Kayat ti Dios ti Makisinninged Kenka
SUHETO ITI AKKUB | INTERESADO KADI TI DIOS KENKA?
“Awan ti tao a makaumay kaniak malaksid no ti Ama, a nangibaon kaniak, ti mangyasideg kenkuana.”—JUAN 6:44.
NO APAY NGA AGDUADUA TI DADDUMA: Kaaduan a mamati iti Dios mariknada nga adayoda kenkuana. “Imbilangko laeng ti Dios kas nangaramid iti amin a bambanag,” inamin ni Christina a taga-Ireland a linawas a makimisa. “Ngem diak am-ammo ti Dios. Diak pulos narikna a nasingedak kenkuana.”
NO ANIA TI ISURSURO TI SAO TI DIOS: Kanayon a tulongannatayo ni Jehova uray no kasla awanen ti namnamatayo. Kastoy ti panangiladawan ni Jesus iti pannakaseknan ti Dios kadatayo: “No ti maysa a tao addaan sangagasut a karnero ket maysa kadakuada ti maiwawa, saannanto aya a panawan ti siam a pulo ket siam iti bambantay ket mapanna biroken daydiay maiwawwawa?” Ti leksion? “Kasta met a di matarigagayan a banag ken ni Amak nga adda sadi langit a mapukaw ti maysa kadagitoy a babassit.”—Mateo 18:12-14.
Napateg iti Dios ti tunggal “maysa kadagitoy a babassit.” Kasano a ‘biroken ti Dios daydiay naiwawa’? Sigun iti teksto iti rugi daytoy nga artikulo, iyasideg ni Jehova dagiti tattao kenkuana.
Siasino ita ti sumarsarungkar kadagiti tattao iti pagtaenganda ken kadagiti publiko a lugar tapno mangiranud iti mensahe ti Biblia maipapan iti Dios?
Usigem no ania ti inaramid ti Dios tapno mayasideg kenkuana dagiti napasnek a tattao. Idi umuna a siglo C.E., imbaon ti Dios ti Kristiano nga adalan a ni Felipe a mangilawlawag iti kaipapanan ti padto iti Biblia a basbasaen ti Etiope nga opisial. (Aramid 8:26-39) Idi agangay, binilin ti Dios ni apostol Pedro a mapan iti pagtaengan ni Cornelio, maysa nga opisial a Romano nga agkarkararag ken mangikagkagumaan nga agdayaw iti Dios. (Aramid 10:1-48) Indalan met ti Dios ni apostol Pablo ken dagiti kakaduana iti maysa a karayan iti ruar ti siudad ti Filipos. Naam-ammoda sadiay ti “managdaydayaw iti Dios” nga agnagan iti Lidia, ket ‘ti pusona linuktan ni Jehova tapno agimdeng.’—Aramid 16:9-15.
Iti tunggal situasion, sinigurado ni Jehova a dagidiay mangbirbirok Kenkuana, adda gundawayda a mangam-ammo Kenkuana. Siasino ita ti sumarsarungkar kadagiti tattao iti pagtaenganda ken kadagiti publiko a lugar tapno mangiranud iti mensahe ti Biblia maipapan iti Dios? Adu ti mangibaga a dagiti “Saksi ni Jehova.” Isaludsodmo iti bagim, ‘Isuda ngata ti us-usaren ti Dios tapno agbalinak a nasinged kenkuana?’ Paregtaendaka nga ikararagmo iti Dios tapno tulongannaka a suminged kenkuana. *
^ par. 8 Para iti kanayonan nga impormasion, buyaem ti video nga Apay nga Adalem ti Biblia? iti www.jw.org/ilo.
Baka Kayatmo Met ti
MAIPAPAN KADAKAMI
Apay nga Adalem ti Biblia?
Mangipapaay ti Biblia iti sungbat kadagiti napapateg a saludsod ti minilion a tattao iti intero a lubong. Kayatmo met kadi a masungbatan ti saludsodmo?
