Thimo 31:1-31
31 Ici nĩ ciugo cia Mũthamaki Lemueli, ndũmĩrĩri nditũ ĩrĩa nyina aamũheire nĩguo amũtaare:+
2 Ngũkwĩra atĩa, wee mũrũ wakwa,Ngũkwĩra atĩa, wee mwana* wa nda yakwa,Ningĩ ngũkwĩra atĩa, wee mwana* wa mĩĩhĩtwa yakwa?+
3 Ndũkahũthĩre hinya waku na atumia,+O na ndũkarũmĩrĩre njĩra iria cianangaga athamaki.+
4 Atĩrĩrĩ Lemueli, ti ũndũ mwagĩrĩru harĩ athamaki,Ti ũndũ mwagĩrĩru harĩ athamaki kũnyuaga ndibeiO na ti ũndũ mwagĩrĩru harĩ arĩa marathana kũũria atĩrĩ, “Ndibei yakwa ĩrĩ kũ?”+
5 Nĩguo matikanyue mariganĩrũo nĩ ũrĩa watho uugĩteNa mogomie ihooto cia andũ arĩa matarĩ hinya.
6 Njohi mĩheagei andũ arĩa marathira+Nayo ndibei mũmĩheage andũ arĩa marĩ na mĩtangĩko mĩnene.+
7 Reke manyue mariganĩrũo nĩ ũthĩni wao;Na matige kũririkana mathĩna mao rĩngĩ.
8 Arĩrĩria arĩa matangĩhota kwĩyarĩrĩria;Tetera ihooto cia arĩa othe marathira.+
9 Marĩrĩrie na ũtuanĩre ciira na ũthingu;Tetera ihooto cia andũ arĩa matarĩ hinya na arĩa athĩni.+
א [Aleph]
10 Mũtumia ngatha-rĩ,* nũũ ũngĩmuona?+
Thogora wake nĩ mũnene mũno gũkĩra wa tũhiga twa goro twa iria-inĩ.*
ב [Beth]
11 Mũthuri wake amwĩhokete kuuma ngoro,Na gũtirĩ kĩndũ kĩa bata mũthuri ũcio agaga.
ג [Gimel]
12 Ekagĩra mũthuri wake maũndũ mega, no ti moru,Matukũ-inĩ mothe ma ũtũũro wake.
ד [Daleth]
13 Nĩ acaragia guoya wa ngʼondu na gatani;Nĩ akenagĩra kũruta wĩra na moko make.+
ה [He]
14 Atariĩ ta meri cia mũhũũri biacara,+Arehaga irio ciake kuuma kũndũ kũraya.
ו [Waw]
15 Ningĩ okagĩra kũrĩ o ũtukũ,Akahe andũ a nyũmba yake irioNa ndungata ciake cia airĩtu agacihe rwĩga rwacio.+
ז [Zayin]
16 Ecũranagia ũhoro wa mũgũnda na akaũgũra;Ahandaga mũgũnda wa mĩthabibũ kuumana na wĩra wake we mwene.*
ח [Heth]
17 Nĩ ehaaragĩria nĩ ũndũ wa wĩra mũritũ,*+Na nĩ ekĩraga moko make hinya.
ט [Teth]
18 Nĩ onaga atĩ wĩra wake wa kuonjorithia nĩ ũrĩ uumithio;Tawa wake ndũhoraga ũtukũ.
י [Yod]
19 Moko make manyitaga mũtĩ wa kuoherera rũrigi,Na makanyita mũtĩ wa kuogotha ndigi.+
כ [Kaph]
20 Nĩ atambũrũkagia rũhĩ rwake nĩ ũndũ wa mũndũ ũrĩa ũtarĩ hinya,Na nĩ akumbatũraga moko make nĩ ũndũ wa ũrĩa mũthĩni.+
ל [Lamed]
21 Ndatangĩkaga nĩ ũndũ wa andũ a nyũmba yake rĩrĩa kwagĩa mbarabu,Nĩ gũkorũo andũ othe a nyũmba yake nĩ mehumbĩte nguo cia ũrugarĩ.*
מ [Mem]
22 Nĩwe wĩtumagĩra macuka ma ũrĩrĩ.
Nguo ciake nĩ cia gatani na ndigi cia rangi wa papũ.
נ [Nun]
23 Mũthuri wake nĩ oĩkaine wega ihingo-inĩ cia itũũra,+Kũrĩa aikaraga thĩ hamwe na athuri* a bũrũri.
ס [Samekh]
24 Nĩ athondekaga na akendia nguo cia gatani*Na akenderia ahũũri biacara mĩcibi.
ע [Ayin]
25 Ehumbĩte hinya na riri,Na etagĩrĩra ihinda rĩrĩa rĩũkĩte arĩ na ũmĩrĩru.*
פ [Pe]
26 Atumũraga kanua gake na njĩra ya ũũgĩ;+Watho wa ũtugi* ũkoragwo rũrĩmĩ-inĩ rwake.
צ [Tsade]
27 Nĩ aroraga mawĩra ma mũciĩ wake,Na ndarĩaga mũgate wa ũgũta.+
ק [Qoph]
28 Ciana ciake irũgamaga ikoiga nĩ mũrathime;Mũthuri wake arũgamaga akamũgaathĩrĩria.
ר [Resh]
29 Nĩ kũrĩ atumia aingĩ ngatha,*No wee—wee nĩ ũmakĩrĩte othe.
ש [Shin]
30 Ũgemu no ũkorũo ũrĩ wa maheeni, naguo ũthaka ũkorũo ũrĩ wa kahinda kanini,*+No mũtumia ũrĩa wĩtigĩrĩte Jehova nĩ arĩgaathagĩrĩrio.+
ת [Taw]
31 Mũheagei ngerenwa nĩ ũndũ wa maũndũ marĩa ekaga,*+Namo mawĩra make nĩ mamũgaathagĩrĩrie ihingo-inĩ cia itũũra.+
Tũũhoro twa magũrũ-inĩ
^ Kana “mũrũ.”
^ Kana “mũrũ.”
^ Kana “mwega-rĩ.”
^ Rora Ũthathaũri wa Ciugo.
^ Kana “kuumana na kĩrĩa athũkũmĩte.” Ũkk., “kuumana na maciaro ma moko make.”
^ Ũkk., “ehotoraga hinya njohero.”
^ Ũkk., “igĩrĩ igĩrĩ.”
^ Athuri arĩa meehokeirũo maũndũ.
^ Kana “nguo cia thĩinĩ.”
^ Kana “athekaga nĩ ũndũ wa mũthenya wa ihinda rĩrĩa rĩũkĩte.”
^ Kana “Ũrutani wa wendo; Watho wa wendo mwĩhokeku.”
^ Kana “ega.”
^ Kana “ũrĩ wa tũhũ.”
^ Ũkk., “Mũheagei kuumana na maciaro ma moko make.”
