Proverbio 5:1-23
5 Anakko, O ipangagmo ti siribko.+ Iyallingagmo dagita lapayagmo iti panangilasinko,+
2 tapno maaluadan dagiti pannakabael nga agpanunot;+ ket dagiti bukodmo a bibig saluadanda koma ti mismo a pannakaammo.+
3 Ta kas iti rara agtedtedted dagiti bibig ti maysa a sangsangaili a babai,+ ket ti ngadasna nalamlamuyot ngem iti lana.+
4 Ngem ti pagbanagan manipud kenkuana ket napait a kas iti ajenjo;+ natarumamis a kas iti kampilan a dua ti tademna.+
5 Dagiti sakana bumabbabada ken patay.+ Dagiti met laeng addangna kumpetda iti mismo a Sheol.+
6 Ti dana ti biag saanna nga utoben.+ Dagiti desdesna nagallaallada iti saanna nga ammo no sadino.+
7 Gapuna ita, O annak, imdengandak+ ket dikay umadayo iti sasao ti ngiwatko.+
8 Ti dalanmo iyadayom iti sibayna, ket dika umasideg iti pagserkan ti balayna,+
9 tapno saanmo a maited iti sabsabali ti dayawmo,+ wenno uray ti tawtawenmo iti naulpit;+
10 iti kasta dagiti sangsangaili saanda a mapennek ti bagbagida iti bilegmo,+ uray ti bambanag a nagun-odam babaen iti rigat awanto met iti balay ti ganggannaet,+
11 saankanto met nga agasug iti masanguanam+ inton ti lasagmo ken ti bagim agngudoda.+
12 Ket kasapulan a kunaemto: “Anian a pananggurak iti disiplina+ ken saan a panangraem ti pusok uray iti pannubngar!+
13 Ket saanak nga immimdeng iti timek dagiti manangisurok,+ ket kadagiti mannursurok saanko nga inyallingag ti lapayagko.+
14 Silalaka a naigamerak iti tunggal kita ti kinadakes+ iti tengnga ti kongregasion ken ti gimong.”+
15 Uminumka iti danum manipud bukodmo a pagurnongan ti danum, ken tartaredted manipud iti tengnga ti bukodmo a bubon.+
16 Rebbeng aya a maiwarawara dagiti ubbogmo iti ruar,+ dagiti baresbes ti danummo kadagiti mismo a publiko a plasa?
17 Agpaayda koma kenka laeng, ket saan a maipaay kadagiti ganggannaet a naikuyog kenka.+
18 Mabendisionan koma ti ubbog ti danummo,+ ket agrag-oka iti asawa ti kinaagtutubom,+
19 maysa a maay-ayat a kabaian nga ugsa ken maysa a makakayaw a kalding iti bantay.+ Dagiti bukodna a barukong bartekendaka koma iti amin a tiempo.+ Babaen iti ayatna patinayon koma nga agragsakka iti napalaus.+
20 Gapuna apay koma, anakko, nga agragsakka iti napalaus a kadua ti maysa a sangsangaili a babai wenno arakupem ti barukong ti maysa a ganggannaet a babai?+
21 Ta ti daldalan ti tao addada iti sanguanan dagiti mata ni Jehova,+ ket ut-utobenna dagiti amin a desdesna.+
22 Dagiti bukodna a biddut tiliwendanto daydiay nadangkes,+ ket isu matengngelto kadagiti tali ti bukodna a basol.+
23 Isunto ti matay agsipud ta awan ti disiplina,+ ken agsipud ta iti kinaruay ti kinamaagna isu maiwawa.+
