[mabalin a nainaig iti Akkadiano a sao a kaipapananna ti “baka,” wenno iti Arabiko a sao a kaipapananna ti “atap a baka”].

 Ti in-inauna nga anak a babai ni Laban nga apoko ti kabsat ni Abraham. Ni Laban ket kabsat ni Rebecca, ina ni Jacob, ngarud agkasinsin da Lea ken Jacob. (Ge 22:20-23; 24:24, 29; 29:16) Ni Lea ket saan a kas iti kapintas ni Raquel nga adingna; nangnangruna a napaliiw nga “awan raniag dagiti matana.” (Ge 29:17) Kadagiti babbai a taga Daya, nangnangruna a ti naraniag wenno narimat a matmata ti maibilang a pakakitaan ti kinapintas.​—Idiligyo ti Sol 1:15; 4:9; 7:4.

 Ni Lea ti nagbalin nga immuna nga asawa ni Jacob. Kasta ti napasamak agsipud ta iti rabii ti kasar ni Jacob, siaallilaw nga inted ni Laban ti inauna a balasangna, ni Lea, imbes a ni Raquel nga ay-ayaten ni Jacob. Nagreklamo ni Jacob gapu ta nasikapan, ngem inkalintegan ni Laban a saan a kaugalian iti lugarda nga iyasawa ti ub-ubing nga anak a babai sakbay ti inauna. Nalabit naabbungotan idi ni Lea, kas panangannurot iti kadaanan a kaugalian dagiti taga Daya a naan-anay a panagabbungot ti agkasar a nobia, ket awan duadua a nakatulong daytoy iti naballigi a panangallilaw ni Laban. Nagserbi ni Jacob iti pito a tawen a ni Raquel ti adda iti panunotna, ngem ni Lea met ti naawatna maipaay iti daytoy a panagtrabaho. Naited kenkuana ni Raquel kalpasan a narambakanna ti umuna a lawas (pito nga aldaw) a panagtiponda ken Lea, ngem kinasapulan nga agtrabaho ni Jacob iti pito pay a tawen tapno mabayadanna ni Raquel.​—Ge 29:18-28.

 Naikuna iti salaysay a “magurgura” ni Lea. (Ge 29:31, 33) Ngem nadakamat met a kalpasan a nagun-odna ni Raquel idi agangay, nangiparangarang ni Jacob iti “ad-adda a panagayat ken ni Raquel ngem ni Lea.” (Ge 29:30) Awan la ketdi ti dakes a gura ni Jacob ken Lea no di ket ad-adda laeng a dinungdungngona ni Raquel, kas kaykayatna nga asawa. Intultuloyna a suportaran ken dennaan ni Lea. No kasta, ti kasasaad ni Lea kas “magurgura” kaipapananna laeng a ni Jacob ad-adda nga inayatna ni Raquel ngem ni Lea.​—Kitaenyo ti GURA.

 Nagbalin ni Lea nga ina ti pito nga annak ni Jacob, ti innem a lallaki a da Ruben, Simeon, Levi, Juda, Isacar, ken Zabulon ken ti maysa a babai, ni Dina. (Ge 29:32-35; 30:16-21) Gapuna, iti Ruth 4:11, nainaganan ni Lea, agraman ni Raquel, kas maysa kadagidiay “nangbangon iti balay ti Israel.” Dayaw ken Lea ti panangyanakna ken Levi, a nagtaudan ti napadian a tribu ti Israel, ken ni Juda, a nagbalin nga ama ti naarian a tribu ti nasion.

 Ni Lea ken ti annakna kimmuyogda ken Jacob idi pinanawanna ti Padan-aram ken nagsubli iti daga a nakayanakanna, idiay Canaan. (Ge 31:11-18) Sakbay a nagkita ni Jacob ken ti kabsatna a ni Esau iti panagturongna idiay Canaan, inurnosna ti sangakabbalayanna tapno masalaknibanna dagiti annakna. Inkabilna iti sanguanan dagiti adipen a babbai ken ti annakda, simmaruno ni Lea ken ti annakna, ket da Raquel ken Jose ti adda iti likudan. (Ge 33:1-7) Idi napan ni Jacob idiay Egipto kimmuyog  kenkuana ti annak ni Lea, ngem saan a dakamaten ti salaysay ti Biblia a napan met ni Lea. (Ge 46:15) Saan a naibaga ti tiempo, lugar, ken dagiti kasasaad idi matay ni Lea, ngem nalabit natay idiay Canaan. Aniaman ti napasamak, impan ti patriarka ti bangkay ni Lea iti lugar a pagitabonan ti pamilia, ti rukib iti talon ti Macpela. Iti pammilin ni Jacob mainaig iti bukodna a bangkay, naipakita a tarigagayna ti maipumpon iti nakaitabonan da Abraham ken Sara, Isaac ken Rebecca, ken ni Lea.​—Ge 49:29-32.