Proverbio 13:1-25
13 Ti anak masirib no adda panangdisiplina ti ama,+ ngem ti managuy-uyaw isu daydiay saan a nakangngeg iti pammabalaw.+
2 Manipud iti bunga ti ngiwatna, ti maysa a tao manganto iti naimbag,+ ngem ti mismo a kararua dagidiay makilanglangen a sigugulib ket kinaranggas.+
3 Daydiay mangaluad iti ngiwatna salimetmetanna ti kararuana.+ Daydiay manginganga unay kadagiti bibigna—addaanto iti pannakarba.+
4 Daydiay nasadut ipakpakitana nga isu agtartarigagay, ngem ti kararuana awanan.+ Nupay kasta, ti mismo a kararua dagidiay nasaet mapalukmegto.+
5 Ti ulbod a sao isu ti guraen daydiay nalinteg,+ ngem dagidiay nadangkes agtignayda a nakababain ket pataudenda ti pannakaibabain maipaay iti bagbagida.+
6 Ti met laeng kinalinteg saluadanna daydiay di makadangran iti dalanna,+ ngem ti kinadangkes isu ti mangiluod iti managbasol.+
7 Adda daydiay aginkukuna a nabaknang ket kaskasdi nga awanan a pulos;+ adda daydiay aginkukuna a bassitan iti sanikua ket kaskasdi nga addaan iti adu a napapateg a banag.
8 Ti subbot maipaay iti kararua ti maysa a tao isu ti kinabaknangna,+ ngem daydiay bassitan iti sanikua saan a nakangngeg iti pammabalaw.+
9 Ti mismo a silaw dagidiay nalinteg agrag-onto;+ ngem ti pagsilawan dagidiay nadangkes—maiddepto dayta.+
10 Babaen iti kinadursok parnuayen laeng ti maysa ti dangadang,+ ngem kadagidiay agiinnuman a sangsangkamaysa adda ti sirib.+
11 Ti napapateg a bambanag nga ibunga ti kinaubbaw bumasbassitda,+ ngem daydiay agum-ummong babaen iti ima isu ti agpaadu.+
12 Ti inanama a maitantan pagsakitenna ti puso,+ ngem ti banag a tinarigagayan maysa a kayo ti biag no dumteng dayta.+
13 Daydiay nangumsi iti sao,+ maagawto kenkuana ti tani ti nakautang; ngem daydiay agbuteng iti bilin isunto ti magunggonaan.+
14 Ti linteg daydiay masirib ubbog ti biag,+ tapno ti maysa iyadayo kadagiti silo ni patay.+
15 Ti met laeng nasayaat a pannakatarus mangted iti pabor,+ ngem ti dalan dagidiay makilanglangen a sigugulib natibbakol.+
16 Tunggal maysa a nasaldet agtignayto a buyogen ti pannakaammo,+ ngem daydiay maag agiwarasto a sisasaknap iti kinamaag.+
17 Ti mensahero a nadangkes matnagto iti dakes,+ ngem ti matalek a babaonen ket makapaimbag.+
18 Daydiay mangliway iti disiplina dumteng iti kinakurapay ken pannakaibabain,+ ngem daydiay mangsalimetmet iti pannubngar isu ti maidaydayaw.+
19 Ti tarigagay no matungpal makaparagsak iti kararua;+ ngem ti iyaadayo iti dakes nakarimrimon kadagidiay maag.+
20 Daydiay makipagna kadagiti masirib a tattao agbalinto a masirib,+ ngem daydiay addaan kadagiti pannakilangen kadagidiay maag nakadakdakesto ti pagtungpalanna.+
21 Dagiti managbasol isuda dagidiay kamaten ti didigra,+ ngem dagiti nalinteg isuda dagidiay gunggonaan ti naimbag.+
22 Ti maysa a naimbag mangibatinto iti tawid iti annak ti annak, ket ti kinabaknang ti managbasol maysa a banag a maidulin maipaay iti daydiay nalinteg.+
23 Ti naarado a daga dagiti tattao a bassitan iti sanikua mangipaay iti adu a taraon,+ ngem adda daydiay mapunas gapu iti kinakurang ti hustisia.+
24 Daydiay mangigawid iti pagbautna gurguraenna ti anakna,+ ngem daydiay mangay-ayat kenkuana isu daydiay kumitkita kenkuana a buyogen ti disiplina.+
25 Ti nalinteg mangan agingga iti pannakapnek ti kararuana,+ ngem ti tian dagidiay nadangkes ongaongto.+
