Thimo 19:1-29
19 Nĩ kaba ũkorũo ũrĩ mũthĩni na ũthiage na wĩkindĩru+Gũkĩra ũkorũo ũrĩ mũkĩgu na waragie maheeni.+
2 Mũndũ ũtarĩ ũmenyo ti mwega,+Na ũrĩa ũhĩkĩkaga gwĩka ũndũ* nĩ kwĩhia ehagia.
3 Ũrimũ wa mũndũ nĩguo ũthũkagia njĩra yake,Nayo ngoro yake ĩkarakarĩra Jehova.
4 Ũtonga nĩ ũgucagĩrĩria arata aingĩ,No mũndũ ũrĩa mũthĩni atiganagĩrio nginya nĩ mũratawe.+
5 Mũira wa maheeni ndakaaga kũherithio,+Na mũndũ ũrĩa ũitũrũraga maheeni ndakaahonoka.+
6 Andũ aingĩ nĩ macaragia ũrĩa mangĩtĩkĩrĩka harĩ mũndũ ũrĩ igweta,*Na mũndũ wothe akoragwo arĩ mũrata wa mũndũ ũrĩa ũheanaga iheo.
7 Mũndũ mũthĩni athũirũo nĩ ariũ othe a nyina;+Na githĩ ndagĩĩthemagwo o na makĩria nĩ arata ake!+
Amathingataga akĩenda kũmahoya ũndũ, no gũtirĩ o na ũmwe ũmũcokagĩria.
8 Mũndũ wothe ũgĩaga na wĩcirio* nĩ endete muoyo wake.+
Mũndũ wothe wĩigagĩra ũtaũku ta arĩ mũthithũ nĩ agaacagĩra.*+
9 Mũira wa maheeni ndakaaga kũherithio,Na mũndũ ũrĩa ũitũrũraga maheeni nĩ agaathira.+
10 Ti ũndũ mwagĩrĩru harĩ kĩrimũ gũtũũra mũtũũrĩre wa kwĩgangara;Na githĩ ti ũndũ ũtarĩ mwagĩrĩru o na makĩria ndungata gwathaga anene!+
11 Ũtaũku wa mũndũ hatarĩ nganja nĩ ũhooragĩria marakara make,+Na nĩ ũthaka harĩ we kwaga gũtindanĩra na* mahĩtia.*+
12 Marakara ma mũthamaki matariĩ ta mũraramo wa mũrũthi,*+No gwĩtĩkĩrĩka harĩ we nĩ ta ime rĩrĩ nyeki-inĩ.
13 Mwana mũkĩgu nĩ arehagĩra ithe mathĩna,+Na mũtumia wa ngũĩ* atariĩ ta nyũmba ĩtatigaga kuura.+
14 Nyũmba na ũtonga igayagwo kuuma kũrĩ maithe,No mũtumia mũũgĩ oimaga kũrĩ Jehova.+
15 Ũgũũta ũrehaga toro mũnene,Na mũndũ wa gwĩkururia nĩ arĩhũtaga.+
16 Mũndũ ũrĩa ũmenyagĩrĩra rĩathani nĩ muoyo wake amenyagĩrĩra;+Na mũndũ ũrĩa ũtatindanagĩra na njĩra ciake nĩ agaakua.+
17 Mũndũ ũrĩa ũiguagĩra mũndũ ũrĩa ũtarĩ hinya tha nĩ Jehova akombagĩra,+Nake nĩ akaamũrĩha* nĩ ũndũ wa maũndũ marĩa ekaga.+
18 Rũngaga mũrũ waku hĩndĩ ĩrĩa kũrĩ na mwĩhoko,+Na ndũgatuĩke atĩ wee nĩwe ũgũtũma* akue.+
19 Mũndũ ũrĩa ũrakaraga na ihenya nĩ aherithagio;Ũngĩgeria kũmũteithũra, ũrĩbataraga gwĩka ũguo maita maingĩ.+
20 Thikagĩrĩria ũtaaro na wĩtĩkagĩre kũrũngwo,+Nĩgetha ũgaatuĩka mũndũ mũũgĩ ũtũũro-inĩ waku wa thutha.+
21 Ngoro ya mũndũ nĩ ĩkoragwo na mĩbango mĩingĩ,No muoroto wa Jehova nĩguo ũgũtooria.+
22 Ũndũ ũrĩa wa kwĩrirĩrio harĩ mũndũ nĩ wendo wake mwĩhokeku;+Na nĩ kaba gũkorũo ũrĩ mũthĩni gũkĩra gũkorũo ũrĩ mũndũ wa maheeni.
23 Gwĩtigĩra Jehova gũtongoragia muoyo-inĩ;+Mũndũ ũrĩ na guoya ũcio arĩkoragwo na ũhurũko mwega, gũtarĩ ũũru ũngĩmũkora.+
24 Kĩgũũta kĩrikagia guoko gwakĩo mbakũri-inĩ ya iruga,Ĩndĩ o na gĩtiĩringithagia gũgũcokia kanua-inĩ.+
25 Ringa mũndũ wa kĩnyũrũri,+ nĩguo mũndũ ũtarĩ ũmenyeru agĩe na ũũgĩ,+Na ũrũnge mũndũ ũrĩa ũkoragwo na ũtaũku, nĩguo ongerere ũmenyo wake.+
26 Mũndũ ũrĩa wĩkaga ithe maũndũ moru na akaingata nyinaNĩ mwana wa kũrehe thoni na gĩconoko.+
27 Mũrũ wakwa, ũngĩtiga gũthikagĩrĩria ũtaaro,Nĩ ũkũũra njĩra ũtigane na ciugo cia ũmenyo.
28 Mũira ũtarĩ kĩene nĩ anyũrũragia kĩhooto,+Na kanua ka mũndũ ũrĩa mwaganu kameragia maũndũ moru.+
29 Ituĩro nĩ rĩigĩirũo anyũrũrania,+Na kũhũũrũo mũgongo gũkaigĩrũo andũ arĩa akĩgu.+
Tũũhoro twa magũrũ-inĩ
^ Ũkk., “ũhĩkĩkaga na magũrũ make.”
^ Kana “mũndũ mũtaana.”
^ Kana “nĩ arĩonaga maũndũ mega.”
^ Ũkk., “ũgĩaga na ngoro.”
^ Ũkk., “kũhĩtũkĩrĩra.”
^ Kana “mehia.”
^ Kana “mũrũthi mwĩthĩ wa njamba.”
^ Kana “wa mateta.”
^ Kana “nĩ akaamũhe kĩheo.”
^ Kana “ndũkerirĩrie.”