Thimo 4:1-27
4 Ariũ akwa, thikĩrĩriai ũtaaro wa thoguo;+Tegai matũ nĩguo mũgĩe na ũtaũku,
2 Nĩ gũkorũo nĩ ngũmũhe ũtaaro mwega;Mũtikanatiganĩrie ũrutani* wakwa.+
3 Ndarĩ mwana mwĩhokeku* harĩ baba+Na nĩ ndendetwo mũno nĩ maitũ.+
4 Baba aandutire akĩnjĩra atĩrĩ: “Ngoro yaku ĩrorũmia ciugo ciakwa biũ.+
Rũmagĩrĩra maathani makwa nĩguo ũthiĩ na mbere gũtũũra muoyo.+
5 Gĩa na ũũgĩ, gĩa na ũtaũku.+
Ndũkanariganĩrũo, na ndũkanagarũrũke ũtigane na uuge wakwa.
6 Ndũkanatigane naguo, na nĩ ũrĩkũgitagĩra.
Wende, na nĩ ũrĩkũrangagĩra.
7 Ũũgĩ nĩguo ũndũ ũrĩa wa bata makĩria,+ nĩ ũndũ ũcio, gĩa na ũũgĩ,Na harĩ indo iria ciothe ũkũgĩa nacio, gĩa na ũtaũku.+
8 Ũtĩage mũno, naguo nĩ ũrĩgũtũũgagĩria.+
Nĩ ũrĩkũheaga gĩtĩo tondũ nĩ ũũhĩmbagĩria.+
9 Nĩ ũrĩkũhumbaga thũmbĩ ngʼemu ya mahũa mũtwe;Nĩ ũrĩkũgemagia na thũmbĩ ya ũthaka.”
10 Mũrũ wakwa, thikĩrĩria na wĩtĩkĩre ciugo ciakwa,Na mĩaka ya ũtũũro waku nĩ ĩkũingĩha.+
11 Nĩ ngũgũtaara nguonererie njĩra ya ũũgĩ;+Nĩ ngũgũtongoria tũcĩra-inĩ twa ũrũngĩrĩru.+
12 Rĩrĩa ũgũthiĩ, makinya maku matirĩhĩngĩcagwo;Na rĩrĩa watengʼera, ndũrĩhĩngagwo.
13 Rũmia ũtaaro; ndũkanareke ũkweherere.+
Ũgitĩre, nĩ gũkorũo nĩguo muoyo waku.+
14 Ndũkanatonye gacĩra-inĩ ka andũ arĩa aganu,Na ndũkanagerere njĩra-inĩ ya andũ oru.+
15 Mĩĩtheme, ndũkanamĩgerere;+Mĩeherere, na ũmĩhĩtũke.+
16 Nĩ gũkorũo matingĩhota gũkoma matekĩte ũndũ mũũru.
Matingĩona toro matatũmĩte mũndũ agwe.
17 Marĩaga mũgate wa waganu,Na makanyua ndibei ya ũhinya.
18 No njĩra ya andũ arĩa athingu ĩhaana ta ũtheri wa rũcinĩŨrĩa ũthiaga ũkĩaraga o nginya mũthenya barigici.+
19 Njĩra ya andũ arĩa aganu ĩtariĩ ta nduma;Matimenyaga kĩrĩa kĩmahĩngaga.
20 Mũrũ wakwa, tega matũ ũigue ciugo ciakwa;Thikĩrĩria na kinyi* ciugo ciakwa.
21 Ndũkanareke ciehere maitho-inĩ maku;Ciige ngoro-inĩ yaku thĩinĩ biũ,+
22 Nĩ gũkorũo icio nĩ muoyo harĩ arĩa magĩaga nacio+Na nĩ ũgima mwega harĩ mwĩrĩ wao wothe.*
23 Makĩria ma indo iria ciothe ũgitagĩra, gitagĩra ngoro yaku,+Nĩ gũkorũo thĩinĩ wayo nĩkuo ihumo cia muoyo irĩ.
24 Eheria mĩario ĩtarĩ mĩrũngĩrĩru kuuma harĩ wee,+Na ũige mĩario ya wara haraya nawe.
25 Maitho maku magĩrĩire kũrora mbere marũngĩrĩirie,Ũikare ũroretie maitho maku* mbere yaku.+
26 Aragania* njĩra ya magũrũ maku,+Na njĩra ciaku ciothe irĩkoragwo ciĩhandĩte wega.
27 Ndũkanehũgũre na mwena wa ũrĩo kana wa ũmotho.+
Eheragia magũrũ maku kuuma harĩ ũndũ ũrĩa mũũru.
