩ ũgucania mũũru. Kwa ngerekano-rĩ, ta hũũra mbica ũthiĩte handũ hĩndĩ ya heho. Thutha wa gũcoka mũciĩ, ũgakia mwaki nĩguo wote. Nĩ ũkuona ta ũngĩigua ũrugarĩ wa kũigana ũngĩaga kũhinga mũrango? Aca, tondũ heho no ĩraingĩra. Tũreruta atĩa? O na tũkĩongagĩrĩra kĩyo maũndũ-inĩ ma kĩĩroho nĩguo tũkorũo na ũrata mwega hamwe na Jehova, no mũhaka tũhinge mũrango wa mũhaano nĩguo tũtigetĩkĩrie “rĩera” ihehu, kana mĩerekera mĩũru ya thĩ ĩno ĩingĩre ngoro-inĩ itũ ĩmĩgayũkanie.—Ef. 2:2. w24.07 21 ¶6-7

Jesu nĩ aakirĩrĩirie ruo rũnene, gũconorithio, na wagi wa kĩhooto na njĩra tũtangĩtaũkĩrũo biũ. No aatũũririe mawoni mega o na thutha wa gwĩkwo maũndũ maingĩ matarĩ ma kĩhooto. Handũ ha gwĩtĩria thigari iria ciamũcuuririe mũtĩ-inĩ kĩrumi, aacihoeire ũũ: “Awa, mohere, nĩ gũkorũo matiramenya ũrĩa mareka.” (Luk. 23:34) Rĩrĩa twahoera arĩa maratũnyarira, nĩ tũrikagĩria marakara marĩa twĩ namo kũmerekera, na o na tũgacenjia mawoni maitũ megiĩ andũ acio matũtuurithĩtie. Tũtiũĩ nĩ maũndũ marĩkũ matarĩ ma kĩhooto tũgũcemania namo mũthia wa mũtabarĩre ũyũ ũtanakinya. Gũtekũmakania ũndũ o wothe tũngĩcemania naguo, rekei tũtikanatige kũhoya ũteithio wa Jehova. Ningĩ nĩ wega twĩgerekanagie na ũrĩa Jesu aahiũranagia na wagi wa kĩhooto, na tũthiĩ na mbere kũhũthĩra motaaro ma Bibilia. Tweka ũguo, no tũkorũo na ma atĩ Jehova nĩ arĩtũrathimaga.—1 Pet. 3:​8, 9. w24.11 7 ¶16, 17, 19

Jehova nĩ athũire mehia, na kwoguo kũrĩ mĩtugo atetĩkagĩria. (Thab. 5:​4-6) Erĩgagĩrĩra tũrũmie ithimi ciake cia ũthingu iria aandĩkithirie thĩinĩ wa Bibilia. O na kũrĩ ũguo, Jehova nĩ oĩ atĩ tũtirĩ akinyanĩru, na kwoguo nderĩgagĩrĩra tũmwathĩkĩre na njĩra nginyanĩru. (Thab. 130:​3, 4) Ĩndĩ ndegũtũũra akirĩrĩirie “andũ matetigĩrĩte Ngai arĩa magarũraga ũtugi wake mũnene ũgatuĩka kĩĩgwatio gĩa gwĩka mĩtugo ya rũtũrĩko.” (Jud. 4) Nĩkĩo Bibilia yaragia ũhoro wa “kũniinwo kwa andũ arĩa matetigĩrĩte Ngai” hĩndĩ ya mbaara ya Hari–Magedoni. (2 Pet. 3:7; Kũg. 16:16) O na kũrĩ ũguo, Jehova ndendaga mũndũ o na ũmwe akaaniinwo. Bibilia nĩ yonanagia wega atĩ “endaga othe merire.” (2 Pet. 3:9) Athuri a kĩũngano nĩ megerekanagia na Jehova na njĩra ya gũteithia mũndũ wĩhĩtie marĩ na wetereri, nĩguo acenjie mĩthiĩre yake na etĩkĩrĩke rĩngĩ harĩ Jehova. w24.08 26 ¶1-2

O ta Jehova, o na ithuĩ no tũheage arĩa angĩ indo iria marabatara tũgĩtindĩkwo nĩ wendo. Kwa ngerekano-rĩ, hihi nĩ ũĩ mũrũ kana mwarĩ wa Ithe witũ ũrabatara ũteithio wa irio kana nguo? Jehova no akũhũthĩre kũmũhe ũteithio ũrĩa arabatara. Andũ a Jehova nĩ mahiũhaga kũheana ũteithio, makĩria hĩndĩ ya moritũ. Kwa ngerekano hĩndĩ ya kĩngʼũki gĩa COVID-19, aarĩ na ariũ a Ithe witũ nĩ maaheanire irio, nguo, na indo ingĩ kũrĩ arĩa maarĩ na ũbataro. Ningĩ nĩ maarutire mĩhothi nĩ ũndũ wa gũteithĩrĩria wĩra wa thĩ yothe. Mĩhothi ĩyo nĩ yateithĩrĩirie wĩra-inĩ wa kũheana ũteithio thĩinĩ wa thĩ yothe. Aarĩ na ariũ a Ithe witũ acio nĩ meekire kũringana na ũrĩa Ahibirania 13:16 yugaga: “Mũtikanariganĩrũo gwĩkaga wega na kũgayagĩra arĩa angĩ kĩrĩa mũrĩ nakĩo, nĩ ũndũ Ngai nĩ akenagio mũno nĩ magongona ta macio.” w24.09 27 ¶6-7

Ta wĩcirie ũndũ ũyũ: Ta tua atĩ nĩ ũracaria wĩra nĩguo ũhote kũrũmbũiya famĩlĩ yaku, na he na mawĩra merĩ maroneka. Ũgatuĩria maũndũ wega nĩguo ũtigĩrĩre nĩ wamenya mawĩra macio nĩ ma mũthemba ũrĩkũ, mĩtaratara ya kũmaruta, ũrĩhũthagĩra ihinda rĩigana atĩa gũkinya kuo, na maũndũ mangĩ ta macio. Thutha wa gũtuĩria, ũkona atĩ mawĩra macio merĩ matiragarara motaaro ma Bibilia. O na hihi harĩ wĩra ũmwe ũragũkenia mũno tondũ nĩ ũwendete kana tondũ wĩ na mũcara mwega. O na kũrĩ ũguo, harĩ maũndũ mangĩ ũrabatara gwĩciria ũhoro wamo ũtanatua itua. Kwa ngerekano no wĩyũrie, hihi wĩra ũcio nĩ ũkũingĩrĩra mathaa ma mĩcemanio ya kĩũngano? Hihi wĩra ũcio nĩ ũgũtũma njage mahinda ma kũigana ma gũkorũo hamwe na famĩlĩ yakwa na kũmĩrũmbũiya kĩĩroho? Kwĩyũria ciũria ta icio no gũgũteithie kũiga mbere “maũndũ marĩa ma bata makĩria,” na nĩmo, ũthathaiya wanyu o hamwe na mabataro ma famĩlĩ yaku, handũ ha o gwĩciria ũrĩa ũgũthũkũma mbeca nyingĩ. Weka ũguo, nĩ ũgũkinyĩrĩra gũtua itua rĩgũkenia Jehova. w25.01 17 ¶11-13

O na angĩkorũo wanekwo maũndũ moru, no ũkorũo na ma atĩ Jehova nĩ akwendete na nĩ onaga ũrĩ wa bata. Angĩkorũo nĩ ũiguaga ‘ũhehenjekete roho,’ ririkanaga atĩ Jehova nĩ oonire maũndũ mega ngoro-inĩ yaku, na we mwene agĩkũgucĩrĩria harĩ we. (Joh. 6:44) Hingo ciothe akoragwo ehaarĩirie gũgũteithia tondũ ũrĩ wa bata mũno harĩ we. No twĩrute ũrĩa Jehova atuonaga kuumana na kĩonereria kĩa Jesu. Rĩrĩa Jesu aarĩ gũkũ thĩ, nĩ aarũmbũyagia arĩa moonagwo matarĩ a bata na akamacaĩra. (Mat. 9:​9-12) Rĩrĩa mũtumia ũmwe warĩ na mũrimũ mũũru aahutirie nguo yake nĩguo ahone, Jesu nĩ aamũũmĩrĩirie na akĩmũgaathĩrĩria nĩ ũndũ wa wĩtĩkio wake. (Mar. 5:​25-34) Jesu nĩ onanagia wega ngumo ta cia Ithe. (Joh. 14:9) Kwoguo no ũkorũo na ma atĩ Jehova nĩ onaga ũrĩ wa bata na nĩ akenagio nĩ ngumo ciaku njega, o hamwe na wĩtĩkio waku na wendo waku kũmwerekera. w24.10 7 ¶4-5

Daudi nĩ aacemanirie na moritũ maigana ũna marĩa maatũmire aite maithori. Kwarĩ na andũ maamũthũire na nĩ aatiganĩirio nĩ andũ amwe eehokete. (1 Sam. 19:​10, 11; 2 Sam. 15:​10-14, 30) Kũrĩ hĩndĩ aaugire ũũ: “Nĩ njagĩte hinya nĩ ũndũ wa gũcaya; ũtukũ wothe njihũgagia ũrĩrĩ wakwa na maithori; ndũmaga gĩtanda gĩakwa gĩcagace nĩ ũndũ wa kũrĩra.” (Thab. 6:6) O na Daudi akĩgeragĩra moritũ macio, aarĩ na ma atĩ Jehova nĩ amwendete. Aaugire ũũ: “Jehova nĩ ekũigua mũgambo wa kĩrĩro gĩakwa.” (Thab. 6:8) Ciugo cia rĩandĩko rĩa ũmũthĩ nĩ ironania wega ũrĩa Jehova atwendete, na atĩ nĩ ataũkagĩrũo nĩ ũrĩa tũiguaga. Daudi aaugire nĩ ta Jehova aacokanagĩrĩria maithori make cuba-inĩ kana akamaandĩka ibuku-inĩ. Aarĩ na ma atĩ Jehova nĩ oonaga na akaririkana ruo rwake rwa ngoro, na atĩ to kũmenya Jehova aamenyaga maũndũ marĩa aageragĩra, no ningĩ nĩ aataũkagĩrũo nĩ ũrĩa maũndũ macio maahutagia Daudi. w24.12 22 ¶11-12