Arutwo a Jesu nĩ meetĩkĩtie Kiugo kĩa Ngai na nĩ meerutanagĩria biũ gũkĩrũmĩrĩra ũtũũro-inĩ wao. (Joh. 17:6) No nĩ maatukanĩirũo rĩrĩa Jesu ooragirũo ta mwĩki-naĩ. Jesu nĩ aamenyaga atĩ maagĩte na nganja tondũ matiataũkagĩrũo wega nĩ Maandĩko, no ti tondũ maarĩ na mwerekera mũũru. (Luk. 9:​44, 45; Joh. 20:9) Nĩ ũndũ ũcio, akĩmateithia gũtaũkĩrũo nĩ Maandĩko. Kwa ngerekano-rĩ, ta wĩcirie ũrĩa aateithirie arutwo arĩa erĩ maathiaga Emau. Jesu ndemenyithanirie o rĩo harĩ arutwo acio, aambire akĩmoria ciũria. Nĩkĩ? Kwahoteka eendaga maitũrũre kĩrĩa kĩarĩ meciria-inĩ na ngoro-inĩ ciao. Na ũguo nĩguo meekire. Maamwĩrire atĩ meerĩgagĩrĩra Jesu nĩ ekũhonokia Aisiraeli kuuma harĩ ũhinyanĩrĩria wa Roma. (Luk. 24:​18-27) Jesu nĩ aahũthĩrire Maandĩko kũmateithia gũtaũkĩrũo nĩ maũndũ marĩa meekĩkĩte. Thutha-inĩ mũthenya o ro ũcio hwaĩ-inĩ, Jesu nĩ aaumĩrĩire arutwo acio angĩ na akĩmathathaũrĩra maũndũ macio.—Luk. 24:​33-48. w24.10 14 ¶9-10

Maũndũ marĩa Jesu aaugaga na ageka eerutĩte kuuma kũrĩ Ithe. Ithondeka rĩa Jehova nĩ rĩrũmagĩrĩra kĩonereria kĩa Jesu tondũ ũtongoria ũrĩa rĩheanaga na maũndũ marĩa rĩrutanaga makoragwo maumĩte Kiugo-inĩ kĩa Ngai. (2 Tim. 3:​16, 17) Nĩ tũririkanagio kaingĩ bata wa gũthoma Kiugo kĩa Ngai na kũhũthĩra maũndũ marĩa tweruta. Nĩ tũgunĩkaga mũno rĩrĩa tweruta Bibilia tũgĩteithĩrĩrio nĩ mabuku maitũ. Kwa ngerekano, nĩ tũhotaga kũringithania ũrĩa Bibilia ĩrauga na ũtongoria ũrĩa tũraheo nĩ ithondeka ritũ. Rĩrĩa tuona ũrĩa ũtongoria ũcio ũratwarana na Maandĩko, nĩ twĩhokaga ithondeka rĩa Jehova o na makĩria. (Rom. 12:2) Jesu nĩ aahunjagia “ũhoro ũrĩa mwega wa Ũthamaki wa Ngai.” (Luk. 4:​43, 44) Nĩ aathire arutwo ake o nao mahunjagie ũhoro wa Ũthamaki. (Luk. 9:​1, 2; 10:​8, 9) Ũmũthĩ ũyũ andũ arĩa othe marĩ ithondeka-inĩ rĩa Jehova nĩ mahunjagia ndũmĩrĩri ya Ũthamaki gũtekũmakania kũrĩa maikaraga. w24.04 9 ¶5-7

Tũũra wĩhokete ũtongoria wa ithondeka rĩa Jehova. Matukũ-inĩ ma Isiraeli, Jehova nĩ aahũthĩrire Musa na thutha-inĩ akĩhũthĩra Joshua kũhe andũ ake ũtongoria. (Josh. 1:17) Aisiraeli nĩ maagĩaga na irathimo rĩrĩa metĩkĩra atĩ arũme acio maahũthagĩrũo nĩ Jehova. Mĩaka mĩingĩ thutha ũcio rĩrĩa kĩũngano gĩa Gĩkristiano kĩaambĩrĩirio, atũmwo arĩa 12 nĩo maaheanaga ũtongoria. (Atũm. 8:​14, 15) Thutha-inĩ atũmwo acio o hamwe na athuri angĩ arĩa maarĩ Jerusalemu nĩo maahũthagĩrũo kũheana ũtongoria. Na tondũ Akristiano nĩ maarũmagĩrĩra ũtongoria ũrĩa maaheagwo nĩ arũme acio, “ciũngano igĩthiĩ na mbere kũgĩa na hinya ũhoro-inĩ wa wĩtĩkio na kuongerereka mũthenya o mũthenya.” (Atũm. 16:​4, 5) O na mahinda-inĩ maya, nĩ twamũkagĩra irathimo rĩrĩa twarũmĩrĩra ũtongoria wa ithondeka rĩa Jehova. w24.07 10 ¶10

Jehova nĩ eendete Mũthamaki Daudi mũno. O na aamwĩtire, “mũndũ wĩtĩkĩrĩkĩte ngoro-inĩ yakwa.” No Daudi nĩ eekire mehia maritũ. Kwa ngerekano nĩ eeingĩririe ũtharia-inĩ na akĩũragana. Kũringana na Watho wa Musa, Daudi aagĩrĩire kũũragwo. (Alaw. 20:10; Ndar. 35:31) Ĩndĩ Jehova nĩ aaingĩrĩire maũndũ. Aatũmire mũnabii Nathani kũrĩ Daudi, o na gũtuĩka gũtirĩ ũndũ woonanagia atĩ nĩ eerirĩte mehia make. Nathani aahũthĩrire ngerekano yahutirie Daudi ngoro mũno, nginya agĩkinyĩrĩra kwĩrira. (2 Sam. 12:​1-14) O na nĩ aandĩkire thaburi, ĩrĩa yonanagia atĩ nĩ eerirĩte kuuma ngoro. (Thab. 51, kohoro ga gũtaarĩria) Thaburi ĩyo yanomĩrĩria andũ aingĩ arĩa managwa mehia-inĩ maritũ na ĩkamatindĩka kwĩrira. Na githĩ ti ũndũ wa gwĩkĩra ngoro kuona ũrĩa Jehova aateithirie Daudi ndungata yake nginya agĩkinyĩrĩra kwĩrira? w24.08 10 ¶9

Andũ aingĩ nĩ monete atĩ kũrera mwana nĩ kũbataraga kĩyo kĩingĩ. Angĩkorũo ũrĩ mũciari, nĩ tũrakũgathĩrĩria mũno nĩ ũndũ wa kwĩrutanĩria gũteithia mwana waku gwaka wĩtĩkio mũrũmu. (Gũcok. 6:​6, 7) O ũrĩa mwana waku arakũra, no ambĩrĩrie kũũria ciũria nditũ ciĩgiĩ wĩtĩkio witũ o hamwe na ithimi cia Bibilia ciĩgiĩ mĩtugo. Kĩambĩrĩria-inĩ no wone ta ciũria iria mwana waku arakũũria ironania ta anyihĩtie wĩtĩkio. No o ũrĩa ciana iraneneha, nĩ ciũragia ciũria nĩguo ciĩkĩre wĩtĩkio wacio hinya. (1 Kor. 13:11) Kwoguo ndũrabatara gũtangĩka rĩrĩa mwana waku akũũria ciũria ciĩgiĩ wĩtĩkio witũ, handũ ha ũguo no ũhũthĩre mweke ũcio kũmũteithia gũkũria ũhoti wa gwĩciria. w24.12 14 ¶1-2

Akristiano Ahibirania nĩ mangĩabatarire wĩtĩkio mũrũmu nĩguo mahonoke thĩna ũrĩa warĩ hakuhĩ kũgũmĩra Judea. (Ahib. 10:​37, 38) Jesu nĩ eerĩte arũmĩrĩri ake atĩ rĩrĩa mangĩonire Jerusalemu ĩthiũrũrũkĩirio nĩ mbũtũ ciambĩte hema, maabatiĩ kũũrĩra irĩma-inĩ. Ũtaaro ũcio waagĩrĩire kũrũmĩrĩrũo nĩ Akristiano othe arĩa maaikaraga itũũra-inĩ rĩu nginya arĩa maaikaraga mĩgũnda-inĩ. (Luk. 21:​20-24) Mahinda-inĩ macio, andũ mangĩatharĩkĩirũo nĩ mbũtũ mooragĩra itũũra-inĩ rĩirigĩre ta rĩa Jerusalemu. Nĩ ũndũ ũcio, ũtaaro wĩgiĩ kũũrĩra irĩma-inĩ nĩ ũngĩonekire ũtarĩ wa ũũgĩ, na kwoguo nĩ mangĩabatarire wĩtĩkio mũnene nĩguo mathĩkĩre ũtaaro ũcio. Ningĩ Akristiano Ahibirania nĩ maabataraga kwĩhoka andũ arĩa Jesu aahũthagĩra kũheana ũtongoria kĩũngano-inĩ. No kũhoteke arĩa maatongoragia maũndũ nĩ maaheanire ũtongoria wa ĩmwe kwa ĩmwe, ũrĩa ũngĩateithirie andũ othe kĩũngano-inĩ kũrũmĩrĩra ũtaaro wa Jesu ihinda rĩrĩa rĩagĩrĩire na njĩra ĩrĩ na mũbango mwega.—Ahib. 13:17. w24.09 10 ¶9-10

Rĩrĩa Jesu aarĩ gũkũ thĩ, nĩ aarutire kĩhinyio wĩra ũrĩa Ithe aamũheete. (Joh. 17:4) No Jesu ndaarĩ na mwerekera wa atĩ nowe tu ũngĩahotire kũruta wĩra ũcio na njĩra ĩrĩa yagĩrĩire. Nĩ aamenyeririe andũ angĩ kũruta wĩra ũcio. Ningĩ nĩ eehokeire arutwo ake wĩra wa kũrũmbũiya ngʼondu cia Jehova, na gũtongoria wĩra-inĩ wa kũhunjia na kũrutana. Jesu nĩ aaheire arutwo ake ũtaaro wa ĩmwe kwa ĩmwe ĩndĩ na njĩra ya wendo. Nĩ oonire atĩ amwe ao maarĩ na mwerekera wa gũkorũo na nganja, na kwoguo akĩmarũnga. (Luk. 24:​25-27; Joh. 20:27) Nĩ aamatĩtĩrithĩirie bata wa kũiga mbere wĩra wa kũrĩithia ngʼondu cia Jehova handũ ha biacara ciao. (Joh. 21:15) Nĩ aamaririkanirie atĩ matibatiĩ kwĩringithania na arĩa angĩ ũhoro-inĩ wĩgiĩ mĩeke ĩrĩa mũndũ angĩkorũo ehokeirũo. (Joh. 21:​20-22) Na nĩ aarũngire mawoni mamwe mahĩtanu maarĩ namo megiĩ Ũthamaki na akĩmateithia kũiga meciria mao wĩra-inĩ wa kũhunjia ũhoro ũrĩa mwega.—Atũm. 1:​6-8. w24.10 15-16 ¶13-14

Gwathĩka nĩ gũgaatũma tũtũũre tene na tene. O ta Aisiraeli arĩa maakiriĩ kũingĩra Bũrũri wa Kĩĩranĩro, o na ithuĩ tũkiriĩ kũingĩra thĩ njerũ, ĩrĩa ĩgaathiĩ ĩtuĩkĩte paradiso. (Isa. 35:1; Luk. 23:43) Shaitani na ndaimono ciake matigaakorũo kuo. (Kũg. 20:​2, 3) Ndini cia maheeni iria itũmĩte andũ maraihĩrĩrie Jehova itigakorũo kuo rĩngĩ. (Kũg. 17:16) O na Thirikari cia andũ iria ikoretwo ikĩhinyĩrĩria raia a cio itigaakorũo kuo. (Kũg. 19:​19, 20) Na thĩinĩ wa Paradiso gũtigaakorũo na andũ aremi. (Thab. 37:​10, 11) Andũ othe nĩ magaathĩkagĩra mawatho ma Jehova, marĩa magaatũteithia gũtũũria thayũ na ũrũmwe. Kwoguo ithuothe tũgakoragwo twendaine na twĩhokanĩte. (Isa. 11:9) Na githĩ kĩu ti kĩĩrĩgĩrĩro kĩa magegania? Makĩria ma ũguo, twathĩkĩra Jehova nĩ tũgathiĩ na mbere gũtũũra thĩinĩ wa paradiso gũkũ thĩ, to ihinda inini tu, ĩndĩ nĩ nginya tene na tene.—Joh. 3:16. w24.11 9 ¶7

Ũrathi ũcio nĩ ũrahinga matukũ-inĩ maya na gĩkĩro kĩnene gũkĩra hĩndĩ ĩngĩ o yothe. Rĩu ndũmĩrĩri ya Ũthamaki ĩroneka na thiomi makĩria ma 1,000, na andũ aingĩ no mathome ndũmĩrĩri ĩyo kũgerera Website ya jw.org. O na kũrĩ ũguo, Jesu nĩ eerire arutwo ake atĩ rĩrĩa agooka, agaakora “[matarĩkĩtie] gũthiũrũrũka matũũra-inĩ mothe,” kana matarĩkĩtie kũhunjĩria andũ othe. (Mat. 10:23; 25:​31-33) Ciugo icio cia Jesu nĩ iratũhutia o na mahinda-inĩ maya. Andũ milioni nyingĩ maikaraga icigo-inĩ wĩra witũ wa kũhunjia wĩkĩrĩirũo mĩkaana. Makĩria ma ũguo, ciana nyingĩ nĩ iraciarũo o mũthenya. Nĩ twĩrutanagĩria ũrĩa wothe tũngĩhota kũhunjia ũhoro ũrĩa mwega kũrĩ andũ a “ndũrĩrĩ ciothe na mĩhĩrĩga na thiomi.” (Kũg. 14:6) No ma nĩ atĩ tũtingĩhota gũkorũo tũhunjĩirie andũ othe thĩinĩ wa thĩ mũico ũtakinyĩte. w24.05 10 ¶6-7

Jesu aaragĩria andũ na ciugo cia kũmomĩrĩria na kũmekĩra ngoro. Ndaahũthagĩra ciugo ingĩatuurithirie arutwo ake. (Luk. 8:​47, 48) Na githĩ kĩu ti kĩonereria kĩega mũno aaigĩire athuri Akristiano? Jesu aaugire atĩ mũthuri abatiĩ gũkorũo arĩ mwĩhokeku harĩ mũtumia wake. Nĩ aacokerire ciugo cia Ithe rĩrĩa aaugire atĩ mũthuri agĩrĩirũo ‘kũnyitana na mũtumia wake.’ (Mat. 19:​4-6) Kiugo gĩa Kĩngiriki kĩrĩa gĩtaũrĩtwo “manyitane” rĩandĩko-inĩ rĩu, kĩngĩtaũrũo kiugo gwa kiugo kiugĩte “kũnyitithania na ngamu.” Ũguo nĩ kuuga atĩ mũthuri na mũtumia wake mabatiĩ gũkorũo na ũrũmwe mũrũmu ũũ atĩ nĩ ta manyitithanĩtio na ngamu. Kwoguo ũmwe wao angĩka ũndũ wa gũtuurithia ũcio ũngĩ, eerĩ no nginya mahutio nĩ ũndũ ũcio. Mũthuri ũkũrĩtie ũrũmwe ta ũcio hamwe na mũtumia wake, nĩ arĩĩthemaga biũ kwĩrorera mĩthemba yothe ya ponografĩ. Arĩhũgũraga maitho make o na ihenya nĩguo “matige kũrora ũndũ wa tũhũ.” (Thab. 119:37) Na njĩra ĩngĩ, arĩkoragwo arĩkanĩire na maitho make atĩ ndangĩĩrorera mũtumia o wothe arĩ na merirĩria moru.—Ayub. 31:1. w25.01 10 ¶12-13

Ti ũndũ mũhũthũ gũtaũkĩrũo nĩ wohanĩri wa andũ. Ũrĩa Jehova atuohagĩra nĩ ngũrani mũno na ũrĩa andũ mohanagĩra. Jehova atuohagĩra na njĩra ya mwanya. Mwandĩki wa Thaburi aaugire ũũ igũrũ rĩgiĩ Jehova: “Wee wohanagĩra biũ, nĩguo wĩtigagĩrũo.” (Thab. 130:4) Kwoguo Jehova ‘ohanagĩra biũ.’ Nĩ onanĩtie wega ũrĩa kuohanĩra kuugĩte. Mĩhari-inĩ ĩmwe, andĩki a Bibilia maahũthĩrire kiugo gĩa Kĩhibirania kĩngĩhũthĩka o gũtaarĩria wohanĩri wa Jehova tu, no gĩtingĩhũthĩka kwarĩrĩria wohanĩri wa andũ. Rĩrĩa Jehova ohera mũndũ, eheragia mehia make biũ na agacokia ũrata na mũndũ ũcio o ta ũrĩa ũrarĩ hau kabere. Jehova ohanagĩra biũ na ndanogagio nĩ kuohanĩra. w25.02 8 ¶1-3

O na andũ mangĩaga gũtũthikĩrĩria ũtungata-inĩ, no tũkoragwo tũhingĩtie muoroto witũ. Tũngiuga ũguo nĩkĩ? Tondũ nĩ tũkoragwo tũrutĩte ũira, na ũcio nĩguo ũndũ ũrĩa Jehova na Mũrũwe mendaga twĩke. O na tũngĩaga andũ a kũhunjĩria kana andũ marege ndũmĩrĩri itũ, no tũkorũo na gĩkeno nĩ ũndũ wa kũmenya nĩ tũrakenia Ithe witũ wa igũrũ. (Thim. 27:11) Ningĩ nĩ tũkenaga rĩrĩa mũhunjia ũngĩ ona mũndũ ũrakenio nĩ ũhoro gĩcigo-inĩ gitũ. Ngathĩti ya Mũrangĩri yanaringithania wĩra witũ wa kũhunjia na ũrĩa andũ macaragia mwana ũũrĩte. Acaragio nĩ andũ aingĩ kuuma gĩcigo kĩmwe nginya kĩrĩa kĩngĩ. Na rĩrĩa mwana ũcio oneka, to mũndũ ũrĩa wamuona ũkenaga, ĩndĩ nĩ arĩa othe mekũmũcaragia. Na njĩra o ta ĩyo, wĩra wa gũtua andũ arutwo ũbataraga ũnyitanĩri wa andũ aingĩ. Nĩ tũbataraga ũnyitanĩri wa ahunjia othe nĩguo tũhote gũkinyĩra andũ othe gĩcigo-inĩ gitũ, na kwoguo ithuothe nĩ tũkenaga rĩrĩa mũndũ ũmwe ambĩrĩria gũka mĩcemanio. w24.04 18 ¶13-14

Nĩ tũrerirĩria mũno kuona maũndũ marĩa megwĩkĩka ica ikuhĩ! Tũrerĩgĩrĩra atĩ kũgerera ũteithio wa Jehova, andũ angĩ aingĩ nĩ megwĩtĩkĩra ũhoro wa ma, thĩna ũrĩa mũnene ũtanambĩrĩria. Ningĩ nĩ tũrakena kũmenya atĩ o na hĩndĩ ya thĩna ũcio mũnene, kwahoteka nĩ tũkoona andũ angĩ aingĩ magĩtigana na thĩ ĩno ya Shaitani na manyitanĩre na ithuĩ kũgooca Jehova. Kamũira ihinda rĩu rĩkinyĩte, tũrĩ na wĩra wa kũruta. Tũrĩ na mweke wa kũnyitanĩra wĩra-inĩ ũtakaarutwo rĩngĩ wa kũhunjia ũhoro ũrĩa mwega wa Ũthamaki wa Ngai thĩinĩ wa thĩ yothe. Makĩria ma ũguo, no mũhaka tũthiĩ na mbere kũheana ndũmĩrĩri ya mũkaana. Andũ nĩ marabatara kũmenya atĩ mũthia wa mũtabarĩre ũyũ mũũru wa maũndũ nĩ ũkuhĩrĩirie mũno. Tondũ nĩ twendete ũhoro ũrĩa mwega, tũkenda andũ arĩa angĩ, na makĩria tũkenda Jehova Ngai na rĩĩtwa rĩake, twagĩrĩirũo gũthiĩ na mbere kũhunjia tũrĩ na kĩyo na mĩtũkĩ nginya rĩrĩa Jehova akauga atĩ wĩra ũcio nĩ wakinya mũthia. w24.05 19 ¶14-16

Ũtukũ wa mũico Jesu atanoragwo, nĩ aarutire Petero na atũmwo arĩa angĩ ũndũ wa bata wĩgiĩ wĩnyihia. Aarutire wĩra warutagwo kaingĩ nĩ ngombo, ũndũ ũrĩa wagegirie atũmwo ake mũno. Jesu aarutire nguo ciake cia igũrũ, akĩĩyoha taurũ njohero, agĩcoka agĩĩkĩra maĩ kĩraĩ-inĩ, na akĩambĩrĩria gũthambia atũmwo magũrũ. (Joh. 13:​4, 5) Kwahoteka nĩ ooire ihinda gũthambia magũrũ ma atũmwo othe 12, nginya ma Judasi ũrĩa ũngĩamũkunyanĩire. O na kũrĩ ũguo, Jesu arĩ na wĩnyihia nĩ aarutire wĩra ũcio. Jesu aacokire akĩmeera ũũ: “Hihi nĩ mwataũkĩrũo nĩ ũguo ndeka? Mũnjĩtaga ‘Mũrutani’ na ‘Mwathani,’ na mũtikoragwo mũhĩtĩtie, tondũ ũguo nĩguo ndariĩ. Kwoguo, angĩkorũo niĩ Mwathani na Mũrutani wanyu nĩ ndamũthambia magũrũ-rĩ, o na inyuĩ nĩ mwagĩrĩirũo gũthambanagia magũrũ.”—Joh. 13:​12-14. w25.03 10 ¶9-11

Andũ thĩinĩ wa thĩ no matũme ũkorũo ũrĩ ũndũ mũritũ harĩ ithuĩ gũtũũra hakuhĩ na Jehova. Andũ aingĩ matiĩtĩkĩtie atĩ nĩ kũrĩ Ngai. Kaingĩ andũ arĩa matarũmagĩrĩra wendi wa Ngai monekaga makĩgaacĩra. Ũndũ ũcio no ũgerie wĩtĩkio witũ. O na gũtuĩka nĩ twĩtĩkĩtie atĩ Ngai arĩ kuo, no twambĩrĩrie gwĩkĩrĩra nganja kana nĩ arĩtũteithagia. Kũrĩ hĩndĩ mwandĩki wa Thaburi ya 73 eekagĩrĩra nganja ũndũ ũcio. Nĩ oonaga andũ arĩa maamũthiũrũrũkĩirie makĩagarara mawatho ma Ngai, ĩndĩ no maakenagĩra ũtũũro. Nĩ ũndũ ũcio, akĩambĩrĩria kuona ta gũtungatĩra Ngai gũtarĩ ũguni. (Thab. 73:​11-13) Nĩ kĩĩ gĩateithirie mwandĩki ũcio wa Thaburi kũrũnga mwĩcirĩrie wake? Nĩ eecũranirie ũrĩa kũngĩathiire harĩ andũ arĩa matigaga kwĩhoka Jehova. (Thab. 73:​18, 19, 27) Ningĩ nĩ eecũranirie irathimo cia gũtungatĩra Jehova. O na ithuĩ no twĩcũranagie ũhoro wĩgiĩ irathimo iria Jehova atũheete. w24.06 25 ¶16-17

Mahinda-inĩ ma Bibilia, andũ amwe nĩ maahinyagĩrĩria arĩa maarĩ athĩni na njĩra ya kũmetia maciaro ma mbeca iria mamakombithĩtie. Ningĩ atuanĩri ciira amwe nĩ maamũkagĩra mahaki na makogomia ciira wa mũndũ ũtarĩ na mahĩtia. Jehova nĩ athũire mũno ciĩko ta icio. (Ezek. 22:12) Nĩ wega gũthuthuria mawoni maitũ megiĩ mbeca. No wĩyũrie ũũ: ‘Hihi kaingĩ nĩ ndĩkoraga ngĩciria ũhoro wĩgiĩ mbeca na kĩrĩa ingĩhota kũgũra? Ingĩkomba mbeca-rĩ, hihi nĩ hũthagĩrĩria kũrĩha ngĩciria atĩ mũndũ ũcio ũngombithĩtie ndaracibatara? Hihi gũkorũo na mbeca nĩ gũtũmaga ndĩyone ndĩ wa bata ĩndĩ ngaritũhĩrũo kuonania ũtaana? Hihi nĩ nyonaga ta aarĩ na ariũ a Ithe witũ mendete indo cia kĩĩmwĩrĩ atĩ tondũ tu nĩ atongu? Hihi nyendaga kũgĩa ũrata na andũ arĩa atongu no ngaga gũtindanĩra na arĩa athĩni?’ No tũtũũrie ũrata hamwe na Ngai na njĩra ya gwĩthema kwenda mbeca. Tweka ũguo, Jehova ndarĩ hĩndĩ agaatũtiganĩria. w24.06 12-13 ¶17-18

Kĩrĩa kĩngĩtũteithia kũregana na magerio nĩ gũkũria merirĩria marĩa magĩrĩire. Tũngĩĩruta ‘gũthũũra ũndũ ũrĩa mũũru, na twendage ũrĩa mwega,’ nĩ tũrĩkĩraga hinya itua ritũ rĩa gwĩka ũndũ ũrĩa wagĩrĩire. (Amos. 5:15) Ningĩ gũkorũo na merirĩria marĩa magĩrĩire no gũtũteithie kwĩhanda wega magerio mangĩtũkora. Tũbatiĩ kũrikĩra biũ maũndũ-inĩ ma kĩĩroho. Rĩrĩa tũrĩ mĩcemanio-inĩ ya Gĩkristiano kana ũtungata-inĩ, tũkoragwo tũgĩkĩra hinya itua ritũ rĩa gũkenia Jehova. (Mat. 28:​19, 20; Ahib. 10:​24, 25) Gũthoma na kwĩruta Kiugo kĩa Ngai na gwĩcũrania igũrũ rĩakĩo, nĩ gũtũteithagia kwenda o na makĩria ũndũ ũrĩa mwega na gũthũũra ũrĩa mũũru. (Josh. 1:8; Thab. 1:​2, 3; 119:97) Ningĩ ririkana ũndũ ũyũ Jesu eerire arutwo ake: “[Hoyagai] mũtegũtigithĩria nĩguo mũtikaingĩre magerio-inĩ.” (Mat. 26:41) Kwoguo, tũkoragwo tũkĩhe Jehova mweke wa gũtũteithia na tũgekĩra hinya itua ritũ rĩa kũmũkenia.—Jak. 4:8. w24.07 17-18 ¶14-16

Wĩrutanagĩrie kwĩgerekania na Jehova rĩrĩa ũramenyeria arĩa angĩ. Ririkana atĩ Jehova aheanaga ũũgĩ wake arĩ na ũtaana. Kwoguo o na ithuĩ twagĩrĩirũo gũkorũo twĩhaarĩirie kũgaĩra arĩa tũramenyeria ũmenyo na ũũgĩ ũrĩa twĩ naguo. Tũtiĩigagĩra maũndũ mamwe tũgĩĩtigĩra atĩ mũthia-inĩ mũndũ ũrĩa tũramenyeria ahota kwĩhokerũo wĩra ũrĩa twĩ naguo. Ningĩ nĩ twĩthemaga gũkorũo na muonere wa atĩ tondũ ithuĩ tũtiamenyeririo, o na ithuĩ tũtikũmenyeria arĩa angĩ. Andũ a Jehova matibatiĩ gũkorũo na mwerekera ta ũcio. Handũ ha ũguo, nĩ tũkenagĩra kũgaĩra arĩa angĩ ũũgĩ ũrĩa wothe twĩ naguo, na tũkehotora ‘kwĩheana’ biũ tũkĩmamenyeria. (1 Thes. 2:8) Na twĩrĩgagĩrĩra atĩ o nao nĩ “megũkorũo marĩ agĩrĩru biũ kũruta andũ arĩa angĩ.” (2 Tim. 2:​1, 2) O mũndũ angĩgayagĩra arĩa angĩ ũũgĩ ũrĩa arĩ naguo, ithuothe nĩ tũrĩongagĩrĩra ũũgĩ na tũgakorũo na gĩkeno makĩria. w24.09 29 ¶12-13

Angĩkorũo wonaga ta ũtarĩ na ũhoti wa mwanya, ndũgakue ngoro. Hatarĩ nganja wĩ na ngumo ũngĩhũthĩra gũteithia kĩũngano. No ũgunĩke ũngĩĩcũrania na njĩra ya mahoya ũrĩa Paulo aaugire thĩinĩ wa 1 Akorintho 12:12-30. Ciugo icio cia Paulo nĩ ironania atĩ o ta ndungata iria ingĩ cia Jehova, ũrĩ na itemi rĩa bata ũngĩhingia thĩinĩ wa kĩũngano. Wĩrutanĩrie ũrĩa wothe ũngĩhota gũtungatĩra Jehova na gũteithia aarĩ na ariũ a Ithe witũ. Korũo na ma atĩ athuri a kĩũngano nĩ marĩkwĩhokagĩra mawĩra kũringana na ũhoti waku. (Rom. 12:4-8) Akristiano othe nĩ mabatiĩ gũkuhĩrĩria Jehova, kũgĩa na gĩkeno kĩrĩa kiumanaga na kũheana, na gũtũũra kũringana na ithimi cia Jehova. w24.11 17 ¶12-13

Hana nĩ aahiũranagia na mathĩna matiganĩte maatũmaga aite maithori ma kĩeha. Thĩna ũmwe warĩ atĩ mũthuri wake aarĩ na mũtumia ũngĩ wetagwo Penina, na mũtumia ũcio nĩ aathũire Hana. Na gũthũkia mũno, Hana ndaarĩ na ciana no Penina aarĩ na ciana cigana ũna. (1 Sam. 1:​1, 2) Penina aaikaraga akĩnyũrũragia Hana tondũ ndaarĩ na ũhoti wa kũgĩa ciana. Hana aaiguaga akuĩte ngoro “nginya akarĩra na akaga kũrĩa irio,” na agakorũo na “marũrũ maingĩ mũno” ngoro-inĩ. (1 Sam. 1:​6, 7, 10) Nĩ kĩĩ kĩomĩrĩirie Hana? Ũndũ ũmwe wamũteithirie nĩ gũthiaga gũthathaiya Jehova gĩikaro-inĩ kĩrĩa kĩamũre. Mũthenya ũmwe arĩ kũu, aathaithire Jehova akĩmwĩra: ‘Rora thĩna ũyũ wa ndungata yaku na ũndirikane.’ (1 Sam. 1:11) Jehova nĩ oonire mĩtangĩko yake, akĩigua kĩrĩro gĩake, na thutha-inĩ akĩmũrathima na njĩra ya kũmũhotithia kũgĩa ciana.—1 Sam. 1:​19, 20; 2:21. w24.12 21 ¶5-7

Ũkũũri nĩ ũtũrutaga atĩ Jesu nĩ arũmbũyagia andũ mũno, makĩria arutwo ake. (Joh. 13:1) Kwa ngerekano, Jesu nĩ aamenyaga atĩ maũndũ mamwe aabataraga gwĩka arĩ gũkũ thĩ matingĩarĩ mahũthũ, ta ũhoro wĩgiĩ gũkua gĩkuũ kĩa ruo. No nĩ aahingirie maũndũ macio mothe eyendeire, ti tondũ tu nĩ aathĩtwo ameke. Jesu nĩ eeheanire na ngoro yothe wĩra-inĩ wa kũhunjia, kũrutana, na gũtungatĩra arĩa angĩ. O na mũthenya wa mũico atanoragwo, nĩ aathambirie atũmwo ake magũrũ, akĩmomĩrĩria, na akĩmaruta maũndũ maingĩ. (Joh. 13:​12-15) Na rĩrĩa aacuurĩtio mũtĩ-inĩ, nĩ aaheire mwĩki-naĩ ũrĩa wacuurĩtio hakuhĩ nake mwĩhoko na akĩbanga ũrĩa nyina angĩarũmbũyirio. (Luk. 23:​42, 43; Joh. 19:​26, 27) Kwoguo kũgerera gĩkuũ gĩake na maũndũ marĩa eekire arĩ gũkũ thĩ, Jesu nĩ oonanirie atĩ nĩ endete andũ mũno. w25.01 23 ¶11

Bibilia nĩ ĩhũthĩrĩte ngerekano ĩtũteithagia gũtaũkĩrũo nĩ wĩyathi ũrĩa tũgĩaga naguo thutha wa kuoherũo nĩ Jehova. Ĩtwĩtaga “ngombo cia mehia” nĩ ũndũ wa mwerekera witũ wa kwaga gũkinyanĩra. No nĩ ũndũ wa wohanĩri wa Jehova, rĩu tũtariĩ o ta ngombo ‘ikũũrĩtwo kuuma mehia-inĩ.’ (Rom. 6:​17, 18; Kũg. 1:5) Kwoguo rĩrĩa Jehova atuohera, tũiguaga tũkenete o ta mũndũ ũkũũrĩtwo kuuma ũkombo-inĩ. Nĩ ũndũ wa igongona rĩa ũkũũri rĩrĩa Jehova aaheanire kũgerera harĩ Mũrũwe, nĩ tũhonagio na njĩra ya mũhaano. (1 Pet. 2:24) Rĩrĩa twarwara kĩĩroho, ũkũũri nĩ ũtũhotithagia gũcokia ũrata mwega hamwe na Jehova. O ta ũrĩa mũndũ aiguaga arĩ na gĩkeno kĩnene nĩ ũndũ wa kũhona mũrimũ mũũru, no taguo tũiguaga tũkenete nĩ ũndũ wa kũhonio kĩĩroho na gũcokia ũrata hamwe na Jehova thutha wake gũtuohera. w25.02 11 ¶16-17

Thĩinĩ wa ngerekano ya taranda, Jesu nĩ aataarĩirie ũhoro wa ngombo igĩrĩ iria ciarĩ njĩhokeku harĩ mwathi wacio, na ĩngĩ ĩmwe ĩtaarĩ njĩhokeku. (Mat. 25:​14-30) Ngombo iria igĩrĩ njĩhokeku irũgamagĩrĩra Akristiano aitĩrĩrie maguta arĩa ehokeku. Mwathi wao Jesu nĩ amanyitaga ũgeni ‘maingĩre gĩkeno-inĩ kĩa mwathi wao.’ Nĩ mamũkagĩra ngerenwa yao kũrĩa igũrũ kũgerera ũriũkio wa mbere. (Mat. 25:​21, 23; Kũg. 20:5b) No kĩonereria kĩũru kĩa ngombo ĩrĩa ngũũta gĩkoragwo kĩrĩ mũkaana harĩ arĩa aitĩrĩrie maguta. Na njĩra ĩrĩkũ? No mũhaka makoragwo na kĩyo. O ta ngerekano-inĩ ya airĩtu ikũmi, o na ngerekano-inĩ ya taranda Jesu ndoonanagia atĩ arĩa aitĩrĩrie maguta nĩ mangĩgaatuĩka igũũta. Handũ ha ũguo, oonanagia ũrĩa kũngĩgaathiĩ mangĩakorirũo matarĩ na kĩyo. Nĩ mangĩagire ‘gwĩkĩra hinya gwĩtwo o na gũthuurũo kwao,’ na mage gwĩtĩkĩrio kũingĩra Ũthamaki-inĩ wa igũrũ. w24.09 22 ¶10; 23 ¶12-13

Gũtirĩ mũndũ ũtendaga gũkorũo na wĩra ũramũhotithia kũhingia mabataro make na ma famĩlĩ yake. (Koh. 7:12; 1 Tim. 5:8) Rĩrĩa tũratua kana nĩ tũgwĩtĩkĩra wĩra mũna, hatarĩ nganja nĩ twĩciragia ũhoro wa mũcara ũrĩa tũrĩrĩhagwo. No angĩkorũo ũndũ ũcio noguo tu twĩciragia ũhoro waguo, tũngĩkorũo tũgĩthiĩ na kuona. Angĩkorũo nĩ tũthiaga na wĩtĩkio, ũndũ ũngĩ tũngĩciria ũhoro waguo nĩ ũrĩa wĩra ũcio ũkũhutia ũrata witũ na Jehova. No twĩyũrie ũũ: ‘Hihi wĩra ũcio nĩ ũgũtũma ndĩingĩranie na maũndũ marĩa Jehova athũire?’ (Thim. 6:​16-19) ‘Hihi nĩ ũkũingĩrĩra ũthathaiya wakwa na hihi ũtũme ndaihanagĩrĩrie na famĩlĩ yakwa kwa ihinda iraihu?’ Angĩkorũo macokio ma ciũria icio nĩ ĩĩ, no ũkorũo ũtarĩ ũndũ wa ũũgĩ gwĩtĩkĩra wĩra ũcio, o na angĩkorũo ti ũndũ mũhũthũ kuona wĩra. Gũthiaga na wĩtĩkio nĩ kũrĩtũmaga tũtue matua maronania tũrĩ na ma atĩ Jehova nĩ arĩtũhingagĩria mabataro maitũ.—Mat. 6:33; Ahib. 13:5. w25.03 21 ¶5-6

Hingo ciothe twagĩrĩirũo kwĩrutanĩria kuona aarĩ na ariũ a Ithe witũ ta ũrĩa Jehova amonaga. Twĩkaga ũguo na njĩra ya kũrora ngumo ciao njega handũ ha mawathe mao, tondũ mũthia-inĩ mawathe macio nĩ magaathira. Rĩrĩa twaga kũiguithania, no tũcokie thayũ na njĩra ya wendo. Tweka ũguo, paradiso itũ ya kĩĩroho nĩ ĩrĩgucagĩrĩria andũ arĩa mangĩenda kũrũmbũiyo na njĩra ta ĩyo. Rekei tũtũũre tuonanagia ngatho nĩ ũndũ wa paradiso ĩyo Jehova atũthondekeire. Mũndũ wothe ũngĩenda gũcanjamũrũo, kũigua aiganĩire, ahooreire, na arĩ na ũgitĩri, no mũhaka oke thĩinĩ wa paradiso itũ ya kĩĩroho na ndakanaume thĩinĩ wayo. No nĩ tũbatiĩ kwĩmenyerera, tondũ Shaitani nĩ arĩgeragia gũtũhĩtithia nĩguo tuume thĩinĩ wayo. (1 Pet. 5:8; Kũg. 12:9) Ndũkanareke agũtoorie. Rekei twĩrutanĩrie biũ kũgitĩra paradiso itũ ya kĩĩroho nĩguo ĩikare ĩrĩ thaka, ĩrĩ theru, na ĩiyũire thayũ. w24.04 24-25 ¶18-19

Aciari, no mũteithie ciana cianyu gũkorũo na kĩyo ũthathaiya-inĩ wa Jehova. Ruta mwana waku kũgerera ciugo na ciĩko ciaku atĩ maũndũ ma kĩĩroho ta gũthoma Bibilia, gũthiĩ mĩcemanio, na kũhunjia, nĩmo maũndũ marĩa abatiĩ kũiga mbere ya marĩa mangĩ mothe. Ũngĩaga gwĩka ũguo, mwana waku ahota gwĩciria atĩ abatiĩ gũtuĩka Mũira wa Jehova tondũ tu ĩyo nĩyo ndini ya aciari ake. Ũndũ ũcio no ũtũme age kũiga ũthathaiya wa ma mbere ũtũũro-inĩ wake kana o na aũtiganĩrie biũ. Ĩ nake mũndũ ũtigĩte gũtungatĩra Jehova? Hihi no tuuge atĩ ndarĩ na mwĩhoko? Aca, tondũ no erire na acokerere Jehova. Na nĩgetha ahote gwĩka ũguo, no abatare gũkorũo na wĩnyihia na etĩkĩre ũteithio wa athuri a kĩũngano. (Jak. 5:14) Angĩririkana atĩ maumĩrĩro ma kĩyo gĩake nĩ gũcokia ũrata hamwe na Jehova, ndangĩritũhĩrũo gwĩka ũguo. w24.07 25 ¶18-19

Mũngĩka atĩa nĩguo mũikare mũrĩ atheru kĩĩmĩtugo hĩndĩ ĩrĩa mũramenyana na ũrĩa mũtumĩte ndũgũ nake? O ũrĩa wendo wanyu ũrakũra, noguo mũrĩgucanagĩrĩria makĩria. Nĩ kĩĩ kĩngĩmũteithia gũikara mũrĩ atheru kĩĩmĩtugo? Mwagĩrĩirũo gwĩthema kwarĩrĩria maũndũ ma waganu, gũkorũo handũ mũrĩ oiki, na kũnyua njohi gũkĩria gĩthimi. (Ef. 5:3) Maũndũ macio no marahũre merirĩria ma ngomanio na matũme ũkorũo ũrĩ ũndũ mũritũ harĩ inyuĩ gwĩka ũndũ ũrĩa wagĩrĩire. No ũkorũo ũrĩ ũndũ wa ũũgĩ kwaragĩrĩria kaingĩ maũndũ marĩa mũngĩka nĩguo mũikare mũrĩ atheru kĩĩmĩtugo. (Thim. 22:3) Njĩra imwe cia kuonania wendo no ikorũo ciagĩrĩire o ũrĩa ndũgũ yanyu ĩrathiĩ ĩkũrĩte. No angĩkorũo nĩ mũreka maũndũ mararahũra merirĩria manyu ma ngomanio, ũndũ ũcio no ũtũme mũremwo gũtua matua marĩa magĩrĩire. (Rwĩm. 1:2; 2:6) Ningĩ njĩra imwe cia kuonania wendo no itũme mũremwo kwĩgirĩrĩria na mwĩingĩrie mĩtugo-inĩ ya ũũra-thoni. (Thim. 6:27) Kwoguo mũkĩambĩrĩria ndũgũ yanyu, nĩ wega kwarĩrĩria mĩhaka ĩrĩa mũkwĩigĩra ĩrĩa ĩratwarana na motaaro ma Bibilia.—1 Thes. 4:​3-7. w24.05 29 ¶10-11

Tũngĩenda gũkoragwo tũrĩ andũ mangĩhokwo nĩ arĩa angĩ, makĩria rĩrĩa maragerera moritũ. (Thim. 17:17) Tũngĩka atĩa nĩguo tũkorũo tũrĩ andũ mangĩhokeka? No twĩrutanĩrie kuonanagia ngumo ta cia Jehova mahinda mothe, na njĩra ya gwĩka maũndũ ta kũhingia ũrĩa twĩranĩire na kwĩrutanĩria kũigaga mahinda. Athuri a kĩũngano nĩ magunaga aarĩ na ariũ a Ithe witũ nĩ ũndũ wa gũkorũo marĩ andũ mangĩhokeka. Na njĩra ĩrĩkũ? Angĩkorũo mũthuri wa kĩũngano, ta hihi mũrori wa gĩkundi, nĩ akinyĩrĩkaga na ihenya, aarĩ na ariũ a Ithe witũ matitangĩkaga tondũ nĩ mamenyaga no mone ũteithio hĩndĩ o yothe. Ningĩ ahunjia nĩ maiguaga mendetwo rĩrĩa mamenya atĩ athuri a kĩũngano nĩ mehaarĩirie kũmateithia. Na rĩrĩa athuri a kĩũngano maheana ũtaaro uumanĩte na Maandĩko na mabuku ma ngombo ĩrĩa njĩhokeku handũ ha mawoni mao, nĩ mehokagwo nĩ Akristiano arĩa angĩ. Makĩria ma ũguo, aarĩ na ariũ a Ithe witũ nĩ mehokaga athuri arĩa matatheremagia ndeto cia thiri iria merĩtwo na arĩa mahingagia ũrĩa meranĩire. w24.06 29-30 ¶14-15

Ũmũthĩ ũyũ tũtingĩrĩgĩrĩra Jehova atwehererie mathĩna maitũ mothe, ĩndĩ no twĩrĩgĩrĩre atĩ hingo ciothe nĩ arĩtũteithagia. (Thab. 41:3) Kũgerera roho wake mũtheru, Jehova nĩ arĩtũheaga hinya, ũũgĩ, na thayũ wa meciria nĩguo tũkahota gũkirĩrĩria. (Thim. 18:14; Afil. 4:13) Ningĩ nĩ atũũmagĩrĩria kũgerera kĩĩrĩgĩrĩro gitũ kĩa ihinda rĩũkĩte, rĩrĩa akaaniina mĩrimũ yothe. (Isa. 33:24) Jehova nĩ aandĩkithirie ciugo cia gũtũhooreria iria ingĩtũũmĩrĩria rĩrĩa tũrahiũrania na ũndũ mũritũ. (Rom. 15:4) Thutha wa mwarĩ wa Ithe witũ ũmwe kuuma Afrika ya Ithũĩro kwĩrũo atĩ arĩ na kansa, nĩ ekoraga akĩrĩra kaingĩ. Aaugire ũũ: “Rĩandĩko rĩmwe rĩnyũmagĩrĩria mũno nĩ Isaia 26:3. . . . Mũhari ũcio nĩ ũnyonagia atĩ Jehova no atũteithie kũigua tũhooreire na atũteithie gũkirĩrĩria igerio o rĩothe.” Hihi harĩ rĩandĩko ũiguaga rĩgĩkũhooreria rĩrĩa ũrahiũrania na ũndũ mũritũ kana rĩrĩa ũrona ta gũtarĩ na mwĩhoko? w24.12 24 ¶17-18

Athuri a kĩũngano nĩ merutanagĩria gũkorũo na mwerekera wa wohanĩri kwerekera arĩa meheretio kĩũngano-inĩ. Nĩ mendaga mũno andũ acio macokerere Jehova. (Luk. 15:​22-24, 32) Na rĩrĩa mũndũ acoka kĩũngano-inĩ, nĩ kũgĩaga gĩkeno kĩnene kũrĩa igũrũ o na gũkũ thĩ. (Luk. 15:7) Jehova ndetĩkagĩria mũndũ ũregete kwĩrira athiĩ na mbere gũikara kĩũngano-inĩ. O na kũrĩ ũguo, nĩ ageragia gũteithia mũndũ ta ũcio nĩguo amũcokerere. Hosea 14:4 nĩ yonanagia ũrĩa Jehova aiguaga rĩrĩa andũ arĩa mehĩtie merira. Yugaga ũũ: “Nĩ ngaamahonia na matigaacoka gũkorũo matarĩ ehokeku rĩngĩ. Nĩ ngaamenda ndĩyendeire, tondũ marakara makwa nĩ [meherete].” Na githĩ ũndũ ũcio ndũrekĩra athuri a kĩũngano ngoro kũroraga ũndũ o wothe ũronania atĩ mũndũ nĩ ambĩtie kwĩrira? Ningĩ nĩ ũrekĩra ngoro mũndũ ũtigĩte Jehova amũcokerere atekũmaĩrĩria. w24.08 28 ¶8-9

Rĩmwe andũ no mage gũtũcokeria ngatho. Kũrĩ hĩndĩ tũngĩhũthĩra mahinda, hinya, kana indo citũ gũteithia arĩa angĩ, no tuone ta matanatindanĩra na kĩyo gitũ. Kũngĩthiĩ ũguo-rĩ, tũngĩĩthema atĩa gũkua ngoro kana kũũrũo nĩ gĩkeno? Ririkanaga atĩ gĩkeno gitũ rĩrĩa tũraheana gĩtiĩhocagia harĩ ũrĩa arĩa angĩ mekũiyũkia ũtaana witũ. (Atũm. 20:35) No tũhote kũheanaga tũkenete o na tũngĩona ta arĩa angĩ mataronania ngatho. Nĩ kĩĩ kĩngĩtũteithia gwĩka ũguo? Ririkanaga atĩ rĩrĩa ũraheana ũkoragwo ũkĩĩgerekania na Jehova. Aheaga andũ indo njega gũtekũmakania kana marĩ na ngatho kana matirĩ. (Mat. 5:​43-48) Jehova atwĩrĩire atĩ rĩrĩa o na ithuĩ twaheana ‘tũtegũtanya kũrĩhwo, kĩheo gitũ kĩrĩkoragwo kĩrĩ kĩnene.’ (Luk. 6:35) Kiugo “kũrĩhwo” mũhari-inĩ ũcio kĩronania ũndũ o wothe tũngĩĩrĩgĩrĩra rĩrĩa twaheana, nginya gũcokerio ngatho. Kwoguo gũtekũmakania kana mũndũ nĩ egũtũcokeria ngatho kana ndegũtũcokeria, Jehova nĩ arĩtũrathimaga nĩ ũndũ wa maũndũ mega marĩa twĩkagĩra arĩa angĩ, na nĩ ũndũ wa gũkorũo tũrĩ ‘andũ maheanaga makenete.’—Thim. 19:17; 2 Kor. 9:7. w24.09 29 ¶14-16