SUHETO ITI AKKUB | INTERESADO KADI TI DIOS KENKA?
Bambantayannaka ti Dios
“Ta dagiti matana [ti Dios] addada kadagiti dalan ti tao, ket amin dagiti addangna makitana.” —JOB 34:21.
NO APAY NGA AGDUADUA TI DADDUMA: Sigun iti nabiit pay a panagadal, adda agarup 100 a bilion a planeta iti galaksitayo. Gapu ta naglawa ti uniberso, adu ti mangisaludsod, ‘Apay koma a maseknan ti mannakabalin-amin a Namarsua iti ar-aramid dagiti nanumo a tattao iti nagbassit a planeta?’
NO ANIA TI ISURSURO TI SAO TI DIOS: Saan a basta inted ti Dios ti Biblia kadatayo sa kalpasanna binaybay-annatayon. Imbes ketdi, ipasigurado kadatayo ni Jehova: “Mangipaayakto iti balakad a ti matak situturong kenka.”—Salmo 32:8.
Alaentay a pagarigan ti Egipcio a babai a ni Agar idi maika-20 a siglo B.C.E. Inumsi ni Sarai ti adipenna a ni Agar ta awan panagraemna kenkuana. Gapuna, nagtalaw ni Agar a napan idiay let-ang. Saan kadin a maseknan ti Dios ken Agar gapu ta nagbasol? Kuna ti Biblia: “Isu nasarakan ti anghel ni Jehova.” Impasigurado ti anghel ken ni Agar: “Ni Jehova nangngegna ti rigatmo.” Kinuna ngarud ni Agar ken ni Jehova: “Maysaka a Dios ti panagkita.”—Genesis 16:4-13.
Sipsiputannaka met “ti Dios ti panagkita.” Kas pagarigan: Sipsiputan ti naayat nga ina ti ubbing pay nga annakna, gapu ta ad-adda a kasapulanda ti nadungngo a panangaywan ti nagannak. Kasta met, nangnangruna a bantayannatayo ti Dios no marigrigatan ken nakapuytayo. Kuna ni Jehova: “Iti nangato ken iti nasantuan a disso isu ti pagtaengak, kasta met iti daydiay nailupitlupit ken napakumbaba ti espirituna, tapno paungarek ti espiritu dagidiay napakumbaba ken tapno paungarek ti puso dagidiay mailupitlupit.”—Isaias 57:15.
Ngem mabalin a mapanunotmo: ‘Kasano a bambantayannak ti Dios? Uk-ukomennak kadi maibatay iti itsurak, wenno kitkitaenna ti kaunggak ken talaga nga am-ammonak?’