Salsaludsod Dagiti Agbasbasa

Apay a dagiti Saksi ni Jehova matmatanda a literal, saan a simboliko, ti bilang a 144,000 a nadakamat iti libro nga Apocalipsis?

Insurat ni apostol Juan: “Nangngegko ti bilang dagidiay naselioan, sangagasut uppat a pulo ket uppat a ribu.” (Apocalipsis 7:4) Iti Biblia, ti sasao a “dagidiay naselioan” tukoyenna ti maysa a grupo dagiti indibidual a napili manipud iti sangatauan tapno makipagturay ken ni Kristo idiay langit ket iturayanda ti Paraiso a daga iti masanguanan. (2 Corinto 1:21, 22; Apocalipsis 5:9, 10; 20:6) Adda sumagmamano a rason no apay a mamatmatan a literal ti bilangda a 144,000. Ti maysa ket naibatay iti mismo a konteksto ti Apocalipsis 7:4.

Kalpasan a nasirmata ni Juan daytoy a grupo ti 144,000 nga indibidual, naipakita kenkuana ti sabali a grupo. Dineskribir ni Juan daytoy maikadua a grupo kas “maysa a dakkel a bunggoy, nga awan ti tao a nakabael a mangbilang, manipud kadagiti amin a nasion ken kadagiti tribu ken kadagiti ili ken kadagiti pagsasao.” Daytoy a dakkel a bunggoy tuktukoyenna dagidiay makalasatto iti um-umayen a “dakkel a rigat,” a mangdadael iti agdama a dakes a lubong.​—Apocalipsis 7:9, 14.

Ngem imutektekanyo ti intampok ni Juan a panagduma ti bersikulo 4 ken 9 iti Apocalipsis kapitulo 7. Kunana a ti umuna a grupo, “dagidiay naselioan,” adda espesipiko a bilangda. Ngem saan a kasta ti maikadua a grupo, ti “dakkel a bunggoy.” Gapuna, lohikal a matmatan a literal ti bilang a 144,000. No ti numero a 144,000 ket simboliko ken tuktukoyenna ti maysa a grupo a di masierto ti bilangna, awan serserbina a napagdilig dayta a dua a grupo. No kasta, sibibileg nga ipakita ti konteksto a talaga a literal ti bilang a 144,000.

Dagiti nadumaduma nga eskolar ti Biblia, iti napalabas ken iti agdama, matmatanda met a literal dayta a bilang. Kas pagarigan, iti komentona maipapan iti Apocalipsis 7:4, 9, kastoy ti kapaliiwan ti Britano a leksikograpo a ni Dr. Ethelbert W. Bullinger agarup 100 a tawenen ti napalabas: “Ti simple nga ibaga ti kinapudno: maysa nga espesipiko a bilang maisupadi iti di espesipiko a bilang iti daytoy a mismo a kapitulo.” (The Apocalypse or “The Day of the Lord,” panid 282) Itay nabiit pay, ni Robert L. Thomas Jr., propesor iti New Testament iti The Master’s Seminary idiay Estados Unidos, insuratna: “Awan ti natibker a pangibatayan a simboliko dayta a bilang.” Innayonna: “Espesipiko dayta a bilang [iti Apocalipsis 7:4] a maisupadi iti di masierto a bilang iti Apocalipsis 7:9. No matmatan dayta a simboliko, awan ngarud ti bilang iti libro nga Apocalipsis ti mabalin a matmatan a literal.”​—Revelation: An Exegetical Commentary, Tomo 1, panid 474.

Irason ti dadduma a gapu ta naglaon ti Apocalipsis iti adu a simboliko a sasao, amin a bilang a masarakan iti daytoy a libro, agraman ti 144,000 ket simbolikoda met. (Apocalipsis 1:1, 4; 2:10) Ngem nalawag a saan a husto dayta a konklusion. Pudno, naglaon ti  Apocalipsis iti adu a simboliko a bilang, ngem naglaon met dayta kadagiti literal a bilang. Kas pagarigan, tinukoy ni Juan “ti sangapulo ket dua a nagan ti sangapulo ket dua nga apostol ti Kordero.” (Apocalipsis 21:14) Nalawag a literal, saan a simboliko, ti bilang a 12 a nadakamat iti daytoy a bersikulo. Maysa pay, nagsurat ni apostol Juan maipapan “ti sangaribu a tawen” a panagturay ni Kristo. Mamatmatan met a literal dayta a numero kas ipakita ti naannad a panagadal iti Biblia. * (Apocalipsis 20:3, 5-7) Gapuna, mamatmatan a literal wenno simboliko ti maysa a numero iti Apocalipsis sigun iti kontekstona.

Maitunos met kadagiti dadduma a teksto ti Biblia ti konklusion a ti 144,000 ket literal ken tuktukoyenna ti limitado a bilang dagiti indibidual, a makuna a bassit a grupo no idilig iti “dakkel a bunggoy.” Kas pagarigan, iti maudi a paset ti sirmata ni apostol Juan, natukoy dagiti 144,00 kas dagidiay ‘nagatang manipud iti sangatauan kas umuna a bungbunga.’ (Apocalipsis 14:1, 4) Ti ebkas nga “umuna a bungbunga” tukoyenna ti maysa a bassit a napili a grupo. Kasta met, idi adda ni Jesus ditoy daga, tinukoyna dagidiay makipagturay kenkuana iti nailangitan a Pagarian ken inawaganna ida a “bassit nga ipastoran.” (Lucas 12:32; 22:29) Kinapudnona, bassit ti bilang dagiti napili manipud iti sangatauan a makipagturay idiay langit no idilig kadagidiay agtaeng iti umad-adanin a Paraiso a daga.

Gapuna, ti konteksto ti Apocalipsis 7:4 ken dagiti dinakamat ti dadduma a paset ti Biblia patalgedanda a literal ti bilang a 144,000. Tuktukoyenna dagidiay makipagturay ken ni Kristo idiay langit a mangituray iti maysa a paraiso a daga, a mapnonto iti nakaad-adu ken di mabilang a naragsak a tattao nga agdaydayaw ken ni Jehova a Dios.​—Salmo 37:29.

[Footnote]

[Blurb iti panid 31]

Ti bilang dagiti makipagtawid idiay langit ket nakedngan iti 144,000

[Ladawan iti panid 31]

Saan a nakedngan ti bilang ti “dakkel a bunggoy”

[Picture Credit Line iti panid 31]

Dagiti Bituen: Iti pammalubos ti Anglo-Australian Observatory, rinetrato ni David Malin