Nĩguo tũkaagĩa na muoyo wa tene na tene, nĩ tũrabatara kuonania wĩtĩkio harĩ igongona rĩa Jesu rĩa ũkũũri. (Ef. 1:7) Arĩa Jesu eetire “ngʼondu ingĩ” matiagĩrĩirũo kũrĩa mũgate kana kũnyua ndibei hĩndĩ ya gĩkũngũĩro kĩa o mwaka kĩa Irio cia Hwaĩ-inĩ cia Mwathani. (Joh. 10:16) O na kũrĩ ũguo, nĩ marĩaga “mũgate wa muoyo” na njĩra ya mũhaano. Mekaga ũguo rĩrĩa monania wĩtĩkio harĩ igongona rĩa Jesu rĩa ũkũũri. (Joh. 6:53) Ngũrani na ũguo, arĩa marĩaga mũgate na makanyua ndibei nĩ arĩa makoragwo thĩinĩ wa kĩrĩkanĩro kĩrĩa kĩerũ, na kwoguo marĩ na kĩĩrĩgĩrĩro gĩa gũgaathana Ũthamaki-inĩ wa igũrũ. Kwoguo, gũtekũmakania kana tũrĩ aitĩrĩrie maguta kana a ngʼondu ingĩ, nĩ tũrabatara kuonania wĩtĩkio mũrũmu harĩ igongona rĩa Jesu rĩa ũkũũri nĩguo tũkoona muoyo wa tene na tene. w24.12 12-13 ¶14, 16

Hĩndĩ ya gĩkũngũĩro kĩa Irio cia Hwaĩ-inĩ cia Mwathani, Jesu aaheire atũmwo ake mũgate ũtarĩ mwĩkĩre ndawa ya kũimbia na akĩmeera atĩ ũrũgamĩrĩire mwĩrĩ wake. Agĩcoka akĩmahe ndibei akĩmeera ĩrũgamĩrĩire ‘thakame ya kĩrĩkanĩro.’ (Mar. 14:​22-25; Luk. 22:20; 1 Kor. 11:24) Arĩa marĩ thĩinĩ wa kĩrĩkanĩro kĩu kĩerũ nĩ “nyũmba ya Isiraeli” a kĩĩroho arĩa magaathana na Jesu ‘Ũthamaki-inĩ wa Ngai.’ (Ahib. 8:​6, 10; 9:15) Ciugo iria Jesu aaririe hĩndĩ ĩyo ya gĩkũngũĩro kĩa Irio cia Hwaĩ-inĩ cia Mwathani, ihutĩtie o gakundi ka andũ karĩa getĩtwo “karũũru kanini.” Atũmwo ehokeku a Jesu arĩa maarĩ nake hĩndĩ ĩyo nĩo maarĩ a mbere gũkorũo gakundi-inĩ kau. Nĩo mangĩkaheo mweke wa gũkorũo hamwe na Jesu kũrĩa igũrũ. w24.12 11 ¶9-10

Jesu aakunyanĩirũo, akĩnyitwo, akĩrumwo, akĩigĩrĩrũo igenyo, akĩnyarirũo, na agĩtuĩrũo kũũragwo. Thigari ciamũtwarire harĩa aarĩ oragĩrũo, na ikĩmũhũũrĩrĩra mĩcumarĩ mũtĩ-inĩ. Jesu nĩ aakirĩrĩirie ruo rũu ruothe, na o na Jehova nĩ aatuurirũo mũno rĩrĩa oonire Mũrũ wake akĩnyamarĩka. Jehova aarĩ na hinya na ũhoti wa kũgirĩrĩria Mũrũ wake ndakanyamarĩke, no ndeekire ũguo. Nĩkĩ? Tondũ nĩ atwendete. Kũruta Jesu arĩ igongona, nĩyo njĩra ĩrĩa nene Jehova oonanirie nayo gĩkĩro kĩrĩa akwendete nakĩo. Aarutire Mũrũ wake wa mũmwe na agĩkirĩrĩria ruo rũingĩ mũno, nĩgetha akũhonokie kuuma mehia-inĩ na gĩkuũ. (1 Joh. 4:​9, 10) Hatarĩ nganja endaga gũteithia o ũmwe witũ kũrũa na mehia, na mũthia-inĩ nĩ tũkaamatooria biũ. w24.08 6 ¶13-14

No tũtaũkĩrũo wega ũrĩa Jehova atwendete tũngĩcũrania ruo rũrĩa aagereire akĩĩrorera Mũrũ wake akĩnyamarĩka nĩguo arute ũkũũri. Shaitani augaga atĩ gũtirĩ ndungata ya Jehova ĩngĩikara ĩrĩ njĩhokeku rĩrĩa arĩ ũndũ mũritũ gwĩka ũguo. Nĩguo Jehova onanie atĩ thitango ĩyo nĩ ya maheeni, nĩ aarekire Jesu anyamarĩke atanakua. (Ayub. 2:​1-5) Jehova nĩ eeyoneire Jesu akĩnyũrũrio nĩ andũ, akĩhũũrũo iboko nĩ thigari, na akĩhũũrĩrĩrũo mũtĩ-inĩ na mĩcumarĩ. Agĩcoka akĩyonera Mũrũ wake endete agĩkua gĩkuũ kĩa ruo. (Mat. 27:​28-31, 39) Jehova aarĩ na hinya wa kũgirĩrĩria maũndũ macio. (Mat. 27:​42, 43) No angĩekire ũguo, ũkũũri ndũngĩarutirũo na kwoguo tũtingĩrĩ na kĩĩrĩgĩrĩro. Kwoguo Jehova nĩ aarekire Mũrũ wake anyamarĩke nginya rĩrĩa aakuire. w25.01 22 ¶7

Ta hũũra mbica kũrĩ Nisani 16, 33 M.M. Arutwo a Jesu marĩ na kĩeha kĩnene na guoya mũingĩ. Arutwo erĩ makauma Jerusalemu merekeire gĩcagi kĩa Emau. Mũndũ ũmwe akamakuhĩrĩria na akambĩrĩria gũtwarana nao. Arutwo acio makamũtaarĩria maũndũ moru marĩa marekĩkire harĩ Jesu. Mũndũ ũcio nake akambĩrĩria kũmataarĩria maũndũ ma bata matakaariganĩrũo. Akamataarĩria “ambĩrĩirie na maandĩko ma Musa na ma Anabii othe,” kĩrĩa kĩngĩatũmire Mesia anyamarĩke na akue. Makinya Emau, arutwo acio makamenya atĩ mũndũ ũcio nĩ Jesu. (Luk. 24:​13-35) Jesu nĩ aaumĩrĩire arutwo ake maita maingĩ ihinda-inĩ rĩa matukũ 40 ma mũthia arĩ gũkũ thĩ. Ihinda-inĩ rĩu, Jesu nĩ eekĩrire ngoro arutwo ake arĩa maarĩ na kĩeha na guoya mũingĩ. Ũndũ ũcio nĩ watũmire magĩe na gĩkeno na ũmĩrĩru wa kũhunjia na kũrutana ndũmĩrĩri ya Ũthamaki. w24.10 12 ¶1-3

O ũrĩa mahinda marahĩtũka, noguo mwana akũraga agatuĩka mũndũ mũgima. No kũgimara kĩĩroho gũtiĩrehaga o ũguo. Kwa ngerekano, Akristiano a Korintho nĩ meetĩkĩrire ũhoro ũrĩa mwega, makĩbatithio, makĩamũkĩra roho mũtheru, na makĩgunĩka kuumana na ũrutani wa mũtũmwo Paulo. (Atũm. 18:​8-11) O na kũrĩ ũguo, mĩaka ĩigana ũna thutha wa kũbatithio, aingĩ ao matiagimarĩte kĩĩroho. (1 Kor. 3:2) Nĩguo tũtuĩke agimaru kĩĩroho, no mũhaka twambe tũkũrie wendi wa gwĩka ũguo. Arĩa mendete ‘ũhoro wa kwaga ũmenyeru,’ na makenda gũikara o ũguo ta tũkenge, matikũraga kĩĩroho. (Thim. 1:22) Tũtingĩenda kũhaana ta ciana iria ituĩkaga andũ agima no ikerĩgĩrĩra atĩ aciari a cio nĩ megũthiĩ na mbere gũcituĩra matua. Handũ ha ũguo, twagĩrĩirũo kũigua tũrĩ na ũigĩrĩrĩki wa kwĩrutanĩria ithuĩ ene nĩguo tũkũre kĩĩroho. Angĩkorũo ndũkinyĩrĩire gũtuĩka Mũkristiano mũgimaru kĩĩroho, hoya Jehova akũhe “wendi o na ũhoti wa gwĩka maũndũ.”—Afil. 2:13. w24.04 4 ¶9-10

Jehova nĩ atũguũrĩirie ũrĩa aiguaga ũhoro-inĩ wĩgiĩ gũtuĩra andũ. (Ezek. 33:11) Jehova ndahiũhaga kũniina andũ tene na tene o tiga rĩrĩa harĩ na gĩtũmi kĩega gĩa gwĩka ũguo. Aiyũirũo nĩ tha, na kwoguo nĩ acionanagia rĩrĩa rĩothe ona kwagĩrĩire. Nĩ ũndũ ũrĩkũ tũĩ wĩgiĩ andũ arĩa matakaariũkio? Bibilia nĩ ĩgwetaga andũ maigana ũna arĩa matakaariũkio. Jesu oonanirie atĩ Judasi Mũisikariota ndakaariũkio. (Mar. 14:21; Joh. 17:12) Judasi eekire ũndũ aamenyaga wega atĩ nĩ mũgarũ na wendi wa Jehova Ngai na Mũrũwe. (Mar. 3:29) Ningĩ Jesu aaugire atĩ atongoria amwe a ndini arĩa maamũkararagia, mangĩakuire matarĩ na kĩĩrĩgĩrĩro gĩa gũkaariũkio. (Mat. 23:33; Joh. 19:11) Nake mũtũmwo Paulo oonanirie atĩ aregenyũki arĩa materiraga matikaariũkio.—Ahib. 6:​4-8; 10:29. w24.05 4 ¶10-11

Tũngĩtũũra hakuhĩ na Jehova, gũtirĩ ũndũ Shaitani angĩtwĩka ũngĩtũrehera mwanangĩko wa gũtũũra. (1 Joh. 3:8) Thĩinĩ wa thĩ njerũ, Jehova nĩ agaathiĩ na mbere kũgitĩra arata ake ehokeku matigathũkio kĩĩroho, na nginya amagitĩre na njĩra ya kũmehereria gĩkuũ. (Kũg. 21:4) Hatarĩ nganja nĩ mweke wa mwanya gũtuĩka mũgeni hema-inĩ ya Jehova, tondũ nĩ tũgĩaga na ũrata wa hakuhĩ hamwe nake ũrĩa ũngĩtũũra tene na tene. (Ezek. 37:27) Twagĩrĩirũo gwĩka atĩa nĩguo tũthiĩ na mbere gũkorũo tũrĩ ageni hema-inĩ yake? Ũngĩnyitwo ũgeni nĩ mũndũ gwake mũciĩ, no wende kũmenya maũndũ marĩa arerĩgĩrĩra wĩke. O ũndũ ũmwe na ũcio, nĩ twendaga kũmenya maũndũ marĩa Jehova erĩgagĩrĩra kuuma kũrĩ arĩa mangĩenda gũthiĩ na mbere gũikara hema-inĩ yake. Kwenda Jehova nĩ gũtũtindĩkaga gwĩka ũrĩa wothe tũngĩhota ‘nĩguo tũmũkenagie biũ.’ (Kol. 1:10) Hingo ciothe twagĩrĩirũo gũkorũo na gĩtĩo kĩnene harĩ we. Ũndũ ũcio nĩ ũrĩtũteithagia kwaga gwĩka ũndũ o na ũmwe ũngĩmũrakaria. Wendi witũ ũrĩkoragwo ũrĩ ‘gũtwarana na Ngai witũ tũrĩ na wĩnyihia.’—Mik. 6:8. w24.06 4 ¶8-9

Jehova eerire Iburahimu arute mũrũ wake Isaaka arĩ igongona. Hatarĩ nganja Iburahimu nĩ aamenyaga atĩ ũndũ ũcio nĩ ũngĩamũreheire ruo rũnene. O na kũrĩ ũguo, nĩ eehaarĩirie gwathĩkĩra Jehova. No Ngai nĩ aagirĩrĩirie Iburahimu ndagĩka ya mũico ndakorage mũrũwe. Ĩndĩ kĩonereria kĩu nĩ kĩrutaga andũ arĩa othe marĩ na wĩtĩkio ũndũ wa bata, atĩ Jehova nĩ angĩgakorũo ehaarĩirie kũruta Mũrũ wake endete arĩ igongona. Na githĩ ũndũ ũcio ndũronania atĩ Jehova nĩ endete andũ mũno? (Kĩam. 22:​1-18) Mĩaka mĩingĩ thutha ũcio, Jehova nĩ aaheire Aisiraeli Watho akĩmeera marutage magongona matiganĩte ma kũhumbagĩra mehia mao. (Alaw. 4:​27-29; 17:11) Magongona macio maarĩ kĩĩruru kĩa igongona rĩngĩ inene, rĩrĩa rĩngĩakũũrire andũ biũ kuuma mehia-inĩ. Anabii a Jehova nĩ maataarĩirie atĩ mbeũ ĩyo yeranĩirũo, na nĩyo Mũrũ wa mũmwe wa Ngai, nĩ ĩngĩkanyamarĩka na yũragwo nĩgetha ĩhonokie andũ kuuma mehia-inĩ na gĩkuũ, nginya o nawe!—Isa. 53:​1-12. w24.08 4 ¶7-8

Ũgĩka ũthomi waku wa Bibilia, tigagĩrĩra atĩ nĩ wecũrania ũrĩa ũngĩhũthĩra maũndũ marĩa wathoma. Wĩyũragie ũũ rĩrĩa ũrathoma, ‘Ingĩhũthĩra ũhoro ũyũ atĩa ihinda-inĩ rĩrĩ kana ihinda rĩũkĩte?’ Kwa ngerekano, ta nĩ tũtue ũthomi-inĩ waku wa Bibilia nĩ wathoma 1 Athesalonike 5:​17, 18. Thutha wa gũthoma mĩhari ĩyo ĩĩrĩ, no ũtithie wĩyũrie wee ũhoyaga maita maigana na wĩitũrũraga harĩ Jehova na gĩkĩro kĩigana atĩa. Ningĩ no ũtaranie irathimo iria ũgĩte nacio, na hihi ũthuure maũndũ matatũ marĩa ũngĩenda gũcokeria Jehova ngatho nĩ ũndũ wamo. O na angĩkorũo ũkũhũthĩra ndagĩka nini tu gwĩcũrania na njĩra ta ĩyo, ũndũ ũcio nĩ ũgũgũteithia gũtaũkĩrũo nĩ Kiugo kĩa Ngai na gũkĩhingia. Ta wĩcirie ũrĩa ũngĩgunĩka ũngĩkaga ũguo o mũthenya rĩrĩa ũrathoma Bibilia. Hatarĩ nganja ũndũ ũcio no ũgũteithie kwĩmenyeria kũhingagia Kiugo kĩa Ngai. w24.09 4-5 ¶9-10

Jehova aatũmbire tũrĩ na ũhoti wa mwanya. O na gũtuĩka nĩ tũkenagĩra kwamũkĩra, tũkenaga o na makĩria rĩrĩa twaheana. Nĩ tũiguaga wega ngoro rĩrĩa twahota gũteithia aarĩ na ariũ a Ithe witũ. Na nĩ tũkenaga rĩrĩa matũcokeria ngatho. Ĩndĩ o na tũngĩaga gũcokerio ngatho, nĩ tũkenaga nĩ gũkorũo nĩ tweka ũndũ ũrĩa wagĩrĩire. Ririkanaga atĩ gũtekũmakania kĩrĩa waheana, “Jehova arĩ na ũhoti wa gũkũhe nyingĩ gũkĩra icio.” (2 Maũ. 25:9) Kwoguo hingo ciothe Jehova arĩkũheaga makĩria ma kĩrĩa ũheanĩte. Na gũtirĩ gĩkeno gĩkĩrĩte kũrĩhwo nĩ Jehova we mwene. Nĩ ũndũ ũcio, rekei twĩrutanĩrie kwĩgerekanagia na Ithe witũ wa igũrũ mũtaana. w24.09 31 ¶20-21

Jehova nĩ mũigua tha na mũcayanĩri. (Thab. 103:13; Isa. 49:15) Rĩrĩa twatuurithio, o nake nĩ atuuragwo. (Zek. 2:8) Nĩ akinyĩrĩkaga, na kwoguo nĩ tũhotaga kũmũkuhĩrĩria na tũgatuĩka arata ake. (Thab. 25:14; Atũm. 17:27) Ningĩ Jehova nĩ mwĩnyihia. Bibilia ĩtwĩraga ũũ: “Nĩ enyihagia akainamĩrĩra nĩguo arore igũrũ o na thĩ, agokĩria mũndũ ũrĩa ũtarĩ hinya kuuma rũkũngũ-inĩ.” (Thab. 113:​6, 7) Na githĩ ngumo icio ititũtindĩkaga kũhe Ngai witũ riri? Tũheaga Jehova riri tondũ nĩ twendaga andũ arĩa angĩ mamũmenye. Andũ aingĩ matiũĩ ũhoro wa ma wĩgiĩ Jehova. Nĩkĩ? Tondũ Shaitani nĩ atumumarĩtie meciria mao na njĩra ya gũtheremia maheeni moru megiĩ Jehova. (2 Kor. 4:4) Shaitani nĩ atũmĩte andũ metĩkie atĩ Jehova nĩ Ngai wa kwĩrĩhanĩria, ũtarũmbũyagia andũ, na atĩ nĩwe kĩhumo kĩa mathĩna maingĩ marĩa marĩ thĩinĩ wa thĩ. No tondũ ithuĩ nĩ tũĩ ũhoro wa ma wĩgiĩ Ngai witũ, tũrĩ na mweke wa kũmenyithia andũ arĩa angĩ ũhoro ũcio, na njĩra ĩyo tũkagoocithia Jehova.—Isa. 43:10. w25.01 3 ¶6-7

O na gũtuĩka Jesu, Mũrũ wa Ngai, aarĩ mũkinyanĩru na nĩ aaringire ciama cia magegania, Shaitani nĩ aahũthĩrire andũ amwe gũtheremia maheeni maingĩ mamwĩgiĩ. Kwa ngerekano, atongoria a ndini meeraga andũ atĩ hinya ũrĩa Jesu aahũthagĩra kũingata ndaimono aaheetwo nĩ “mũnene wa ndaimono.” (Mar. 3:22) Rĩrĩa Jesu aaciirithagio, atongoria a ndini nĩ maamũthitangĩire atĩ nĩ arumĩte Ngai na magĩcogera kĩrĩndĩ kiuge oragwo. (Mat. 27:20) Thutha-inĩ rĩrĩa arũmĩrĩri a Kristo maahunjagia ũhoro ũrĩa mwega, arĩa maamakararagia nĩ ‘maacogerire andũ a ndũrĩrĩ na makĩmathũkia meciria’ nĩguo manyarire Akristiano acio. (Atũm. 14:​2, 19) Ngathĩti ya Mũrangĩri ya Dicemba 1, 1998, ĩkĩarĩrĩria Atũmwo 14:2 yaugire atĩ andũ arĩa maanyitaga Shaitani mbaru nĩ maaregire ndũmĩrĩri ĩrĩa Akristiano maahunjagia, na ningĩ magĩtheremia ndeto njũru cimegiĩ nĩguo andũ mamathũũre na matikamathikĩrĩrie. O na ũmũthĩ ũyũ, Shaitani no ‘ahĩtithagia thĩ yothe ĩrĩa ĩikaragwo.’ w24.04 11 ¶15-16

Mũndũ ndagaatuĩrũo kũringana na rĩrĩa aakuire. Jehova atuanagĩra na njĩra nginyanĩru, na kwoguo hingo ciothe matua make makoragwo marĩ ma kĩhooto na magĩrĩru. (Thab. 33:​4, 5) Nĩ ũndũ ũcio no tũkorũo na ma atĩ “Mũtuanĩri Ciira wa thĩ yothe” ageeka ũndũ ũrĩa wagĩrĩire. Ningĩ no tuuge atĩ mũndũ ndagaatuĩrũo kũringana na kũrĩa aaikaraga. Tũtingĩrĩgĩrĩra atĩ nĩ kũrĩ andũ Jehova agaatuĩra atĩ nĩ a mũhaano wa “mbũri” atĩ tondũ tu maaikaraga kũndũ mataagĩire na mweke wa kũigua ndũmĩrĩri ya Ũthamaki. (Mat. 25:46) Tondũ we atuanagĩra na njĩra ya kĩhooto, twĩ na ma atĩ nĩ arũmbũyagia andũ ta acio na njĩra nene gũkĩra ũrĩa ithuĩ tũngĩhota. Tũtiũĩ ũrĩa Jehova agaatongoria maũndũ hĩndĩ ya thĩna ũrĩa mũnene. No kũhoteke andũ amwe ta acio nĩ makaagĩa na mweke wa kũmenya Jehova na marũgame mwena wake rĩrĩa agaatheria rĩĩtwa rĩake ndũrĩrĩ-inĩ ciothe.—Ezek. 38:16. w24.05 12 ¶14-15

Andũ a Jehova nĩ mendete gũteithania mũndũ na ũrĩa ũngĩ. (2 Kor. 8:4) No rĩmwe ũndũ ũcio nĩ ũbataraga ũmĩrĩru. Kwa ngerekano rĩrĩa kwaumĩra mbaara, athuri a kĩũngano nĩ mamenyaga atĩ aarĩ na ariũ a Ithe witũ nĩ marabatara gwĩkĩrũo ngoro, gũtiirĩrĩrũo, na kũheo ũteithio wa kĩĩroho kana wa kĩĩmwĩrĩ. Wendo wao kwerekera aarĩ na ariũ a Ithe witũ nĩ ũmatindĩkaga kũingĩria mĩoyo yao ũgwati-inĩ nĩguo mamahe ũteithio ũrĩa marabatara. Mahinda-inĩ ta macio, nĩ ũndũ wa bata gũtũũria ũrũmwe. Rũmĩrĩra ũtongoria ũrĩa ũheanĩtwo nĩ wabici ya rũhonge. (Ahib. 13:17) Athuri a kĩũngano nĩ magĩrĩirũo gũikara makĩroraga mĩbango ya gĩcigo kĩao ĩgiĩ kwĩhaarĩria nĩ ũndũ wa gĩcanjama kĩa ndũire, o hamwe na ũtongoria wa ithondeka wĩgiĩ ũrĩa magĩrĩirũo gwĩka rĩrĩa gĩcanjama kĩaumĩra. (1 Kor. 14:​33, 40) Korũo na ũmĩrĩru ĩndĩ ũikare wĩhũgĩte. (Thim. 22:3) Hũthĩra ũũgĩ nĩgetha ndũkeingĩrie ũgwati-inĩ ũngĩhota gwĩthema. Wĩhoke Jehova. No agũteithie kũhe aarĩ na ariũ a Ithe witũ ũteithio ũrĩa marabatara ũtekwĩingĩria ũgwati-inĩ. w24.07 4 ¶8; 5 ¶11

Mũthamaki Daudi nĩ ooĩ Jehova na nĩ aamwĩhokete. Rĩrĩa Mũthamaki Saulu na thũ ingĩ cia Daudi ciageragia kũmũũraga, nĩ aahoire Jehova amũteithie. Daudi aaugire ũũ thutha wa Ngai gũcokia mahoya make na kũmũhonokia: “Jehova arĩ muoyo!” (Thab. 18:46) Hihi Daudi eendaga kuuga atĩa? Ibuku rĩmwe rĩa gũtaarĩria Bibilia riugaga atĩ Daudi eendaga kuonania aarĩ na ma atĩ Jehova “nĩ ngai ũtũũraga muoyo ũrĩa hingo ciothe ũrũagĩrĩra andũ ake.” Hatarĩ nganja, maũndũ marĩa Daudi eeyoneire nĩ maatũmĩte akorũo na ma atĩ Ngai wake arĩ muoyo, na ũndũ ũcio nĩ wekĩrire hinya itua rĩake rĩa gũthiĩ na mbere gũtungatĩra Jehova na kũmũgooca. (Thab. 18:​28, 29, 49) Tũngĩkoragwo na ma atĩ Jehova nĩ Ngai ũrĩa ũtũũraga muoyo, ũndũ ũcio no ũtũteithie kũmũtungatĩra na kĩyo. Nĩ tũrĩkoragwo na hinya wa gũkirĩrĩria magerio na tũkerutanĩria biũ ũtungata-inĩ wake. Ningĩ nĩ tũrĩkoragwo tũtuĩte itua rĩa gũtũũra hakuhĩ na Jehova. w24.06 20-21 ¶3-4

Tũreruta atĩa kuumana na ciugo icio mũtũmwo Paulo aandĩkĩire Athesalonike? Tũngĩigua ũhoro ũtaratwarana na maũndũ marĩa twĩrutĩte kuuma Bibilia-inĩ kana tũigue mũhuhu wa kũmakania, tũrabatara kũhũthĩra ũtaũku. Thĩinĩ wa Soviet Union, thũ citũ nĩ ciatheremetie marũa meerĩkanaga maumĩte wabici-inĩ itũ ĩrĩa nene. Marũa macio meeraga ariũ a Ithe witũ amwe meyamũranie na ithondeka, mathondeke gĩkundi kĩao. Marũa macio moonekaga ta marĩ ma kwĩhokeka. No ariũ a Ithe witũ arĩa ehokeku matiaheenekire. Nĩ maataũkĩirũo atĩ ndũmĩrĩri ĩrĩa yarĩ marũa-inĩ macio ndĩatwaranaga na maũndũ marĩa meerutĩte. O na ũmũthĩ ũyũ, thũ cia ũhoro ũrĩa wa ma rĩmwe nĩ ihũthagĩra indo ta intaneti na nenda cia ũkinyanĩria kũgeria gũtũhĩngĩca na gũtũgayũkania. Handũ ha ‘kũhiũha kwenyenyio kuuma harĩ gwĩciria gwitũ,’ no twĩgitĩre na njĩra ya gũthuthuria kana maũndũ marĩa tũrathoma kana tũkaigua nĩ maratwarana na ũhoro wa ma ũrĩa twĩrutĩte.—2 Thes. 2:2; 1 Joh. 4:1. w24.07 12 ¶14-15

Itua rĩrĩa rĩa bata makĩria mũndũ angĩtua nĩ rĩa kwĩyamũrĩra Jehova na gũtuĩka wa famĩlĩ yake. Jehova endaga andũ othe meke ũguo. Nĩkĩ? Nĩ endaga makorũo na ũrata wa hakuhĩ hamwe nake na matũũre tene na tene. (Gũcok. 30:​19, 20; Gal. 6:​7, 8) O na kũrĩ ũguo, Jehova ndatindĩkagĩrĩria mũndũ amũtungatĩre. Nĩ etĩkĩrĩtie o mũndũ gwĩtuĩra ũrĩa ekwenda. Ĩ Mũkristiano mũbatithie angĩka mehia maritũ? Angĩaga kwĩrira, no mũhaka eherio kĩũngano-inĩ. (1 Kor. 5:13) No o na hĩndĩ ta ĩyo, Jehova no erĩgagĩrĩra atĩ mũndũ ũcio wĩhĩtie nĩ ekũmũcokerera. O na ũndũ ũmwe wa bata watũmire Jehova arute ũkũũri, nĩ atĩ nĩ ũhotithagia arĩa merirĩte kuoherũo mehia mao. Ngai witũ ũrĩ wendo nĩ oragia arĩa mehĩtie merire.—Zek. 1:3; Rom. 2:4; Jak. 4:8. w24.08 14 ¶1-2

Gũkinyĩria rĩrĩa mũtũmwo Johana aandĩkire marũa ma gatatũ, andũ amwe nĩ maatheremagia morutani ma maheeni na magatũma kũgĩe ngayũkano kĩũngano-inĩ. Ĩndĩ kwarĩ na Akristiano maathiiaga o na mbere “kũrũmĩrĩra ũhoro ũrĩa wa ma.” Nĩ maathĩkagĩra Jehova na magathiĩ “kũringana na maathani make.” (2 Joh. 4, 6) Akristiano acio nĩ maatũmaga Johana akene, na magakenia Jehova. (Thim. 27:11) Tũreruta atĩa? Wĩhokeku nĩ ũrehaga gĩkeno. (1 Joh. 5:3) Kwa ngerekano, nĩ tũkenaga nĩ kũmenya atĩ nĩ tũrakenia Jehova. Nĩ akenaga ona tũkĩregana na magerio ma thĩ ĩno na tũkĩrũmĩrĩra ũhoro wa ma. O na araika kũrĩa igũrũ nĩ makenaga. (Luk. 15:10) Ningĩ nĩ tũkenaga rĩrĩa tuona Akristiano arĩa angĩ magĩtũũria wĩhokeku. (2 Thes. 1:4) Na rĩrĩa mũtabarĩre ũyũ wa maũndũ ũkaaniinwo, nĩ tũgaakena kũmenya atĩ nĩ twatũũririe wĩhokeku witũ harĩ Jehova o na tũrĩ thĩinĩ wa thĩ ĩratongorio nĩ Shaitani. w24.11 12 ¶17-18

Hihi wagĩrĩirũo kuoya ihinda rĩigana atĩa gũtuĩria mũndũ ũtanamũũria kana no mũtume ndũgũ? Ũngĩmũũria na ihenya mũno no woneke ta ũrĩ mũndũ wa gũtengʼerera maũndũ. (Thim. 29:20) No ningĩ ũngĩikara mũno no woneke ta wĩkururagia ũgĩgatua matua, makĩria angĩkorũo mũndũ ũcio nĩ onete atĩ nĩ ũragucĩrĩrio nĩwe. (Koh. 11:4) Ũgĩtua itua rĩa kũũria mũndũ ũcio, ririkana atĩ to nginya ũkorũo na ma atĩ nĩ mũkũhikania nake. No nĩ wagĩrĩirũo gũkorũo na ma atĩ nĩ wĩhaarĩirie kũingĩra kĩhiko-inĩ na atĩ no mwaganĩrĩrũo na mũndũ ũcio. Ĩ ũngĩmenya atĩ mũndũ mũna nĩ aragucĩrĩrio nĩwe? Angĩkorũo ndũragucĩrĩrio nĩwe, reke ciĩko ciaku cionanie ũguo. No ũkorũo ũtarĩ ũndũ wa wendo gũtũma mũndũ ũcio ecirie atĩ o nawe no wende mwambĩrĩrie ndũgũ na tiguo kũrĩ.—Ef. 4:25. w24.05 23 ¶9-10

Akristiano arĩa aitĩrĩrie maguta kũna na ehokeku no o tu makaamũkĩrũo nĩ Jesu Ũthamaki-inĩ wa igũrũ. Aitĩrĩrie maguta arĩa mataikaraga meiguĩte kĩĩroho matigacokanĩrĩrio hamwe na “arĩa athuure.” (Mat. 24:31) Makĩria ma ũguo, andũ othe a Jehova, gũtekũmakania kĩĩrĩgĩrĩro kĩao nĩ kĩrĩkũ, nĩ magĩrĩirũo gwathĩkĩra mũkaana wa Jesu wĩgiĩ gũikara twĩhũgĩte na gũtũũra tũrĩ ehokeku. No twĩhoke matuĩro ma Jehova tondũ nĩ tũmũmenyete wega. Kwoguo tũtitangĩkaga o na angĩkorũo Jehova nĩ athuurĩte gũitĩrĩria andũ amwe maguta mahinda-inĩ maya. Nĩ tũririkanaga ũrĩa Jesu aaugire ngerekano-inĩ yake ya mũgũnda wa mĩthabibũ igũrũ rĩgiĩ andũ arĩa mookire wĩra thaa ikũmi na ĩmwe. (Mat. 20:​1-16) Andũ arĩa meetĩirũo wĩra mũgũnda-inĩ ũcio mathaa ma hwaĩ-inĩ maaheirũo mũcara ũiganaine na wa arĩa maambĩrĩirie kũruta wĩra o gatene. Na njĩra o ta ĩyo, aitĩrĩrie maguta arĩa magaatuĩrũo atĩ nĩ ehokeku nĩ makaaheo ngerenwa yao kũrĩa igũrũ gũtekũmakania rĩrĩa maathuurirũo. w24.09 24 ¶15-17

Jesu nĩ aatũigĩire kĩonereria kĩega kĩa ũrĩa tũngĩhiũrania na wagi wa kĩhooto. Ta wĩcirie maũndũ matarĩ ma kĩhooto marĩa aagereire kuuma kũrĩ andũ aingĩ nginya andũ ao a famĩlĩ. Andũ ao a famĩlĩ maaugaga nĩ agũrũkĩte, atongoria a ndini makauga arahũthĩra hinya wa ndaimono, nacio thigari cia Roma ikĩmũnyũrũria, ikĩmũnyarira, na mũthia-inĩ ikĩmũũraga. (Mar. 3:​21, 22; 14:55; 15:​16-20, 35-37) No Jesu nĩ aakirĩrĩirie wagi ũcio wothe wa kĩhooto, na ndaigana kwĩrĩhĩria. Tũreruta atĩa kuumana na kĩonereria gĩake? (1 Pet. 2:​21-23) Jesu nĩ aatũtigĩire kĩonereria kĩega gĩa kũrũmĩrĩra rĩrĩa tũrahiũrania na wagi wa kĩhooto. Nĩ aamenyaga hĩndĩ ya kwaria na ya gũkira. (Mat. 26:​62-64) Rĩmwe nĩ aathuuraga kwaga kuuga ũndũ rĩrĩa andũ maria ndeto cia maheeni imwĩgiĩ. (Mat. 11:19) Na rĩrĩa athuura kwaria, ndaarumaga arĩa maamũnyariraga kana akamehĩtĩra. w24.11 5 ¶9-10

Ta hũũra mbica ũheete mũndũ wendete kĩheo kĩa goro na kĩngĩmũteithia. Na githĩ to ũigue ũũru mũno ũngĩmenya atĩ mũndũ ũcio aathiire akĩiga kĩheo kĩu handũ na ndatindanagĩra nakĩo? Ngũrani na ũguo, no ũkene mũno ũngĩmenya atĩ nĩ arahũthĩra kĩheo kĩu ũrĩa kwagĩrĩire na akonania ngatho nĩ ũndũ wakĩo. Ngerekano ĩyo ĩratũruta atĩa? Jehova nĩ aarutire Mũrũ wake akue nĩ ũndũ witũ. Kwoguo no mũhaka akorũo Jehova nĩ akenaga mũno rĩrĩa ona tũkĩonania ngatho nĩ ũndũ wa kĩheo kĩu kĩa goro, na nĩ ũndũ wa wendo wake ũrĩa wamũtindĩkire kũruta ũkũũri. (Joh. 3:16; Rom. 5:​7, 8) No o ũrĩa mahinda marathiĩ, no twĩkore tũkĩambĩrĩria kũhũthia kĩheo kĩu gĩa ũkũũri. Gwĩka ũguo no kũringithanio na kũiga kĩheo kĩu handũ tũtarakĩona, na kwoguo tũkaga gũtindanĩra nakĩo. Nĩgetha tũtigekore ta hau, no mũhaka tũikare tũkĩrurumũraga ngatho citũ nĩ ũndũ wa ũrĩa Jehova na Jesu matwĩkĩire. w25.01 26 ¶1-2

Mũthuri wa kĩũngano ndagĩrĩire gũkorũo arĩ mũndũ ũratuĩkire Mũkristiano ica ikuhĩ. O na gũtuĩka to nginya ũkorũo ũikarĩte mĩaka mĩingĩ kuuma wabatithio, nĩ ũrabatara ihinda rĩiganu nĩguo ũgimare kĩĩroho. Ũtanatuĩka mũthuri wa kĩũngano, no nginya ũkorũo wonanĩtie atĩ o ta Jesu, ũrĩ mwĩnyihia na nĩ wĩhaarĩirie gweterera nginya rĩrĩa Jehova arĩkwĩhokera mĩeke ya ũtungata. (Mat. 20:23; Afil. 2:​5-8) Na no wonanie atĩ ũrĩ mwĩhokeku harĩ Jehova na njĩra ya kũrũmia ithimi ciake cia ũthingu, na kũrũmĩrĩra ũtongoria wa ithondeka rĩake. Maandĩko monanagia wega atĩ arori nĩ mabatiĩ gũkorũo na ũhoti wa kũrutana. Hihi ũguo nĩ kuuga no nginya ũkorũo na kĩheo gĩa kũruta mĩario? Aca. Kũrĩ athuri aingĩ a kĩũngano matakoragwo na kĩheo gĩa kũruta mĩario, no nĩ marutanaga wega mũno ũtungata-inĩ na magakinyĩra ngoro cia andũ hĩndĩ ya maceera ma ũrĩithi. w24.11 23-24 ¶14-15

Ũngĩthoma ũndũ Bibilia-inĩ na wage gũtaũkĩrũo nĩguo biũ, ĩka ũthuthuria. Na mũthenya ũcio wothe no wĩcũranie maũndũ marĩa weruta na ũrĩa marakũruta igũrũ rĩgiĩ Jehova, Mũrũwe, na wendo wao harĩ ithuĩ. (Thab. 119:​97, kohoro ka magũrũ-inĩ.) Ndũgakue ngoro angĩkorũo ti hingo ciothe wonaga ũndũ mwerũ kana wa gũcanjamũra rĩrĩa ũrathoma kana ũreka ũthuthuria. Ũtariĩ ta mũndũ ũracaria thahabu. Kaingĩ mũndũ ũracaria thahabu nĩ aikaraga mathaa maingĩ kana matukũ maingĩ angĩkona nginya gacunjĩ kanini ga thahabu. O na kũrĩ ũguo ndakuaga ngoro, ĩndĩ athiaga na mbere kũmĩcaria tondũ nĩ oĩ thogora wayo. Maũndũ merũ marĩa twĩrutaga thĩinĩ wa Bibilia nĩ ma thogora mũnene o na gũkĩra thahabu. (Thim. 8:10) Kwoguo koragwo na wetereri na ũthiĩ na mbere gũcaria maũndũ merũ wĩruti-inĩ waku wa Bibilia.—Thab. 1:2. w25.01 24-25 ¶14-15

Jehova erĩgagĩrĩra tũkorũo twĩhaarĩirie kuohera arĩa matũtuurithĩtie. (Thab. 86:5; Luk. 17:4; Ef. 4:32) Mũndũ no auge kana eke ũndũ ũtũtuurithie na njĩra nene, na no tũtuurũo o na makĩria angĩkorũo mũndũ ũcio nĩ mũrata wa hakuhĩ kana mũndũ witũ wa famĩlĩ. (Thab. 55:​12-14) Rĩmwe o na no tũigue tũtuurĩtwo ta mũndũ ũthecangĩtwo na rũhiũ. (Thim. 12:18) No tũgerie kwaga gũtindanĩra kana kũhũthia ruo rũrĩa tũraigua ngoro-inĩ, no gwĩka ũguo no kũringithanio na mũndũ ũthecetwo na kahiũ, ĩndĩ agagatiga kĩronda-inĩ kĩu. Na njĩra o ta ĩyo, kwaga gũtindanĩra na ũrĩa tũraigua gũtingĩtũteithia kũniina ruo rũrĩa tũraigua ngoro-inĩ. Kaingĩ rĩrĩa mũndũ atũhĩtĩria, nĩ tũrakaraga. O na Bibilia nĩ yonanagia wega atĩ no gũthiĩ ũguo. O na kũrĩ ũguo, nĩ ĩtũkaanĩtie kũiga marakara ngoro-inĩ. (Thab. 4:4; Ef. 4:26) Nĩkĩ? Tondũ kaingĩ marakara matikoragwo na maumĩrĩro mega. (Jak. 1:20) Ririkana atĩ rĩrĩa twahĩtĩrio no tũrakare, ĩndĩ no tũthuure kwaga kũiga marakara. w25.02 15 ¶4-6

Jesu nĩ aaheanire ngerekano ĩronania atĩ mũndũ ũreigĩra mbeca no ti “mũtongu maitho-inĩ ma Ngai” ndakoragwo akĩonania ũũgĩ. (Luk. 12:​16-21) Ma nĩ atĩ, gũtirĩ mũndũ ũĩ ũhoro wa rũciũ. (Thim. 23:​4, 5; Jak. 4:​13-15) Ningĩ nĩ harĩ ũritũ tũcemanagia naguo nĩ ũndũ wa gũkorũo tũrĩ arũmĩrĩri a Jesu. Jesu aaugire atĩ no mũhaka tũkorũo twĩhaarĩirie ‘gũtiga’ indo citũ ciothe nĩguo tũtuĩke arutwo ake. (Luk. 14:​33, kohoro ka magũrũ-inĩ.) Akristiano a karine ya mbere arĩa maarĩ Judea nĩ meetĩkĩrire makenete kũũrũo nĩ indo ciao. (Ahib. 10:34) O na mahinda-inĩ maya, aarĩ na ariũ a Ithe witũ aingĩ nĩ morĩtwo nĩ indo ciao nĩ ũndũ wa kũrega kwĩingĩrania na maũndũ ma gĩũteti. (Kũg. 13:​16, 17) Makoragwo mehaarĩirie kũũrũo nĩ indo ciao tondũ nĩ metĩkĩtie biũ kĩĩranĩro gĩkĩ kĩa Jehova: “Ndirĩ hĩndĩ ngaagũtiga, na ndirĩ hĩndĩ ngaagũtirika.” (Ahib. 13:5) Kwoguo nĩ twĩrutanagĩria kũbanga ũrĩa tũkaahingia mabataro maitũ ihinda-inĩ rĩũkĩte, tũrĩ na ma atĩ o na kũngiumĩra ũndũ tũterĩgĩrĩire, Jehova nĩ arĩtũrũmbũyagia. w25.03 29-30 ¶13-14

Jehova nderĩgagĩrĩra tũtuĩke agimaru kĩĩroho tũtarĩ na ũteithio o wothe. Arĩa matungataga marĩ arĩithi na arutani thĩinĩ wa kĩũngano nĩ makoragwo mehaarĩirie gũtũteithia gũtuĩka ‘andũ agima’ kĩĩroho, na “[gũkinyĩra] gĩthimi kĩa ũgima kĩa ũiyũru wa Kristo.” (Ef. 4:​11-13) Ningĩ Jehova nĩ atũheaga roho wake mũtheru nĩguo ũtũteithie kũgĩa na “meciria ma Kristo.” (1 Kor. 2:​14-16) Makĩria ma ũguo, Ngai nĩ aandĩkithirie mabuku marĩa mana ma Injiri nĩguo matũteithie kũmenya mwĩcirĩrie wa Jesu o hamwe na ciugo na ciĩko ciake arĩ gũkũ thĩ. Ũngĩĩgerekania na mwĩcirĩrie wa Jesu na ciĩko ciake, nĩ ũkũhota gũkinyĩra muoroto waku wa gũtuĩka Mũkristiano mũgimaru kĩĩroho. No nĩguo tũtuĩke Akristiano agimaru kĩĩroho, no mũhaka ningĩ tũkorũo “tũhĩtũkĩte ũrutani wa mũthingi wĩgiĩ Kristo,” na ũguo nĩ kuuga morutani ma mũthingi marĩa Akristiano metĩkĩtie. w24.04 4 ¶11-12

O mũthenya nĩ tũbataraga gũtua matua. Matua mamwe makoragwo marĩ mahũthũ, ta itua rĩgiĩ kĩrĩa tũkũrĩa kana mathaa marĩa tũrĩkomaga. No matua mangĩ no makorũo marĩ maritũ, tondũ no mahutie ũgima witũ wa mwĩrĩ, gĩkeno gitũ, arata na andũ aitũ a famĩlĩ, kana ũthathaiya witũ. Ithuothe no twende gũtuaga matua megũtũguna o hamwe na famĩlĩ citũ. Na ũndũ wa bata o na makĩria, tũngĩenda matua maitũ makenagie Jehova. (Rom. 12:​1, 2) Ikinya rĩa bata rĩngĩgũteithia gũtua itua rĩega nĩ kwamba gũtuĩria maũndũ wega. Ũndũ ũcio nĩ wa bata nĩkĩ? Ta hũũra mbica mũrwaru athiĩte kuona ndagĩtarĩ. Hihi ndagĩtarĩ no ambĩrĩrie kũmũthondeka atambĩte kũmũthima kana kũmũũria ciũria? Aca ndangĩka ũguo. Ũndũ ũcio ũronania atĩ ũngĩambaga gũtuĩria maũndũ wega nĩ ũrĩhotaga gũtua matua mega. w25.01 14 ¶1-3

Nĩ atĩa tũĩ wĩgiĩ tha cia Jehova? Onanĩtie atĩa atĩ “ndendaga mũndũ o na ũmwe akaaniinwo”? (2 Pet. 3:9) Ta wĩcirie ũhoro wa andũ amwe Jehova oonirie tha arĩa meekĩte mehia maritũ. Mũthamaki Daudi nĩ eekire mehia maigana ũna maritũ, ta ũtharia na kũũragana. No tondũ Daudi nĩ eeririre, Jehova nĩ aamuonirie tha na akĩmuohera. (2 Sam. 12:​1-12) Nake Mũthamaki Manase nĩ eekire maũndũ maingĩ moru ihinda-inĩ rĩa mĩaka mĩingĩ ya ũtũũro wake. No o na ehĩtie na gĩkĩro kĩnene ũguo, Jehova nĩ aamuonirie tha na akĩmuohera tondũ nĩ eeririre. (2 Maũ. 33:​9-16) Ngerekano icio iratuonia atĩ Jehova nĩ onanagia tha rĩrĩa rĩothe he na gĩtũmi gĩa gwĩka ũguo. Kwoguo nĩ akaariũkia andũ ta acio tondũ nĩ meetĩkĩrire mehia mao na makĩĩrira. w24.05 5 ¶12