Proverbio 2:1-22
2 Anakko, no awatemto ti sasaok+ ket idulinmo kenka dagiti bukodko a bilin,+
2 tapno ti sirib ipangagmo babaen ti lapayagmo,+ iti kasta mapagannayasmo ta pusom iti panangilasin;+
3 mainayon pay, no agpukkawka maipaay iti mismo a pannakaawat+ ket iyesngawmo ti timekmo maipaay iti mismo a panangilasin,+
4 no itultuloymo a sapulen dayta kas iti pirak,+ ken kas kadagiti nalmeng a gameng itultuloymo a biroken dayta,+
5 iti kasta maawatamto ti panagbuteng+ ken Jehova, ket masarakamto ti mismo a pannakaammo iti Dios.+
6 Ta ni met laeng Jehova mangted iti sirib;+ manipud ngiwatna adda pannakaammo ken panangilasin.+
7 Ket agpaay kadagiti napalungdo mangidulinto iti praktikal a kinasirib;+ kadagidiay magmagna iti kinatarnaw isu ket kalasag,+
8 babaen ti panangsalimetmet kadagiti dana ti panangukom,+ ket saluadannanto ti mismo a dalan dagidiay nasungdona.+
9 Iti kasta maawatamto ti kinalinteg ken panangukom ken kinapalungdo, ti intero a turongen ti naimbag.+
10 No ti sirib sumrek iti pusom+ ket ti met laeng pannakaammo agbalin a makaay-ayo iti mismo a kararuam,+
11 ti met laeng pannakabael nga agpanunot aywanannakanto,+ ti met laeng panangilasin saluadannakanto,+
12 tapno ispalendaka manipud iti dakes a dalan,+ manipud iti tao nga agsasao iti balusingsing a bambanag,+
13 manipud kadagidiay mangbaybay-a kadagiti dana ti kinapalungdo tapno magnada iti daldalan ti kinasipnget,+
14 manipud kadagidiay agragragsak iti panagaramid iti dakes,+ isuda nga agrag-o iti balusingsing a bambanag ti kinadakes;+
15 dagidiay a ti dandanada nakillo ken isuda a nasikap iti pangkaaduan a turongenda;+
16 tapno ispalendaka iti karkarna a babai, iti ganggannaet a babai+ a nangpalamuyot iti bukodna a sasao,+
17 a mangpampanaw iti piaren a gayyem ti kinaagtutubona+ ken nanglipat iti mismo a tulag ti Diosna.+
18 Ta ti balayna lumned nga agpababa ken patay ket dagiti desdesna agpababa kadagidiay inutil ken patay.+
19 Kadagidiay makidendenna kenkuana awanto ti agsubli, saandanto met a magun-odanen dagiti dana dagidiay sibibiag.+
20 Ti panggep ket tapno makapagnaka iti dalan ti naimbag a tattao+ ken tapno masalimetmetam dagiti dana dagidiay nalinteg.+
21 Ta dagiti napalungdo isuda ti agtaengto iti daga,+ ket dagiti awan pakababalawanna isuda ti mateddanto iti dayta.+
22 No maipapan kadagiti nadangkes, magessatdanto iti mismo a daga;+ ket no maipapan kadagiti nagulib, maalat-atdanto iti dayta.+
