Thimo 11:1-31
11 Ratiri itarĩ cia wĩhokeku* nĩ kĩndũ kĩrĩ magigi harĩ Jehova,No nĩ akenagio nĩ gĩthimi kĩrĩa kĩagĩrĩru.*+
2 Rĩrĩa mwĩĩkĩrĩro woka, gĩconoko nĩ kĩrũmagĩrĩra,+No ũũgĩ ũkoragwo na andũ arĩa enyihia.*+
3 Wĩkindĩru wa andũ arĩa arũngĩrĩru nĩguo ũmatongoragia,+No ũhinga wa arĩa akunyanĩri nĩ ũkaamaniina.+
4 Ũtonga ndũgaakorũo* na ũguni mũthenya wa marakara,+No ũthingu nĩguo ũkaahonokia mũndũ kuuma gĩkuũ-inĩ.+
5 Ũthingu wa mũndũ ũrĩa ũtarĩ ũcuke ũtũmaga njĩra yake ĩrũngare,No mũndũ ũrĩa mwaganu akaagwa nĩ ũndũ wa waganu wake mwene.+
6 Ũthingu wa andũ arĩa arũngĩrĩru nĩ ũkaamahonokia,+No arĩa akunyanĩri makaanyitwo nĩ merirĩria mao ene.+
7 Rĩrĩa mũndũ mwaganu akua, kĩĩrĩgĩrĩro gĩake nĩ gũthira gĩthiraga;Na maũndũ marĩa erĩgagĩrĩra kuuma kũrĩ ũhoti wake, o namo nĩ mathiraga.+
8 Mũndũ ũrĩa mũthingu ahonokagio kuuma harĩ mĩtangĩko,Nake ũrĩa mwaganu agacoka ithenya rĩake.+
9 Mũregenyũki* arehagĩra mũndũ ũrĩa ũngĩ mwanangĩko na kanua gake,No andũ arĩa athingu mahonokagio nĩ ũndũ wa ũmenyo.+
10 Wega wa mũndũ ũrĩa mũthingu nĩ ũtũmaga itũũra rĩkene,Na rĩrĩa andũ arĩa aganu mathira, andũ nĩ managĩrĩra nĩ gũkena.+
11 Itũũra nĩ rĩtũũgagĩrio nĩ ũndũ wa kĩrathimo kĩa andũ arĩa arũngĩrĩru,+No kanua ka arĩa aganu nĩ kũrĩananga karĩanangaga.+
12 Ũrĩa wothe ũtakoragwo na wĩcirio* nĩ anyararaga* mũndũ ũrĩa ũngĩ,No mũndũ ũrĩa ũkoragwo na ũtaũku wa ma nĩ gwĩkirĩra ekiragĩra.+
13 Mũcambania nĩ aguũragia ndeto cia hitho,+No mũndũ mwĩhokeku* nĩ aigaga hitho.*
14 Hĩndĩ ĩrĩa gũtarĩ na ũtongoria wa ũũgĩ, andũ nĩ magũaga,No ataarani aingĩ nĩ matũmaga kũgĩe na ũgaacĩru.*+
15 Ũrĩa ũrũgamagĩrĩra thiirĩ* wa mũgeni hatarĩ nganja nĩ akona ũũru,+No ũrĩa wĩthemaga* kũgeithania na guoko nĩguo arĩkanĩre ũndũ arĩkoragwo na thayũ.
16 Mũtumia mũtugi* nĩ agĩaga na riri,+No andũ arĩa matarĩ tha nĩ gwĩtahĩra metahagĩra ũtonga.
17 Mũndũ mũtugi* egunaga we mwene,*+No mũndũ ũrĩa ũtarĩ tha erehagĩra thĩna* we mwene.+
18 Mũndũ ũrĩa mwaganu agĩaga mũcara wa maheeni,+No mũndũ ũrĩa ũhandaga ũthingu amũkagĩra irĩhi rĩa ma.+
19 Mũndũ ũrĩa ũrũgamaga ehandĩte nĩ ũndũ wa ũthingu nĩ akona muoyo,+No ũrĩa ũtengʼeranagia na maũndũ moru nĩ gũkua agaakua.
20 Andũ arĩa matarĩ arũngĩrĩru ngoro nĩ kĩndũ kĩrĩ magigi harĩ Jehova,+No arĩa njĩra yao ĩtarĩ na ũcuke nĩ mamũkenagia.+
21 Gĩa na ma na ũndũ ũyũ:* Mũndũ ũrĩa mwaganu ndakaaga kũherithio,+No ciana cia ũrĩa mũthingu nĩ ikaahonoka.
22 O ta gĩcũhĩ gĩa thahabu iniũrũ-inĩ rĩa ngũrũe,Nĩguo mũtumia mũthaka ũrĩa ũtarĩ wĩcirio ahaana.
23 Merirĩria ma arĩa athingu marehaga maũndũ mega,+No kĩrĩa andũ arĩa aganu merĩgagĩrĩra kĩrehaga marakara.
24 Kũrĩ mũndũ ũheanaga na ũtaana* nake akagĩa na indo nyingĩ makĩria;+Ũngĩ nake aimanaga indo iria ciagĩrĩire kũheanwo, no agatuĩka mũthĩni.+
25 Mũndũ ũrĩa mũtaana nĩ arĩgaacagĩra,*+Na ũrĩa ũheaga arĩa angĩ maĩ ma kũnyua o nake nĩ arĩheagwo maĩ ma kũnyua.+
26 Andũ nĩ marĩrumaga mũndũ ũrĩa ũregaga kũmenderia ngano,*No nĩ marĩrathimaga ũrĩa ũmendagĩria.
27 Ũrĩa ũcaragia na kĩyo gwĩka wega akoragwo agĩcaria gwĩtĩkĩrĩka,+No ũrĩa ũcaragia gwĩka ũũru, hatarĩ nganja ũũru ũcio noguo ũrĩmũkoraga.+
28 Ũrĩa wĩhokaga ũtonga wake nĩ kũgwa akaagwa,+No arĩa athingu makaagaacĩra o ta mathangũ maruru.+
29 Mũndũ wothe ũrehagĩra nyũmba yake thĩna* akaagaya rũhuho,+Nake mũndũ ũrĩa kĩrimũ agaatuĩka ndungata ya mũndũ ũrĩa ũrĩ na ũũgĩ wa ngoro.
30 Maciaro ma mũndũ ũrĩa mũthingu nĩ mũtĩ wa muoyo,+Na ũrĩa ũhotaga kũgucĩrĩria andũ nĩ mũũgĩ.+
31 Angĩkorũo mũndũ ũrĩa mũthingu thĩinĩ wa thĩ nĩ aheagwo marĩhi-rĩ,Na githĩ ũrĩa mwaganu na ũrĩa mwĩhia matingĩkĩrĩhwo o na makĩria!+
Tũũhoro twa magũrũ-inĩ
^ Kana “ihiga igima rĩa gũthima.”
^ Kana “cia kũheenania.”
^ Kana “arĩa matarĩ eĩkĩrĩri.”
^ Kana “Indo cia goro itigaakorũo.”
^ Kana “Mũndũ ũtetigĩrĩte Ngai.”
^ Kana “ũkoragwo na ngoro ĩtarĩ na ũtaũku.”
^ Kana “amenaga.”
^ Ũkk., “ũrĩa mwĩhokeku roho-inĩ.”
^ Ũkk., “nĩ ahumbagĩra ũndũ.”
^ Kana “ũhonokio.”
^ Ũkk., “ũthũire.”
^ Kana “ũrutaga kĩndũ gĩa kũrũgamĩrĩra thiirĩ.”
^ Kana “mwega.”
^ Kana “Mũndũ ũrĩ wendo mwĩhokeku.”
^ Kana “nĩ muoyo wake ekaga wega.”
^ Kana “gĩconoko.”
^ Kana “O na guoko kũngĩnyitana na guoko.”
^ Ũkk., “ũhurunjaga.”
^ Ũkk., “nĩ arĩnoragio.”
^ Kana “cairi.”
^ Kana “gĩconoko.”
