Mateo 9:1-38
9 Gapuna, idi limmugan iti barangay, bimmallasiw ket napan iti mismo a siudadna.+
2 Ket, adtoy! nangyegda kenkuana iti paralisado a lalaki a siiidda iti pagiddaan.+ Idi makitana ti pammatida kinuna ni Jesus iti paralitiko: “Bumilegka, anak; mapakawan dagiti basolmo.”+
3 Ket, adtoy! dadduma kadagiti eskriba kinunada iti bagbagida: “Daytoy a tao agtabtabbaaw.”+
4 Ket ni Jesus, a pagaammona ti pampanunotda,+ kinunana: “Apay nga agpampanunotkayo iti nadangkes a bambanag iti puspusoyo?+
5 Kas pagarigan, ania ti nalaklaka, ti panangikuna, Mapakawan dagiti basolmo, wenno ti panangikuna, Bumangonka ket magnaka?+
6 Nupay kasta, tapno maammuanyo a ti Anak ti tao addaan autoridad ditoy daga a mangpakawan kadagiti basol+—” idin kinunana iti paralitiko: “Bumangonka, bagkatem ta pagiddaam, ket agawidka iti pagtaengam.”+
7 Ket bimmangon ken nagawid iti pagtaenganna.
8 Idi makitada daytoy nagbuteng dagiti bunggoy, ket indaydayawda ti Dios,+ a nangted iti kasta a kinaturay+ kadagiti tattao.
9 Sumaganad, bayat a lumablabas manipud sadiay, nakita ni Jesus ti maysa a tao a managan Mateo a situtugaw iti pagsingiran iti buis, ket kinunana kenkuana: “Agbalinka a pasurotko.”+ Dagus a timmakder ket simmurot kenkuana.+
10 Idi agangay, bayat a sisasadag iti panganan idiay balay,+ adtoy! immay ti adu nga agsingsingir iti buis ken managbasol ket nangrugida a nagsadag a kadua ni Jesus ken dagiti adalanna.
11 Ngem idi makitada daytoy rinugian dagiti Fariseo a kunaen kadagiti adalanna: “Apay a ti mannursuroyo makipangan kadagiti agsingsingir iti buis ken kadagiti managbasol?”+
12 Idi nangngegna ida, kinunana: “Dagiti tattao a nasalun-at saanda a kasapulan ti mangngagas,+ no di ket dagiti masaksakit.
13 Inkayo, ngarud, ket adalenyo no ania ti kaipapanan daytoy, ‘Kalikagumak ti asi, ket saan a sakripisio.’+ Ta immayak agayab, saan a kadagiti nalinteg a tattao, no di ket kadagiti managbasol.”
14 Idin immay kenkuana dagiti adalan ni Juan ket inyimtuodda: “Apay a dakami ken dagiti Fariseo annurotenmi ti panagayunar ngem dagiti adalam saanda nga agayunar?”+
15 Gapu itoy kinuna kadakuada ni Jesus: “Adda kadi rason nga agleddaang ti gagayyem ti nobio bayat nga adda kadakuada ti nobio?+ Ngem umayto dagiti aldaw a ti nobio maipanaw+ kadakuada, ket iti kasta agayunardanto.+
16 Awan ti asinoman a mangidait iti di kimsen a lupot a pangtakup iti daan a makinruar a kawes; ta napigsa ti panangguyodna iti makinruar a kawes ket kumaro ti pigisna.+
17 Saan met a mangikabil dagiti tattao iti baro nga arak kadagiti daan a supot a lalat; ngem no aramidenda, iti kasta dagiti supot a lalat bumtak ket ti arak maibelleng ket dagiti supot a lalat madadael.+ No di ket mangikabil dagiti tattao iti baro nga arak kadagiti baro a supot a lalat, ket agpada a mataginayon dagita.”+
18 Bayat nga ibagbagana kadakuada dagitoy a banag, adtoy! ti maysa nga agturay+ nga immasideg nangrugi nga agruknoy kenkuana,+ a kunkunana: “Itan ti anakko a babai mabalin a natayen;+ ngem umayka ket ipataymo ta imam kenkuana ket isu agbiagto.”+
19 Iti kasta ni Jesus, idi timmakder, rinugianna ti sumurot kenkuana; kasta met dagiti adalanna.
20 Ket, adtoy! maysa a babai nga agsagsagaba iti panagbulos ti dara+ iti sangapulo ket dua a tawenen ti immasideg iti likudan ket sinagidna ti barayubay ti makinruar a kawesna;+
21 ta kinunkunana iti bagina: “No masagidko laeng koma ti makinruar a kawesna umimbagakto.”+
22 Timmaliaw ni Jesus ket, idi makitana, kinunana: “Bumilegka, anak; ti pammatim pinaimbagnaka.”+ Ket manipud iti dayta nga oras immimbag ti babai.+
23 Itan, idi dimteng iti balay ti agturay+ ken nakitana dagiti tumutokar iti plauta ken ti bunggoy nga agar-ariwawa,+
24 rinugian a kunaen ni Jesus: “Panawanyo ti lugar, ta ti balasitang saan a natay, no di ket matmaturog.”+ Gapu itoy rinugianda a katawaan a lalaisen.+
25 Apaman a ti bunggoy naparuaren, isu simrek ket iniggamanna ti imana,+ ket ti balasitang bimmangon.+
26 Siempre, ti sarita maipapan iti daytoy nagrakurak iti intero dayta a rehion.
27 Bayat a lumablabas ni Jesus manipud sadiay, dua a bulsek a lallaki+ ti simmurot kenkuana, nga agpukpukkaw ken agkunkuna: “Maasianka kadakami,+ Anak ni David.”
28 Kalpasan a nakastreken iti balay, immay kenkuana dagiti bulsek a lallaki, ket inyimtuod kadakuada ni Jesus: “Addaankay kadi iti pammati+ a kabaelak nga aramiden daytoy?” Simmungbatda kenkuana: “Wen, Apo.”
29 Kalpasanna sinagidna dagiti matada,+ a kunkunana: “Maitunos iti pammatiyo mapasamak koma kadakayo.”
30 Ket nakakita dagiti matada. Mainayon pay, siiinget a binilin ida ni Jesus, a kunkunana: “Kitaenyo nga awan asinoman a makaammo iti dayta.”+
31 Ngem isuda, kalpasan a nakaruarda, impablaakda ti maipapan kenkuana iti intero dayta a rehion.+
32 Ita idi a pumampanawda, adtoy! dagiti tattao nangyegda kenkuana iti umel a lalaki a nagunggan ti sairo;+
33 ket kalpasan a ti sairo naparuaren nagsao ti umel a lalaki.+ Ala ket, nagsiddaaw dagiti bunggoy+ ket kinunada: “Saan pay a pulos nakita ti aniaman a kas iti daytoy iti Israel.”
34 Ngem rinugian a kunaen dagiti Fariseo: “Babaen iti agturay kadagiti sairo a paruarenna dagiti sairo.”+
35 Ket ni Jesus napan nagsursor kadagiti amin a siudad ken purpurok, a nangisursuro kadagiti sinagogada ken nangikaskasaba iti naimbag a damag ti pagarian ken nangag-agas iti tunggal kita ti sagubanit ken tunggal kita ti an-annayen.+
36 Idi makitana dagiti bunggoy simnek ti asina+ kadakuada, agsipud ta nalalatan ken naiwarawarada a kasla karkarnero nga awanan pastor.+
37 Idin kinunana kadagiti adalanna: “Wen, dakkel ti anien, ngem bassit dagiti trabahador.+
38 Ngarud, ipakaasiyo iti Apo ti panagani a mangibaon kadagiti trabahador iti panaganina.”+
