Mateo 14:1-36
14 Iti dayta a mismo a tiempo nangngeg ni Herodes, ti agturay iti distrito, ti damag maipapan ken Jesus+
2 ket kinunana kadagiti adipenna: “Daytoy isu ni Juan a Mammautisar. Naibangon manipud kadagiti natay, ket daytoy ti makagapu nga agtigtignay kenkuana ti mannakabalin nga ar-aramid.”+
3 Ta ni Herodes inarestona ni Juan ket pinarautanna ken impisokna idiay pagbaludan maigapu ken Herodias nga asawa ni Felipe a kabsatna.+
4 Ta kinunkuna kenkuana ni Juan: “Saan a nainkalintegan nga isu kupikopam.”+
5 Uray kasta, nupay kinayatna a papatayen, nagbuteng iti bunggoy, agsipud ta imbilangda a maysa a mammadto.+
6 Ngem idi a ti kasangay ni Herodes+ maramrambakan nagsala iti dayta ti anak a babai ni Herodias ket naay-ayo unay ni Herodes
7 iti kasta inkarina buyogen iti sapata nga itedna kenkuana ti aniaman a dawatenna.+
8 Idin, babaen ti panangisuro ni inana, kinunana: “Itedmo kaniak ditoy iti maysa a bandeha ti ulo ni Juan a Mammautisar.”+
9 Nupay naleddaangan, ti ari maipagapu kadagiti sapatana ken kadagidiay kaduana a sisasadag imbilinna a maited dayta;+
10 ket nagbaon ket pinaputolanna ni Juan iti pagbaludan.
11 Ket ti ulona naiyeg iti maysa a bandeha ket naited iti balasang, ket inyegna dayta ken inana.+
12 Kamaudiananna dimteng dagiti adalanna ket innalada ti bangkay ket intabonda+ ket immayda ken impadamagda ken Jesus.
13 Idi mangngegna daytoy pimmanaw ni Jesus sadiay babaen iti barangay nga agturong iti maysa a disso a langalang tapno agputputong;+ ngem dagiti bunggoy, idi mangngegda dayta, simmurotda kenkuana a nagnagnada manipud kadagiti siudad.
14 Ita idi dimsaag nakitana ti maysa a dakkel a bunggoy; ket simnek ti asina+ kadakuada, ket inagasanna dagiti masakitda.+
15 Ngem idi dimteng ti rabii immasideg kenkuana dagiti adalanna ket kinunada: “Ti disso langalang ken ti oras nalabesen; papanawem dagiti bunggoy, tapno mapanda kadagiti purok ket gumatangda iti bambanag a makan.”+
16 Nupay kasta, kinuna kadakuada ni Jesus: “Saan a kasapulan a pumanawda: ikkanyo ida iti makan.”+
17 Kinunada kenkuana: “Awanankami ditoy no di lima a tinapay ken dua nga ikan.”+
18 Kinunana: “Iyegyo ida kaniak ditoy.”
19 Sumaganad binilinna dagiti bunggoy nga agdalupisakda iti karuotan ket innalana ti lima a tinapay ken dua nga ikan, ket, idi timmangad sadi langit, nangisao iti pamendision+ ket, kalpasan a napispisina dagiti tinapay, imbunongna ida kadagiti adalan, dagiti adalan kalpasanna imbunongda kadagiti bunggoy.+
20 Gapuna nanganda amin ket napnekda, ket inurnongda dagiti tedda a pispisi, sangapulo ket dua a labba a napno.+
21 Ngem dagidiay nangan agarup lima ribuda a lallaki, malaksid dagiti babbai ken ub-ubbing.+
22 Kalpasanna, awanan panagtaktak, indagadagna kadagiti adalanna a lumuganda iti barangay ket mapanda nga umun-una kenkuana iti ballasiw, bayat a pinapanawna dagiti bunggoy.+
23 Iti kamaudiananna, idi napapanawnan dagiti bunggoy, simmang-at a maymaysa idiay bantay tapno agkararag.+ Nupay rimmabiin, adda idi sadiay nga agmaymaysa.
24 Itan ti barangay adu a gasuten a metro ti kaadayona iti daga, a marigrigatan kadagiti dalluyon,+ agsipud ta ti angin sumuba idi kadakuada.
25 Ngem iti tiempo ti maikapat a panagbantay iti rabii isu immay kadakuada, a magmagna iti rabaw ti baybay.+
26 Idi nakitada a magmagna iti rabaw ti baybay, nariribukan dagiti adalan, a kunkunada: “Al-alia dayta!”+ Ket nagikkisda gapu iti butengda.
27 Ngem madagdagus a nagsao kadakuada ni Jesus iti sasao a: “Bumilegkayo, siak daytoy;+ dikay agbuteng.”
28 Kas sungbat kinuna kenkuana ni Pedro: “Apo, no sika dayta, bilinennak nga umay kenka iti rabaw dagiti danum.”
29 Kinunana: “Umayka!” Dagus a ni Pedro, idi dimsaag manipud iti barangay,+ nagna iti rabaw dagiti danum ket nagturong ken Jesus.
30 Ngem idi kitkitaenna ti allawig, nagbuteng ket, idi nangrugi a lumned, inyikkisna: “Apo, isalakannak!”
31 Idi inunnatna a dagus ti imana isu iniggaman ni Jesus ket kinunana kenkuana: “Sika a bassitan pammati, apay a nagduaduaka?”+
32 Ket kalpasan a limmuganda iti barangay, ti allawig nagtalna.
33 Idin nagruknoy kenkuana dagidiay adda iti barangay, a kunkunada: “Pudno a sika ti Anak ti Dios.”+
34 Ket nakaballasiwda ket dimtengda iti daga idiay Genesaret.+
35 Apaman nga isu nailasinda nagbaon dagiti lallaki iti dayta a lugar iti mapan iti intero dayta nga aglikmut a pagilian, ket dagiti tattao inyegda kenkuana amin dagidiay masakit.+
36 Ket nagpakpakaasida kenkuana nga uray masagidda laeng koma ti barayubay ti makinruar a kawesna;+ ket amin dagidiay a nangsagid iti dayta napaimbagda a naan-anay.
