Ũhoro Mwega Ũrĩa Waandĩkirũo nĩ Luka 13:1-35

  • Mwĩrirei kana mũniinwo (1-5)

  • Ngerekano ya mũkũyũ ũrĩa ũtaaciaraga (6-9)

  • Mũtumia warĩ muonju kũhonio mũthenya wa Thabatũ (10-17)

  • Ngerekano ya mbegũ ya karatarĩ na ndawa ya kũimbia (18-21)

  • Kĩyo nĩ kĩbataranagia harĩ gũtonyera mũromo ũrĩa mũceke (22-30)

  • Herode, “mbwe ĩyo” (31-33)

  • Jesu gũcakaĩra Jerusalemu (34, 35)

13  O hĩndĩ ĩyo andũ amwe arĩa maarĩ hau nĩ maamũheire ũhoro wa Agalili arĩa Pilato aatukanirie thakame yao na magongona mao. 2  Nake akĩmacokeria akĩmoria atĩrĩ: “Mũgwĩciria atĩ Agalili acio maarĩ ehia gũkĩra Agalili arĩa angĩ othe nĩ ũndũ nĩ maanyaririrũo na maũndũ macio? 3  Ngũmwĩra atĩrĩ, tiguo kũrĩ; ĩndĩ mũngĩaga kwĩrira, o na inyuĩ inyuothe mũkaaniinwo o tao.+ 4  Kana arĩa 18 maagwĩrĩirũo nĩ nyũmba ndaya na igũrũ Siloamu, na ĩkĩmoraga-rĩ, mũgwĩciria atĩ maarĩ na mehia maingĩ gũkĩra andũ arĩa angĩ othe maikaraga Jerusalemu? 5  Ngũmwĩra atĩrĩ, tiguo kũrĩ; ĩndĩ mũngĩaga kwĩrira, o na inyuĩ inyuothe mũkaaniinwo o tao.” 6  Agĩcoka akĩmahe ngerekano ĩno: “Mũndũ ũmwe aarĩ na mũkũyũ wahandĩtwo mũgũnda-inĩ wake wa mĩthabibũ, na agĩthiĩ gũcaria maciaro harĩ guo no ndaakorire kĩndũ o nakĩ.+ 7  Agĩcoka akĩra mũruti wĩra mũgũnda-inĩ ũcio wa mĩthabibũ atĩrĩ, ‘Rĩu nĩ mĩaka ĩtatũ ngoretwo ngĩũka gũcaria maciaro mũkũyũ-inĩ ũyũ, no ndikoraga kĩndũ o nakĩ. Ũteme! Ũragĩte mũgũnda nĩkĩ?’ 8  Nake akĩmũcokeria akĩmwĩra, ‘Mwathi wakwa, reke ũikare mwaka ũngĩ ũmwe nginya nyambe ndĩũrĩmĩre na ndĩwĩkĩre thumu. 9  Ũngĩkaagĩa na maciaro thutha-inĩ, nĩ wega; no ũngĩkaaga gũciara, hĩndĩ ĩyo no ũũteme.’”+ 10  Hĩndĩ ĩmwe nĩ kũrutana aarutanaga thĩinĩ wa thunagogi ĩmwe mũthenya wa Thabatũ. 11  Na rĩrĩ, kũu nĩ kwarĩ na mũtumia ũmwe warĩ na roho watũmĩte akorũo na wathe* mĩaka 18; na aakoragwo eyunĩte na ndangĩahotire kũrũgama ehandĩte o na hanini. 12  Rĩrĩa Jesu aamuonire, akĩmwarĩria akĩmwĩra atĩrĩ: “Mũtumia ũyũ, nĩ wohorũo kuuma harĩ wathe waku.”+ 13  Na akĩigĩrĩra mũtumia ũcio moko, na o hĩndĩ ĩyo akĩrũngara na akĩambĩrĩria kũgooca Ngai. 14  No mũrũgamĩrĩri wa thunagogi, akĩrakara nĩ ũndũ wa Jesu kũhonania mũthenya wa Thabatũ, akĩra kĩrĩndĩ atĩrĩ: “Wĩra wagĩrĩirũo kũrutwo thikũ ithathatũ;+ kwoguo ũkagai thikũ icio nĩguo mũhonio, no ti mũthenya wa Thabatũ.”+ 15  O na kũrĩ ũguo, Mwathani akĩmũcokeria: “Hinga ici,+ githĩ o ũmwe wanyu ndohoraga ndegwa kana ndigiri yake kuuma kiugũ mũthenya wa Thabatũ akamĩtwara akamĩhe maĩ?+ 16  Kaĩ gũtekwagĩrĩire mũtumia ũyũ, mwarĩ wa Iburahimu o we Shaitani atũũrĩte ohete mĩaka 18, ohorũo kĩoho-inĩ gĩkĩ mũthenya wa Thabatũ?” 17  Rĩrĩa ooigire maũndũ macio-rĩ, arĩa othe maamũkararagia magĩconoka, ĩndĩ kĩrĩndĩ gĩothe gĩkĩambĩrĩria gũkena nĩ ũndũ wa maũndũ marĩa mothe manene eekire.+ 18  Nĩ ũndũ ũcio agĩthiĩ na mbere kuuga: “Ũthamaki wa Ngai ũtariĩ ta kĩĩ, na ingĩũringithania na kĩĩ? 19  Ũtariĩ ta mbegũ ya karatarĩ* ĩrĩa mũndũ ũmwe ooire akĩhanda mũgũnda wake, na ĩgĩkũra ĩgĩtuĩka mũtĩ, nacio nyoni cia rĩera-inĩ* igĩaka itara honge-inĩ ciaguo.”+ 20  O rĩngĩ akiuga: “Ingĩringithania Ũthamaki wa Ngai na kĩĩ? 21  Ũtariĩ ta ndawa ya kũimbia ĩrĩa mũtumia ũmwe ooire na agĩtukania na mũtu ithimi* ithatũ nene nginya mũtu ũcio wothe ũkĩimba.”+ 22  Na agĩthiĩ kuuma itũũra rĩmwe nginya rĩrĩa rĩngĩ na kuuma gĩcagi kĩmwe nginya kĩrĩa kĩngĩ, akĩrutanaga arĩ rũgendo-inĩ rwake rwa gũthiĩ Jerusalemu. 23  Na rĩrĩ, mũndũ ũmwe akĩmwĩra atĩrĩ: “Mwathani, kaĩ arĩa makaahonokio arĩ anini?” Nake akĩmeera: 24  “Giginyanai mũno nĩguo mũtonyere mũromo ũrĩa mũceke,+ tondũ ngũmwĩra atĩrĩ, aingĩ nĩ makaageria gũtonya, no matikahota. 25  Rĩrĩa mwene nyũmba agookĩra ahinge mũrango, inyuĩ mũkaarũgama nja mũkĩringaringa mũrango, mũkiugaga, ‘Mwathani, tũhingũrĩre.’+ No we akaamũcokeria amwĩre ũũ: ‘Niĩ ndiũĩ kũrĩa muumĩte.’ 26  Hĩndĩ ĩyo mũkaambĩrĩria kuuga atĩrĩ, ‘Twarĩaga na tũkanyua hamwe nawe, na nĩ warutanaga barabara-inĩ iria nene cia gwitũ.’+ 27  No we nĩ akaamwĩra atĩrĩ, ‘Niĩ ndiũĩ kũrĩa muumĩte. Njehererai inyuothe mwĩkaga maũndũ matarĩ ma ũthingu!’ 28  Kũu nĩkuo mũkaarĩragĩra na mũkahagarania magego, rĩrĩa mũkoona Iburahimu, Isaaka, Jakubu, na anabii othe Ũthamaki-inĩ wa Ngai, no inyuĩ ene mũikĩtio nja.+ 29  Ningĩ, andũ nĩ magooka kuuma mwena wa irathĩro na wa ithũĩro na wa rũgongo na wa mũhuro, na maikare thĩ metha-inĩ thĩinĩ wa Ũthamaki wa Ngai. 30  Na rĩrĩ, nĩ harĩ a thutha magaatuĩka a mbere, na nĩ harĩ a mbere magaatuĩka a thutha.”+ 31  Ithaa-inĩ o rĩu, Afarisai amwe magĩthiĩ harĩ we makĩmwĩra atĩrĩ: “Uma gũkũ wĩthiĩre, tondũ Herode nĩ arenda gũkũũraga.” 32  Nake akĩmeera: “Thiĩi mwĩre mbwe ĩyo atĩrĩ, ‘Ngũingata ndaimono na honie andũ ũmũthĩ na rũciũ, na mũthenya wa gatatũ nĩ ngaakorũo ndĩkĩtie.’ 33  O na kũrĩ ũguo, no mũhaka thiĩ na mbere ũmũthĩ na rũciũ na mũthenya ũcio ũngĩ, tondũ gũtingĩtuĩka* atĩ mũnabii no oragĩrũo nja ya Jerusalemu.+ 34  Jerusalemu, Jerusalemu, wee ũũragaga anabii na ũkahũũra na mahiga arĩa matũmagwo kũrĩ wee+—nĩ maita maigana ndanenda gũcokanĩrĩria ciana ciaku o ta ũrĩa ngũkũ ĩcokanagĩrĩria tũcui twayo rungu rwa mathagu mayo! No wee ndũigana kwenda ũndũ ũcio.+ 35  Atĩrĩrĩ, nyũmba yanyu nĩ ĩtiganĩirio.+ Ngũmwĩra atĩrĩ, mũtikanyona rĩngĩ o nginya rĩrĩa mũkoiga: ‘Kũrathimwo nĩ ũrĩa ũroka na rĩĩtwa rĩa Jehova!’”*+

Tũũhoro twa magũrũ-inĩ

^ Kana “roho wa wonje.”
^ Nĩ kabegũ kanini mũno konekaga mwena wa Palestina. No gakũre gatuĩke mũtĩ ũrĩ na ũraihu wa mita ta inya ũrĩ na honge.
^ Kana “nyoni cia igũrũ.”
^ Ũkk., “ithimi cia sea.” Sea ĩmwe yaiganaine na lita 7.33. Rora Ũhoro Muongerere B14.
^ Kana “gũtingĩhoteka.”

Kũgĩtĩra ihooto cia ibuku rĩrĩ