Mateo 23:1-39
23 Idin ni Jesus nagsao kadagiti bunggoy ken kadagiti adalanna,+ a kunkunana:
2 “Dagiti eskriba+ ken dagiti Fariseo impatugawda ti bagbagida iti tugaw ni Moises.+
3 Gapuna amin a bambanag nga ibagada+ kadakayo, aramiden ken tungpalenyo, ngem dikay aramiden maitunos iti ar-aramidda,+ ta sawenda ngem saanda nga aramiden.
4 Mangreppetda kadagiti nadagsen nga awit ket ipabaklayda ida kadagiti abaga dagiti tattao,+ ngem isuda saanda kayat a garawen ida babaen iti ramayda.+
5 Amin dagiti aramid nga aramidenda ket aramidenda tapno maimatangan dagiti tattao;+ ta paakabaenda dagiti [naglaon-kasuratan a] kahita+ nga ikapetda kas pangsaluad, ken padakkelenda dagiti barayubay+ dagiti kawesda.
6 Kaykayatda ti katan-okan a puesto+ kadagiti pangrabii ken dagiti makinsango a pagtugawan kadagiti sinagoga,+
7 ken dagiti kablaaw+ kadagiti plasa ken awagan ida dagiti tattao iti Rabbi.+
8 Ngem dakayo, saankayo a maawagan iti Rabbi, ta maymaysa ti mannursuroyo,+ yantangay agkakabsatkayo amin.
9 Mainayon pay, dikay naganen nga amayo ti asinoman ditoy daga, ta maymaysa ti Amayo,+ Daydiay nailangitan.
10 Saankayo met a maawagan iti ‘papanguluen,’+ ta ti Panguluenyo ket maymaysa, ni Kristo.
11 Ngem daydiay kadakkelan kadakayo masapul nga agserbi kadakayo.+
12 Siasinoman a mangitan-ok iti bagina maipababanto,+ ket siasinoman a mangipababa iti bagina maitan-okto.+
13 “Asikayo pay, eskriba ken Fariseo, a managinsisingpet! agsipud ta rikpanyo+ ti pagarian ti langlangit iti sanguanan dagiti tattao; ta dakayo+ saankayo a sumrek, saanyo met palubosan a sumrek dagidiay mapan a sumrek.
14 ——
15 “Asikayo pay, eskriba ken Fariseo, a managinsisingpet!+ agsipud ta ballasiwenyo ti baybay ken ti namaga a daga tapno aramidenyo ti maysa a proselita, ket inton agbalinen a kasta pagbalinenyo nga agpaay iti Gehenna a mamindua nga ad-adda ngem iti bagbagiyo.
16 “Asikayo pay, bulsek a mangidaldalan,+ nga agkuna, ‘No ti asinoman agsapata babaen iti templo, awan aniamanna; ngem no ti asinoman agsapata babaen iti balitok ti templo, adda rebbengenna.’+
17 Dakayo a maag ken bulsek! Iti kinapudnona, ania ti dakdakkel, ti balitok wenno ti templo a nangsantipikar iti balitok?+
18 Kasta met, ‘No ti asinoman agsapata babaen iti altar, awan aniamanna; ngem no ti asinoman agsapata babaen iti sagut nga adda iti dayta, adda rebbengenna.’
19 Dakayo a bulsek! Iti kinapudnona, ania ti dakdakkel, ti sagut wenno ti altar+ a mangsantipikar iti sagut?
20 Gapuna ti agsapata babaen iti altar agsapsapata babaen iti dayta ken babaen iti amin a bambanag nga adda iti dayta;
21 ket ti agsapata babaen iti templo agsapsapata babaen iti dayta ken babaen kenkuana nga agnanaed iti dayta;+
22 ket ti agsapata babaen iti langit agsapsapata babaen iti trono ti Dios+ ken babaen kenkuana a situtugaw iti dayta.
23 “Asikayo pay, eskriba ken Fariseo, a managinsisingpet! agsipud ta itedyo ti apagkapullo+ ti yerbabuena ken ti eneldo ken ti kumino, ngem saanyo nga inkankano ti nadagdagsen a bambanag iti Linteg, nga awan sabali, ti kinahustisia+ ken asi+ ken kinamatalek.+ Dagitoy a banag rebbeng nga aramiden, kaskasdi a saan met a baybay-an ti dadduma a bambanag.
24 Dakayo a bulsek a mangidaldalan,+ a mangsagat iti sepsep+ ngem mangalun-on iti kamelio!+
25 “Asikayo pay, eskriba ken Fariseo, a managinsisingpet! agsipud ta dalusanyo ti ruar ti kopa+ ken ti pinggan, ngem iti uneg napnoda iti samsam+ ken panaglablabes.
26 Bulsek+ a Fariseo, dalusam nga umuna ti uneg ti kopa+ ken ti pinggan, tapno ti ruarna agbalin met a nadalus.
27 “Asikayo pay, eskriba ken Fariseo, a managinsisingpet!+ agsipud ta umarngikayo kadagiti napapuraw+ a tanem, nga iti ruar pudno nga agparangda a napintas ngem iti uneg napnoda iti tultulang dagiti natay a tattao ken tunggal kita ti kinarugit.
28 Iti kasta a wagas dakayo met, pudno nga iti ruar, agparangkayo a nalinteg kadagiti tattao,+ ngem iti uneg napnokayo iti panaginsisingpet ken kinakillo.
29 “Asikayo pay, eskriba ken Fariseo, a managinsisingpet!+ agsipud ta ibangonyo ti tantanem dagiti mammadto ket arkosanyo ti pakalaglagipan a tantanem dagiti nalinteg,+
30 ket kunayo, ‘No addakami koma idi kaaldawan dagidi ammami, saankami a makiraman kadakuada iti dara dagiti mammadto.’+
31 Gapuna saksaksianyo a maibusor iti bagbagiyo nga annakdakayo dagidiay namapatay kadagiti mammadto.+
32 Ala ket, ngarud, punnuenyo ti pagrukodan+ dagidi ammayo.
33 “Serpiente, putot dagiti karasaen,+ kasanokayo a makalisi iti pannakaukom idiay Gehenna?+
34 Gapu itoy, adtoy ibaonko+ kadakayo dagiti mammadto ken dagiti masirib a tattao ken dagiti manangisuro iti publiko.+ Sumagmamano kadakuada ti papatayenyonto+ ken ilansayo, ket sumagmamano kadakuada ti saplitenyonto+ kadagiti sinagogayo ken idadanesyo iti siniudansiudad;
35 tapno umay kadakayo dagiti amin a nalinteg a dara a naibuyat iti daga,+ manipud iti dara ni nalinteg+ nga Abel+ agingga iti dara ni Zacarias nga anak ni Baraquias, a pinapatayyo iti nagbaetan ti santuario ken ti altar.+
36 Pudno kunak kadakayo, Amin dagitoy a banag umaydanto itoy a kaputotan.+
37 “Jerusalem, Jerusalem, ti mammapatay kadagiti mammadto+ ken manangubor+ kadagidiay naibaon kenkuana,+—anian a namin-adu a kinayatko nga urnongen a sangsangkamaysa ti annakmo, iti wagas a ti upa urnongenna a sangsangkamaysa dagiti piekna iti sirok dagiti payakna!+ Ngem saanyo a kinayat dayta.+
38 Adtoy! Ti balayyo+ mabaybay-an kadakayo.+
39 Ta kunak kadakayo, Saandakton a pulos makita manipud ita agingga a kunaenyo, ‘Bendito dayta umay iti nagan ni Jehova!’”+
